Ènya Alesi Woalalaa?

ÈNYA ɣeyiɣi si gbegbe amewo zãna ƒe sia ƒe tsɔ nɔa lalamee dzaa koa? Woɖoa fli nɔa lalam le fiase me alo le mɔ̃memidzeƒe. Wolalana be woatsɔ nuɖuɖu vɛ na ame le nuɖuɖudzraƒe. Wolalana be woakpɔ ɖɔkta alo aɖutikewɔla. Wodzɔa ʋuwo kple ketekewo. Ẽ, amegbetɔ zãa eƒe agbenɔɣi ƒe didime wɔmoyaa aɖe tsɔ nɔa nuwo lalamee. Akɔntabubu aɖe gblɔ be, Germanytɔwo ɖeɖe gblẽa gaƒoƒo biliɔn 4.7 ƒe sia ƒe nɔa lalam le ʋuwo ƒe agbɔsɔsɔ ɖe mɔdodo dzi ta! Ame aɖe bu akɔnta be esia nye ame 7,000 lɔƒo ƒe agbenɔƒe ƒe ƒuƒoƒo.

Be woalala te ŋu gbãa dzi na ame. Le ŋkeke siawo me la, edze abe ɣeyiɣi geɖe meli woatsɔ awɔ nusianu o ene, eye tamebubu tso nu bubu siwo wòle be míanɔ wɔwɔm hafi ŋu ate ŋu ana lala nazu dodokpɔ ŋutɔŋutɔ. Agbalẽŋlɔla Alexander Rose gblɔ ɣeaɖeɣi be: “Agbemevevesesewo ƒe afã enye be woalala.”

Amerika-dziɖuɖumegã Benjamin Franklin de dzesii be, be woalala ate ŋu agblẽ ga geɖe hã na ame. Ƒe 250 kple edzivɔ enye si va yi la, egblɔ be: “Ɣeyiɣi nye ga.” Ema tae asitsadɔwɔƒewo dia mɔnuwo be woatsɔ aƒo asa na megbelelehehe siwo mehiã o le dɔwo wɔwɔ me. Adzɔnu geɖe si woawɔ le ɣeyiɣi kpui aɖe me ate ŋu ahe viɖe geɖe vɛ. Dɔwɔƒe siwo kpɔa amewo gbɔ tẽ dzea agbagba be yewoakpɔ wo gbɔ kaba—nuɖaɖa kaba, gadzadzraɖo kple gaɖeɖe mɔnu si tsɔna, kple esiawo tɔgbe—elabena wonya be ne yewoadze asisiwo ŋu la, ke ebia be yewoatso ɣeyiɣi si woatsɔ anɔ lalam dzi akpɔtɔ.

Míaƒe Agbenɔɣiwo Dome Gbegblẽ

Ƒe alafa 19 lia me Amerikatɔ hakpanyaŋlɔla Ralph Waldo Emerson fa konyi ɣeaɖeɣi be: “Aleke gbegbe amegbetɔ ƒe agbenɔƒe gbogbo aɖewo bunae nye si ne wole lalam!” Nyitsɔ laa la, agbalẽŋlɔla Lance Morrow fa konyi tso alesi lala naa ame ƒe mo dzakanae eye wònana wòtsia  dzimaɖii ŋuti. Gake emegbe eƒo nu tso “lala ƒe fuwɔame le ayeme” ŋu. Nukae nye ema? “Enyanya be wole ame ƒe nunɔamesi xɔasitɔ kekeake, si nye ɣeyiɣi, si nye ame ƒe agbenɔɣi ƒe akpa aɖe la fim dzoe, abu eye womagakpɔe o.” Ewɔ nublanui, gake enye nyateƒe. Ɣeyiɣi si wobu esime wole lalam la bu tegbee.

Le nyateƒe me la, ne ɖe agbe mele kpuie alea o la, míatsɔ ɖeke le lala me fũ akpa o. Gake agbe le kpuie. Biblia me hakpala gblɔ ƒe akpe geɖe enye si va yi be: “Míaƒe agbenɔƒewo nye ƒe blaadre, ne ede ƒã la, ƒe blanyi, eye fuɖename kple hiã nye wo adegbeƒonu; elabena wova yi kabakaba, eye míedzo.” (Psalmo 90:10) Afika ke míeɖale kple ameka ke míeɖanye o, míaƒe agbe—ŋkeke, gaƒoƒo, aɖabaƒoƒo siwo le mía ŋgɔ tso esime wodzi mí la—le kpuie. Ke hã míate ŋu aƒo asa na nɔnɔme siwo azi mía dzi be míagblẽ ɣeyiɣi xɔasi ma ƒe ɖe anɔ lalam na nuwo alo amewo o.

Alesi Míalala Sɔsrɔ̃

Mía dometɔ akpa gãtɔ nɔ ʋu aɖe me kpɔ si ʋua kula dina ɣeawokatãɣi be yeato ʋu siwo le ye ŋgɔ ŋu. Zi geɖe la, menye ɖe nane hiã kpata nenema gbegbe hafi o—ɖoɖo kpata aɖeke mele ʋua kula si o. Ke hã malɔ̃ be ʋukula bubu nakpɔ ŋusẽ ɖe alesi yele zɔzɔmee dzi o. Dzigbɔɖi si mele esi o la ɖee fia be mesrɔ̃ alesi woalalae o. Ðe wosrɔ̃nɛa? Ẽ, alesi woalala nyanya nye nu wòle be woasrɔ̃. Womedzi ame aɖeke kplii o. Vidzĩwo dina be woakpɔ yewo gbɔ enumake ne dɔ le wo wum alo ne nane le wo wɔm. Ne wole tsitsim ko hafi wova sea egɔme be ɣeaɖewoɣi la, ele be yewoalala nusi dim yewo le. Le nyateƒe me la, esi wònye be lala nye agbe ƒe akpa si womate ŋu aƒo asa na o ta la, alesi woalala dzigbɔɖitɔe ne ehiã la nyanya ɖenɛ fiana be amea tsi.

Ele eme baa be nɔnɔme kpata aɖewo li si me gɔmesese nɔa dzitsitsi ŋu le. Asɔ be srɔ̃ŋutsu si tsɔ srɔ̃a le du dzi yina kɔdzi le esi fu le eɖum ta la natsi dzi ne wole megbelele hem. Mawudɔla siwo xlɔ̃ nu Lot be wòadzo le Sodom melala esime Lot nɔ megbelele hem o. Tsɔtsrɔ̃ gogo, eye Lot kple eƒe ƒomea ƒe agbe ɖo afɔku me. (Mose I, 19:15, 16) Gake le go geɖe me la, menye amewo ƒe agbee ɖoa afɔku me ne nɔnɔmewo zi amewo dzi be woalala o. Le go mawo me la, nuwo anyo wu ne amesiame asrɔ̃ dzigbɔɖi—nenye be ame aɖe ƒe dɔmawɔmawɔ nyuie alo ɖekematsɔlemee wɔe be woalala hã. Gakpe ɖe eŋu la, woate ŋu agbɔ dzi ɖi bɔbɔe ne amesiame srɔ̃ alesi wòazã ɣeyiɣi si wòtsɔ le lalam la le mɔ ɖevi aɖe nu. Aɖaŋuɖoɖo aɖewo le aɖaka si le axa 5 lia me ku ɖe alesi woate ŋu ado dzi alala eye woawɔe wòaɖe vi hã ŋu.

Nusi mele be míaŋlɔ be o enye be dzimagbɔɖi ƒe nɔnɔme ate ŋu afia be wonye dadala, amesi sena le eɖokui me be yele vevie wu amesi alala. Anyo be amesiame si si nɔnɔme sia le nabu Biblia me nya siwo gbɔna ŋu be: “Dzigbɔɖitɔ nyo wu dadala.” (Nyagblɔla 7:8) Ðokuidodoɖedzi, alo dada, nye nɔnɔme gbegblẽ aɖe ŋutɔ, eye Biblia me lododo aɖe gblɔ be: “Dadalawo katã nye ŋunyɔ na Yehowa.” (Lododowo 16:5) Eyata dzigbɔɖi sɔsrɔ̃—alesi woalala sɔsrɔ̃—abia be míalé ŋku ɖe mía ɖokui kple ƒomedodo si le mía kple amesiwo ƒo xlã mí dome ŋu nyuie.

Woaɖo Dzigbɔɖi Teƒe

Le dzɔdzɔmenu la, lala nyea nu bɔbɔe na mí ne míexɔe se be viɖe le nusi lalam míele la ŋu eye be nua ava mlɔeba. Le go sia me la, anyo be míabu nyateƒenya sia ŋu anya be Mawu subɔla ɖianukwarewo katã le eƒe ŋugbedodo wɔnuku si le Biblia me lalam. Le kpɔɖeŋu me, wogblɔ na mí le ha si gbɔgbɔ ʋã wodzi me be: “Ame dzɔdzɔewo anyi anyigba la dome, eye woanɔ edzi tegbee.” Apostolo Yohanes gbugbɔ ŋugbedodo sia ŋutinya gblɔ esime wògblɔ be: “Amesi wɔa Mawu ƒe lɔlɔ̃nu la, nɔa anyi yi ɖe mavɔmavɔ me.” (Psalmo 37:29; Yohanes I, 2:17) Edze ƒã be ne míate ŋu anɔ agbe tegbee la, be woalala manye kuxi gã aɖeke o. Gake míele agbe tegbee fifia o. Ðe wòaɖe vi aɖe gɔ̃ hã be míaƒo nu tso agbe mavɔ ŋua?

Hafi míaɖo eŋu la, ɖo ŋku edzi be Mawu wɔ mía dzila gbãtɔwo hena agbe mavɔ nɔnɔ ƒe mɔkpɔkpɔ  wo. Nuvɔ̃ si wowɔ tae mɔkpɔkpɔ ma bu ɖe wo kple wo viwo siaa—míawo hã míele eme. Gake le woƒe nuvɔ̃a wɔwɔ megbe teti la, Mawu gblɔ tame si wòɖo be yeaɖɔ woƒe tomaɖomaɖoa me tsonuwo ɖo. Edo ‘dzidzimevi’ aɖe ƒe vava ƒe ŋugbe, amesi va nye Yesu Kristo.—Mose I, 3:15; Romatɔwo 5:18.

Be mía dometɔ aɖe nakpɔ viɖe tso eƒe ŋugbedodowo me vava me la nye nyametsotso si mía ŋutɔwo míawɔ. Nusia wɔwɔ abia dzigbɔɖi. Be míate ŋu asrɔ̃ dzigbɔɖi sia la, Biblia de dzi ƒo na mí be míade ŋugble le agbledela ƒe kpɔɖeŋu ŋu. Eƒãa eƒe nukuwo eye naneke meganɔa eŋu wòawɔ o tsɔ wu be wòalala dzigbɔɖitɔe—anɔ nusi wòate ŋu awɔ atsɔ akpɔ eƒe agblemenuwo tae la wɔm—vaseɖe esime ɣeyiɣia nade be wòaxa nu. Ɣemaɣie woɖoa eƒe lala la teƒe nɛ, eye wòkpɔa dɔ si wòwɔ la me kutsetsewo. (Yakobo 5:7) Apostolo Paulo tɔ asi dzigbɔɖi ƒe kpɔɖeŋu bubu dzi. Eɖo ŋku blema ŋutsu kple nyɔnu wɔnuteƒewo dzi na mí. Wonɔ mɔ kpɔm na Mawu ƒe tameɖoɖowo me vava, gake ɖeko wòle be woalala Mawu ƒe ɣeyiɣiɖoɖi. Paulo de dzi ƒo na mí be míasrɔ̃ amesiawo, siwo ‘nyi ŋugbedodoawo dome to xɔse kple dzigbɔgbɔ blewu me.’—Hebritɔwo 6:11, 12.

Ẽ, be woalala nye agbe ƒe akpa si womate ŋu aƒo asa na gbeɖegbeɖe o. Gake mele be wòanye nusi hea nuxaxa vɛ ɣesiaɣi o. Ate ŋu ado dzidzɔ na amesiwo le Mawu ƒe tameɖoɖowo me vava lalam. Woate ŋu azã ɣeyiɣi si wotsɔ le lalamee la anɔ ƒomedodo kplikplikpli tum ɖo le wo kpakple Mawu dome eye woanɔ dɔ siwo aɖe woƒe xɔse fia wɔm. Eye to gbedodoɖa, nusɔsrɔ̃, kple ŋugbledede me la, kakaɖedzi blibo ate ŋu asu wo si be nusianu si ƒe ŋugbe Mawu do la ava eme le eƒe ɣeyiɣiɖoɖi dzi.

[Aɖaka/Nɔnɔmetata si le axa 5]

ÐE LALA ƑE FUWƆAME DZI KPƆTƆ!

Wɔ ɖoɖo do ŋgɔ! Ne ènya be ahiã be yealala la, dzra ɖo be yeaxlẽ nu, aŋlɔ nu, alɔ̃ nane, atɔ nu, alo akpɔ gome le wɔna ɖevi bubu aɖe me.

Zã ɣeyiɣia nàtsɔ ade ŋugblee, elabena enye nusi wɔwɔ le sesẽm ɖe edzi le míaƒe xexe si le du dzi me.

Da agbalẽxexlẽ aɖewo ɖe telefon xa si nàxlẽ nenye be woabia tso asiwò be nàlala; àte ŋu axlẽ axa geɖe le aɖabaƒoƒo atɔ̃ alo ewo me.

Ne miele lalam le ƒuƒoƒo me la, wɔ mɔnukpɔkpɔa ŋudɔ, ne esɔ, nàtsɔ adze dzeɖoɖo gɔme kple ame bubuwo eye nàɖo dze tuameɖowo kpli wo.

Nuŋlɔɖigbalẽvi alo agbalẽxexlẽ nenɔ ʋu me na wò si nàzã ne eva hiã le vo me be nàlala.

Miã ŋku, ɖe dzi ɖi, alo do gbe ɖa.

AME ƑE NƆNƆME KPLE NUŊUBUBU DO ŊGƆ KOŊ YE NANA WOKPƆA DZIDZEDZE LE LALA ME.