1, 2. (a) Mɔfiafia ka dzi wɔwɔe xɔ ame geɖe ɖe agbe? (Kpɔ nɔnɔmetata si le nyati sia ƒe gɔmedzedze.) (b) Mɔfiafia kae axɔ Mawu ƒe amewo ɖe agbe?

“TƆ VIE, KPƆ MƆ ME NYUIE, LÉ TO ÐE NU ŊU.” Nya siawoe woŋlɔ klã ɖe afi si ʋuwo tsoa ketekemɔwo me le le Dziehe Amerika anɔ ƒe 100 ye nye esia. Nu ka tae? Ale be keteke siwo le du dzi va yina nagalɔ ʋu siwo le ketekemɔa me tsom o. Mɔfiafia sia dzi wɔwɔ xɔ ame geɖe ɖe agbe.

² Yehowa naa mɔfiafia si de ŋgɔ wu ema eƒe amewo. Efiaa mɔ mí ale be míaƒo asa na afɔkuwo, ne míakpɔ agbe mavɔ. Yehowa le abe alẽkplɔla lɔ̃ame si fiaa mɔ eƒe alẽwo eye wòxlɔ̃a nu wo be woagadze afɔku o la ene.—Xlẽ Yesaya 30:20, 21.

3. Nu kae kplɔ amegbetɔƒomea katã de ku me?

³ Tso amegbetɔwo wɔɣi kee Yehowa le mɔ fiam wo. Le kpɔɖeŋu me, le Eden-bɔa me la, Yehowa na mɔfiafia siwo  me kɔ la amegbetɔwo, si ana woanɔ agbe tegbee le dzidzɔ me. (1 Mose 2:15-17) Gake Adam kple Xawa gbe wo Fofo lɔ̃amea ƒe mɔfiamewo dzi wɔwɔ. Xawa ɖo to da aɖe boŋ ƒe gbe eye Adam hã ɖo to srɔ̃a ƒe gbe. Nu kae do tso eme? Wokpe fu, woku, eye mɔkpɔkpɔ aɖeke megali na wo o. Azɔ hã, woƒe tomaɖomaɖoa kplɔ amegbetɔƒomea katã de ku me.

4. (a) Nu ka tae wòhiã be woade se bubuwo le Tsiɖɔɖɔa megbe? (b) Aleke esia na míekpɔ ale si Mawu bua agbe kple ʋui?

⁴ Mawu na mɔfiafia siwo aɖe amewo ƒe agbe la Noa. Le Tsiɖɔɖɔa megbe la, Yehowa ɖe mɔ na amegbetɔwo be woaɖu lã. Eye tɔtrɔ yeye sia na wòhiã be Yehowa nana mɔfiame yeyewo. Eya ta ede se ɖe ʋu zazã ŋu. Egblɔ be: “Ðeko migaɖu lã si me eƒe agbe, si nye eƒe ʋu, le la o.” (1 Mose 9:1-4) Se sia na míekpɔ ale si Mawu bua agbe si dzɔ tso egbɔ lae. Eyae nye mía Wɔla kple Agbenala, eya ta etɔ dzɔ be wòade se na mí le ale si míanɔ agbee ŋu. Le kpɔɖeŋu me, ede se be míagawu ame o. Esia fia be Mawu bua agbe kple ʋu be wole kɔkɔe, eya ta ahe to na ame sia ame si azãe le mɔ gbegblẽ nu.—1 Mose 9:5, 6.

5. Nu ka mee míadzro, eye nu ka tae?

⁵ Mawu yi edzi fia mɔ eƒe amewo le Noa ƒe ŋkekea megbe. Le nyati sia me la, míakpɔ ale si wòfiaa mɔ eƒe amewoe la ƒe kpɔɖeŋu aɖewo. Numedzodzro sia ado ŋusẽ mí be míayi edzi awɔ ɖe Yehowa ƒe mɔfiafia siwo akplɔ mí ayi xexe yeyea me dzi.

6. Nu ka tae wòle vevie be Israel-viwo nawɔ ɖe se si Mawu na wo to Mose dzi la dzi, eye nɔnɔme kae wòle be woaɖe afia?

⁶ Le Mose ƒe ɣeyiɣia me la, Yehowa na mɔfiafia siwo me kɔ la eƒe amewo le ale si woanɔ agbe kple ale si woasubɔe ŋu. Nu ka tae? Elabe nɔnɔmeawo gatrɔ ake. Israel-viwo va zu kluviwo le Egipte ƒe alafa eve kple edzivɔe nye ema. Ame siwo dome wonɔ la subɔa tɔgbui kukuwo kple trɔ̃wo, eye wowɔa nu bubu geɖe siwo medea bubu Mawu ŋu o. Eya ta esi Mawu kplɔ eƒe amewo dzoe le Egipte la, ehiã be wòana mɔfiame yeye wo. Esia ana woazu dukɔ si wɔa Yehowa ƒe Sewo ko dzi. Numekugbalẽ aɖewo gblɔ be Hebrigbe me nya si gɔme woɖe be “se” la do ƒome kple nya si gɔmee nye “mɔfiafia, amekpɔkplɔ, nufiafia.” Sea kpɔ Israel-viwo ta be woagasrɔ̃ dukɔ siwo ƒo xlã wo ƒe gbɔdɔdɔ manɔsenu kple alakpasubɔsubɔ nuwɔnawo o. Ne Israel-viwo ɖo to Mawu la, eyraa wo. Gake ne wogbe toɖoɖo la, wokpea fu.—Xlẽ 5 Mose 28:1, 2, 15.

7. (a) Nu ka tae Yehowa fia mɔ eƒe amewo? (b) Nu ka tae Se la nɔ abe mɔfiala ene na Israel-viwo?

⁷ Israel-viwo hiã mɔfiame yeyewo ɖe susu bubu aɖe hã ta. Sea dzra wo ɖo na Yehowa ƒe tameɖoɖo vevi aɖe me vava—si nye Yesu Kristo, Mesia la, ƒe vava. Sea ɖoa ŋku edzi na Israel-viwo be wonye ame madeblibowo. Eye ena wokpɔe be yewohiã na tafe, si nye vɔsa deblibo si aɖe woƒe nu vɔ̃wo ɖa keŋkeŋ. (Galatiatɔwo 3:19; Hebritɔwo 10: 1-10) Gakpe ɖe eŋu la, Sea kpɔ ƒome si me Mesia la adzɔ tso ta, eye wòkpe ɖe Israel-viwo ŋu wokpɔe dze sii esime wòva ɖo. Nyateƒee, Se la nɔ abe “mɔfiala” ene hena ɣeyiɣi aɖe, si kplɔ wo yi Kristo gbɔe.—Galatiatɔwo 3:23, 24.

8. Nu kawoe wòle be míawɔ be mɔfiame vevi siwo le Mose ƒe Sea me la naɖe vi na mí?

⁸ Mɔfiame siwo Yehowa na to Sea dzi la ate ŋu aɖe vi na mí Kristotɔwo hã egbea. Le mɔ ka nu? Ele be míatɔ vie ale be míakpɔ mɔfiame vevi siwo dzi wotu Sea ɖo la adze sii. Togbɔ be míegale se mawo te o hã la, wo dometɔ geɖe ate ŋu afia mɔ mí le míaƒe agbenɔnɔ kple Yehowa subɔsubɔ me. Mawu na woŋlɔ se mawo ɖe Biblia me be míasrɔ̃ nu tso wo me, be mɔfiame vevi siwo le wo me la nakplɔ mí, eye wòana míakpɔe be ele be míada akpe be Yesu fia nu si de ŋgɔ wu Se la mí. Ele be míalé to ɖe Yesu ƒe nufiamewo ŋu nyuie. Le kpɔɖeŋu me, egblɔ be: “Miese wogblɔ be: ‘Mègawɔ ahasi o.’ Ke nye la, mele egblɔm na mi be, ame sia ame si le ŋku lém ɖe nyɔnu ŋu, eye wòdzroe la, ewɔ ahasi kplii xoxo le eƒe dzi me.” Esia fia be menye ahasiwɔwɔ koe wòle be míatsri o, ke boŋ ele be míaɖe dzodzro kple tamesusu vɔ̃ ɖe sia ɖe ɖa.—Mateo 5:27, 28.

9. Nɔnɔme yeye kae na wòhiã be Mawu nana mɔfiafia yeyewo eƒe amewo?

⁹ Le Yesu, si nye Mesia la, ƒe vava megbe la, Yehowa gana mɔfiame yeye siwo na míegase eƒe tameɖoɖowo gɔme ɖe edzi. Nu si ta esia hiãe nye be, Mawu ƒe amewo gaɖo nɔnɔme yeye aɖe me. Le ƒe 33 K.Ŋ. la, Yehowa gbe Israel-dukɔa eye wòɖo Kristo hamea anyi wozu eƒe amewo.

10. Nu ka tae wona se yeye Kristo hamea, eye aleke wòto vovo tso esi wona Israel-viwo gbɔe?

¹⁰ Yehowa na Mose ƒe Sea Israel-viwo be wòafia ale si woanɔ agbe kple ale si woasubɔe la wo. Gake tso ƒe alafa gbãtɔ me la, Mawu ƒe amewo meganye dukɔ ɖeka aɖe me tɔwo ko o, ke boŋ wotso dukɔ sia dukɔ me, eye woyɔ wo be gbɔgbɔ me Israel. Wova zu Kristo hame si le nubabla yeye te. Eya ta Yehowa na ale si woanɔ agbe ahasubɔe la ŋuti mɔfiafia yeyewo alo numekɔkɔ bubuwo wo. Eme kɔ be, “Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ eye wòwɔa nu dzɔdzɔe la, eya ƒe nue dzea eŋu.” (Dɔwɔwɔwo 10:34, 35) Wowɔna ɖe “Kristo la ƒe se” si wotu ɖe gɔmeɖosewo koŋ dzi la dzi. Menye kpewo dzie woŋlɔ se sia ɖo o, ke boŋ ɖe woƒe dziwo me. Se sia fiaa mɔ Kristotɔwo eye wòɖea vi na wo afi ka kee woɖale o.—Galatiatɔwo 6:2.

11. Se eve kawo dzie wòle be ame siwo le “Kristo la ƒe se” te nawɔ ɖo?

¹¹ Mɔfiame siwo Yehowa na to Yesu dzi la ɖea vi na gbɔgbɔ me Israel ale gbegbe. Hafi Yesu naɖo nubabla yeyea anyi la, ede se vevi eve aɖewo. Ðeka ku ɖe gbeƒãɖeɖedɔa wɔwɔ ŋu. Eye evelia ku ɖe ale si Kristotɔwo anɔ agbe ahawɔ nu ɖe wo nɔewo ŋui la ŋu. Kristotɔwo katãe wode se siawo na, eya ta ele be ame siwo le mɔ kpɔm be yewoanɔ agbe tegbee le dziƒo loo alo anyigba dzi la siaa nawɔ wo dzi.

12. Mɔfiame yeye kae wona ku ɖe gbeƒãɖeɖedɔa ŋu?

 ¹² Le blema la, ele be dukɔ bubu me tɔwo nazɔ mɔ ava Israel ale be woava subɔ Yehowa. (1 Fiawo 8:41-43) Gake emegbe Yesu de se aɖe si dze le Mateo 28:19, 20. (Xlẽe.) Yesu gblɔ na eƒe nusrɔ̃lawo be, “miheyi” dukɔwo katã me tɔwo gbɔ. Le ƒe 33 ƒe Pentekoste ŋkekea dzi la, Yehowa ɖee fia be yedi be woaɖe gbeƒã nya nyuia le xexe bliboa me. Gbe ma gbe la, wokɔ gbɔgbɔ kɔkɔea ɖe hame yeyea me tɔ 120 dzi, wode asi gbe vovovowo dodo me, eye woɖi ɖase na Yudatɔwo kple ame siwo trɔ dzi me zu Yudatɔwo siaa. (Dɔwɔwɔwo 2:4-11) Emegbe wokeke gbeƒãɖeɖedɔa ɖe enu wòɖo Samariatɔwo gbɔ. Eye le ƒe 36 K.Ŋ. la, dɔa gakeke ɖe enu ɖo Dukɔwo me tɔ aʋamatsomatsotɔwo gbɔ. Esia fia be ele be Kristotɔwo nayi aɖaɖe gbeƒã na amewo katã le xexea me!

13, 14. (a) Nu kae “se yeye” si Yesu de la bia? (b) Nu kae míesrɔ̃ tso kpɔɖeŋu si Yesu ɖo la me?

¹³ Yesu de “se yeye” le ale si míawɔ nu ɖe mía nɔviwo ŋui ŋu. (Xlẽ Yohanes 13:34, 35.) Ele be míalɔ̃ wo ɣesiaɣi eye míanɔ klalo be míaku ɖe wo ta gɔ̃ hã. Esia nye nu yeye si medze le Mose ƒe Sea me o.—Mateo 22:39; 1 Yohanes 3:16.

¹⁴ Yesue ɖo ɖokuitɔmadimadi ƒe lɔlɔ̃ sia ƒe kpɔɖeŋu gãtɔ ɖi. Elɔ̃ eƒe nusrɔ̃lawo ale gbegbe be etsɔ eƒe agbe na ɖe wo ta. Eye ebia tso eyomedzelawo katã hã si be woalɔ̃ awɔ esia. Eya ta ele be míalɔ̃ faa ado dzi le nɔnɔme sesẽwo me alo aku gɔ̃ hã ɖe mía nɔviwo ta.—1 Tesalonikatɔwo 2:8.

15, 16. Nɔnɔme yeye kawo mee míele egbea, eye aleke Mawu le mɔ fiam míi?

¹⁵ Yesu ɖo “kluvi nuteƒewɔla kple aɖaŋudzela” la be wòana gbɔgbɔmenuɖuɖu ye yomedzelawo “le ɣeyiɣi nyuitɔ dzi.” (Mateo 24:45-47) Nuɖuɖu sia ƒe ɖee nye mɔfiafia vevi siwo Mawu naa eƒe amewo le nɔnɔme ɖe sia ɖe me. Nɔnɔme yeye ka mee míele egbea?

¹⁶ Míele “ŋkeke mamlɛawo me,” eye eteƒe madidi o, xaxa si tɔgbi meva kpɔ o la ava. (2 Timoteo 3:1; Marko 13:19) Wonya Satana kple eƒe gbɔgbɔ vɔ̃wo ɖa le dziƒo hetsɔ wo ƒu gbe ɖe anyigba dzi, si na amegbetɔwo le fu kpem ale gbegbe. (Nyaɖeɖefia 12:9, 12) Azɔ hã, míele se si Yesu de be woaɖe gbeƒã la dzi wɔm. Míele gbeƒã ɖem na ame siwo doa gbegbɔgblɔ vovovowo le xexea me fifia wu ɣeyiɣi ɖe sia ɖe!

17, 18. Aleke wòle be míabu mɔfiafia siwo nam wole mí lae?

¹⁷ Mawu ƒe habɔbɔa naa dɔwɔnu gbogbo aɖewo mí siwo kpena ɖe mía ŋu le gbeƒãɖeɖedɔa me. Èle wo zãma? Le míaƒe kpekpewo me la, wofiaa mɔ nyuitɔ siwo nu míazã dɔwɔnu siawo le la mí. Ðe nèbua mɔfiame siawo be wotso Mawu gbɔa?

¹⁸ Be Mawu nayra mí la, ele vevie be míalé to ɖe mɔfiafia siwo katã wòto Kristo hamea dzi le mía nam la ŋu. Ne míeɖoa to fifia la, anɔ bɔbɔe na mí be míawɔ ɖe mɔfiamewo dzi le “xaxa gã” la me, esime woatsrɔ̃ Satana ƒe xexe vɔ̃ɖia keŋkeŋ. (Mateo 24:21) Le ema  megbe la, míahiã mɔfiame yeye siwo nu míanɔ agbe ɖo le xexe yeye dzɔdzɔe si me Satana ƒe ŋusẽkpɔɖeamedzi aɖeke manɔ o la me.

19, 20. Agbalẽ yeye kawoe woaʋu, eye aleke woaɖe vi na míi?

¹⁹ Le Mose ƒe ŋkekea me la, Israel-dukɔa hiã mɔfiame yeyewo, eya ta Mawu tsɔ Sea na wo. Emegbe wobia tso Kristo hamea si be woawɔ ɖe “Kristo la ƒe se” dzi. Eye Biblia na míenya be le xexe yeyea me la, woana agbalẽ siwo me mɔfiame yeyewo anɔ la mí. (Xlẽ Nyaɖeɖefia 20:12.) Edze ƒãa be Yehowa ƒe nudidi siwo nu amegbetɔwo anɔ agbe ɖo ɣemaɣi la anɔ agbalẽ mawo me. Wo sɔsrɔ̃ ana amewo katã, siwo dome ame siwo woagbɔ agbee hã le la, nanya nu siwo Mawu di tso wo si. Agbalẽawo akpe ɖe mía ŋu míanya ale si Yehowa bua nuwo ŋui la geɖe wu. Woana míagase Biblia gɔme ɖe edzi, eye le Paradisoa me la, míawɔ nu ɖe mía nɔewo ŋu le lɔlɔ̃ kple bubu me. (Yesaya 26:9) Wò ya bu nu gbogbo siwo míasrɔ̃ kple nu siwo míafia amewo le míaƒe Fia Yesu Kristo ƒe kpɔkplɔ te la ŋu kpɔ ko!

²⁰ Ne míewɔ ɖe mɔfiame “siwo woŋlɔ ɖe agbalẽawo me” dzi eye míewɔ nuteƒe na Yehowa le dodokpɔ mamlɛtɔ me la, woaŋlɔ míaƒe ŋkɔwo ɖe “agbegbalẽ la” me tegbee. Eye agbe mavɔ asu mía si! Eya ta ele vevie be MÍATƆ VIE axlẽ Biblia edziedzi, MÍAKPƆ nu si Mawu di tso mía si adze sii nyuie, eye MÍALÉ TO ÐE eƒe mɔfiamewo ŋu fifia. Ne míewɔa nu siawo la, míate ŋu atso xaxa gã la, eye míayi edzi anɔ nu srɔ̃m tso mía Mawu lɔ̃ame Yehowa, si nye nunyala gãtɔ, ŋu tso mavɔ me yi mavɔ me.—Nyagblɔla 3:11; Romatɔwo 11:33.