BIBLIA ƑE MƆFIAME: “Ame aɖeke melé fu eya ŋutɔ ƒe ŋutilã kpɔ o, ke boŋ enyinɛ, eye wòléa be nɛ nyuie.”—Efesotɔwo 5:29.

NU SI WÒFIA: Biblia ƒe mɔfiame sia de dzi ƒo na mí be míawɔ mía tɔ sinua alé be na mía ɖokui. Numekuku aɖe ɖee fia be ale si ame akpa gãtɔ nɔa gbee gbɔe lãmesẽkuxi geɖewo tsona. Eya ta ale si nènɔa agbee la ate ŋu ana nànɔ lãmesẽ nyuie me.

NU SI NÀTE ŊU AWƆ:

• Ðu Nu Si Me Nunyiame Le. Ðu nu siwo me nunyiame le eye nànɔ tsi nom sɔ gbɔ.

• Nɔ Kame Dem. Ƒe ka kee nèɖaxɔ o, èɖanye nuwɔametɔ alo dɔléle sesẽ aɖe le ŋuwò o, kamedede ana nànɔ lãmesẽ me. Togbɔ be ame siwo lɔ̃ wò kple ɖɔktawo aɖo aɖaŋu nyuiwo na wò hã la, wò ŋutɔe awɔ edzi be wòaɖe vi na wò!

• Dɔ Alɔ̃ Wòasu Wò. Ne mèdɔa alɔ̃ wòsua wò o la, ate ŋu ana nàva dze dɔ vevie emegbe. Ame aɖewo tsɔa nu geɖe doa agba na wo ɖokuiwo le alɔ̃dɔɣiwo. Ke hã ne ètiae be yeadɔ alɔ̃ wòasu ye nyuie la, ànɔ lãmesẽ me.

BIBLIA ƑE MƆFIAME: “Mina míakɔ mía ɖokui ŋu tso ŋutilã kple gbɔgbɔ ƒe ɖiƒoƒo sia ɖiƒoƒo me.”—2 Korintotɔwo 7:1.

NU SI WÒFIA: Eɖea vi na mí ŋutɔ ne míetsri nu siwo gblẽa nu le mía ŋu abe atama kple nu bubu siwo nye nu siwo koŋ gblẽa nu le míaƒe lãmesẽ ŋu eye wohea ku vɛ.

 NU SI NÀTE ŊU AWƆ: Ðo ɣeyiɣi si nàdzudzɔ keŋkeŋ eye nàde dzesii ɖi. Hafi ŋkeke ma naɖo la, tsɔ sigaretwo, dzowɔgbawo, dzosinuwo kple nu bubu siwo do ƒome kplii la ƒu gbe. Mèganɔ teƒe siwo amewo aƒoe ɖe nuwò be nàƒo ɖokuiwò ɖe nuwɔna siawo me yim o. Gblɔ ale si nètso nya mee na xɔlɔ̃ siwo di be nàtrɔ ne woakpe ɖe ŋuwò.

WƆ NU SIWO ANA NÀNƆ DEDIE.

“Ne ètso aƒe yeye la, tɔ kpɔ ɖe xɔa tame, bena ame aɖeke magage le edzi, eye nàna wò aƒe naɖi ʋufɔ o.”—5 MOSE 22:8.

ÐU WÒ DZIKU DZI.

“Ame si medoa dziku kabakaba o la, nugɔmesese bɔ ɖe esi, ke ame si megbɔa dzi ɖi o la ɖea eƒe bometsitsi fiana.”—LODODOWO 14:29.

TSRI NU TSU ÐUÐU.

‘Mèganɔ nu tsu ɖulawo dome o.’—LODODOWO 23:20.