Agbemeŋutinya

Ŋkuɖoɖo Mía Wɔla Dzi Tso Míaƒe Sɔhɛmenɔɣi

ABE ALESI DAVID Z. HIBSHMAN GBLƆE ENE

“Ne kudo nue meɖo la, meka ɖe edzi be mesubɔ Yehowa le nuteƒewɔwɔ me vavã. Mele kuku ɖem nɛ be wòakpɔ David dzi nam. Akpe na wò ɖe eta, Yehowa, eye akpe na wò ɖe míaƒe srɔ̃ɖeɖea ta. Enyo ŋutɔ, edo dzidzɔ na mí ŋutɔ!”

BU ALESI mese le ɖokuinye me ŋu kpɔ esime míeɖi srɔ̃nye le March 1992 vɔ megbe, eye mekpɔ eƒe nya mamlɛ siawo le eƒe nuŋlɔɖigbalẽ me. Ɣleti atɔ̃ koe nye ema va yi esi míeɖu Helen ƒe ƒe 60 xɔxɔ le ɣeyiɣiawo katã ƒe subɔsubɔdɔa me.

Meɖo ŋku ŋkeke si tututu dzi mía kple Helen míenɔ anyi ɖe teƒe ɖeka le takpekpe me le Columbus, Ohio, U.S.A. le ƒe 1931 me la dzi. Helen mexɔ ƒe 14 tututu ɣemaɣi o, gake ekpɔ ŋudzedze ɖe takpekpea ƒe vevienyenye ŋu wum gɔ̃ hã. Eteƒe medidi o, Helen ɖe eƒe dzonɔameme ɖe subɔsubɔdɔa ŋu fia esi wo kpakple dadaa si nye ahosi la va zu mɔɖelawo, si nye alesi woyɔa amesiwo nye ɣeyiɣiawo katã ƒe nyanyuigblɔlawo le Yehowa Ðasefowo dome. Woɖe asi le aƒe nyui si nɔ wo si ŋu va nɔ gbeƒã ɖem le kɔƒe nutowo me le United States ƒe anyiehekpa dzi.

Nye Kristotɔnyenye ƒe Domenyinu

Le ƒe 1910 me la, dzinyelawo ʋu kple wo vi sue eve tso Pennsylvania ƒe ɣedzeƒekpa dzi yi Grove City, le nutoa ƒe ɣetoɖoƒekpa dzi. Woƒle aƒe sue aɖe le afima hexe fea ƒe akpa aɖe eye wova zu Sɔlemeha si Woɖɔ Ðo me tɔ dovevienuwo. Ema megbe kpuie la, William Evans, si nye Biblia Nusrɔ̃vi, si nye ŋkɔ si woyɔna na Yehowa Ðasefowo ɣemaɣi la, va srã wo kpɔ. Papa, si nɔ eƒe ƒe 20-awo me ɣemaɣi, eye wòtsi wu Dada ƒe atɔ̃, ɖo to ŋutsu xɔlɔ̃wɔla sia si tso Wales eye wokpee be wòaɖu nu kple yewo. Eteƒe medidi o, woxɔ Biblia me nyateƒe si srɔ̃m wonɔ la.

 Be ƒomea nate ɖe afisi hamea nɔ ŋu la, Papa ʋu kple ƒomea yi du si nye Sharon me, si gbɔ didi abe kilometa 40 ene. Ɣleti aɖewo megbe le ƒe 1911 alo 1912 me la, Papa kple Dada xɔ nyɔnyrɔ. Charles Taze Russell, si nye Gbetakpɔxɔ Habɔbɔa ƒe zimenɔla gbãtɔe ƒo nyɔnyrɔxɔxɔ nuƒoa. Wodzim le December 4, 1916, ɖe vi ene siwo nɔ dzinyelawo si xoxo la yome. Esime wodzim la, woɖe gbeƒã le ŋunye be: “Nɔviŋutsu lɔlɔ̃tɔ bubu va.” Eyatae wotsɔ ŋkɔ nam be David, si gɔmee nye “Lɔlɔ̃tɔ.”

Esime mexɔ kwasiɖa ene la, wokɔm yi takpekpe gbãtɔ si mede kpɔ. Le gɔmedzeɣeyiɣi mawo me la, fofonye kple fonyewo zɔa afɔ kilometa geɖe yia hamea ƒe kpekpewo, eye Dada kɔa mía kple nɔvinyenyɔnu míeɖoa ʋu. Wowɔa kpekpea ƒe akpa aɖe le ŋdi eye akpa bubu le ŋdɔ. Zi geɖe ne míele aƒeme la, míaƒe dzeɖoɖo kuna ɖe Gbetakpɔxɔ kpakple Nyɔ!, si woyɔna tsã be The Golden Age, me nyatiwo ŋu.

Nusɔsrɔ̃ tso Kpɔɖeŋuɖola Nyuiwo Gbɔ

Mɔzɔla, si nye ŋkɔ si woyɔna na dzikpɔla mɔzɔlawo ɣemaɣi, geɖe va srã míaƒe hamea kpɔ. Zi geɖe wonɔa mía gbɔ ŋkeke ɖeka alo eve. Nuƒolaawo dometɔ si dzi megaɖoa ŋkui kokokoe nye Walter J. Thorn, si ɖo ŋku eƒe Wɔla Gã la dzi le ‘eƒe ɖekakpuiŋkekewo me.’ (Nyagblɔla 12:1) Esime menye ŋutsuvi dzaa la, mekplɔa Papa ɖo míeɖea “Xexemewɔwɔ ƒe Fotoɖeɖefia” si nye ameƒomea ƒe ŋutinya si wogblɔ helé ɖe mɔ̃ dzi wòle akpa ene me la fiana.

Togbɔ be Nɔviŋutsu Evans kple srɔ̃a Miriam medzi vi o hã la, wova zu gbɔgbɔ me dzilawo kple tɔgbui kpakple mama na míaƒe ƒomea. William yɔa Papa ɣesiaɣi be “Vinye,” eye wo kple Miriam woƒã nyanyuigbɔgblɔdɔa wɔwɔ ƒe gbɔgbɔ ɖe míaƒe ƒomea me. Le ƒe alafa 20 lia ƒe gɔmedzedze la, Nɔviŋutsu Evans zɔa mɔ yia Wales hetsɔa Biblia me nyateƒea yia Swansea nuto me. Woyɔnɛ le afima be gbeƒãɖela si tso Amerika.

Le ƒe 1928 me la, Nɔviŋutsu Evans ɖe asi le dɔ si wòwɔna ŋu hete gbeƒãɖeɖe le West Virginia ƒe togbɛwo dzi. Fonye tsitsi eve, Clarence si xɔ ƒe 21 kple Carl, si xɔ ƒe19 yi kplii. Mí ŋutsuvi enea katã míewɔ ɣeyiɣiawo katã ƒe subɔsubɔdɔa ƒe geɖe. Le nyateƒe me la, mí katã míewɔ Yehowa Ðasefowo ƒe dzikpɔla mɔzɔla dɔa le míaƒe ɖekakpui me. Nyitsɔ laa la, Danye nɔvinyɔnu ɖevitɔ, Mary, si le eƒe ƒe 90-awo me fifia ŋlɔ agbalẽ nam be: “Aleke gbegbe mí katã míedaa akpee nye si be Nɔviŋutsu Evans tsɔ dzo ɖe subɔsubɔdɔa wɔwɔ ŋu eye wòɖi tsa va Grove City!” Daɖia Mary hã nye ame bubu si ɖo ŋku eƒe Wɔla dzi tso eƒe ɖevi me.

Takpekpewo Yiyi

Papa kple Clarence koe te ŋu de takpekpe si wowɔ le Cedar Point, Ohio, le ƒe 1922 me, si womaŋlɔ be akpɔ le ŋutinya me o la. Gake le ƒe 1924 me la, ʋu nɔ mía si, eye míaƒe ƒomea katã de takpekpe si wowɔ le Columbus, Ohio. Wogblɔ na mí ɖeviawo be míadzra ga ɖo atsɔ aɖu nui le ŋkeke enyi takpekpea me. Mía dzilawo ƒe susue nye be ele be ƒomea me tɔ ɖesiaɖe nasrɔ̃ alesi wòakpɔ eɖokui dzii. Eyata míenyia koklo kple fɔmizi eye anyixɔ nɔ mía si míenyia anyi le wo me, eye mí ŋutsuviawo katã míedzraa nyadzɔdzɔgbalẽ hã.

Esi Toronto, Canada, takpekpea yiyi ɖo edzi le ƒe 1927 me la, nɔviŋutsu si nye vidzĩ si  xɔ ɣleti ade nɔ mía si, si ŋkɔe nye Paul. Wode dɔ asinye be matsi aƒe akpe ɖe danyeɖia si nye srɔ̃tɔ ŋu míakpɔ Paul dzi, ne dzinyelawo kple ɖevi susɔeawo nayi Toronto takpekpea. Wona dɔlar ewom ɖe eta, eye metsɔe ƒle kot yeye. Wofia mí ɣesiaɣi be míado awu nyuie hafi ayi kpekpewo, eye míalé be na míaƒe nudodowo.

Le takpekpe si wowɔ le Columbus, Ohio, le ƒe 1931 me si womaŋlɔ be akpɔ gbeɖe o wɔɣi la, srɔ̃ nɔ Clarence kple Carl si eye wo kpakple wo srɔ̃wo nɔ mɔɖeɖedɔa wɔm. Ʋu si woa ŋutɔwo wɔ wònye xɔdɔme mee wo dometɔ ɖesiaɖe nɔ. Carl ɖe Claire Houston, si tso Wheeling, West Virginia, eye susu ma tae menɔ Claire nɔvinyɔnu ɖevitɔ, Helen, xa le Columbus takpekpea me ɖo.

Ɣeyiɣiawo Katã ƒe Subɔsubɔdɔa

Medo le kɔledzi le ƒe 1932 me esi mexɔ ƒe 15, eye le ƒe si kplɔe ɖo me la, meku ʋu xoxo aɖe yi na nɔvinyeŋutsu Clarence si nɔ mɔɖeɖedɔa wɔm le South Carolina. Meɖo dɔbiagbalẽ ɖa be mawɔ mɔɖeɖedɔa eye mete dɔa wɔwɔ kple Clarence kpakple srɔ̃a. Ɣemaɣi la, Helen nɔ mɔɖeɖedɔa wɔm le Hopkinsville, Kentucky, eye meŋlɔ lɛta nɛ zi gbãtɔ. Esi wòɖo eŋu nam la, ebiam be: “Mɔɖelae Nènyea?”

Le nye lɛtaa me la,—Helen dzrae ɖo vaseɖe eƒe kugbe ƒe 60 kloe megbe—meɖo eŋu be: “Ẽ, eye mele mɔ kpɔm be manye mɔɖela ɖaa.” Megblɔ na Helen le lɛta ma me be memaa agbalẽvi si nye The Kingdom, the Hope of the World na osɔfowo kple ʋɔnudrɔ̃lawo ne mele gbeƒãɖeɖedɔa wɔm.

Le ƒe 1933 me la, Papa wɔ avɔgbadɔʋu si nye xɔdɔme nam—enye ʋu si ŋu wofa avɔ ɖo ƒo xlãe si didi meta 2.4 eye wòkeke meta 2, eye fesre le eƒe ŋgɔgbe kple megbe siaa. Emae nye aƒe si me menɔ le ƒe ene siwo me menɔ mɔɖeɖedɔa wɔm me.

Le March 1934 me la, mía kple Clarence kple Carl, wo srɔ̃wo, Helen kple dadaa, kpakple Clarence srɔ̃ nɔvinyɔnu—míenɔ ame enyi—míeɖo ta ɣetoɖoƒe, yi takpekpe le Los Angeles, California. Ame aɖewo ɖo nye ʋua tsi eme dɔ hã. Nye hã medɔ ʋua me, eye ame susɔeawo haya dzeƒe. Esi ʋunyawo ɖe fu na mí ta la, míeva ɖo Los Angeles le ŋkeke ade takpekpea ƒe ŋkeke eveagbe. Le March 26 lia dzi le afima la, mía kple Helen míetsɔ nyɔnyrɔxɔxɔ ɖe tsi me ɖo kpe míaƒe adzɔgbeɖeɖe na Yehowa dzi mlɔeba.

Le takpekpea me la, Joseph F. Rutherford, si nye Gbetakpɔxɔ Habɔbɔa ƒe zimenɔla ɣemaɣi kpe kple mɔɖelawo katã. Ede dzi ƒo na mí be Biblia me nyateƒea taʋlila kalẽtɔwoe míenye. Le kpekpe ma me la, wowɔ ɖoɖo be woana gakpekpeɖeŋu mɔɖelawo ale be woate ŋu ayi subɔsubɔdɔa dzi.

Agbe me Nusɔsrɔ̃

Esi míetrɔ tso Los Angeles takpekpea gbɔ la, mí katã míegblɔ Fiaɖuƒegbedasia na amesiwo le South Carolina, Virginia, West Virginia, kple Kentucky nutoawo katã me. Ƒe aɖewo megbe la, Helen ŋlɔ nu tso ɣemaɣi ŋu be: “Hame aɖeke menɔ anyi si ŋu míaziɔ ɖo o, eye xɔlɔ̃ aɖeke menɔ anyi akpe ɖe mía ŋu o, elabena le nyateƒe me la, míenye amedzrowo nɔ dzronyigba dzi. Gake fifia menyae be nu srɔ̃mee menɔ. Nuteƒekpɔkpɔ geɖe nɔ asinye sum.”

Ebia be: “Nukae ɖetugbi atsɔ eƒe ɣeyiɣi awɔe esime wòdzo le wo de kple etɔwo gbɔ? Nya vɔ̃ aɖeke medzɔ o. Nyemeɖo ŋku edzi be nu ti kɔ nam kpɔ hã o. Mexlẽa nu ŋutɔ. Medzɔ kpɔ be míedo kpo míaƒe Biblia-srɔ̃gbalẽwo xexlẽ kple nusɔsrɔ̃ o. Menɔ danye ŋu kplikplikpli, mesrɔ̃  alesi mazã ga si nɔ mía si, meƒlea asi, meɖɔlia lɔri taya, meɖaa nu, metɔa nu, eye meɖea gbeƒã. Wo wɔwɔ mete ɖe dzinye o, eye adzɔ dzi nam be magawɔe ake.”

Togbɔ be aƒe nyui aɖe nɔ Helen dada si hã la, edze wo ŋu be yewoanɔ ʋu sue aɖe si wowɔ wònye xɔdɔme me. Le Columbus, Ohio takpekpea megbe le ƒe 1937 me la, Helen dada ƒe lãme va gblẽ ŋutɔ eye woxɔe ɖe kɔdzi. Eku ɖe Philippi, West Virginia, afisi woɖoe ɖo, le November 1937 me.

Srɔ̃ɖeɖe Kple Dɔa Dzi Yiyi

Le June 10, 1938, dzi la, mía kple Helen míeɖe mía nɔewo le srɔ̃ɖewɔna kpokploe aɖe me le aƒe si me wodzii ɖo le Elm Grove, si te ɖe Wheeling, West Virginia ŋu me. Mía Nɔviŋutsu lɔlɔ̃tɔ Evans, amesi fia nyateƒea míaƒe ƒomea ƒe geɖe hafi wova dzim lae ƒo srɔ̃ɖenuƒoa. Le srɔ̃kpekpea megbe la, mía kple Helen míeɖoe be míagbugbɔ ayi mɔɖeɖedɔa wɔwɔ dzi le Kentucky ƒe ɣedzeƒekpa dzi, gake nukutɔe la, wokpe mí be míava wɔ nutomedɔa. Dɔ sia wɔwɔ lɔ Yehowa Ðasefowo ƒe ƒuƒoƒo siwo le Kentucky ƒe ɣetoɖoƒekpa dzi kple Tennessee ƒe akpa aɖewo sasrã kpɔ ɖe eme. Le ɣemaɣi la, Fiaɖuƒegbeƒãɖela siawo ƒe xexlẽme si anɔ 75 pɛ koe nɔ afisiwo katã míeyi.

Ɣemaɣi la, dulɔlɔ̃ tɔtɔ susu na ame geɖe, eye menɔ mɔ kpɔm be eteƒe madidi o woadem mɔ le Kristotɔwo ƒe akpaɖekedzimademade ta. (Yesaya 2:4) Gake le esi wodze sii be gbeƒãɖeɖedɔe mewɔna ta la, dɔwɔƒe si tiaa dukɔmeviwo na asrafodɔwɔwɔ sesẽe ɖem ɖa le eme si na mɔɖeɖe su asinye be mayi ɣeyiɣiawo katã ƒe subɔsubɔdɔa dzi.

Esi míedze mɔzɔzɔdɔa gɔme la, amesiame kloe gblɔ nya aɖe tso míaƒe sɔhɛnyenye ŋu. Le Hopkinsville, Kentucky la, nɔvinyɔnu Kristotɔ aɖe tsɔ vividoɖeameŋu blibo kpla Helen hebiae be: “Èɖo ŋku dzinyea?” Le ƒe 1933 me la, Helen ɖe gbeƒã nɛ le fiase aɖe si dzi kpɔm srɔ̃aŋutsua nɔ la me. Kwasiɖagbe suku ƒe nufialae wònye, gake esi wòxlẽ agbalẽ si Helen tsɔ nɛ vɔ la, etɔ ɖe sukuviawo ŋkume ɖe kuku na wo ɖe nusiwo wòfia wo siwo metso Biblia me o la ta. Esi wòdo le sɔlemeha si me wònɔ me vɔ la, ete gbeƒã ɖeɖe Biblia me nyateƒea le eƒe nutoa me. Mía kple Helen míesubɔ le Kentucky ƒe ɣetoɖoƒekpa dzi ƒe etɔ̃ eye nɔvinyɔnu ma kple srɔ̃a ƒe aƒemee míedzena.

Ɣemaɣiwo la, míewɔa nutome sue takpekpewo, eye A. H. Macmillan ƒo nu le takpekpe siawo dometɔ ɖeka me. Enɔ Helen dzilawo ƒeme kpɔ esime Helen nye ɖevi, eyata le takpekpea wɔɣi la, etiae be yeanɔ mía gbɔ le míaƒe ʋu si nye xɔdɔme, si didi meta 5, eye abati bubu nɔ eme la me. Eya hã ɖo ŋku eƒe Wɔla Gã la dzi le eƒe ɖekakpuiŋkekewo me, etsɔ eƒe agbe ɖe adzɔgbee na Yehowa le ƒe 1900 me, esime wòxɔ ƒe 23.

Le November 1941 me la, woɖo asi nɔvi mɔzɔlawo ƒe dɔa dzi vie, ale be woɖom ɖe mɔɖeɖedɔa me le Hazard, Kentucky. Míegakpɔ mɔnu wɔ dɔ kple nɔvinyeŋutsu Carl kple srɔ̃a Claire ake. Le afisia la, Joseph Houston, Helen ƒe tasiyɔvi va mía gbɔ hedze mɔɖeɖedɔa wɔwɔ gɔme. Eyi ɣeyiɣiawo katã ƒe subɔsubɔdɔa dzi wòsusɔ vie wòasubɔ ƒe 50, gake dzidɔ va wui kpata le ƒe 1992 me esime wònɔ subɔsubɔm nuteƒewɔwɔtɔe le Yehowa Ðasefowo ƒe xexeame katã ƒe dɔwɔƒegã le Brooklyn, New York.

Le ƒe 1943 me la, woɖo mí ɖe Rockville, Connecticut. Afisia trɔ yeyee na mía kple Helen siaa, elabena gbeƒãɖeɖe le anyiehe ma mí. Le Rockville la, Helen wɔa Biblia-nusɔsrɔ̃ wòwua 20 edziedzi kwasiɖa sia kwasiɖa. Le ɣeyiɣi aɖe megbe la, míeva haya xɔ kpokploe aɖe tsɔ wɔ Fiaɖuƒe Akpatae tsɔ dze hame sue aɖe gɔmee.

Esi míenɔ subɔsubɔm le Rockville la, wokpe mí be míava de Gbetakpɔxɔ Habɔbɔa ƒe Gilead Biblia Suku ƒe klass atɔ̃lia le South Lansing, New York. Dzidzɔtɔe la, míeva see be Aubrey kple Bertha Bivens, siwo nye mía xɔlɔ̃wo esi míenɔ mɔɖeɖedɔa wɔm le Kentucky gbɔna míaƒe sukuxɔmehatiwo nye ge.

Sukua Kple Míaƒe Dɔdasi Yeye

Togbɔ be míeganye sɔhɛwo hã la, míetsi wu míaƒe sukuxɔmehati akpa gãtɔ gɔ̃ hã. Ẽ, wonɔ ŋku ɖom wo Wɔla Gã la dzi le woƒe ɖekakpuiŋkekewo me. July 1945 mee míewu sukua nu,  esi Xexemeʋa II nɔ kekem. Esi míenɔ afisi woaɖo mí ɖo míava wɔ dutanyanyuigbɔgblɔdɔa lalam la, míede gbedzi kple Flatbush Hamea le Brooklyn, New York. Mlɔeba le October 21, 1946 la, míeɖo yameʋu yi mía dedu yeyea me le Guatemala City le Guatemala hekpe ɖe míaƒe sukuxɔmehati ade bubu siwo dome Bivens kple srɔ̃a hã nɔ ŋu. Ɣemaɣi la, Yehowa Ðasefo siwo nɔ Titina Amerika dukɔ ma katã me mede 50 o.

Le April 1949 me la, woɖe mí dutanyuigblɔlawo dometɔ ʋɛ aɖewo ɖo ɖe Quetzaltenango, si nye dukɔa ƒe du vevi lolotɔ evelia me. Dua le teƒe si kɔkɔ gbɔ atsiaƒu ŋu meta 2,300, eye ya si ƒona le tonyigba sia dzi la me dza hefa miɔ. Helen ŋlɔ nu tso dɔ si míewɔ le afisia ŋu kpuie be: “Mɔnukpɔkpɔe wònye na mí be míeɖe gbeƒã le du kple kɔƒe geɖe me. Míefɔna abe fɔŋli ga ene ene heɖoa atiʋu yia didiƒe du aɖe me. Míeɖea gbeƒã le afima abe gaƒoƒo enyi ene hafi gbɔna le fiẽ me.” Egbea la, hame le teƒe siawo dometɔ geɖe, hekpe ɖe hame ade ŋu le Quetzaltenango.

Eteƒe medidi o wonɔ dutanyanyuigblɔlawo dim be woasubɔ le Puerto Barrios le Caribbean Ƒuta, si nye dugã etɔ̃lia le Guatemala. Míaƒe zɔhɛ lɔlɔ̃tɔwo, Bivens kple srɔ̃a siwo míewɔ dɔ kpli ƒe atɔ̃ sɔŋ le Guatemala hã nɔ amesiwo yi du yeyea me la dome. Kaklã la sesẽ ŋutɔ eye míesusua wo ale gbegbe. Esi wònye mía kple Helen ɖeɖekoe susɔ ɖe dutanyanyuigblɔlawo ƒe aƒea me ta la, míeʋu yi aƒe sue aɖe me. Le ƒe 1955 me la, woɖo mía kple Helen ɖe du bubu si nye Mazatenango me, du si me dzoxɔxɔ le wu. Nɔvinyeŋutsu ɖevitɔ, Paul kple srɔ̃a Dolores siwo do le Gilead Sukua le ƒe 1953 me nɔ subɔsubɔm le afima vie hafi míeyi.

Kaka ƒe 1958 naɖo la, Ðasefowo sɔ gbɔ wu 700, hame 20 kple nutome sue etɔ̃ nɔ Guatemala. Mía kple Helen míegage ɖe mɔzɔzɔdɔa me ake, míesrãa Ðasefowo ƒe ƒuƒoƒo suewo kple hame geɖe hekpe ɖe hame si le Quetzaltenango ŋu kpɔna. Emegbe le August 1959 me la, woyɔ mí be míagbugbɔ ayi Guatemala City, eye míeɖanɔ alɔdzedɔwɔƒea. Wona dɔm le alɔdzedɔwɔƒea, gake Helen ya yi dutanyanyuigbɔgblɔdɔa dzi ƒe 16 bubu. Emegbe eya hã te dɔwɔwɔ le alɔdzedɔwɔƒea.

Yayra Bubuwo

Ƒe aɖewoe nye si va yi la, edze abe nyee nye ɖevitɔ kekeake nɔ Yehowa subɔlawo dome ene. Fifia la, nyee nyea tsitsitɔ kekeake zi geɖe, abe alesi wònɔ esime meyi alɔdzedɔwɔƒe sukua le Patterson, New York, le ƒe 1996 me ene. Abe alesi ko ame tsitsiwo kpe ɖe ŋunye ale gbegbe esi menye sɔhɛ ene la, le ƒe siawo me la, enye mɔnukpɔkpɔ nam be makpe ɖe sɔhɛ geɖe siwo di be yewoaɖo ŋku yewo Wɔla dzi le yewoƒe ɖekakpuiŋkekewo me ŋu.

Yehowa yi edzi le eƒe amewo yram geɖe le Guatemala afisia. Le ƒe 1999 me la, hame siwo nɔ Guatemala City wu 60. Eye le dziehe, anyiehe, ɣedzeƒe, kple ɣetoɖoƒe siaa la, hame geɖewo li eye Mawu Fiaɖuƒea ŋuti gbeƒãɖela akpe geɖewo li. Fiaɖuƒegbeƒãɖela siwo mede 50 o esime míeva anye ƒe 53 enye esiwo va yi la dzi ɖe edzi wu 19,000!

Nu Geɖe Li si Ta Míada Akpe Ðo

Ame aɖeke menɔa agbe kuxi aɖeke me matomatoe o, gake míate ŋu atsɔ míaƒe ‘nyawo adro ɖe Yehowa dzi’ ɣesiaɣi. (Psalmo 55:23) Etoa zɔhɛ lɔ̃amewo ƒe kpekpeɖeŋu dzi léa mí ɖe te zi geɖe. Le kpɔɖeŋu me, ƒe ʋɛ aɖewo do ŋgɔ na Helen ƒe ku la, etsɔ atikpakpɛ sue aɖe nam, si dzi woŋlɔ Hebritɔwo 6:10 me nyawo ɖo be: ‘Mawu menye madzɔmadzɔtɔ be, wòaŋlɔ wò dɔwɔwɔ kple lɔlɔ̃, si nèɖe fia le eƒe ŋkɔ ta, le esime nèsubɔ ame kɔkɔewo, eye nègale edzi le wo subɔm la be o.’

 Eŋlɔ nya aɖewo kpe ɖe eŋu, si ƒe akpa aɖe xlẽ be: “Nye lɔlɔ̃tɔ, naneke mele asinye mana wò tsɔ wu NYE LƆLƆ̃ BLIBO o . . . Mawunyakpukpui sia ku ɖe ŋuwò ale gbegbe, eye medi be nàtsɔe ada ɖe wò kplɔ̃ dzi le dɔme, menye esi nyee tsɔe na wò ta o, ke boŋ be eku ɖe ŋuwò esi nètsɔ ƒe geɖe subɔe ta.” Vaseɖe egbe la, atikpakpɛa kpɔtɔ le nye kplɔ̃ dzi le ɔfis le Guatemala lɔdzedɔwɔƒea.

Mesubɔ Yehowa tso nye ɖekakpuiŋkekewo me ke, eye medaa akpe na Yehowa be le nye tsitsime fifia la, lãmesẽ le asinye be mete ŋu wɔa nye dɔdasiwo. Zi geɖe ne mele Biblia xlẽm la, medoa go mawunyakpukpui siwo mesusuna be ne nye lɔlɔ̃tɔ Helen ye le wo xlẽm la, anye ne ete fli ɖe wo te le eƒe Biblia me. Nya sia va nye tame esi megbugbɔ nɔ Psalmo 48:15 xlẽm ake, si gblɔ be: “Mawu siae nye mía Mawu ɖaa tegbee, eye akplɔ mí vaseɖe ku me.”

Enye dzidzɔ nam be magblɔ tsitretsitsi ŋkekea si dzi dukɔ ɖesiaɖe si nɔ anyi kpɔ me tɔwo ado dzaa na woƒe lɔlɔ̃tɔ siwo fɔ tso ku me va xexe yeyea me la ƒe mɔkpɔkpɔa na ame bubuwo. Mɔkpɔkpɔ nyui ka gbegbee nye si! Dzidzɔvi ka gbegbe enye si wòanye míafa gbemagbe esime míaɖo ŋku edzi be vavãe Yehowa nye Mawu, “[si faa] akɔ na ame bɔbɔɖeanyiwo”!—Korintotɔwo II, 7:6.

[Nɔnɔmetata si le axa 25]

Tso dzime le miame va yi anyime: Dada, Papa, Daɖia Eva, kple nɔvinyeŋutsu Carl kple Clarence, le ƒe 1910 me

[Nɔnɔmetata siwo le axa 26]

Mía kple Helen le ƒe 1947 kple 1992 me