NYA SIWO AME AÐEWO GBLƆNA

Romatɔwo wu Yesu esi wohee ɖe atitsoga ŋu.

NYA SI BIBLIA GBLƆ

Wowu Yesu esi ‘wohee ɖe ati ŋu.’ (Dɔwɔwɔwo 5:30, The New Jerusalem Bible) Nya vovovo eve siwo Biblia ŋlɔlawo zã tsɔ ɖɔ nu si ŋu Yesu ku ɖo la fia ati ɖeka ko ke menye eve o. Helagbe me nya stau·rosʹ si agbalẽ si nye Amehehe Ðe Ati Ŋu Le Blema (si le Eŋlisigbe me) zã la fia “ati tsrala ɖeka. Mefia ‘atitsoga’ o.” Nya xyʹlon si wozã le Dɔwɔwɔwo 5:30 “fia ati tsrala alo ati dzro aɖe si ŋu Romatɔwo hea ame ɖo.” *

Ale si Biblia hã ƒo nu tso Yesu wuwu ŋu la wɔ ɖeka kple se si wotsɔ na blema Israel-viwo. Sea gblɔ be: “Ne ame aɖe wɔ nu vɔ̃ aɖe si dze ku, eye wowui, eye nèhee ɖe ati ŋu la, . . . Mawu ƒo fi de ame si wohe ɖe ati ŋu” la. (5 Mose 21:22, 23) Esi Kristotɔ apostolo Paulo nɔ susu hem yi se ma dzi la, egblɔ be Yesu zu “fiƒodeme ɖe mía teƒe, elabena woŋlɔ ɖi be: ‘Ame sia ame si wohe ɖe ati [xyʹlon] ŋu la, fiƒode le edzi.’” (Galatiatɔwo 3:13) Paulo ƒe nyawo fia be ati—si fia ati tsrala ɖeka—ŋue wowu Yesu ɖo.

“Wowui esi ‘wohee ɖe ati ŋu.”—Dɔwɔwɔwo 10:39, The New Jerusalem Bible.

NYA SI BIBLIA GBLƆ

Biblia megblɔ le afi aɖeke be Kristotɔ gbãtɔwo zã atitsoga abe subɔsubɔdzesi ene o. Romatɔ siwo nɔ anyi ɣemaɣi boŋue zã atitsoga wònye woƒe mawuwo ƒe dzesi. Ƒe 300 le Yesu ƒe ku megbe la, Roma Fiagã Konstantino zã atitsoga wònye eƒe asrafowo ƒe dzesi, eye emegbe ame siwo gblɔna be yewonye “Kristotɔwo” va te ezazã le woƒe sɔlemehawo me.

Esi wònye trɔ̃subɔlawoe zãa atitsoga le woƒe mawuwo subɔsubɔ me la, ɖe Yesu ƒe nusrɔ̃lawo azãe le woƒe tadedeagu na Mawu vavã la mea? Le nyateƒe me la, wonya be tso gbe aɖe gbe ke la, Mawu mekpɔa ŋudzedze ɖe subɔsubɔ si me wozãa nane ƒe “nɔnɔme” le ŋu o eye wobia tso Kristotɔwo si hã be woasi le “trɔ̃subɔsubɔ nu.” (5 Mose 4:15-19; 1 Korintotɔwo 10:14) “Mawu nye Gbɔgbɔ,” eye amegbetɔwo mate ŋu akpɔe o. Eya ta Kristotɔ gbãtɔwo mezãa nu siwo ŋku kpɔna be wòakpe ɖe yewo ŋu be yewoate ɖe Mawu ŋu o. Ke boŋ eƒe gbɔgbɔ kɔkɔe si womekpɔna o la kpena ɖe wo ŋu wosubɔnɛ “le gbɔgbɔ kple nyateƒe” me, si wɔ ɖeka kple Mawu ƒe lɔlɔ̃nu abe ale si wòdze le Ŋɔŋlɔawo me ene.—Yohanes 4:24.

“Nyateƒetadeagulawo ade ta agu na Fofo la le gbɔgbɔ kple nyateƒe me.”—Yohanes 4:23.

NYA SIWO AMEWO GBLƆNA

“Esɔ eye wòle dzɔdzɔmenu be nane si dzi woto ɖe amegbetɔwo la, nava zu nane si ŋu woanɔ bubu demee eye woazãe le subɔsubɔ me. . . . Ame si dea bubu dzesia ŋu la le bubu dem ame si dzesia le tsitre ɖi na la hã ŋu.”—New Catholic Encyclopedia.

NYA SI BIBLIA GBLƆ

Kristotɔwo nyi fe gã aɖe le Yesu ŋu elabe eƒe kua na wòle bɔbɔe be woate ŋu atsɔ woƒe nu vɔ̃wo ake wo, woate ŋu ate ɖe Mawu ŋu eye woakpɔ agbe mavɔ. (Yohanes 3:16; Hebritɔwo 10:19-22) Womebia tso wo si be woade bubu nunana ma ŋu to Yesu ƒe nɔnɔmewɔwɔ dzi loo alo agblɔ be yewoxɔ edzi se ko o. Nya lae nye be, “xɔse hã, ne dɔwɔwɔ mekpe ɖe eŋu o la, enye nu kuku.” (Yakobo 2:17) Aleke Kristotɔwo aɖee afia be yewoxɔ Yesu dzi se?

Biblia gblɔ be: “Kristo ƒe lɔlɔ̃ la ƒonɛ ɖe mía nu, elabena nu si dzi míelɔ̃ ɖoe nye esi, be ame ɖeka ku ɖe wo katã ta . . . Ale be ame siwo le agbe la naganɔ agbe na wo ɖokuiwo azɔ o, ke woanɔ agbe na ame si ku ɖe wo ta, eye wofɔe ɖe tsitre la boŋ.” (2 Korintotɔwo 5:14, 15) Kristo ƒe lɔlɔ̃ sia ƒonɛ ɖe Kristotɔwo nu be woatrɔ woƒe agbenɔnɔ eye woadze eƒe kpɔɖeŋuwo yome. Esia wɔnɛ be wodea bubu Yesu ŋu le mɔ si de ŋgɔ wu subɔsubɔ me dzesiwo zazã nu.

“Esiae nye Fofonye ƒe lɔlɔ̃nu be ame sia ame si kpɔa Vi la, eye wòxɔa edzi sena la nakpɔ agbe mavɔ.”—Yohanes 6:40.