Gbedodoɖa Ƒe Ŋusẽ

Ɣea nɔ to ɖom le Naxor-dua dzi le Titina Ɣedzeƒe. Siria-ŋutsu aɖe si ŋkɔe nye Eliezer kplɔ kposɔ ewo va ɖo vudo aɖe si le dua godo la to. Ðikeke mele eme o be ɖeɖi te Eliezer ŋu gake ame bubuwo ƒe nuhiahiãwoe nɔ vevie nɛ wu. Dutanyigba aɖe dzie wòtso va srɔ̃ di ge na eƒe aƒetɔ ƒe viŋutsu. Gawu la, ele be wòadi srɔ̃ sia le eƒe aƒetɔ ƒe ƒometɔwo dome. Aleke wòawɔ dɔ sesẽ siae?

ELIEZER xɔ gbedodoɖa ƒe ŋusẽ dzi se. Abe ɖevi si si xɔse ɖedzesi le ene la, ebia ɖokuibɔbɔtɔe be: “Yehowa, nye aƒetɔ Abraham ƒe Mawu! Meɖe kuku, na wòadze edzi nam egbea, eye nave nye aƒetɔ Abraham nu! Kpɔ ɖa, mele tsitre ɖe vudoa to, eye ne dua me nyɔnuviwo va tsi du ge, eye ava me be, nyɔnuvi aɖe ava, amesi magblɔ na bena: Na tsim mano, eye wòaɖo ŋu nam be: Noe, eye mana wò kposɔwo hã nano la, ekema eyae nye nyɔnu, si nèɖo ɖi na wò dɔla Isak, eye eya me madze sii le be, ève nye aƒetɔ nu!”—Mose I, 24:12-14.

Eliezer meɖo ŋu ɖe gbedodoɖa ƒe ŋusẽ ŋu dzodzro o. Nukutɔe la, edzɔ be nyɔnu gbãtɔ si va vudoa to la nye Abraham nɔvi ƒe tɔgbuiyɔvi! Eŋkɔe nye Rebeka, eye srɔ̃ menɔ esi o, enɔa agbe nyui, eye wòdze tugbe. Nukutɔe la, menye Eliezer koe wòna tsii o ke boŋ ebia dɔmenyotɔe be yeana tsi eƒe kposɔwo katã hã wòano. Emegbe le nuƒoƒo kple ƒomea vɔ megbe la, Rebeka lɔ̃ faa be yeakplɔ Eliezer ɖo ayi dutanyigba aɖe dzi ava zu Abraham ƒe vi Isak srɔ̃. Eliezer ƒe gbedodoɖaa ŋuɖoɖo wɔdɔɖeamedzi si dze nyuie kae nye esi esia nye le ɣeyiɣi si me Mawu dea nu nudzɔdzɔwo me nukutɔe ɣeaɖewoɣi!

Míate ŋu asrɔ̃ nu geɖe tso Eliezer ƒe gbedodoɖaa me. Eɖe eƒe xɔse si ɖe dzesi, ɖokuibɔbɔ, kple ɖetsɔtsɔ le ame bubuwo ƒe nuhiahiãwo me ɖokuitɔmadimaditɔe fia. Eliezer ƒe gbedodoɖa ɖe eɖokuibɔbɔ ɖe alesi Yehowa wɔa nu kple ameƒomeae tẽ hã fia. Ðikeke mele eme o be enya nu tso ƒomedodo tɔxɛ si le Mawu kple Abraham dome kpakple Eƒe ŋugbe si wòdo be etsɔme yayrawo ava na ameƒomea katã to Abraham dzi la ŋuti. (Mose I, 12:3) Eyatae Eliezer dze eƒe gbedodoɖa gɔme kple nya siawo be: “Yehowa, nye aƒetɔ Abraham ƒe Mawu!”

Yesu Kristoe nye Abraham ƒe dzidzimevi si dzi woato ayra ameƒomea katã. (Mose I, 22:18) Ne míedi be woaɖo míaƒe gbedodoɖawo ŋu egbea la, ele be míakpɔ ŋudzedze ɖe alesi Mawu le nu wɔmee kple ameƒomea to Via dzii ŋu le ɖokuibɔbɔ me. Yesu Kristo gblɔ be: “Ne mienɔa menye, eye nye nyawo hã nɔa mia me  la, ekema nusi ke mielɔ̃ bia la, woawɔe na mi.”—Yohanes 15:7.

Kristo yomedzela aɖe si kpɔ Yesu ƒe nya siawo ƒe nyateƒenyenye teƒe enye apostolo Paulo. Le nyateƒe me la, mexɔ gbedodoɖa ƒe ŋusẽ dzi se dzodzro o. Ede dzi ƒo na hati Kristotɔwo be woatsɔ woƒe dzimaɖitsitsiwo katã ayi Mawu gbɔ le gbedodoɖa me eye wòɖi ɖase be: “Metea ŋu wɔa nuwo katã le Kristo, amesi doa ŋusẽm la me.” (Filipitɔwo 4:6, 7, 13) Ðe esia fia be Mawu wɔ nusiwo katã Paulo biae le gbedodoɖa me la nɛa? Mina míakpɔe ɖa.

Menye Biabiawo Katã Ŋue Woɖona O

Le Paulo ƒe ɖokuitɔmadimadi ƒe subɔsubɔdɔa me la, nusi wòɖɔ be enye ‘ŋù le eƒe ŋutilã me’ la ɖe fu nɛ. (Korintotɔwo II, 12:7) Esia ate ŋu anye nuxaxa si tsitretsiɖeŋulawo kple ‘aʋatsonɔviwo’ do nɛ. (Korintotɔwo II, 11:26; Galatiatɔwo 2:4) Alo anye ŋkudɔ si ɖea fu nɛ edziedzi si menaa eƒe dzi dzea eme o. (Galatiatɔwo 4:15) Wo dometɔ kae wòɖanye o, ‘ŋù sia si nɔ Paulo ƒe ŋutilã me’ na wògbɔdzɔ. Eŋlɔ bena: “Meyɔ Aƒetɔ la zi etɔ̃, bene wòadzo le ŋunye.” Gake womeɖo Paulo ƒe biabiaa ŋu o. Woɖe eme na Paulo be gbɔgbɔmeviɖe siwo wòkpɔ tso Mawu gbɔ xoxo, abe ŋusẽ si wòtsɔ nɔa te ɖe dodokpɔwo nu ene, la sɔ gbɔ. Gakpe ɖe eŋu la, Mawu gblɔ be: “Nye ŋusẽ zu blibo le gbɔdzɔgbɔdzɔ me.”—Korintotɔwo II, 12:8, 9.

Nukae míesrɔ̃ tso Eliezer kple Paulo ƒe kpɔɖeŋuawo me? Le nyateƒe me la, Yehowa Mawu sea amesiwo dina ɖokuibɔbɔtɔe be yewoasubɔe la ƒe gbedodoɖawo. Gake esia mefia be Mawu ɖoa woƒe biabiawo ŋu ɣesiaɣi o elabena ebua nuwo ŋu yia ŋgɔ. Enya nusi nyo na mí wu alesi míawo míenyae. Vevietɔ wu la, ewɔa nu ɖe eƒe tameɖoɖo siwo le Biblia me nu.

Gbɔgbɔmedɔwo Daɣi

Mawu do ŋugbe be yeada ameƒomea ƒe ŋutilã, susu kple seselelãme me dɔwo katã le Ƒe Akpe Ðeka ƒe Dziɖuɖu si me Via aɖu anyigba dzi le. (Nyaɖeɖefia 20:1-3; 21:3-5) Nyateƒe Kristotɔwo tsɔ ŋusẽ si le Mawu si be wòana wòava eme dzixɔxɔse blibo le mɔ kpɔm vevie na etsɔme sia si ƒe ŋugbe wòdo. Togbɔ be womele mɔ kpɔm na nukugbedada sia fifia o hã la, wodoa gbe ɖa na Mawu biaa eƒe akɔfafa kple ŋusẽ be woanɔ te ɖe dodokpɔwo nu. (Psalmo 55:23) Ne wodze dɔ la, woate ŋu ado gbe ɖa abia Mawu ƒe mɔfiame bene yewoate ŋu akpɔ dɔdadamɔnu nyuitɔ si nu woƒe ga ate ŋu ade.

Subɔsubɔha aɖewo nɔa te ɖe nukugbedada siwo Yesu kple eƒe apostolowo wɔ dzi dea dzi ƒo na dɔnɔwo be woado gbe ɖa be woƒe lãme nasẽ fifia. Gake tameɖoɖo vevi aɖe tae wowɔ nukunu mawo ɖo. Woɖo kpe edzi be Yesu Kristoe nye Mesia vavã la eye woɖee fia be Mawu megakpɔ ŋudzedze ɖe Yuda dukɔa ŋu o ke Kristo-hame si woɖo yeyee la boŋ ŋue. Le ɣeyiɣi mawo me la, nukununanawo hiã be woatsɔ ado ŋusẽ Kristo-hame yeye si woɖo la ƒe xɔsee. Esi hame yeyea tso ɖe eƒe afɔwo dzi, le kpɔɖeŋumɔ nu, eye wòtsi la, ‘woɖe’ nukununanaawo “ɖa.”—Korintotɔwo I, 13:8, 11.

Le ɣeyiɣi vevi sia me la, Yehowa Mawu le mɔ fiam esubɔlawo le gbɔgbɔmedɔ si le vevie wu la dada me. Esi ɣeyiɣi kpɔtɔ li la, ehiã kpata be amewo nawɔ nu ɖe amekpekpe sia nu, be: “Midi Yehowa, ŋkeke alesi wòle gaglãgbe, miyɔe, esime wòtsɔ kpuiƒe. Ame vɔ̃ɖi neɖe asi le eƒe mɔ ŋu, eye nu vlo wɔla neɖe asi le eƒe susuwo ŋu, ne wòatrɔ ɖe Yehowa ŋu, ekema akpɔ nublanui nɛ, eye wòatrɔ ɖe mía Mawu ŋu, elabena etsɔa nuvɔ̃ kena geɖe.”—Yesaya 55:6, 7.

To gbeƒãɖeɖe Mawu ƒe Fiaɖuƒe nyanyuia me la, wole gbɔgbɔmedɔ sia dam na nuvɔ̃wɔla trɔdzimewo.(Mateo 24:14) To ŋusẽ si dom Yehowa Mawu le esubɔlawo bene woayi agbeɖeɖedɔ sia wɔwɔ dzi me la, ele kpekpem ɖe ame miliɔn geɖe siwo tso dukɔwo katã me ŋu be woatrɔ tso woƒe nuvɔ̃wo me ava nɔ ƒomedodo nyui me kplii hafi nuɖoanyi vɔ̃ɖi sia ƒe nuwuwu naɖo. Wole amesiwo katã doa gbe ɖa le anukwareɖiɖi me hena gbɔgbɔmegbedada sia kple amesiwo katã doa gbe ɖa biaa kpekpeɖeŋu be yewoatsɔ awɔ gbɔgbɔmegbedadadɔ sia ƒe gbedodoɖawo ŋu ɖom na wo.

[Nɔnɔmetata Tsoƒe si le axa 3]

Eliezer kple Rebeka/The Doré Bible Illustrations/Dover Publications