NA SƆHƐWO
12: Taɖodzinuwo
NU SI WÒFIA
Menye drɔ̃eƒenyae taɖodzinu nye o, ke boŋ enye nu si nèle mɔ kpɔm na be adzɔ ŋutɔŋutɔ. Ebia be woawɔ ɖoɖo, ada asɔ, eye woado vevie dɔ awɔ.
Taɖodzinu ate ŋu anye esi (axɔ ŋkeke aɖewo alo kwasiɖa aɖewo), bubu ate ŋu anye esi didi vie si (axɔ ɣleti aɖewo) kple esi axɔ ɣeyiɣi geɖe (ƒe ɖeka alo esi wu ema). Taɖodzinu suesuesuewo gbɔ ɖoɖo akpe ɖe ŋuwò be nàte ŋu ava ɖo esi axɔ ɣeyiɣi la gbɔ.
NU SI TA WÒLE VEVIE
Ne èɖo taɖodzinu aɖe gbɔ la, ana dzi naɖo ƒowò, ana nàdze xɔ̃ nyuiwo, eye àkpɔ dzidzɔ wu tsã.
Ana dzi naɖo ƒowò: Ne èɖo taɖodzinu suewo eye nète ŋu ɖo wo gbɔ la, dzi aɖo ƒowò be nàminya gãwo. Eye ne èdo go nuwo abe hatiwo ƒe nyaƒoɖeamenu ene la, dzi anɔ ƒowò nànɔ te ɖe wo nu.
Xɔlɔ̃wo: Edzɔa dzi na amewo be yewoanɔ ame siwo si taɖodzinu ɖɔʋuwo le la dome, ame siwo nya taɖodzinu si minyam wole eye wodzea agbagba be yewoaɖo wo gbɔ. Azɔ hã, mɔ vevi aɖe si dzi ame ato ana ƒomedodo si le eya kple exɔlɔ̃ dome nasẽ wue nye be woaminya taɖodzinu ɖeka.
Dzi adzɔ wò: Ne èɖo taɖodzinu na ɖokuiwò eye nèɖo egbɔ la, dzi adzɔ wò.
“Melɔ̃a taɖodzinuwo ɖoɖo na ɖokuinye. Nye susu nɔa wo ŋu eye medzea agbagba be maɖo taɖodzinuawo gbɔ. Eye ne ète ŋu ɖo taɖodzinu aɖe gbɔ, eye nètrɔ kpɔ megbe la, dzi adzɔ wò nàgblɔ be, ‘Ɛhɛ̃, mete ŋu wɔe! Mete ŋu wɔ nu si meɖo be mawɔ la.’”—Christopher.
BIBLIA ƑE MƆFIAME: “Ame si le ŋku lém ɖe yaƒoƒo ŋu la maƒã nu o, eye ame si le ŋku lém ɖe alilikpowo ŋu la maŋe nu o.”—Nyagblɔla 11:4.
NU SI NÀTE ŊU AWƆ
Ðe afɔ siawo ne woakpe ɖe ŋuwò nàɖo wo taɖodzinuwo gbɔ.
De vovototo nuwo me. Ŋlɔ taɖodzinu siwo gbɔ nàdi be yeaɖo la ɖe ɖoɖo nu, vevitɔwo nava gbã, eye nàtia esi gbɔ nàdi be yeaɖo gbã, evelia kple bubuawo.
Wɔ ɖoɖo. Be nàɖo taɖodzinu ɖe sia ɖe gbɔ la, wɔ nu siawo:
-
Ðo ɣeyiɣi si sɔ na taɖodzinua gbɔ ɖoɖo.
-
Wɔ ɖoɖo ɖe nu siwo nàwɔ hafi aɖo egbɔ la ŋu.
-
Kpɔ mɔ be kuxiwo ado mo ɖa, eye nàbu ale si nàwɔ aɖu wo dzi la ŋu.
Dze egɔme. Mègalala be nu sia nu nasɔ gbe keŋkeŋ hafi nàɖe afɔ o. Bia ɖokuiwò be, ‘Nu kae nye nu gbãtɔ si mate ŋu awɔ be maɖo nye taɖodzinua gbɔ?’ Ekema wɔe. De dzesi taɖodzinua ƒe akpa siwo gbɔ nète ŋu ɖo xoxo.
BIBLIA ƑE MƆFIAME: “Veviedola ƒe ɖoɖowo hea dzidzedzekpɔkpɔ vanɛ.”—Lododowo 21:5.
Ɖewohĩ Esia Hã Adzɔ Dzi Na Wò
NYA SIWO HAWÒTIWO GBLƆ
Cameron Kpɔ Dzidzeme Vavãtɔ Kekeake
Èdi be yeakpɔ dzidzeme le agbe mea? Lé to ɖe Cameron ŋu esi wòle ale si wòwɔ kpɔ dzidzeme le nuto aɖe si me màsusui be ate ŋu akpɔ dzidzime le o me la gblɔm.
SƆHƐWO BIANA BE
Aleke Mawɔ Anya Ame Si Ƒe Kpɔɖeŋu Masrɔ̃?
Ne èsrɔ̃ kpɔɖeŋu nyui si ame aɖe ɖo la, ate ŋu akpe ɖe ŋuwò nàƒo asa na kuxiwo, aɖo wò taɖodzinuwo gbɔ eye nàkpɔ dzidzedze le agbe me. Gake ame ka ƒe kpɔɖeŋue wòle be nàsrɔ̃?
