Gaŋkuidzraɖola Aɖe Ƒã Nuku Aɖe

Akpa kae gaŋkuidzraɖola aɖe si le Lviv, Ukraine, ƒe agbagbadzedze wɔ le Yehowa Ðasefowo ƒe Russiagbe hame aɖe ɖoɖo le Haifa, Israel, si gbɔ didi kilometa 2,000, eye wòle dukɔ geɖewo godo la me? Esia nye ŋutinya aɖe si ɖe nya si Biblia gblɔ le Nyagblɔla 11:6 ƒe nyateƒenyenye fia, si gblɔ be: “Ƒã wò nukuwo le ŋdi, eye megadzudzɔ le ɣetrɔ me o; elabena mènya kae le wɔwɔ ge o.”

MÍAƑE ŋutinyaa dze egɔme le ƒe 1990 me, esime Ella, si nye ɖetugbi Yudatɔ, nɔ du si nye Lviv me. Ella kple eƒe ƒomea nɔ dzadzram ɖo be yewoaʋu ayi Israel. Esi wòsusɔ vie woadzo la, ɖoɖo aɖe nɔ gaŋkuidzraɖola aɖe si nye Yehowa Ðasefo kple Ella dome. Ɣemaɣi la, woxe mɔ ɖe Yehowa Ðasefowo ƒe dɔ nu le Ukraine. Ke hã, gaŋkuidzraɖola la xɔ ŋgɔ gblɔ eƒe Biblia dzixɔsewo na Ella. Esi wògblɔ na Ella be ŋkɔ le  Mawu si la, ewɔ nuku nɛ ale gbegbe. Nya ma na Ella di be yease nya geɖe, eye ena be woɖo dze nyui aɖe le Biblia me.

Dzeɖoɖoa vivi Ella nu ale gbegbe be wòbia be yewoagayi edzi le kwasiɖa si kplɔe ɖo kple bubu si gakplɔe ɖo me. Eƒe ɖetsɔlemea nɔ dzidzim ɖe edzi, gake kuxi aɖe nɔ anyi. Woƒe ƒomea ƒe dzodzoɣi ayi Israel nɔ aƒe tum kabakaba. Nu geɖe gali Ella nasrɔ̃! Be wòana ɣeyiɣi si susɔ naɖe vi geɖe nɛ la, ebia be woasrɔ̃ Biblia kpli ye gbesiagbe vaseɖe esime yeadzo. Togbɔ be Ella megayi nusɔsrɔ̃a dzi esi wòɖo Israel teti o hã la, nyateƒea ƒe ku ƒo ke ɖe to ɖe eƒe dzi me. Kaka ƒea nawu enu la, egadze Biblia-sɔsrɔ̃a gɔme kple ŋkubiã.

Aʋa dzɔ le Persia-Ƒukɔme, eye Iraq nɔ tu siwo wodana tsoa didiƒe la dam ɖo ɖe Israel. Amewo va nɔ dze ɖom le nusia ŋu edziedzi. Gbeɖeka le fiase gã aɖe me la, Ella se ƒome aɖe si nye Russiatɔwo, siwo ʋu va yeyee la nɔ dze ɖom. Togbɔ be Ella ŋutɔ kpɔtɔ nɔ Biblia srɔ̃m hã la, ete ɖe ƒomea ŋu hegblɔ ŋutifafaxexe aɖe si ƒe ŋugbe Biblia do la ŋu nya na wo. Ena be wo mama, Galina; dadaa, Natasha; viaŋutsu, Sasha (Ariel); kple vianyɔnu, Ilana ƒoa ƒu Ella srɔ̃a Biblia kpli wo.

Sasha ye nye ƒomea me tɔ gbãtɔ si ɖo nyɔnyrɔxɔxɔ gbɔ—togbɔ be kuxi geɖe nɔ anyi hã. Togbɔ be enye sukuvi si nya agbalẽ ŋutɔ hã la, wonyae le suku le esi eƒe Kristotɔ ƒe dzitsinya meɖe mɔ nɛ wòƒo eɖokui ɖe asrafohehexɔxɔ, si nye sukunusɔsrɔ̃a ƒe akpa aɖe me o ta. (Yesaya 2:2-4) Sasha ƒe nyaa yi ɖe Israel-dukɔa ƒe Ʋɔnudrɔ̃ƒe Kɔkɔ le Jerusalem, eye wodze na kafukafu esi woɖe gbe be woagbugbɔ Sasha axɔ ɖe sukua ale be wòate ŋu awu sukuƒea nu. Nyaa kaka ɖe dukɔ bliboa me. Le esia ta, Israeltɔ geɖe va nya nu tso Yehowa Ðasefowo ƒe dzixɔsewo ŋu. *

Esi Sasha wu sukukɔkɔ nu la, ege ɖe Yehowa Ðasefowo ƒe ɣeyiɣiawo katã ƒe subɔsubɔdɔa me. Egbea la, enye mɔɖela vevi kple hamemegã. Nɔvianyɔnu Ilana hã va ge ɖe ɣeyiɣiawo katã ƒe subɔsubɔdɔa me kpe ɖe eŋu. Wo dada kple wo mama siaa nye Ðasefo xɔnyɔnyrɔwo. Nuku si gaŋkuidzraɖola la ƒã kpɔtɔ nɔ ku tsem!

Ella ŋutɔ hã yi edzi wɔ gbɔgbɔ me ŋgɔyiyi eye eteƒe medidi o ete gbeƒãɖeɖe tso aƒeme yi aƒeme. Le ʋɔtru gbãtɔ si nu Ella ɖo la, edo go Faina, amesi tso Ukraine va eteƒe medidi o. Blanuiléle nɔ fu ɖem na Faina. Ella va se emegbe be ɖeko Faina do gbe ɖa na Mawu be: “Nyemenya amesi nènye ya o, gake ne èle to ɖomem la, ke kpe ɖe ŋunye” vɔ teti koe nye ma wòƒo ʋɔ na nyɔnu blanuiléla la. Dzeɖoɖo dedzolãmename aɖe yi edzi le woa kple Ella dome. Faina bia nya geɖe, eye wòde ŋugble le ŋuɖoɖo siwo wonae la ŋu nyuie. Le ɣeyiɣi aɖe megbe la, eva xɔe se be Yehowa Ðasefowoe le nyateƒea fiam tso Biblia me. Etrɔ asi le eƒe yunivɛsiti nusrɔ̃ɖoɖo ŋu ale be wòate ŋu azã ɣeyiɣi geɖe ɖe hamea kple gbeƒãɖeɖedɔa ŋu. Le May 1994 me la, Faina xɔ nyɔnyrɔ. Ege ɖe mɔɖeɖedɔa me, eye wòwɔa kɔmpiuta dɔ ɣeyiɣi aɖe tsɔ kpɔa eɖokui dzii.

 Le November 1994 me esime Ella nɔ gbeƒãɖeɖedɔa wɔm la, ese le eɖokui me kpata be yegbɔdzɔ ŋutɔ. Eyi kɔdzi afisi wodoe kpɔ hekpɔe be abi nɔ eƒe dɔkavi me si nɔ ʋu ɖuɖum. Kaka fiẽsi naɖo la, Ella ƒe ʋu ɖiɖi va ɖo 7.2. Hamemegã aɖe le Ella ƒe hamea me, si nye Kɔdzi ƒe Kadododzikpɔkɔmiti (HLC) si le afima ƒe zimenɔla, tsɔ atikewɔmɔnu vovovo siwo mabia ʋu zazã o ŋuti nyatakakawo yi na ɖɔktaawo. * Wowɔ dɔ na Ella ʋumadomadoe dzidzedzetɔe, eye eƒe lãme sẽ keŋkeŋ.—Dɔwɔwɔwo 15:28, 29.

Nyaa wɔ dɔ ɖe Karl, si nye nyɔnuwo ƒe dɔléle ŋuti nunyala, si kpɔ Ella gbɔ, amesi nye Yudatɔ si wodzi ɖe Germany, dzi ale gbegbe. Eva ɖo ŋku edzi be ye dzilawo, siwo tsi agbe le Ametsɔtsrɔ̃ Gã la me nya Yehowa Ðasefowo le fuwɔamegaxɔawo me. Karl bia nya geɖe. Togbɔ be vovo menɔ Karl ŋu kura o le eƒe atikewɔdɔa ta hã la, edi ɣeyiɣi hena Biblia-nusɔsrɔ̃ edziedzi. Kaka ƒe si kplɔe ɖo naɖo la, ete Kristotɔwo ƒe kpekpewo dede kwasiɖa sia kwasiɖa.

Nukae do tso nuku si gaŋkuidzraɖola la ƒã me? Míekpɔ nusi dzɔ ɖe Sasha kple eƒe ƒomea dzi xoxo. Ella hã va zu mɔɖela vevi. Vianyɔnu, Eina, amesi do le sukukɔkɔ eteƒe medidi o, hã dze mɔɖeɖedɔa wɔwɔ gɔme. Faina hã nye mɔɖela vevi. Karl, nyɔnuwo ƒe dɔléle ŋuti nunyala si kpɔ Ella gbɔ, hã nye Ðasefo xɔnyɔnyrɔ fifia eye wònye subɔsubɔdɔwɔla, si le Biblia ƒe nyateƒea ƒe dɔdaŋusẽ ŋu nya gblɔm na dɔnɔ siwo vaa egbɔ kple ame bubuwo.

Russiatɔ siwo ʋu yi afima ƒe ƒuƒoƒo sue si nye Hebrigbe hame si le Haifa ƒe akpa aɖe tsã la va zu Russia-hame si me dzo le, si me Fiaɖuƒegbeƒãɖela 120 le fifia. Nusi gbɔ dzidziɖedzi sia ƒe akpa aɖe tsoe nye nya sia be gaŋkuidzraɖola aɖe si le Lviv wɔ mɔnukpɔkpɔ aɖe ŋudɔ tsɔ ƒã nuku aɖee!

[Etenuŋɔŋlɔwo]

[Anyigbatata si le axa 29]

(Edze nyuie le agbalẽa ŋutɔ me)

UKRAINE

ISRAEL

[Afi Si Míexɔ Mɔɖeɖe Tso]

Mountain High Maps® Copyright © 1997 Digital Wisdom, Inc.

[Nɔnɔmetata siwo le axa 30]

Ella kple vianyɔnu Eina

[Nɔnɔmetata si le axa 31]

Ðasefo Russiagbedolawo ƒe ƒuƒoƒo kpɔdzidzɔ si le Haifa. Miame yi ɖusime: Sasha, Ilana, Natasha, Galina, Faina, Ella, Eina, kple Karl