Aleke Gbegbe Nyateƒea Xɔ Asi Na Wòe?
Aleke Gbegbe Nyateƒea Xɔ Asi Na Wòe?
“Miadze si nyateƒe la, eye nyateƒe la lawɔ mi ablɔɖeviwoe.”—YOHANES 8:32.
1. Aleke alesi Pilato zã nya “nyateƒe” anya to vovo tso alesi Yesu zãe gbɔ?
“NUKAE nye nyateƒe?” Esime Pilato bia nya sia la, edze abe nyateƒe gbadzaa ko ŋu nya biam wònɔ ene. Gake ɖeko Yesu ya gblɔ be: “Nye la, esia ta wodzim ɖo, eye esia ta meva xexeame ɖo, bena maɖi ɖase na nyateƒe la.” (Yohanes 18:37, 38) To vovo na Pilato la, Yesu zã asitɔnudzi tẽ ƒe nyakui hegblɔ be ‘nyateƒe la.’ Nyateƒe deblibo si tso Mawu gbɔ ŋue wònɔ nu ƒom tsoe.
Xexeame ƒe Nɔnɔme Ðe Nyateƒea Ŋu
2. Yesu ƒe nyagbɔgblɔ kae ɖe nyateƒe ƒe asixɔxɔ fia?
2 Paulo gblɔ be: “Menye amewo katã si xɔse la le o.” (Tesalonikatɔwo II, 3:2) Woate ŋu agblɔ nya sia ke le nyateƒe hã ŋu. Ne wotsɔ nyateƒe si wotu ɖe Biblia dzi gɔ̃ hã yi na ame geɖe la, woɖonɛ koŋ gbenɛ. Ke hã aleke gbegbee wòxɔ asii enye si! Yesu gblɔ be: “Miadze si nyateƒe la, eye nyateƒe la lawɔ mi ablɔɖeviwoe.”—Yohanes 8:32.
3. Nufiafia siwo kplɔa ame tranae ŋuti nuxlɔ̃ame kawoe wòle be míaxɔ?
3 Apostolo Paulo gblɔ be nyateƒea mele xexemenunya kple amegbetɔwo ƒe kɔnyinyiwo me woakpɔ o. (Kolosetɔwo 2:8) Le nyateƒe me la, nufiafia mawo kplɔa ame tranae. Paulo xlɔ̃ nu Efeso Kristotɔwo be ne woxɔ wo dzi se la, woanɔ abe gbɔgbɔmevidzĩ siwo ‘ya sia ya ƒona yina gaƒona gbɔna, henyamana wo to amewo ƒe beble, aɖaŋu vɔ̃, si nu sẽ, kple to nudadafiafia ƒe amebeblemɔ nu’ la ene. (Efesotɔwo 4:14) Egbea la, amesiwo tsi tre ɖe Mawu ƒe nyateƒea ŋu tsɔa woƒe ameflunyawo doa “amewo ƒe beble” la ɖe ŋgɔ. The New Encyclopædia Britannica ɖe “ameflunya” gɔme be enye “agbagbadzedze vivivi be woakpɔ ŋusẽ ɖe ame bubuwo ƒe xɔse, nɔnɔme, alo nuwɔnawo dzi.” Ameflunya mawo trɔa nyateƒe ayetɔe wòzua aʋatso eye wonaa aʋatso dzena abe nyateƒe ene. Be míake ɖe nyateƒe ŋu le nyaƒoɖeamenu vɔ̃ɖi siawo tɔgbe me la, ele be míadzro Ŋɔŋlɔawo me kutrikukutɔe.
Kristotɔwo Kple Xexeame
4. Amekawoe wona nyateƒeae, eye dɔ kae wode asi na amesiwo xɔe?
4 Yesu Kristo do gbe ɖa na Yehowa ɖe amesiwo va zu eƒe nusrɔ̃lawo ta be: “Wɔ wo kɔkɔe le nyateƒe la me, wò nya la enye nyateƒe.” (Yohanes 17:17) Woakɔ amesiawo ŋu, alo aɖe wo ɖe vovo, be woasubɔ Yehowa ahana amewo nanya nu tso eƒe ŋkɔ kple Fiaɖuƒea ŋu. (Mateo 6:9, 10; 24:14) Togbɔ be Yehowa ƒe nyateƒea mele amewo katã si o hã la, enye nunana femaxee na amesiwo katã dinɛ, dukɔ ka ke mee woɖatso o, ŋutigbalẽ ka kee ɖale wo ŋu o, alo dekɔnu ka kee ɖale wo si o. Apostolo Petro gblɔ bena: “Medze sii . . . be, Mawu mekpɔa ame ŋku me o, hafi boŋ le dukɔ sia dukɔ me, amesi ke vɔ̃nɛ, eye wòwɔa nu dzɔdzɔe la, eya dzea eŋu.”—Dɔwɔwɔwo 10:34, 35.
5. Nukatae wotiaa Kristotɔwo yome zi geɖe?
5 Kristotɔwo gblɔa Biblia ƒe nyateƒea na amewo gake womexɔa wo le afisiafi o. Yesu xlɔ̃ nu be: “Woade mi asi na fukpekpe, eye woawu mi, eye dukɔwo katã woalé fu mi le nye ŋkɔ ŋuti.” (Mateo 24:9) Esi nunɔla Irelandtɔ John R. Cotter nɔ nu ƒom tso nya sia ŋu la, eŋlɔ le ƒe 1817 me be: “Le nyateƒe me la, agbagba siwo [Kristotɔwo] dzena to woƒe gbeƒãɖeɖe dzi be yewoatrɔ asi le ameƒomea ƒe agbenɔnɔ ŋu wòanyo, si naa ameawo ɖea ŋudzedzekpɔkpɔ fiana la naa woléa fu nusrɔ̃laawo hetia wo yome le esi woklo nu le woƒe nugbegblẽwɔwɔwo dzi ta.” Yometila siawo ‘mexɔa nyateƒe la ƒe lɔlɔ̃, bene woaxɔ wo o.’ Le susu sia ta la, ‘Mawu ɖe mɔ beble, si nu sẽ la, ɖo wo gbɔ, bene woaxɔ aʋatsokaka dzi ase, ne woadrɔ̃ ʋɔnu wo katã elabena womexɔ nyateƒe la dzi se o, ke boŋ wodo vivi ɖe madzɔmadzɔnyenye ŋu.’—Tesalonikatɔwo II, 2:10-12.
6. Dzodzro kae mele be Kristotɔ naɖe mɔ wòaɖo eme o?
6 Apostolo Yohanes xlɔ̃ nu Kristotɔ siwo le xexe sẽŋuta sia me be: “Migalɔ̃ xexeame kple nusiwo le eme o. . . . Nusianu, si le xexeame: ŋutilã ƒe nudzodzro kple ŋkuwo ƒe ŋubiabiã kple agbe ƒe adegbe ƒuƒlu ƒoƒo la, metso Fofo la gbɔ o, ke boŋ xexeame wotso.” (Yohanes I, 2:15, 16) Esime Yohanes gblɔ be “nusianu” la, meɖe naneke le eme o. Le susu sia ta la, mele be míana xexeame ƒe naneke si ate ŋu aɖe mí ɖa le nyateƒea ŋu la nadzro mí gbeɖe o. Yohanes ƒe nuxlɔ̃amea dzi wɔwɔ akpɔ ŋusẽ gã aɖe ɖe míaƒe agbe dzi. Le mɔ ka nu?
7. Aleke nyateƒea nyanya ʋãa dzianukwaretɔwoe?
7 Le ƒe 2001 me la, Yehowa Ðasefowo wɔ aƒeme Biblia nusɔsrɔ̃ miliɔn ene kple afã ɣleti sia ɣleti, henɔ Mawu ƒe nudidiwo hena agbenɔnɔ fiam ame ɖekaɖekawo kple ƒuƒoƒowo le xexeame katã. Esia wɔe be ame 263,431 xɔ nyɔnyrɔ. Nyateƒea ƒe kekelia va xɔ asi na nusrɔ̃la yeye siawo, eye wogbe nu le hadede vɔ̃wo kple nuwɔna gbegblẽ siwo medea bubu Mawu ŋu o siwo bɔ ɖe xexe sia me la gbɔ. Tso esime woxɔ nyɔnyrɔ la, wodzea agbagba be yewoanɔ agbe ɖe dzidzenu siwo Yehowa ɖo na Kristotɔwo katã la nu. (Efesotɔwo 5:5) Ðe nyateƒea xɔ asi na wò nenema?
Yehowa Léa Be na Mí
8. Aleke Yehowa wɔa nu ɖe míaƒe adzɔgbeɖeɖe ŋui, eye nukatae nunya le eme be ‘míadi fiaɖuƒea gbãgbiagbã’?
8 Togbɔ be míede blibo o hã la, Yehowa xɔa míaƒe adzɔgbeɖeɖe nublanuikpɔkpɔtɔe, eye le kpɔɖeŋunyagbɔgblɔ nu la, eɖiɖina vaa anyi be wòahe mí ɖe eɖokui ŋu. Etoa ema me fiaa nu mí be taɖodzinu kple nudidi siwo ŋu bubu le nanɔ mía si. (Psalmo 113:6-8) Le ɣeyiɣi ma ke me la, Yehowa ɖea mɔ be ƒomedodo nanɔ mía kple ye dome eye wòdo ŋugbe be yealé be na mí ne ‘míeyi edzi di mawufiaɖuƒea kple eƒe dzɔdzɔenyenye gbãgbiagbã.’ Ne míewɔ esia hekpɔ mía ɖokui ta le gbɔgbɔ me la, edo ŋugbe be: ‘Yeatsɔ nu bubuwo katã akpe ɖe eŋu na mí.’—Mateo 6:33.
9. Amekae nye “dɔla nuteƒewɔla kple aɖaŋudzela” la, eye aleke Yehowa toa “dɔla” sia dzi léa be na míi?
9 Yesu Kristo tia eƒe apostolo 12-awo eye wòɖo Kristotɔ amesiaminawo ƒe hame si wova yɔ be “Mawu ƒe Israel” la gɔme anyi. (Galatiatɔwo 6:16; Nyaɖeɖefia 21:9, 14) Wova ɖɔ esia emegbe be “Mawu gbagbe [la] ƒe hame kple nyateƒe ƒe sɔti kple gɔmeɖoɖoanyi.” (Timoteo I, 3:15) Yesu yɔ ha ma me tɔwo be “dɔla nuteƒewɔla kple aɖaŋudzela” kpakple “xɔnuvi nuteƒewɔla kple nunyala.” Yesu gblɔ be dɔla nuteƒewɔla la ƒe dɔ anye be ‘wòanɔ nuɖuɖu nam Kristotɔwo le ɣeyiɣi nyui dzi.’ (Mateo 24:3, 45-47; Luka 12:42) Ne míeɖu nu o la, dɔ awu mí míaku. Nenema ke ne míeɖu nu le gbɔgbɔ me o la, míagbɔdzɔ ahaku le gbɔgbɔ me. Eyata “dɔla nuteƒewɔla kple aɖaŋudzela” la ƒe anyinɔnɔ nye kpeɖodzi bubu be Yehowa léa be na mí. Neva eme be míakpɔ ŋudzedze ɖe gbɔgbɔmenuɖuɖu xɔasi siwo wòtoa “dɔla” la dzi naa mí la ŋu ɣesiaɣi.—Mateo 5:3.
10. Nukatae wòle vevie be míanɔ kpekpewo me ɣesiaɣi?
10 Gbɔgbɔmenu ɖuɖu bia ɖokuisinusɔsrɔ̃. Ebia hadede kple Kristotɔ bubuwo kpakple hamea ƒe kpekpewo dede hã. Èɖo ŋku nusiwo tututu nèɖu ɣleti ade, alo kwasiɖa ade siwo va yi la gɔ̃ hã, dzia? Ðewohĩ màɖo ŋkui o. Ke hã nusianu si nèɖu la na nunyiame si nèhiã be wòalé wò ɖe te la wò. Eye ɖewohĩ èɖu nu ma tɔgbe tso ɣeaɖeɣi ke. Nenema ke wòle le gbɔgbɔmenuɖuɖu si wonana le míaƒe Kristotɔwo ƒe kpekpewo me la hã gomee. Ðewohĩ míaɖo ŋku nusianu si míese le kpekpeawo me la katã dzi tsitotsito o. Eye ɖewohĩ míexɔ nyatakaka ɖeka tɔgbe ma edziedzi. Ke hã, enye gbɔgbɔmenuɖuɖu, si hiã hena míaƒe lãmesẽ. Míexɔa gbɔgbɔmenuɖuɖu nyui, si wonana ɖe ɣeyiɣi nyui dzi, le míaƒe kpekpewo me ɣesiaɣi.
11. Agba kawoe le mía dzi ne míele Kristotɔwo ƒe kpekpewo dem?
11 Kristotɔwo ƒe kpekpewo dede hã daa agba ɖe mía dzi. Woxlɔ̃ nu Kristotɔwo be ‘woade dzi ƒo na wo nɔewo’ eye woade dzo wo hati hamea me tɔwo me hena ‘lɔlɔ̃ kple dɔ nyui wɔwɔ.’ Míaƒe dzadzraɖo ɖe Kristotɔwo ƒe kpekpewo katã ŋu, wo dede, kple gome kpɔkpɔ le wo me doa ŋusẽ mía dometɔ ɖesiaɖe ƒe xɔse eye wòdea dzi ƒo na ame bubuwo. (Hebritɔwo 10:23-25) Abe ɖevi sue siwo nɔa nuɖuɖu me tiam ene la, ahiã be woade dzi ƒo na ame aɖewo edziedzi be woaɖu gbɔgbɔmenunyiame. (Efesotɔwo 4:13) Enye lɔlɔ̃ ɖeɖefia be míana dzideƒoname ma ne ehiã ale be ame mawo ate ŋu ava tsi azu Kristotɔ tsitsiwo, amesiwo ŋu apostolo Paulo ŋlɔ le bena: “Nuɖuɖu sesẽ li na amesiwo tsi zu blibo to ŋudɔwɔwɔ me kpɔ sidzenu, siwo nu mã wo, be woabu nyui kple vɔ̃ me kpɔ la.”—Hebritɔwo 5:14.
Beléle na Mía Ðokui le Gbɔgbɔ Me
12. Be míate ŋu anɔ nyateƒea me ɖaa la, ameka ƒe agbanɔamedzi koŋue wònye? Ðe eme.
12 Mía srɔ̃ alo mía dzilawo ate ŋu ade dzi ƒo na mí le nyateƒemɔa dzi. Nenema ke hamemegãwo ate ŋu anyi mí esi míenye alẽha siwo dzi kpɔm wole ta. (Dɔwɔwɔwo 20:28) Gake ne míate ŋu anɔ nyateƒemɔa dzi ɖaa la, ameka ƒe agbanɔamedzi koŋ wònye? Le nyateƒe me la, enye mía dometɔ ɖesiaɖe ƒe agbanɔamedzi. Eye nenemae wòle le nɔnɔme deamedziwo kple ɣeyiɣi sesẽwo siaa me. Bu nudzɔdzɔ siwo gbɔna ŋu kpɔ.
13, 14. Abe alesi nudzɔdzɔ si ku ɖe alẽvia ŋu ɖee fia ene la, aleke míawɔ axɔ gbɔgbɔmekpekpeɖeŋu si míehiã lae?
13 Le Scotland la, alẽvi aɖewo nɔ gbe ɖum le gbedzi esime wo dometɔ ɖeka bu ɖado ɖe togbɛ sue aɖe xa hege dze kpeto aɖe me. Nuvevi mewɔe o, gake vɔvɔ̃ ɖoe eye mete ŋu wòado o. Eyata ete xɔxlɔ̃ sesĩe. Dadaa see eye eya hã te xɔxlɔ̃ vaseɖe esime alẽkplɔlaa va ɖe alẽvia.
14 De dzesi alesi nua dzɔe. Alẽvia do ɣli hena kpekpeɖeŋu, dada hã do ɣlia kpe ɖe eŋu, eye alẽkplɔla si see la tso enumake va ɖee. Ne lã vidzĩ la kple dadaa te ŋu de dzesi afɔku hedo ɣli enumake hena kpekpeɖeŋu ɖe, ɖe mele be míawɔ nu nenema, ne míetra le gbɔgbɔ me alo afɔku tso Satana ƒe xexeame va tu mí truka oa? (Yakobo 5:14, 15; Petro I, 5:8) Ele be míawɔ nenema, vevietɔ ne nuteƒekpɔkpɔ geɖe mesu mía si o le esi míenye ɖeviwo alo míenye ame yeyewo le nyateƒea me ta.
Mawu ƒe Mɔfiamewo Dzi Wɔwɔ Hea Dzidzɔ Vɛ
15. Aleke nyɔnu aɖe se le eɖokui me esime wòte hadede kple Kristo-hamea?
15 Bu asixɔxɔ si le Biblia me nugɔmesese kple susume ƒe akɔdzeanyi si wòhena vɛ na amesiwo subɔa nyateƒe Mawu la ŋu kpɔ ko. Nyɔnu aɖe si xɔ ƒe 70 si nɔ England Sɔlemeha me le eƒe agbe me katã la lɔ̃ be Yehowa Ðasefo aɖe nasrɔ̃ Biblia kpli ye. Eteƒe medidi o esrɔ̃e be Mawu ƒe ŋkɔe nye Yehowa eye wòyi Fiaɖuƒe Akpata si le wo gbɔ me hewɔ ɖeka kple ameawo gblɔ “Amen” ɖe gbe siwo wodona ɖa tso dzi me la dzi. Etsɔ seselelãme deto gblɔ be: “Le esi teƒe be miana wòadze abe ɖe Mawu le adzɔge ʋĩ le mí amegbetɔ tsɛwo gbɔ ene la, miena wòdze abe xɔlɔ̃ vavã aɖe si le mía dome ene. Enye nane si teƒe nyemekpɔ kpɔ o.” Kakaɖedzitɔe la, ɖetsɔlemetɔ lɔlɔ̃ ma maŋlɔ alesi nyateƒea wɔ dɔ ɖe edzii zi gbãtɔ la be akpɔ o. Neva eme be míawo hã míagaŋlɔ alesi nyateƒea xɔ asi na mí le gɔmedzedzea me la be akpɔ gbeɖe o.
16. (a) Nukae ate ŋu adzɔ ne míena gakpɔkpɔ zu míaƒe taɖodzinu vevitɔ? (b) Aleke míate ŋu awɔ akpɔ dzidzɔ vavãtɔ?
16 Ame geɖe xɔ se be ne ga geɖe le yewo si la, dzi adzɔ yewo wu. Gake ne míena gakpɔkpɔ zu taɖodzinu vevitɔ na mí le agbe me la, míate ŋu ‘atsɔ nuxaxa geɖe aŋɔ mía ɖokuii flofloflo.’ (Timoteo I, 6:10) Bu ame alesinu ƒlea loto tikitwo, tsɔa ga ƒua gbe le tsatsadaƒewo, alo nɔa ga dem adzɔha vovovo ƒe dɔwo me megbemakpɔmakpɔe henɔa mɔ kpɔm be yewoazu kesinɔtɔwo le zãdodo ɖeka me ŋu kpɔ. Wo dometɔ ʋɛ aɖewo koe kpɔa ga si wole mɔ kpɔm na la. Eye amesiwo kpɔe gɔ̃ hã va kpɔnɛ zi geɖe be ga si yewokpɔ kpoyi la mehe dzidzɔ aɖeke vɛ na yewo o. Ke boŋ Yehowa ƒe lɔlɔ̃nuwɔwɔ, dɔwɔwɔ kple Kristo-hamea le Yehowa ƒe gbɔgbɔ kɔkɔea ƒe mɔfiame kple eƒe dɔlawo ƒe kpekpeɖeŋu tee hea dzidzɔ vavãtɔ vɛ. (Psalmo 1:1-3; 84:4, 5; 89:15) Ne míewɔ esia la, yayra siwo míele mɔ kpɔm na o ate ŋu asu mía si. Ðe nyateƒea xɔ asi na mí nenema gbegbe be wòahe yayra mawo tɔgbe ava míaƒe agbe mea?
17. Nukae Simon si nye lãgbalẽdɔwɔla ƒe aƒeme si Petro dze ɖe fia le apostoloa ƒe nɔnɔme ŋu?
17 Bu apostolo Petro ƒe nuteƒekpɔkpɔ aɖe ŋu kpɔ. Le ƒe 36 M.Ŋ. me la, ezɔ mɔ yi dutanyanyuigblɔƒe le Saron Gbedzi. Etɔ ɖe Lida, afisi wòyɔ dɔ lãmetututɔ Ainea le eye wòtso afima yi Yope tɔdziʋudzeƒea. Afimae wòfɔ Tabita ɖe tsitre le. Dɔwɔwɔwo 9:43 gblɔ na mí bena: ‘Eva me bena, enɔ Yope xɔ ŋkeke geɖe le Simon aɖe, si nye lãgbalẽdɔwɔla la gbɔ.’ Nyatakaka sue sia ɖe alesi Petro wɔ nu nazãmabumabui ɖe amewo ŋu le subɔsubɔdɔa wɔwɔ le dugã ma me la fia. Le mɔ ka nu? Biblia-nyala Frederic W. Farrar ŋlɔ bena: “Womate ŋu adoe ɖe [Mose ƒe] Sea me léɖeasila megbemakpɔla aɖeke gbɔ be wòadze lãgbalẽdɔwɔla ƒe aƒeme wòalɔ̃ gbeɖe o. Lãgbalẽ kple lã kuku vovovo siwo ŋu wòhiã be woaka asii gbesiagbe le dɔ sia wɔwɔ me, kpakple nusiwo eŋudɔwɔwɔ bia, na be wònye nu makɔmakɔ si nyɔa ŋu le semeléɖeasila megbemakpɔla ɖesiaɖe ŋkume.” Farrar gblɔ be ne Simon ƒe ‘aƒe si le ƒua nu’ mete ɖe eƒe lãgbalẽdɔwɔƒea ŋu o hã la, Simon nɔ “dɔ si wonyɔa ŋui wɔm, eye womade bubu amesiwo katã wɔa dɔ ma ŋu o.”—Dɔwɔwɔwo 10:6.
18, 19. (a) Nukatae Petro tɔtɔ le ŋutega si wòkpɔ la ta? (b) Yayra kawoe Petro xɔ siwo menɔ mɔ kpɔm na o?
18 Petro, amesi mebu nazã o la lɔ̃ dze Simon gbɔ, eye afimae Petro xɔ Mawu ƒe mɔfiame si menɔ mɔ kpɔm na o la tsoe. Ekpɔ ŋutega aɖe si me wogblɔ nɛ le be wòaɖu lã siwo ŋu mekɔ le Yudatɔwo ƒe sea nu o la. Petro gbe be “[yemeɖu] nusianu, si nye nu dzodzro kple nu makɔmakɔ kpɔ o.” Gake wogblɔ nɛ zi etɔ̃ sɔŋ be: ‘Mègayɔ nusi ŋuti Mawu kɔ la be nu dzodzro o.’ Eme kɔ be, ‘Petro tɔtɔ le eɖokui me, le nusi ŋutega, si wòkpɔ la fia ŋuti.’—Dɔwɔwɔwo 10:5-17; 11:7-10.
19 Petro menya be le ŋkeke si do ŋgɔ dzi la, Trɔ̃subɔdukɔ me tɔ aɖe, si ŋkɔe nye Kornelio hã kpɔ ŋutega aɖe le Kaisarea, si gbɔ didi kilometa 50 tso afima o. Yehowa ƒe dɔla gblɔ na Kornelio be wòadɔ dɔlawo woayi Petro gbɔ le Simon lãgbalẽdɔwɔla la ƒeme. Kornelio dɔ eƒe dɔlawo ɖe Simon ƒeme, eye Petro zɔ kpli wo va Kaisarea. Le afima la, eɖe gbeƒã na Kornelio kple eƒe ƒometɔwo kple xɔlɔ̃wo. Ena be wova zu Trɔ̃subɔdukɔ me tɔ aʋamatsomatsotɔ gbãtɔ siwo zu xɔsetɔwo hexɔ gbɔgbɔ kɔkɔea eye wozu Fiaɖuƒe domenyilawo. Togbɔ be ŋutsuawo nye aʋamatsomatsotɔwo hã la, wona nyɔnyrɔ amesiwo katã se Petro ƒe nyawo. Esia ʋu mɔ na dukɔwo me tɔ siwo wobuna ame makɔmakɔwoe le Yudatɔwo ƒe nukpɔsusu nu la be woava nye Kristo-hamea me tɔwo. (Dɔwɔwɔwo 10:1-48; 11:18) Mɔnukpɔkpɔ tɔxɛ ka gbegbee nye si wònye na Petro—le alesi nyateƒea xɔ asi nɛ hena wòwɔ ɖe mɔfiame si tso Yehowa gbɔ dzi eye wòwɔ nu le xɔse me ta!
20. Kpekpeɖeŋu kae Mawu naa mí ne míetsɔ nyateƒea ɖo nɔƒe gbãtɔ le míaƒe agbeme?
20 Paulo xlɔ̃ nu be: ‘Míanye anukwaretɔwo le lɔlɔ̃ me, eye le nusianu me míatsi ali ke ɖe Kristo, si nye ta la me.’ (Efesotɔwo 4:15) Ẽ, nyateƒea ana dzidzɔ si ɖeke mesɔ kplii o nasu mía si fifia ne míetsɔe ɖo nɔƒe gbãtɔ le míaƒe agbeme heɖe mɔ Yehowa to eƒe gbɔgbɔ kɔkɔea dzi fia mɔ mí. Azɔ hã, kpekpeɖeŋu si mawudɔla kɔkɔeawo naa mí le míaƒe nyanyuikakadɔa me nenɔ susu me na mí. (Nyaɖeɖefia 14:6, 7; 22: 6) Mɔnukpɔkpɔ ka gbegbe nye si wònye na mí be woda megbe na mí alea le dɔ si Yehowa de mía si la wɔwɔ me! Nuteƒewɔwɔ me léle ɖe asi akplɔ mí míakafu Yehowa, nyateƒe Mawu la, tegbetegbe. Ðe nane ate ŋu axɔ asi wu ema?—Yohanes 17:3.
Nukae Míesrɔ̃?
• Nukatae ame geɖe mexɔa nyateƒea o?
• Aleke wòle be Kristotɔwo nabu nusiwo le Satana ƒe xexea mee?
• Nɔnɔme kae wòle be wòanɔ mía si ɖe kpekpewo ŋu, eye nukatae?
• Beléle na mía ɖokui le gbɔgbɔ me ƒe agba kae le mía dzi?
[Biabiawo]
[Map/Picture on page 18]
(Edze nyuie le agbalẽa ŋutɔ me)
ƑU GÃ LA
Kaisarea
SARON GBEDZI
Yope
Lida
Yerusalem
[Nɔnɔmetata]
Petro wɔ ɖe Mawu ƒe mɔfiafia dzi eye wòxɔ yayra siwo menɔ mɔ kpɔm na o
[Afi Si Míexɔ Mɔɖeɖe Tso]
Map: Mountain High Maps® Copyright © 1997 Digital Wisdom, Inc.
[Nɔnɔmetata si le axa 13]
Yesu ɖi ɖase le nyateƒea ŋuti
[Nɔnɔmetata si le axa 15]
Abe ŋutilãmenuɖuɖu ene la, gbɔgbɔmenuɖuɖu le vevie hena míaƒe lãmesẽ