Kuxi Siwo Vovototo Dede Amewo Me Hena Vɛ

“ÐEWOHĨ TASƆSƆ ATE ŊU ANYE GOMENƆAMESI, GAKE DZIÐUÐU AÐEKE MELE ANYIGBA DZI SI ATE ŊU AHEE VƐ GBEÐE O.”

Nya siae Honoré de Balzac, si nye Fransetɔ ƒe alafa 19 lia me ŋutinyaŋlɔla la, gblɔ. Èlɔ̃ ɖe eƒe nya mawo dzia? Ame geɖe kpɔe dze sii kɔte be vovototodedeameme mesɔ o. Gake le ƒe alafa 21 lia sia me gɔ̃ hã la, wogakpɔtɔ ma ameƒomea me ɖe hadomeɖoƒe ƒomevi vovovowo me.

CALVIN COOLIDGE, si nye United States dukplɔla tso ƒe 1923 vaseɖe 1929 me, tsi dzi ɖe vovototodedeameme ŋuti kuxiwo ŋu eye wòƒo nu tso “hadomeɖoƒe kɔkɔ ɖesiaɖe ɖeɖe ɖa keŋkeŋ” ŋu. Ke hã ƒe 40 le Coolidge ƒe dziɖuɖu megbe la, Kerner Dɔwɔha si woɖo be woatsɔ asrɔ̃ nu tso ameƒomeviwo dome ƒomedodowo ŋu, gblɔ be vɔvɔ̃ li be United States ava ma ɖe ameha ƒomevi eve me godoo: “ɖeka anye ameyibɔwo, evelia anye yevuwo—amesiwo dome ama eye womasɔ ta o.” Ame aɖewo gblɔ be nya sia le eme vam xoxo eye be “vovototodedeameme le ganyawo kple ameƒomevinyenye me la le dzidzim ɖe edzi” le dukɔ ma me.

Nukatae nana be amegbetɔwo ƒe tasɔsɔ ƒe nya la nava eme ŋutɔŋutɔ sesẽ alea gbegbe ɖo? Kuxi vevitɔ ɖekae nye amegbetɔ ƒe nɔnɔme. William Randolph Hearst si nye United States sewɔhamenɔla tsã gblɔ kpɔ be: “Wowɔ amewo katã wosɔ le nu ɖeka aɖe ya teti me, eyae nye woƒe didi be yewomanɔ tasɔsɔ me o.” Nya ma gɔme ɖe? Ðewohĩ Fransetɔ ƒe alafa 19 lia me fefeŋlɔla Henry Becque gblɔe eme kɔ wu be: “Nusi nana tasɔsɔ nyea kuxi sesẽ aleae nye be míedina be míasɔ ta godoo kple amesiwo le ŋgɔ na mí.” Ne míagblɔe bubui la, amewo dina be yewoasɔ ta kple amesiwo le ɖoƒe kɔkɔwo wu yewo; gake ame akpa gãtɔ malɔ̃ aɖe woƒe mɔnukpɔkpɔwo kple viɖewo dzi akpɔtɔ eye woana amesiwo wobuna be wole yewo te hã nakpɔ gome le eme be woasɔ ta kple yewo o.

Le blema la, wodzia ame aɖewo wonyea ame tsɛwo, ɖewo nyea dziɖuɖu me ame ŋkutawo, alo fiaƒomewo kura gɔ̃ hã. Esia gakpɔtɔ le nenema le teƒe geɖe egbea hã. Gake le dukɔ geɖe me egbea la, ga ƒe amesinɔnɔ—alo eƒe amesimanɔmanɔ—ye fiana be ame aɖe nye ame tsɛ, amesi le vedomesi, alo amesi le ɖoƒe kɔkɔ. Eye nu bubu aɖewo gali siwo fiaa ɖoƒe si ƒomevi ame aɖe le, wo dometɔ aɖewo nye ŋutigbalẽ ƒe amadede, eƒe sukudede, kple eƒe agbalẽnyanya. Eye le teƒe aɖewo la, ŋutsu alo nyɔnu nyenye ye nyea nu vevitɔ si hea  mamadedeameme vɛ, eye esia nana wobua nyɔnuwo be wonye ame tsɛwo.

Ðe Mɔkpɔkpɔ aɖe Lia?

Amegbetɔ ƒe gomenɔamesi ŋuti sewo na woɖe vovototodedeameme ƒe kuxi aɖewo ɖa vaseɖe afi aɖe. Wode se siwo tsi tre ɖe vovototodedeameme ŋu le United States. Wode se ɖe mamadedeameme ŋu le South Africa. Togbɔ be kluvisitsatsa gakpɔtɔ li hã la, wode se ɖe enu le xexeame ƒe akpa geɖe. Nyametsotso siwo wowɔ le se nu va na be anyigba ƒe amesinɔnɔ ŋuti gomenɔamesi ate ŋu asu dumevidzidzi ŋutɔŋutɔ aɖewo si, eye vovototodedeameme ŋuti se aɖewo va na gbɔdzɔe ame tsɛ ƒe ha aɖewo.

Ðe esia fia be hadome vovototodedeameme ƒe kuxia wu enua? Kpao. Togbɔ be wonya ɖe hadome vovototodedeameme dzi kpɔtɔ le mɔ aɖewo nu hã la, mamadedeameme ƒe mɔnu yeye aɖewo le mo dom ɖa xoxo. Agbalẽ si nye Class Warfare in the Information Age gblɔ be: “Edze abe mama si nɔa dɔtɔwo kple dɔwɔlawo dome megasɔ egbea o ene, gake esi wònye be amesiwo do dziku le hatsotso gã siawo mee gama ake ɖe ƒuƒoƒo suesue me tae wòdze nenema ɖo.”

Ðe vovototodedeameme akpɔtɔ ahe mama ade amewo dome tegbeea? Enyo, abe alesi nyati si gbɔna aɖe emee ene la, nɔnɔmea mefia be mɔkpɔkpɔ aɖeke kura megali o.