Toɖoɖo Yehowa Kple Dzi si Le Dzadzraɖoɖi

NUNƆLA Ezra si nye Israel-vi la nye numekula ɖedzesi aɖe, enye agbalẽnyala, nugbugbɔgaŋlɔla, kple Sefiala. Enye kpɔɖeŋu nyui aɖe hã na Kristotɔwo egbea le luʋɔ blibo tsɔtsɔ subɔe me. Le mɔ ka nu? Le susua nu be elé eƒe mawusosroɖa me ɖe asi esime wònɔ Babilon, du si me alakpamawuwo kple gbɔgbɔvɔ̃subɔsubɔ bɔ ɖo la me kura gɔ̃ hã.

Gake Ezra ƒe mawusosroɖa mesu esi bɔbɔe naneke mawɔmawɔ tso eŋui o. Ðe wòdze agbagba le eŋu. Le nyateƒe me la, egblɔ na mí be ‘yedzra yeƒe dzi ɖo be yeadzro Yehowa ƒe sea me ahawɔ edzi.’—Ezra 7:10.

Abe Ezra ene la, Yehowa ƒe ame siwo li egbea di be yewoawɔ nusianu si Yehowa di tso yewo si esime yewokpɔtɔ le xexe si lé fu nyateƒesubɔsubɔ la me. Eyata mina míadzro mɔ siwo nu míawo hã míate ŋu adzra míaƒe dzi, amesi míenye le ememe—hekpe ɖe míaƒe tamesusuwo, nɔnɔmewo, didiwo, kple seselelãmewo ŋu—ɖo be ‘wòadzro Yehowa ƒe sea me ahawɔ edzi’ la me.

Míaƒe Dzi Dzadzraɖo

“Be woadzra ɖo” fia be “woanɔ klalo do ŋgɔ ɖe nane ŋu: woadzra nane ɖo hena zazã, eŋudɔwɔwɔ, alo woana wòanɔ ɖoɖo nu.” Le nyateƒe me la, ne Mawu ƒe Nya la ŋuti sidzedze vavãtɔ su asiwò eye nètsɔ wò agbe ɖe adzɔgbe na Yehowa la, ekema wò dzi ɖee fia nyateƒe be ele dzadzraɖoɖi eye woate ŋu atsɔe asɔ kple “anyigba nyui” si ŋu Yesu ƒo nu tsoe le eƒe lododo ku ɖe nukuwula ŋu me.—Mateo 13:18-23.

Ke hã ele be míanɔ ŋku lém ɖe míaƒe dzi ŋu ahanɔ eme dzrom ɣesiaɣi. Nukatae? Le susu eve ta. Gbã le esi nɔnɔme gbegblẽwo ate ŋu aƒo ke ɖe to bɔbɔe abe gbe le abɔ me ene, vevietɔ le ‘ŋkeke mamlɛ’ siawo me, esi Satana ƒe nuɖoanyia ƒe ‘ya’ me yɔ fũ kple ŋutilã me tamesusu ƒe nuku vɔ̃ɖiwo fifia wu ɣeyiɣi ɖesiaɖe ta. (Timoteo II, 3:1-5; Efesotɔwo 2:2) Susu evelia ku ɖe anyigba la ŋutɔ ŋu. Ne womele asi trɔm le anyigba ŋu o la, eteƒe madidi hafi wòaƒu kplalaa, asesẽ, eye magawɔ nuku o. Alo ɖewohĩ ame gbogbo aɖewo azɔ to abɔa me ɖekematsɔlemetɔe si ana be anyigbaa naté ahaƒu kplalaa. Nenema tɔgbee míaƒe kpɔɖeŋudzi ƒe anyigbaa hã le. Ne míeɖe asi le eŋu alo amesiwo metsɔ ɖeke le míaƒe gbɔgbɔmenyonyo me o zɔ edzi la, magawɔ nuku o.

Ekema aleke gbegbe wòle vevie enye si be mí katã míatsɔ Biblia ƒe nuxlɔ̃ame sia awɔ dɔe be: “Dzɔ wò dzi ŋu wu nuwo katã, elabena eya me agbe tsona.”—Lododowo 4:23.

Nusiwo Naa Míaƒe Dzi ƒe “Anyigba” Nyona Ðe Edzi

Mina míade ŋugble le nanewo, alo nɔnɔme, siwo ana be míaƒe dzi ƒe “anyigba” nanyo ɖe edzi ale be wòawɔ nuku nyuie la ŋu. Le nyateƒe me la, nu geɖe li siwo ana míaƒe dzi ƒe nɔnɔme nanyo ɖe edzi, gake le afisia la, míade ŋugble le wo dometɔ ade ŋu: dzesidede míaƒe gbɔgbɔmenuhiahiã, ɖokuibɔbɔ, anukwareɖiɖi, mawuvɔvɔ̃, xɔse, kple lɔlɔ̃.

Yesu gblɔ be: “Dzidzɔtɔwoe nye amesiwo tsɔa ɖe le woƒe gbɔgbɔ me nuhiahiã me.” (Mateo 5:3, NW) Abe alesi ŋutilãmedɔwuame naa míeɖoa ŋku edzi be ele be míaɖu nu ene la, ŋkuɖoɖo míaƒe gbɔgbɔmenuhiahiã dzi nana be míesenɛ  le mía ɖokui me be ele be míaɖu gbɔgbɔmenuɖuɖu. Le dzɔdzɔme nu la, nuɖuɖu sia tɔgbe dzroa amegbetɔwo vevie elabena enana gɔmesese kple taɖodzinu nɔa agbe ŋu. Nyaƒoɖeamenu siwo tsoa Satana ƒe nuɖoanyia me alo kuviawɔwɔ le nusɔsrɔ̃ ŋu ate ŋu ana míagatsi dzi ɖe hiahiã sia ŋu o. Yesu gblɔ gɔ̃ hã be: “Menye abolo ɖeɖe ko ŋuti ame lanɔ agbe ɖo o, negbe ɖe nya sia nya, si dona tsoa Mawu ƒe nu me la ŋuti.”—Mateo 4:4.

Le ŋutilã gome la, nu ɖuɖu gbesiagbe, nuɖuɖu si me nunyiame le, kple nuɖuɖu nyuiwo naa lãmesẽ ame, eye wonaa ŋutilã la nɔa dzadzraɖoɖi na nuɖuɖu bubu si agava ne ɣeyiɣia de. Nenemae wòle le gbɔgbɔ me gome hã. Ðewohĩ àbu ɖokuiwò amesi nu menya srɔ̃na na o, gake ne èna Mawu ƒe Nya xexlẽ gbesiagbe zu numame na wò eye nèsrɔ̃a agbalẽ siwo wotu ɖe Biblia dzi edziedzi la, àkpɔe be nusɔsrɔ̃ ƒe dzodzro si aɖo ye me anɔ dzidzim ɖe edzi. Le nyateƒe me la, àva nɔ mɔ kpɔm na wò Biblia srɔ̃ɣiwo vevie. Eyata mègana ta bɔbɔe o; dze agbagba vevie nàtu dzodzro nyuitɔ ɖo ɖe gbɔgbɔmenuwo ŋu.

Ðokuibɔbɔ Naa Dzi Bɔbɔna

Ðokuibɔbɔ nye nu vevi aɖe le dzi si le dzadzraɖoɖi ƒe amesinɔnɔ me elabena enaa míelɔ̃na be woafia nu mí eye wòkpena ɖe mía ŋu be míaxɔ aɖaŋuɖoɖo kple ɖɔɖɔɖo si woana mí la. Bu kpɔɖeŋu nyui si Fia Yosia ɖo la ŋu kpɔ. Le eƒe dziɖuɣi la, wofɔ agbalẽ aɖe si me Mawu ƒe Se siwo wòde to Mose dzi la le. Esi Yosia se Sea me nyawo eye wòkpɔ alesi gbegbe tɔgbuiawo tra tso tadedeagu dzadzɛ gbɔe la, edze eƒe awuwo eye wòfa avi le Yehowa ŋkume. Nukatae Mawu ƒe Nya wɔ dɔ ɖe fia la ƒe dzi dzi nenema gbegbe ɖo? Nuŋlɔɖia gblɔ be eƒe dzi ‘bɔbɔ,’ ale be wòbɔbɔ eɖokui esi wòse Yehowa ƒe nyawo. Yehowa de dzesi Yosia ƒe dzi bɔbɔɖeanyi, si ɖoa to la, eye wòyrae ɖe enu.—Fiawo II, 22:11, 18-20.

Ðokuibɔbɔ kpe ɖe Yesu ƒe nusrɔ̃la siwo nye ‘ame manyagbalẽwo kple ame tsɛwo’ ŋu be wose gbɔgbɔmenyateƒe siwo amesiwo nye “nunyalawo kple nugɔmeselawo” le “ŋutilã nu” ko medze si o la gɔme hewɔ wo dzi. (Dɔwɔwɔwo 4:13; Luka 10:21; Korintotɔwo I, 1:26) Ame kemɛawo metsɔ ɖeke le eme be yewoaxɔ Yehowa ƒe nya o elabena dada na be woƒe dzi tri. Ðe wòwɔ nuku be Yehowa lé fu dada?—Lododowo 8:13; Daniel 5:20.

Anukwareɖiɖi Kple Mawuvɔvɔ̃

Nyagblɔɖila Yeremya ŋlɔ bena “dzi la, alakpatɔ wònye wu nuwo katã, nu gbegblẽ wònye, ameka ahadze sii ma?” (Yeremya 17:9) Dzia ƒe alakpatɔnyenye sia dzena le mɔ vovovowo nu, abe mía ɖokui nu si míeɖena ne míewɔ nu gbegblẽ ene. Egadzena ne míeŋe aɖaba ƒu gbɔdzɔgbɔdzɔ gã aɖe si le mía ŋu dzi. Gake anukwareɖiɖi akpe ɖe mía ŋu be míalɔ̃ ɖe nɔnɔme siwo le mía ŋu la dzi ale be míate ŋu awɔ asitɔtrɔ si ana be míaɖu dzia ƒe alakpatɔnyenye dzi. Hakpala la ɖe anukwareɖiɖi sia tɔgbe fia esi wòdo gbe ɖa be: “Yehowa, dom kpɔ, eye nadzro menye kpɔ, lólo nye ayikuwo kple nye dzi!” Edze ƒã be hakpala la dzra eƒe dzi ɖo be wòalɔ̃ Yehowa nadoe akpɔ ahadzro eme, togbɔ be ema wɔwɔ afia be wòalɔ̃ ɖe edzi be vodadawo le ye ŋu siwo dzi wòle be yeaɖu hã.—Psalmo 17:3; 26:2.

Mawuvɔvɔ̃, si lɔ “fuléle vɔ̃” ɖe eme la nye kpekpeɖeŋunu sẽŋu aɖe le ɖokuimedzodzro sia me. (Lododowo 8:13) Togbɔ be edzea amesi vɔ̃a Yehowa vavã ŋu be Yehowa nye amenuvela kple dɔmenyotɔ hã la, enɔa ŋku dzi nɛ ɣesiaɣi be ŋusẽ le Yehowa si be wòahe to na amesiwo meɖo toe o alo wòatsrɔ̃ wo gɔ̃ hã. Yehowa ɖee fia be amesiwo vɔ̃a ye la aɖo to ye hã esi wògblɔ le Israel ŋu be: “Oo, ɖe dzi sia tɔgbe anɔ wo si, ne woavɔ̃m, eye woalé nye seawo katã me ɖe asi ɣesiaɣi, bena wòanyo na wo kple wo viwo!”—Mose V, 5:26.

Edze ƒã be menye mawuvɔvɔ̃ ƒe taɖodzinue nye be wòana vɔvɔ̃ nalé mí míanɔ dzodzom nyanyanya o, ke boŋ be wòaʋã mí míaɖo to mía Fofo lɔlɔ̃tɔ la, amesi míenya be nusi anyo na mí koe wòdina na mí. Le nyateƒe me la, mawuvɔvɔ̃ sia doa ame ɖe dzi eye wònana dzi dzɔa ame, nusi Yesu Kristo ŋutɔ hã ɖe fia le mɔ geɖe nu.—Yesaya 11:3; Luka 12:5.

 Dzi si Le Dzadzraɖoɖi Yɔ Fũ Kple Xɔse

Dzi si sẽ ŋu le xɔse me nya be nusianu si Yehowa bia alo gblɔ to eƒe Nya dzi le dzɔdzɔe ɣesiaɣi eye míaƒe nyonyo tae wògblɔa wo ɖo. (Yesaya 48:17, 18) Amesi si dzi sia tɔgbe le kpɔa dzidzeme geɖe le nuxlɔ̃ame si le Lododowo 3:5, 6 dzi wɔwɔ me, si gblɔ be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.” Gake dzi si mexɔna sena o agbe ŋuɖoɖo ɖe Yehowa ŋu, vevietɔ ne ema wɔwɔ abia be wòatsɔ nanewo asa vɔe, abe agbe bɔbɔe nɔnɔ bena ame ƒe susu nanɔ Fiaɖuƒenuwo dzi ene. (Mateo 6:33) Susu nyui tae Yehowa bua dzi si mexɔna sena o be ‘evɔ̃ɖi’ ɖo.—Hebritɔwo 3:12.

Míaƒe Yehowa dzixɔxɔse dzena le mɔ geɖe nu, tsɔ kpe ɖe nusiwo míewɔna le ɣaɣlaƒe le míaƒe aƒewo me hã ŋu. Le kpɔɖeŋu me, kpɔ gɔmeɖose si dze le Galatiatɔwo 6:7 ɖa: “Migable mia ɖokui o; Mawu menana woɖoa hehe ɖe eta o! Elabena nusi ke ame ƒãna la, esia ke wòaŋe.” Ne míexɔ gɔmeɖose sia dzi se la, adze le nuwo abe sinima siwo míekpɔna, agbalẽ siwo míexlẽna, ɣeyiɣi si míezãna ɖe Biblia sɔsrɔ̃ ŋu, kple le míaƒe gbedodoɖawo ene me. Ẽ, xɔse sẽŋu si ʋãa mí be míaƒã nu ‘ɖe gbɔgbɔ me’ la nye nu vevi aɖe le dzi si le dzadzraɖoɖi be yeaxɔ Yehowa ƒe Nya ahawɔ edzi la ƒe amesinɔnɔ me.—Galatiatɔwo 6:8.

Lɔlɔ̃—Nɔnɔme Vevitɔ Kekeake

Le nyateƒe me la, lɔlɔ̃ nye nɔnɔme si ƒo nɔnɔmewo katã ta si nana be míaƒe dzi ƒe anyigba la ɖoa to Yehowa ƒe Nya. Eyata esi apostolo Paulo tsɔ lɔlɔ̃ sɔ kple xɔse kpakple mɔkpɔkpɔ la, egblɔ be ‘eƒo wo katã ta.’ (Korintotɔwo I, 13:13) Dzi si lɔlɔ̃ na Mawu yɔ fũ la dzea eme eye wòsea vivi ŋutɔ to toɖoɖo eyama me; le nyateƒe me la, Mawu ƒe nudidiwo dzi wɔwɔ meɖua dzi nɛ o. Apostolo Yohanes gblɔ be: “Lɔlɔ̃ na Mawu enye si bena, míalé eƒe seawo me ɖe asi, eye eƒe seawo mesesẽ o.” (Yohanes I, 5:3) Yesu hã gblɔ nya ma tɔgbe be: “Ne ame aɖe le lɔ̃yem la, alé nye nya la me ɖe asi, eye Fofonye alɔ̃ eyama.” (Yohanes 14:23) De dzesii be teƒeɖoɖo li na lɔlɔ̃ sia. Ẽ, Yehowa lɔ̃a amesiwo tena ɖe eŋu le lɔlɔ̃ me la vevie.

Yehowa nya be míede blibo o eye míedaa vo ɖe ye ŋu ɣesiaɣi. Togbɔ be ele alea hã la, meɖea eɖokui ɖa le mía ŋu o. Nusi dim Yehowa le tso eƒe subɔlawo gbɔe nye “dzi blibo” si aʋã mí be míalɔ̃ faa asubɔe kple “luʋɔ blibo.” (Kronika I, 28:9) Enye nyateƒe be Yehowa nya be ebia ɣeyiɣi kple agbagbadzedze be míatu nɔnɔme nyuiwo ɖo le míaƒe dzi me ale be míate ŋu atse gbɔgbɔa ƒe kuwo. (Galatiatɔwo 5:22, 23) Eyata egbɔa dzi ɖi na mí “elabena enya míaƒe wɔwɔme, eɖoa ŋui be, kewɔ míenye.” (Psalmo 103:14) Yesu ɖe nɔnɔme ma ke fia eye mehe nya kple eƒe nusrɔ̃lawo vevie le woƒe vodadawo ta gbeɖe o, ke boŋ etsɔ dzigbɔɖi kpe ɖe wo ŋu eye wòde dzi ƒo na wo. Ðe Yehowa kple Yesu ƒe lɔlɔ̃, nublanuikpɔkpɔ, kple dzigbɔɖi sia meʋã wò be nàgalɔ̃ wo ɖe edzi geɖe oa?—Luka 7:47; Petro II, 3:9.

Ne esesẽna na wò ɣeaɖewoɣi be nàɖe asi le nɔnɔme aɖewo siwo le abe gbe vɔ̃ɖi siwo ƒo ke ɖe to sesĩe ɖe anyigba si ƒu hesẽ kplalaa ene me la, dzika megatso ƒowò o alo dzi megaɖe le ƒowò o. Ke boŋ yi edzi nànɔ wo ɖɔm ɖo vivivi eye ‘nànɔ gbedodoɖa dzi ɣesiaɣi’ ahanɔ koko ƒom na Yehowa ɣesiaɣi be wòana eƒe gbɔgbɔa wò. (Romatɔwo 12:12) Le eƒe lɔlɔ̃nu me la, àkpɔ dzidzedze abe alesi Ezra kpɔ dzidzedze le eƒe dzi dzadzraɖo ɖi koŋ hena ‘Yehowa ƒe sea me dzodzro ahawɔ edzi’ mee ene.

[Nɔnɔmetata si le axa 31]

Ezra lé mawusosroɖa me ɖe asi esi wònɔ Babilon gɔ̃ hã

[Nɔnɔmetata Tsoƒe si le axa 29]

Garo Nalbandian