Yehowa—Amesi Ƒe Alɔkame Sesẽ
Yehowa—Amesi Ƒe Alɔkame Sesẽ
“Wo dometɔ aɖeke mesusɔna o le eƒe ŋusẽ geɖe kple alɔkame sesẽ la nu.”—YESAYA 40:26.
1, 2. (a) Ŋusẽtsoƒe si ŋku kpɔna ka dzie mí katã míenɔ te ɖo? (b) Ðe nusita Yehowa nye ŋusẽwo katã Tsoƒe la me.
ŊUSẼ nye nane si ƒe vevienyenye ŋu mía dometɔ geɖe míebuna boo o. Le kpɔɖeŋu me, míebua elektrikŋusẽ si naa akaɖi kple dzoxɔxɔ mí alo alesi míetsɔa míaƒe elektrikmɔ̃ ƒe ka dea eƒe ŋusẽxɔƒe ko wòwɔa nusi dim míele bɔbɔe ŋu boo o. Ne míele mɔkpɔkpɔ me o eye wotsi dzo na mí hafi míedzea sii be elektrikŋusẽ manɔmee la, naneke magate ŋu ayi edzi le amegbetɔ ƒe duwo me o. To mɔ aɖe nu la, elektrikŋusẽ si dzi míenɔa te ɖo ƒe akpa gãtɔ tsoa anyigbaa ƒe ŋusẽtsoƒe si medoa kpo nu o—si nye ɣe la gbɔ. * Sɛkɛnd ɖesiaɖe la, ɣeŋusẽnamɔ̃ sia zãa nukliadzodonu tɔn miliɔn atɔ̃, eye wòɖoa ŋusẽ si léa agbe ɖe te ɖe anyigba la dzi.
2 Afikae ɣe ƒe ŋusẽ siawo katã tso? Amekae tu ŋusẽdɔwɔƒe sia si le dziŋgɔli me? Yehowa Mawue tui. Eya ŋue Psalmo 74:16 nɔ nu ƒom tsoe esime wògblɔ be: “Wòe ɖo kekeli kple ɣe.” Ẽ, Yehowae nye ŋusẽwo katã Tsoƒe, abe alesi wònye agbe ƒomevi ɖesiaɖe Nala ene. (Psalmo 36:10) Mele be míabu eƒe ŋusẽ nu tsɛe gbeɖe o. Yehowa to nyagblɔɖila Yesaya dzi le ŋku ɖom edzi na mí be míafɔ kɔ dzi akpɔ dziƒonuwo abe ɣe kple ɣletiviwo ene, ahade ŋugble le alesi wowɔ va dzɔe ŋu. “Mifɔ mo dzi, ne miakpɔ nu! Ameka wɔ nusiawo, eye wòkplɔa eŋu nuwo doa goe dedie? Eyɔa wo katã ŋkɔ, eye wo dometɔ aɖeke mesusɔna o le eƒe ŋusẽ geɖe kple alɔkame sesẽ la nu.”—Yesaya 40:26; Yeremya 32:17.
3. Aleke Yehowa ƒe ŋusẽ ɖeɖe fia ɖea vi na míi?
3 Esi Yehowa ƒe alɔkame sẽ ta la, míate ŋu aka ɖe edzi be ɣe la ayi edzi ana kekeli kple dzoxɔxɔ si dzi míaƒe agbe nɔ te ɖo la mí. Gake míenɔa te ɖe Mawu ƒe ŋusẽ dzi hena nusiwo yi ŋgɔ sasasã wu míaƒe ŋutilãmenuhiahiã veviwo ko kpɔkpɔ. Míaƒe ɖeɖekpɔkpɔ tso nuvɔ̃ kple ku me, míaƒe etsɔme mɔkpɔkpɔ, kple míaƒe ŋuɖoɖo ɖe Yehowa ŋu katã do ƒome kplikplikpli kple eƒe ŋusẽ ŋudɔwɔwɔ. (Psalmo 28:6-9; Yesaya 50:2) Kpɔɖeŋuwo bɔ ɖe Biblia me fũ siwo ɖo kpe edzi be ŋusẽ le Yehowa si be wòawɔ nuwo eye wòaxɔ na ame, be wòaɖe eƒe amewo eye wòatsrɔ̃ eƒe futɔwo.
Mawu ƒe Ŋusẽ Dze le Xexemewɔwɔ Me
4. (a) Aleke Dawid se le eɖokui me esi wòkpɔ yame le zãme? (b) Nukae dziƒonuwo ɖe fia le Mawu ƒe ŋusẽ ŋu?
4 Apostolo Paulo ɖe nu me be woate ŋu akpɔ mía Wɔla la ƒe ‘ŋusẽ mavɔ la kɔte le nusiwo wòwɔ me.’ (Romatɔwo 1:20) Ƒe alafa geɖe do ŋgɔ la, anye be hakpala Dawid si nye alẽkplɔla la kpɔa yame le zãme enuenu, eye wòkpɔ dziŋgɔlia ƒe lolome kple Ewɔla ƒe ŋusẽ dze sii. Eŋlɔ be: “Ne mekpɔ wò dziƒowo, siwo nye wò asinudɔwɔwɔ, ɣleti kple ɣletiviwo, siwo nèwɔ la, nuka nye amegbetɔ, be nèɖoa ŋku edzi, kple amegbetɔvi, be nèléa ŋku ɖe eŋu?” (Psalmo 8:4, 5) Togbɔ be Dawid menya nu tso dziŋgɔlimenuwo ŋu boo o hã la, ese egɔme be yemeɖi naneke ne wotsɔ ye sɔ kple xexeme gbahoo sia Wɔla o. Egbea ɣletiviŋununyalawo nya nu geɖe wu tso xexeame ƒe lolome kple ŋusẽ si gbegbe lée ɖe te ŋuti. Le kpɔɖeŋu me, wogblɔna na mí be sɛkɛnd ɖesiaɖe la, ŋusẽ si dona tsoa ɣe la me sɔ kple aɖi si woyɔna be trinitrotoluene alo TNT 100,000 teƒe miliɔn ƒe wówo. * Ŋusẽ sia ƒe sue aɖe koe ɖoa anyigba la dzi, ke hã ema sɔ gbɔ alé nu gbagbewo katã ɖe te le míaƒe ɣletinyigbaa dzi. Ke hã la, menye míaƒe ɣeae nye ɣletivi sesẽtɔ kekeake le dziƒonutowo me o. Ŋusẽ agbɔsɔsɔme si dona tsoa ɣea me le ŋkeke blibo ɖeka mee dona tsoa ɣleti aɖewo me le sɛkɛnd ɖeka pɛ ko me. Ekema bu ŋusẽ si gbegbe le Amesi wɔ dziƒonu siawo si la ŋuti kpɔ! Elihu gblɔ kple gbeteteɖedzi wòsɔ be: “Ŋusẽkatãtɔ la, ame aɖeke matui o, eƒe ŋusẽ tri akɔ.”—Hiob 37:23.
5. Yehowa ƒe ŋusẽ ƒe kpeɖodzi kawoe míekpɔ le eƒe asinudɔwɔwɔwo me?
5 Ne ‘míeku Mawu ƒe asinudɔwɔwɔwo me kpɔ’ abe alesi Dawid wɔe ene la, míakpɔ eƒe ŋusẽ ƒe kpeɖodziwo le afisiafi—le yaƒoƒo kple ƒutsotsoewo me, le dziɖegbe kple dzikedzo me, le tɔsisi gãwo kple to gãwo me. (Psalmo 111:2; Hiob 26:12-14) Gakpe ɖe eŋu la, lãwo ɖia ɖase le Eƒe ŋusẽ ŋu abe alesi Yehowa ɖo ŋku edzi na Hiob ene. Esiawo dometɔ ɖekae nye Behemoth, alo tɔmenyi. Yehowa gblɔ na Hiob be: “Eƒe ŋusẽ le eƒe ali me . . . Eƒe ƒuwo le abe gakpɔti ene.” (Hiob 40:15-18) Wonya nu tso tò ƒe ŋusẽ ɖivɔvɔ̃a hã ŋu le Biblia ƒe ɣeyiɣiwo me, eye Dawid do gbe ɖa be woaɖe ye tso “dzata ƒe nu me, eye . . . tso tò ƒe dzowo nu.”—Psalmo 22:21; Hiob 39:9-11.
6. Nukae nyitsu tsi tre ɖi na le Ŋɔŋlɔawo me, eye nukatae? (Kpɔ etenuŋɔŋlɔa.)
6 Le nyitsu ƒe ŋusẽ ta la, wozãnɛ tsɔ wɔa kpɔɖeŋu na Yehowa ƒe ŋusẽ le Biblia me. * Nugbagbe ene siwo dometɔ ɖeka ƒe mo le abe nyitsu tɔ ene la dze le Yehowa ƒe fiazikpui ƒe ŋutega si Yohanes kpɔ me. (Nyaɖeɖefia 4:6, 7) Edze ƒã be Yehowa ƒe nɔnɔme vevi ene siwo kerubi siawo tsi tre ɖi na dometɔ ɖekae nye ŋusẽ. Bubuawoe nye lɔlɔ̃, nunya, kple dzɔdzɔenyenye. Esi ŋusẽ nye Mawu ƒe nɔnɔme veviwo dometɔ ɖeka alea ta la, eƒe ŋusẽ kple alesi wòzãnɛ gɔmesese ana míate ɖe eŋu kplikplikpli eye wòakpe ɖe mía ŋu be míasrɔ̃ eƒe kpɔɖeŋu le ŋusẽ ɖesiaɖe si le mía si zazã nyuie me.—Efesotɔwo 5:1.
‘Aʋakɔwo ƒe Yehowa, Ŋusẽkatãtɔ La’
7. Aleke míawɔ aka ɖe edzi be nu nyui aɖu nuvɔ̃ dzi?
7 Woyɔa Yehowa le Ŋɔŋlɔawo me be “Mawu Ŋusẽkatãtɔ,” eye dzesideŋkɔ sia ɖoa ŋku edzi na mí be mele be míabu eƒe ŋusẽ nu tsɛe alo ake ɖi ŋutete si le esi be wòaɖu eƒe futɔwo dzi o. (Mose I, 17:1; Mose II, 6:3) Adze abe ɖe Satana ƒe nuɖoanyia li ke sesĩe ene, gake Yehowa ya kpɔa “dukɔwo . . . abe tsi toŋtoŋ le ze ŋu ene, wobu wo abe ʋuʋudedi le nudanu ŋu ene.” (Yesaya 40:15) Le Mawu ƒe ŋusẽ sia ta la, ɖikeke mele eme o be nu nyui ava ɖu nuvɔ̃ dzi. Le ɣeyiɣi sia si me nuvɔ̃ɖiwɔwɔ do agbogbo la, míate ŋu akpɔ akɔfafa ne míenya be “Yehowa Zebaot, Israel ƒe ŋusẽtɔ la” ava ɖe nuvɔ̃ɖiwɔwɔ ɖa tegbee.—Yesaya 1:24; Psalmo 37:9, 10.
8. Dziƒoʋakɔ kawoe le Yehowa te, eye nukae na míenya ŋusẽ si le wo si?
8 Alesi nyagbe ‘Aʋakɔwo ƒe Yehowa’ dze le Eŋlisigbe me Biblia me zi gbɔ zi 285 sɔŋ la nye ŋkuɖodzinya bubu be ŋusẽ le Mawu si. ‘Aʋakɔwo’ si woyɔ le afisia fia gbɔgbɔmenuwɔwɔwo ƒe aʋakɔ siwo Yehowa ɖea gbe na. (Psalmo 103:20, 21; 148:2) Le zãdodo ɖeka me la, mawudɔla siawo dometɔ ɖeka pɛ wu Asiriatɔwo ƒe asrafo 185,000 siwo va nɔ ŋɔdzi dom na Yerusalem. (Fiawo II, 19:35) Ne míenya ŋusẽ si gbegbe le Yehowa ƒe dziƒoʋakɔwo si la, tsitretsiɖeŋulawo mana míavɔ̃ bɔbɔe o. Nyagblɔɖila Elisa metsɔ ɖeke le eme esi aʋakɔ blibo xaxae ɖo henɔ edim o, elabena etsɔ xɔseŋkuwo nɔ dziƒoʋakɔ gã si nɔ eƒe akpa dzi la kpɔm, gake eƒe subɔvi ya menɔ wo kpɔm o.—Fiawo II, 6:15-17.
9. Nukatae wòle be míaɖo ŋu ɖe Mawu ŋu be ele megbe na mí, abe alesi Yesu ɖo ŋu ɖe eŋui ene?
9 Nenema ke Yesu hã nya kpekpeɖeŋu si mawudɔlawo nana esime wòdo go nuvlowɔha aɖe si tsɔ yiwo kple kpowo ɖe asi le Getsemane-bɔa me. Esi Yesu gblɔ na Petro be wòagbugbɔ eƒe yi aɖo eteƒe vɔ la, egblɔ nɛ be ne ehiã la, Yeate ŋu aɖe kuku na ye Fofo be ‘wòana mawudɔlawo ƒe aʋakɔ wu wuieve ye.’ (Mateo 26:47, 52, 53) Ne míawo hã míenya nu tso dziƒoʋakɔ siwo le Mawu si ŋuti nenema la, míawo hã míaɖo ŋu ɖe Mawu ŋu bliboe be ele megbe na mí. Apostolo Paulo ŋlɔ be: “Azɔ, nuka gblɔ ge míala le esia ŋutii? Ne Mawu le mía dzi la, ameka atsi tre ɖe mía ŋutii?”—Romatɔwo 8:31.
10. Amekawo nue Yehowa zãa eƒe ŋusẽ ɖo?
10 Eyata esɔ le go sia go me be míaɖo ŋu ɖe Yehowa ŋu be akpɔ mía ta. Ezãa eƒe ŋusẽ wòɖea vi ɣesiaɣi eye ezãnɛ le ɖekawɔwɔ me kple eƒe nɔnɔme bubuawo—siwo nye dzɔdzɔenyenye, nunya, kple lɔlɔ̃. (Hiob 37:23; Yeremya 10:12) Esi amegbetɔ siwo le ŋusẽnɔƒewo tafaa ame dahewo kple ame fatuwo zi geɖe ɖe viɖe ƒoɖi ta la, Yehowa ya ‘fɔa ame tsɛ la tsoa ʋuʋudedi me’ eye ‘xɔnameŋusẽ geɖe le esi.’ (Psalmo 113:5-7; Yesaya 63:1) Abe alesi Maria, Yesu dada fatu si medoa eɖokui ɖe dzi o se egɔmee ene la, ‘Ŋusẽtɔ la’ zãa eƒe ŋusẽ ɖe amesiwo vɔ̃nɛ nu ɖokuitɔmadimaditɔe, eye wòbɔbɔa dadalawo ɖe anyi hedoa ɖokuibɔbɔlawo ɖe dzi.—Luka 1:46-53.
Yehowa Ðea Eƒe Ŋusẽ Fiaa Esubɔlawo
11. Nukawo teƒee Israel-viwo kpɔ le ƒe 1513 D.M.Ŋ. me si ɖe Mawu ƒe ŋusẽ fia?
11 Yehowa ɖe eƒe ŋutete fia esubɔlawo zi geɖe. Ɣeyiɣi siawo dometɔ ɖekae nye le ƒe 1513 D.M.Ŋ. me le Sinai Toa gbɔ. Israel-viwo kpɔ Mawu ƒe ŋusẽ ƒe dzesi wɔdɔɖeamedziwo va yi le ƒe ma me xoxo. Fuwɔame gblẽnu ewo ɖe Yehowa ƒe asi sesẽ kple Egipte-mawuwo ƒe ŋusẽmanɔŋui fia. Ema megbe kpuie la, Ƒudzĩa tsotso to nukumɔ nu kple Farao ƒe aʋakɔa tsɔtsrɔ̃ gaɖo kpe Mawu ƒe ŋusẽ dzi. Ɣleti etɔ̃ megbe le Sinai Toa gɔme la, Yehowa kpe Israel-viwo be woanye yeƒe ‘dukɔ tɔxɛ le dukɔ bubuwo katã dome.’ Woawo hã do ŋugbe be: “Nya, siwo katã Yehowa gblɔ la, míawɔe.” (Mose II, 19:5, 8) Emegbe Yehowa ɖe eƒe ŋusẽ fia le mɔ wɔdɔɖeamedzi aɖe nu. Sinai Toa nɔ dzudzɔ tum henɔ ʋuʋum kpekpekpe esime dzi nɔ gbe ɖem ganɔ dzo kem, eye kpẽkuku nɔ ɖiɖim. Vɔvɔ̃ ɖo dukɔa eye wotsi tre ɖe adzɔge. Gake Mose gblɔ na wo be ele be nuteƒekpɔkpɔa nafia mawuvɔvɔ̃ wo, wòanye vɔvɔ̃ si aʋã wo be woaɖo to woƒe Mawu vavã ɖeka kolia, Yehowa, ŋusẽkatãtɔ la.—Mose II, 19:16-19; 20:18-20.
12, 13. Nɔnɔme kawoe na Eliya si dzo le eƒe dɔdasia gbɔ, gake aleke Yehowa do ŋusẽe?
12 Ƒe alafa geɖe megbe le nyagblɔɖila Eliya ŋɔli la, wogakpɔ Mawu ƒe ŋusẽ ɖeɖefia teƒe le Sinai Toa gbɔ. Nyagblɔɖila la kpɔ Mawu ƒe ŋusẽ ƒe nuwɔƒe teƒe do ŋgɔ xoxo. Le Israel-dukɔa ƒe megbedede ta la, Mawu ‘xe dziƒo nu’ ƒe etɔ̃ kple afã sɔŋ. (Kronika II, 7:13 ) Le kuɖiɖi si wòhe vɛ me la, akpaviãwoe nyi Eliya le Krit-tɔʋu to, eye emegbe ahosi aɖe ƒe wɔ kple ami sue aɖe ganɔ anyi ɣeyiɣi didi le nukumɔ nu ale be wògakpɔa nu ɖuna. Yehowa do ŋusẽ Eliya be wòfɔ ahosia ƒe viŋutsu ɖe tsitre gɔ̃ hã. Mlɔeba le Mawunyenye ƒe dodokpɔ wɔdɔɖeamedzi aɖe me le Karmel Toa dzi la, dzo tso dziƒo va fiã Eliya ƒe vɔsanuwo. (Fiawo I, 17:4-24; 18:36-40) Gake eteƒe medidi le ema megbe o vɔvɔ̃ ɖo Eliya eye dzi ɖe le eƒo esi Izebel di be yeawui. (Fiawo I, 19:1-4) Esi dzo le dukɔa me hesusu be yeƒe nyagblɔɖidɔa wu enu. Be kakaɖedzi nagasu esi eye ŋusẽ naɖo eŋu la, Yehowa nyo dɔme heɖe eƒe mawunyenye ƒe ŋusẽ fiae.
13 Esime Eliya be ɖe agado aɖe me la, ekpɔ Yehowa ƒe ŋusẽ etɔ̃ siwo wòzãna ƒe ɖeɖefia dziŋɔ aɖe teƒe: yaƒoƒo sesẽ, anyigbaʋuʋu, kple mlɔeba, dzobibi. Gake esi Yehowa ƒo nu kple Eliya la, eƒo nu ‘kple gbe ɖɔɖɔe fafɛ.’ Egade dɔ geɖe esi be wòawɔ eye wògblɔ nɛ be Yehowa subɔla wɔnuteƒe 7,000 gakpɔtɔ le anyigba la dzi. (Fiawo I, 19:9-18) Ne dzi ɖe le mía ƒo le esi míaƒe subɔsubɔdɔa mele ku tsem o ta, abe Eliya ene la, míate ŋu aɖe kuku na Yehowa be wòana ‘ŋusẽ si gbɔ dzɔdzɔmetɔ ŋu’ la mí—si nye ŋusẽ si ate ŋu aɖo mía ŋu be míayi edzi aɖe gbeƒã nyanyuia madzudzɔmadzudzɔe.—Korintotɔwo II, 4:7.
Yehowa ƒe Ŋusẽ Nye Kpeɖodzi be Eƒe Ŋugbedodowo Ava Eme
14. Nukae Yehowa ƒe ŋkɔ ɖe fia, eye aleke eƒe ŋusẽ do ƒome kple eƒe ŋkɔe?
14 Yehowa ƒe ŋusẽ gado ƒome kplikplikpli kple eƒe ŋkɔ kpakple eƒe tameɖoɖowo dzi wɔwɔ. Ŋkɔ tɔxɛ Yehowa, si gɔmee nye “Enaa Wòvaa Eme” la ɖee fia be enye Ŋugbedododziwɔla. Aleke ke ɖikelawo abu Mawu ƒe ŋugbedodowo be wonye nya gbɔlowoe o, naneke alo ame aɖeke mate ŋu axe mɔ nɛ be wòado kpo eƒe tameɖoɖowo dzi wɔwɔ o. Abe alesi Yesu gblɔ na eƒe apostolowo ɣeaɖeɣi ene la, “Mawu gbɔ la woate ŋu awɔ nusianu.”—Mateo 19:26.
15. Aleke woɖo ŋku edzi na Abraham kple Sara be naneke mesesẽ na Yehowa o?
15 Le kpɔɖeŋu me, Yehowa do ŋugbe na Abraham kple Sara ɣeaɖeɣi be yeana woƒe dzidzimeviwo nazu dukɔ gã. Gake vi menɔ wo si o ƒe geɖe. Wo ame evea siaa tsi ŋutɔ esime Yehowa gblɔ na wo be ŋugbedodoa me vaɣi ɖo vɔ eye ena Sara ko nu. Mawudɔlaa ɖo ŋu gblɔ be: “Ðe nane sesẽ na Yehowa?” (Mose I, 12:1-3; 17:4-8; 18:10-14) Mlɔeba le ƒe alafa ene megbe, esi Mose ƒo Abraham ƒe dzidzimevi—siwo zu dukɔ gã azɔ—nu ƒu ɖe Moab Tagba la, eɖo ŋku edzi na wo be Mawu wɔ eƒe ŋugbedodoa dzi. Mose gblɔ be: “[Èkpɔtɔ le agbe elabena Yehowa lɔ̃] fofowòwo, eyata wòtia wo megbeviwo, eye eya ŋutɔ kpamkpam tsɔ eƒe ŋusẽ gã kplɔ wò tso Egipte, eye wònyã dukɔ gã, siwo sesẽ wu wò la, le ŋgɔwò, bena yeakplɔ wò ayii, atsɔ woƒe anyigba na wò wòanye wò domenyinu, abe alesi wòzu egbe siawo ene.”—Mose V, 4:37, 38.
16. Nukatae Zadukitɔwo da ƒu esi wogbe ame kukuwo ƒe tsitretsitsia dzi xɔxɔ se?
16 Ƒe alafa geɖe megbe la, Yesu ka mo na Zadukitɔwo le alesi womexɔ tsitretsitsia dzi se o ta. Nukatae wogbe ŋugbe si Mawu do be yeafɔ ame kukuwo ɖe tsitre la dzi xɔxɔ se? Yesu gblɔ na wo be: “Mienya [Ŋɔŋlɔawo] kple Mawu ƒe ŋusẽ la o.” (Mateo 22:29) Ŋɔŋlɔawo na kakaɖedzi mí be ‘amesiwo katã le ŋkuɖodziyɔdowo me ase Amegbetɔvi la ƒe gbe, eye woado go.’ (Yohanes 5:27-29) Ne míenya nusi Biblia gblɔ le tsitretsitsia ŋu la, kakaɖedzi si le mía si ɖe Mawu ƒe ŋusẽ me ana míaxɔe se be ame kukuwo afɔ ɖe tsitre. Mawu “ami ku saɖagatsi tegbee, . . . elabena Yehowa ye gblɔe.”—Yesaya 25:8.
17. Ŋkeke kae gbɔna si dzi wòahiã vevie le be míaɖo ŋu ɖe Yehowa ŋu etɔxɛe?
17 Le etsɔ si gbɔna kpuie me la, ɣeyiɣi aɖe ava si me wòahiã le na mía dometɔ ɖesiaɖe be wòaɖo ŋu ɖe Mawu ƒe xɔnameŋusẽ ŋu etɔxɛe. Satana Abosam aho aʋa ɖe Mawu ƒe amewo ŋu, abe ɖe ame aɖeke mele wo ta kpɔm o ene. (Xezekiel 38:14-16) Mawu aɖe eƒe ŋusẽ gã la afia ɖe mía nu ɣemaɣi, eye amesiame adze sii be eyae nye Yehowa. (Xezekiel 38:21-23) Fifiae nye ɣeyiɣi si me wòle be míatu míaƒe xɔse kple ŋuɖoɖo ɖe Mawu Ŋusẽkatãtɔ la ŋu ɖo bene míagaʋuʋu le ɣeyiɣi vevi ma me o.
18. (a) Vi kawoe wòɖena na mí ne míede ŋugble le Yehowa ƒe ŋusẽ ŋu? (b) Biabia ka mee míadzro le nyati si kplɔe ɖo me?
18 Ðikeke mele eme o be susu geɖe li siwo ta wòle be míade ŋugble le Yehowa ƒe ŋusẽ ŋu ɖo. Ne míele ŋugble dem le eƒe dɔwɔwɔwo ŋu la, eʋãa mí míetsɔa ɖokuibɔbɔ kafua mía Wɔla Gã la eye míedaa akpe be ewɔa eƒe ŋusẽ ŋudɔ le nunya kple lɔlɔ̃ mɔ nu. Vɔvɔ̃ maɖo mí akpɔ gbeɖe ne míeɖoa ŋu ɖe aʋakɔwo ƒe Yehowa ŋu o. Míagbɔdzɔ le eƒe ŋugbedodowo dzixɔxɔse me o. Gake ɖo ŋku edzi be Mawu ƒe nɔnɔme nue wowɔ mí ɖo. Eyata ŋusẽ le míawo hã si—togbɔ be seɖoƒe li nɛ hã. Aleke míate ŋu asrɔ̃ mía Wɔla la le ŋusẽ ŋudɔwɔwɔ mee? Míadzro nya sia me le nyati si kplɔe ɖo me.
[Etenuŋɔŋlɔwo]
^ mm. 1 Nusi ame geɖe nyae nye be dzɔdzɔmedzodonuwo abe tomemi kple tomeka—siwo nye nusiwo koŋ me ŋusẽdɔwɔƒewo kpɔa ŋusẽ tsonɛ—la kpɔa woƒe ŋusẽ tso ɣe la gbɔ.
^ mm. 4 Gake ŋusẽ si gbegbe do le nukliabɔmb sesẽtɔ kekeake si wodo kpɔ me esi wòwó la de TNT tɔn 57 teƒe miliɔn ɖeka.
^ mm. 6 Anye be tò si woyɔ le Biblia me la nye lã si woyɔna le Eŋlisigbe me be aurochs (Latin urus). Ƒe akpe eve enye si va yi la, lã siawo nɔ Gaul (si nye France fifia), eye Julius Caesar ŋlɔ nu tso wo ŋu be: “Ðeko uri siawo le sue wu atiglinyiwo vie, gake alesi wowɔa nui, woƒe amadede, kple woƒe dzedzeme fia be wonye nyitsuwo. Ŋusẽ le wo ŋu ale gbegbe, eye woƒua du eteƒe mekɔ o: ne woƒe ŋku kli amegbetɔ loo alo gbemelã aɖe la, womekpɔa nublanui na wo o.”
Àte Ŋu Aɖo Biabia Siawo Ŋua?
• Aleke xexemewɔwɔ ɖia ɖase le Yehowa ƒe ŋusẽ ŋui?
• Aʋakɔ kawoe Yehowa ate ŋu azã atsɔ akpe ɖe eƒe amewo ŋu?
• Ɣeyiɣi siwo me Yehowa ɖe eƒe ŋusẽ fia le dometɔ aɖewo ɖe?
• Kpeɖodzi kae le mía si si fia be Yehowa ana eƒe ŋugbedodowo nava eme?
[Biabiawo]
[Nɔnɔmetata siwo le axa 10]
“Mifɔ mo dzi, ne miakpɔ nu! Ameka wɔ nusiawo?”
[Afi Si Míexɔ Mɔɖeɖe Tso]
Photo by Malin, © IAC/RGO 1991
[Nɔnɔmetata siwo le axa 13]
Ŋugbledede le Yehowa ƒe ŋusẽ ƒe ɖeɖefiawo ŋu na woxɔa eƒe ŋugbedodowo dzi sena