AHƆHƆ̃ nenie le asiwò? Ne èɖo eŋu be “ɖeka” la, ke èɖo eŋu nyuie. Ke hã ahɔhɔ̃ ƒomevi aɖe gawɔa dɔ le wò ametia me. Ahɔhɔ̃menugbagbevi aɖewo wɔa dɔ nukutɔe ale gbegbe be dzɔdzɔmeŋutinunyalawo gblɔ be wole abe “ahɔhɔ̃ evelia” ene. Ahɔhɔ̃ evelia sia mele wò tago me o, ke boŋ wò ƒodo mee wòle. Woyɔnɛ le Eŋlisigbe me be enteric nervous system (ENS).

Ebia kutrikuku geɖe kple nuwɔwɔ aduadu hafi ŋutilãa natrɔ nuɖuɖu wòazu nunyiame. Eya ta enyo be wowɔ míaƒe ahɔhɔ̃a be wòaɖe asi le dɔ aɖewo ŋu na dɔgboa (ENS) be wòawɔ.

Togbɔ be dɔgboa ƒe dɔwɔwɔ le bɔbɔe wu ahɔhɔ̃a tɔ hã la, ale si dɔgboa wɔa dɔe gɔmesese sesẽ. Wobu akɔnta be ahɔhɔ̃menugbagbevi miliɔn 200 va ɖo 600 ye le amegbetɔ me. Wowɔ ahɔhɔ̃menugbagbevi siawo siwo ƒe dɔwɔwɔ wɔ nuku la de dɔgboa me. Dzɔdzɔmeŋutinunyalawo xɔe se be ne ɖe ahɔhɔ̃ si le míaƒe tago me awɔ dɔ siwo dɔgboa (ENS) wɔna la, anye ne ahɔhɔ̃meka siwo le míaƒe tagoa me la atri akpa. Abe ale si agbalẽ si nye The Second Brain gblɔe ene la, “edea ametia dzi eye wòsɔ be dɔgboa nawɔ dɔ le eɖokui si.”

Hafi dɔgboa nate ŋu atu nuɖuɖu memie la, ke ele be lãmetsi siwo tututu hiã kple agbɔsɔsɔ siwo hiã la nadza ɖe teƒe siwo tututu wohiã le. Nufialagã Gary Mawe ɖɔ ale si dɔgboa tua nu siwo míeɖuna wòsɔ nyuie be enye “lãmetsiwo ƒe dɔwɔƒe.” Ale si lãmetsi vovovo siawo wɔa dɔe la gbɔ ame ƒe gɔmesese ŋu. Le kpɔɖeŋu me, lãmenugbagbevi tɔxɛ aɖewo le míaƒe dɔkaviwo me siwo dea dzesi nu vovovo siwo le nu si míeɖuna la me. Nyatakaka sia kpena ɖe dɔgboa ŋu be lãmetsi si sɔ pɛpɛpɛ nadza ɖe nuɖuɖua dzi be wòatu nyuie na ŋutilã be wòazã. Azɔ hã dɔgboa léa nanewo siwo le nuɖuɖua me la ƒe ŋusẽ nu eye wònana hã be lãmetsi siwo nana dɔgboa tua nuɖuɖu la wɔa dɔ nyuie.

Bu ale si nuɖuɖu wɔna tuna le dɔgboa me abe dɔwɔƒe gã aɖe ene ŋu kpɔ. Wò “ahɔhɔ̃ evelia” zãa lãmeka siwo le dɔgboa me tsɔ fiaa mɔ nuɖuɖua yia afi si wòatu wo le. Ale si dɔgboa wɔna tsɔa nuɖuɖu yinɛ be woatu la wɔ nuku. Wò “ahɔhɔ̃ evelia” ye fiaa mɔ nuɖuɖua le dɔgboa me yia afi si woatui le. Dɔgboa mezãa ŋusẽ kple tsɔtsɔme ɖeka tɔgbi ne ele nuɖuɖua tum o, ke boŋ ewɔa esia ŋu dɔ ɖe ale si nɔnɔmea bia nu be nuwo nazɔ nyuie.

Dɔgbo la gakpɔa dedienɔnɔnyawo gbɔ. Nugbagbevi siwo ate ŋu agblẽ nu le mía ŋu la le nu siwo míeɖuna me. Mewɔ nuku o be nugbagbevi siwo kpɔa ametia ta tso dɔlélewo si me ƒe alafa memama 70 va ɖo 80 la le míaƒe dɔ me! Ne èɖu nu manyomanyo aɖe la, dɔgboa kpɔa wò ametia ta enumake. Dɔgboa naa nyanya nu siwo kpɔa ametia ta be woawɔ nu kpata, woana nàtru loo alo wòana nàŋɔ mĩ.

Togbɔ be edze abe dɔgboa wɔa dɔ le eɖokui si hã la, eya kple susua wowɔa nu aduadu.  Le kpɔɖeŋu me, dɔgboa wɔa nu vevi aɖe le lãmetsi siwo ɖoa nyatakaka ɖe susua le ɣeyiɣi si wòle be nàɖu nu kple nu agbɔsɔsɔ si wòle be nàɖu la ƒe dɔwɔwɔ me. Nugbagbevi siwo le dɔgboa me ɖoa nyatakaka ɖe susua ne èɖi ƒo eye woate ŋu ana nàdi be yeatru ne èɖu nu fũu akpa.

Hafi nàxlẽ nyati sia la, ɖewohĩ ède dzesii be wò susu kple dɔgboa ɖoa nyatakakawo ɖe wo nɔewo. Le kpɔɖeŋu me, ède dzesii be nuɖuɖu aɖewo siwo me ami le ɖuɖu nana dzi dzɔa wòa? Numekukuwo ɖee fia be wò dɔgboa ɖoa ‘nyatakaka si ana dzi nadzɔ wò’ la ɖe susua si wɔnɛ be dzi dzɔa wò. Ðewohĩ esia tae ame aɖewo ɖua nuɖuɖu aɖewo ƒomevi ne nu te ɖe wo dzi. Dzɔdzɔmeŋutinunyalawo le agbagba dzem be yewoakpɔe ɖa, ne anya wɔ be yewoana dɔgboa ŋutɔ nate ŋu ada blanuiléledɔ.

Dzeɖoɖomɔnu ƒe kpɔɖeŋu bubu si yia edzi le ahɔhɔ̃a kple dɔgboa dome ye nye esi woɖɔ be dɔmedzeagbo. Esia dzɔna nenye be dɔgboa mena ʋu sí to ƒodoa me o, alo ne susua xɔ dzo eye wòtsi dzimaɖi. Nu bubu si dzɔna ye nye dzigbɔtɔame elabena ne susua tsi dzodzodzoe la ewɔnɛ be dɔgboa tɔtɔa ɖoɖo si nu dɔkaviawo wɔa dɔ le. Numekulawo gblɔ be ale si dɔgboa ɖoa nyatakakawo ɖe susua gbɔe wòtso be wogblɔna be ame ƒe dɔme bua tame.

Togbɔ be dɔgboa wɔa nu siawo hã la, mate ŋu abu tame ɖe nuwò alo afia mɔ wò nàtso nya me o. Ne míagblɔe la, menye ahɔhɔ̃e dɔgboa nye o. Mate ŋu akpe ɖe ŋuwò nàkpa ha, abu akɔnta alo awɔ dɔdeasi aɖeke na wò o. Ke hã, nu wɔnuku sia kpɔtɔ wɔa moyaa na dzɔdzɔmeŋutinunyalawo le ale si wòwɔa dɔ etɔxɛe ta, eye ɖewohĩ nyatakaka gbogbo aɖewo li tso eŋu si ŋu womeke ɖo haɖe o. Eya ta ne èdi be yeaɖu nu la, ekema tɔ sẽe nàde ŋugble le nu siwo katã ayi edzi, ale si wòawɔ nyatakakawo ŋu dɔ, awɔ nu ɖe ɖoɖo nu kple kadodo si anɔ wò dɔgboa kple susua dome le wò dɔ me ŋu!