NE ÈVƆ̃NA alo tsia dzi ɖe ale si nɔnɔmeawo le gbegblẽm ɖe edzi le xexea me ŋu la, ke menye wò ɖeka koe o. Le ƒe 2014 me la, Barack Obama si nye Amerika dukplɔla tsã gblɔ be, le nya vɔ̃ siwo wogblɔna le nyadzɔdzɔwo me ta la, ame geɖe ƒo nya ta be “xexea le du dzi . . . ale gbegbe be ame aɖeke mete ŋu le enu lém o.”

Ke hã esi wògblɔ nya mawo megbe kpuie la, eƒo nu tso nu siwo woate ŋu awɔ atsɔ akpɔ xexea ƒe kuxi akpa gãtɔ gbɔ la ŋu kple kakaɖedzi blibo. Egblɔ tso dziɖuɖuwo ƒe ɖoɖowo ŋu be wonye “nya nyui” eye wògblɔ kpee be “yeka ɖe edzi vevie hele mɔ kpɔm be nuwo ava nyo.” Ne míagblɔe bubui la, ele gbɔgblɔm be amegbetɔwo ƒe agbagbadzedze kple susu nyui siwo le wo si gbɔe wòatso be woalé xexea ƒe kuxiwo nu ale be míasi le xexea me katã ƒe afɔku dziŋɔa nu.

Ame geɖe hã le mɔ kpɔm nenema. Le kpɔɖeŋu me, ame aɖewo le ŋu ɖom ɖe dzɔdzɔmeŋutinunya ŋu, eye wole gbɔgblɔm be ŋgɔyiyi siwo wɔm wole le mɔ̃ɖaŋununya me awɔe be woakpɔ xexea ƒe kuxiwo gbɔ. Mɔ̃ɖaŋuŋutinunyala bibi aɖe si nya nu tso nutovɛwo ŋu gblɔ kple kakaɖedzi be kaka ƒe 2030 naɖo la, “míaƒe mɔ̃ɖaŋunuwo aganyo ɖe edzi zi gbɔ zi akpe ɖeka eye kaka ƒe 2045 naɖo la nuwo aganyo ɖe edzi wu gbɔgblɔ.” Egblɔ kpee be: “Míele ŋgɔ yim ŋutɔ. Togbɔ be kuxiwo le dzidzim ɖe edzi hãa, míetea ŋu léa wo nu kaba ŋutɔ.”

Aleke tututue nuwo gblẽ le xexea mee? Ðe afɔku aɖe adzɔ ɖe xexea dzi kpuiea?  Togbɔ be dzɔdzɔmeŋutinunyala kple dunyahela aɖewo gblɔna be mɔkpɔkpɔ li hã la, ame geɖe mele ŋgɔgbea kpɔm nyuie o. Nu ka tae?

Le nyateƒe mea, wò hã ànya bu nu bubu siwo ate ŋu atsrɔ̃ amegbetɔwo la ŋu. Ke hã ne ède ŋugble le nu manyomanyo siwo le dzɔdzɔm fifia ŋu gɔ̃ hã la, màte ŋu ake ɖe ŋuɖoɖo nyui siwo ku ɖe etsɔme ŋu la ŋu o. Ame siwo ɖoa to dunyahelawo kple dzɔdzɔmeŋutinunyalawo hã gblɔ nenema ke. Abe ale si míegblɔe le nyati si do ŋgɔ me ene la, ame geɖe ke ɖe nyabiase siwo ku ɖe xexea ƒe nɔnɔmewo kple ale si nuwo ava nɔ le etsɔme ƒe ŋuɖoɖo nyuiwo ŋu. Afi kae míate ŋu akpɔ ŋuɖoɖoawo le?

AƲAWƆNU SIWO ATE ŊU ATSRƆ̃ AME GBOGBOWO ZI ÐEKA. Togbɔ be Dukɔ Ƒoƒuawo kple habɔbɔ bubuwo dze agbagba vevie be yewoana dukɔwo nadzudzɔ nukliaʋawɔnuwo wɔwɔ hã la, wodo kpo nu. Eye se siwo wode be woatsɔ aɖe aʋawɔnuwo dzi akpɔtɔ la ɖia kokoe na dukplɔla siwo me aglãdzegbɔgbɔ le. Dukɔ siwo si nukliaʋawɔnuwo le la gale asi trɔm le woƒe bɔmbwo ŋu eye wole yeyewo wɔm be woate ŋu agblẽ nu wu. Azɔ hã dukɔ siwo si aʋawɔnu siwo ate ŋu atsrɔ̃ ame gbogbowo zi ɖeka menɔ tsã o la, ate ŋu azã esiwo le wo si fifia atsrɔ̃ ame gbogbowo.

Ale si dukɔwo le klalo be yewoazã nukliaʋawɔnuwo atsɔ awɔ aʋae la na be xexea me ɖi vɔvɔ̃ le “ŋutifafaɣiwo” gɔ̃ hã. Le kpɔɖeŋu me, agbalẽ aɖe gblɔ be “aʋawɔnu siwo ate ŋu ada le wo ɖokui si ‘awu ame’ evɔ ame aɖeke mafia mɔ wo o la na ame geɖe tsi mavomavo.”—Bulletin of the Atomic Scientists.

MÍAƑE LÃMESẼ ÐO AFƆKU ME. Dzɔdzɔmeŋutinunya ate ŋu akpe ɖe mía ŋu míanɔ lãmesẽ me va se ɖe afi aɖe ko. Ʋusɔgbɔdɔ, lolo fũu akpa, ɖiƒoƒo yame kple atike vɔ̃ɖiwo zazã gblẽa nu le lãmesẽ ŋu, eye dzidzim ɖe edzi koe wole. Dɔ siwo womexɔna le ame ŋu o abe kansa, dzidɔ, ʋukamedɔwo kple suklidɔ ene va le ame gbogbo aɖewo wum. Dɔléle bubu siwo dome tagbɔdɔ hã le va le fu ɖem na ame geɖe ŋutɔ. Nyitsɔ laa la, míekpɔ ale si dɔléle vɔ̃ɖi siwo nye Ebola kple Zika siwo womenɔ mɔ kpɔm na o la kaka kabakabae la teƒe. Nyateƒeae nye be: Amegbetɔwo do kpo nu, womate ŋu aɖe dɔlélewo ɖa o, eye mɔkpɔkpɔ aɖeke meli be woate ŋu awɔ nane tso eŋu le etsɔme hã o!

AMEGBETƆWO LE NU GBLẼM LE DZƆDZƆMENUWO ŊU. Dɔwɔƒe gãwo le nu gblẽm le yame ŋu. Ame gbogbo aɖewo kuna ƒe sia ƒe le aɖiya siwo wogbɔ- na ta.

Ame ɖekaɖekawo, ame siwo le nuto aɖewo me kple dziɖuɖudɔwɔƒewo kɔa gbeɖuɖɔwo, kɔdzi kple agbledetike gbegblẽwo, aŋenuwo kpakple ɖinu bubuwo ɖe atsiaƒua me. Agbalẽ aɖe gblɔ be “aɖinu siawo gblẽa nu le tɔmelãwo kple tɔmegbewo kpakple ame siwo ɖua tɔmelã siawo la ŋu.”—Encyclopedia of Marine Science.

Tsi nyuiwo dome le gbegblẽm. Britaintɔwo ƒe dzɔdzɔmeŋutinunyagbalẽ ŋlɔla Robin McKie gblɔ ŋkubiãtɔe be: “Xexea katã dze ŋgɔ tsi nyui ƒe anyimanɔmanɔ ƒe kuxi gã aɖe.” Dunyahelawo lɔ̃ ɖe edzi be amegbetɔwo gbɔe wòtso be tsiwo dome le gbegblẽm eye esia zu kuxi sesẽ aɖe.

DZƆDZƆMENUWO LE NU GBLẼM LE AMEGBETƆWO ŊU. Ahomwo, ya sesẽwo kple anyigbaʋuʋuwo naa tsiɖɔɖɔ gãwo, agaɖevi dziŋɔwo kple afɔku bubuwo gblẽa nu le amewo ŋu. Fifia dzɔdzɔmenu siawo gblẽa nu le ame gbogbowo ŋu alo wua wo wu ɣeyiɣi ɖe sia ɖe. Amerika dukɔa ƒe dɔwɔƒe (NASA) si kua nu me tso yameʋuwo wɔwɔ kple yamenutowo me ŋu gblɔ be, “ahom sesẽwo ate ŋu atu, yame ate ŋu axɔ dzo eye tsiɖɔɖɔwo kple kuɖiɖi sesẽwo hã ate ŋu ava ɖe wo nɔewo yome.” Ðe dzɔdzɔmenuwo atsrɔ̃ amegbetɔwoa?

Le nyateƒe mea, wò hã ànya bu nu bubu siwo ate ŋu atsrɔ̃ amegbetɔwo la ŋu. Ke hã ne ède ŋugble le nu manyomanyo siwo le dzɔdzɔm fifia ŋu gɔ̃ hã la, màte ŋu ake ɖe ŋuɖoɖo nyui siwo ku ɖe etsɔme ŋu la ŋu o. Ame siwo ɖoa to dunyahelawo kple dzɔdzɔmeŋutinunyalawo hã gblɔ nenema ke. Abe ale si míegblɔe le nyati si do ŋgɔ me ene la, ame geɖe ke ɖe nyabiase siwo ku ɖe xexea ƒe nɔnɔmewo kple ale si nuwo ava nɔ le etsɔme ƒe ŋuɖoɖo nyuiwo ŋu. Afi kae míate ŋu akpɔ ŋuɖoɖoawo le?