NE AKOWO le ha me dzo tso ave me nèkpɔ la, àkpɔe be woƒe amadede vovovoawo nya kpɔ ŋutɔ! Akowo ƒe dzodzo le ha me alea nya kpɔ na Europatɔ siwo ɖi tsa va Titina kple Anyiehe Amerika le ƒe alafa 15 lia ƒe nuwuwu lɔƒo me ale gbegbe. Ako siawo siwo wokpɔ la nye ako siwo ƒe ble le legbee siwo nɔa Amerika ƒe nuto siwo me yame xɔa dzo le. Eteƒe medidi o xe siawo ƒe foto va dzena le nutoa ƒe anyigbatatawo dzi wònyea dzesi be woke ɖe anyigba si le abe paradiso ene ŋu.

Le xe siwo woléna dea xadza me dome la, ako siawo ƒe dzedzeme to vovo, eye woƒe amadede dzena nyuie. Wonye xe siwo dze nunya hã, wonɔa ame dome, eye woxlɔ̃na sesĩe wòtɔa to me. Wonɔa ha me abe 30 ene dzona le woƒe nɔƒewo ŋdi kanya ɖafɔa nukuwo, atikutsetsewo, kple nuɖuɖu bubuwo. Zi geɖe la, woƒe fewoe wotsɔna fɔa nuɖuɖu, emegbe wotsɔa woƒe dɔ titri si xa gobaa la nɔa etɔm. Wotea ŋu tsɔa woƒe dɔ gbãa nuku siwo ŋu go sesẽwo le la gɔ̃ hã! Zi geɖe ne woɖu nu vɔ la, wodzona yia towo ƒe agawo ŋu alo tɔwo to va nɔa dɔ tɔm anyikɔwo, eye esia kpena ɖe wo ŋu woɖea aɖi le nu siwo woɖu me eye wògakpena ɖe wo ŋu wokpɔa nunyiame bubu siwo hiã hã.

 Zi geɖe la, atsu kple nɔea kuna ɖe wo nɔewo ŋu le woƒe agbe me katã eye wo ame evea siaa léa be na wo viwo. Akowo wɔa woƒe atɔwo ɖe atiwo ƒe tòwo me, tɔgowo ŋu, babakɔwo me alo ɖe towo ƒe agawo ŋu, eye le afi siawo la, àkpɔ be atsu kple nɔea le ɖi ɖem le wo nɔewo ŋu. Togbɔ be ne wo viwo xɔ ɣleti ade ko wotsi hã la, woganɔa wo dzilawo ŋu abe ƒe etɔ̃ ene. Ne ako siawo le gbe me la, wotea ŋu nɔa agbe ƒe 30 va ɖo 40, gake ne wolé wo de xadza me la wotea ŋu nɔa agbe wu ƒe 60. Ako vovovo siwo ade 18 ye li, wo dometɔ aɖewoe nye esiawo.