Nuteɖeamedzi nye ale si wò ametia wɔa nu le nɔnɔme sesẽwo me. Wò ahɔhɔ̃ nana lãmetsi aɖewo dzina ɖe lãme na wò. Esia wɔnɛ be wò dzi ƒona kabakaba, wò ʋu sina kabakaba, wò dzitodzito vuna alo mĩana eye wò lãmekawo liana. Kaka nànya la, ametia le klalo anɔ te ɖe nɔnɔmea nu. Ne nu si he nuteɖeamedzia vɛ nu yi ko la, wò ametia gawɔa dɔ ale si dze.

Nuteɖeamedzi nye mɔ aɖe si dzi ame tona nɔa te ɖe nɔnɔme sesẽwo alo afɔkuwo nu le dzɔdzɔmenu. Tenɔnɔ ɖe nɔnɔmea nu dzea egɔme tso ahɔhɔ̃a me. Nuteɖeamedzi si ɖea vi la ana nawɔ nu kpata. Nuteɖeamedzi si megbɔ eme o ate ŋu ana nàɖo wò taɖodzinuwo gbɔ alo ana nàwɔ dɔ nyuie, ɖewohĩ le dodokpɔ me, ne èle dɔ dim, alo le kamedefefe aɖe me.

Ke hã, ne nu te ɖe dziwò eteƒe didi, alo wògbɔ eme la, ate ŋu agblẽ nu le ŋuwò. Ne ètsia dzodzodzoe edziedzi la, ate ŋu agblẽ nu le wò ametia, wò seselelãme kple wò susu ŋu. Wò nɔnɔme kple ale si nèwɔa nu ɖe amewo ŋu ate ŋu atrɔ. Nuteɖeamedzi si nu sẽ ate ŋu ana ame natsɔ aha nono, atike vɔ̃ɖiwo zazã kple nuwɔna gbegblẽ bubuwo aɖo dɔe be yeatsɔ anɔ te ɖe enu. Ate ŋu ana ame nalé blanuiléledɔ, nu nati kɔ na ame, alo wòana ame nadi be yeawu ye ɖokui gɔ̃ hã.

Togbɔ be ame sia ame kple ale si wòwɔa nui ne nu te ɖe edzi hã la, nuteɖeamedzi ate ŋu ahe dɔléle vovovowo ava ame dzi. Eye ate ŋu akpɔ ŋusẽ ɖe ametia ƒe akpa sia akpa kloe dzi.