Yi Edzi Nànɔ Nusiwo Nèsrɔ̃ La Ŋudɔ Wɔm
Yi Edzi Nànɔ Nusiwo Nèsrɔ̃ La Ŋudɔ Wɔm
“Nusiwo hã miesrɔ̃, eye miexɔ, eye miese, eye miekpɔ le gbɔnye la, nusiawo ke miwɔ, eye ŋutifafa Mawu la anɔ anyi kpli mi.”—FILIPITƆWO 4:9.
1, 2. Ne míagblɔe gbadzaa la, ɖe Biblia le ŋusẽ kpɔm ɖe amesiwo bua wo ɖokui mawusubɔlawoe ƒe agbe dzia? Ðe eme.
“SUBƆSUBƆHAWO Le Dzidzim Ðe Edzi, Gake Agbenyuinɔnɔ Le To Yim.” Nyati sia si wotsɔ ɖo tanya na nyadzɔdzɔgbalẽ si nye Emerging Trends lae nye nusiwo ŋu woke ɖo le numekuku aɖe si wowɔ le United States katã la ƒe totoɖeme. Edze ƒã be amesiwo dea sɔleme eye wogblɔna be mawusubɔsubɔ le vevie na yewo le agbe me la ƒe xexlẽme dzi ɖe edzi le dukɔ ma me. Gake nyatakakaa gblɔ be: “Togbɔ be xexlẽmea dzi ɖe edzi alea gbegbe hã la, Amerikatɔ geɖewo tɔa gbe ŋusẽ si mawusubɔsubɔ dzixɔsewo le kpɔkpɔm ɖe ame ɖekaɖekawo kple amehawo ƒe agbe dzi.”
2 Menye dukɔ ɖeka ko mee woakpɔ nɔnɔme sia le o. Le xexeame godoo la, ame geɖe siwo gblɔna be yewoxɔ Biblia dzi se eye wodea sɔleme la mele mɔ ɖem be Ŋɔŋlɔawo nakpɔ ŋusẽ gobii aɖeke ɖe woƒe agbe dzi o. (Timoteo II, 3:5) Numekuha aɖe ƒe ŋgɔnɔla gblɔ be: “Míekpɔtɔ dea bubu Biblia ŋu, gake le ɣeyiɣi zazã ɖe exexlẽ, esɔsrɔ̃, kple eŋudɔwɔwɔ ŋu gome la—gbaɖegbenyawoe nye ma.”
3. (a) Aleke Biblia kpɔa ŋusẽ ɖe amesiwo zua Kristotɔ vavãwo dzii? (b) Aleke Yesu yomedzelawo wɔna ɖe Paulo ƒe aɖaŋuɖoɖo si woŋlɔ ɖe Filipitɔwo 4:9 dzii?
3 Gake nɔnɔmea to vovo le Kristotɔ vavãwo ya gome. Mawu ƒe Nya me ɖaŋuɖoɖowo ŋudɔwɔwɔ na wowɔ tɔtrɔwo le woƒe tamebubu kple agbenɔnɔ me. Eye amewo kpɔa amenyenye yeye si woɖena fiana la dzea sii enumake. (Kolosetɔwo 3:5-10) Le Yesu yomedzelawo gome la, Biblia menye agbalẽ aɖe si ʋuʋu lé le agbalẽti me o. Ðe eteƒe la, apostolo Paulo gblɔ na Kristotɔ siwo le Filipi be: ‘Nusiwo hã miesrɔ̃, eye miexɔ, eye miese, eye miekpɔ le gbɔnye la, nusiawo ke miwɔ, eye ŋutifafa Mawu la anɔ anyi kpli mi.’ (Filipitɔwo 4:9) Kristotɔwo wɔa nusi de ŋgɔ wu Mawu ƒe Nya ƒe nyateƒea xɔxɔ ko. Wowɔna ɖe nusi wosrɔ̃ la dzi, nɔa Biblia ƒe aɖaŋuɖoɖowo ŋudɔwɔwɔ dzi—le ƒomea me, le dɔwɔƒe, le hamea me, kple le agbenɔnɔ ƒe akpa bubuwo me hã.
4. Nukatae wònye nu sesẽ be woatsɔ Mawu ƒe sewo ade dɔwɔna me?
4 Mawu ƒe sewo kple gɔmeɖosewo ŋudɔwɔwɔ mele bɔbɔe o. Míele xexe aɖe si le Satana Abosam, amesi Biblia yɔ be “xexe sia me mawu,” ƒe ŋusẽ te la me. (Korintotɔwo II, 4:4; Yohanes I, 5:19) Eyata ele vevie be míanɔ ŋudzɔ ɖe nusianu si ado kplamatse mí be míagayi edzi awɔ nuteƒe na Yehowa Mawu o la ŋu. Aleke míawɔ anye nuteƒewɔlawo?
Lé ‘Nya Siwo Le Blibo ƒe Kpɔɖeŋu’ Me Ðe Asi
5. Nukae nya si Yesu gblɔ be, “Wòadze yonyeme ɖaa” la fia?
5 Nusiwo míesrɔ̃ la ŋudɔwɔwɔ ƒe akpa aɖe bia be míaʋli tadedeagu vavãtɔ ta nuteƒewɔwɔtɔe, togbɔ be dzimaxɔsetɔwo atsi tre ɖe mía ŋu hã. Ebia agbagbadzedze be míate ŋu ado dzi. Yesu gblɔ be: “Ne ame aɖe lɔ̃ bena, yeadze yonyeme la, negbe nu le eya ŋutɔ ɖokui gbɔ, eye wòatsɔ eƒe fuwɔameti, eye wòanɔ yonyeme ɖaa.” (Mateo 16:24, NW ) Yesu megblɔ be míanɔ ye yome kwasiɖa ɖeka, ɣleti ɖeka, alo ƒe ɖeka o. Ke boŋ egblɔ be: “Wòanɔ yonyeme ɖaa.” Eƒe nyawo fia be míaƒe nusrɔ̃lanyenye mate ŋu anye míaƒe agbemeɣeyiɣi aɖe ƒe nuwɔna aɖe ko alo ɖokuitsɔtsɔna aɖe si nu ava yi kpuie o. Tadedeagu vavãtɔ taʋiʋli nuteƒewɔwɔtɔe fia be nuka kee ɖadzɔ o, míado dzi nuteƒewɔwɔtɔe le agbenɔnɔ ƒe mɔ si míetia la dzi. Aleke míate ŋu awɔ emae?
6. Nukae nye nya siwo le blibo ƒe kpɔɖeŋu si ƒe alafa gbãtɔ me Kristotɔwo srɔ̃ le Paulo gbɔ?
6 Paulo xlɔ̃ nu eƒe hadɔwɔla Timoteo be: “Lé nya, siwo le blibo, siwo nèse le nunye la ƒe kpɔɖeŋu me ɖe asi le xɔse kple lɔlɔ̃, si le Kristo Yesu me la me.” (Timoteo II, 1:13) Nuka fiamee Paulo nɔ? Helagbe me nya si gɔme woɖe le afisia be “kpɔɖeŋu” fia nutala aɖe ƒe nuɖeɖe ɖe agbalẽ dzi, le nyaa ŋutɔŋutɔ nu. Togbɔ be nutata sia me maɖe nyuie o hã la, eƒe akpa vovovowo dze nyuie si awɔe be nukpɔla nugɔmesela ate ŋu akpɔ nusi tututu wònye. Nenema ke menye ɖe wotrɔ asi le nyateƒea ƒe kpɔɖeŋu si Paulo fia Timoteo kple ame bubuwo ŋu be wòaɖo biabia ɖesiaɖe si ado mo ɖa la ŋu tẽ o. Ke hã, mɔfiame—si nye nusi dzi wokpɔna, le kpɔɖeŋumɔ nu—gbogbo aɖewo le nufiafia blibo sia me si awɔe be dzianukwaretɔwo nate ŋu akpɔ nusi dim Yehowa le tso wo si la adze sii. Le nyateƒe me la, be woƒe nu nadze Mawu ŋu la, ahiã be woayi edzi alé nyateƒea ƒe kpɔɖeŋu la me ɖe asi to nusi wosrɔ̃ la ŋudɔwɔwɔ me.
7. Aleke Kristotɔwo ate ŋu alé nya siwo le blibo ƒe kpɔɖeŋu me ɖe asii?
7 Le ƒe alafa gbãtɔ me la, amewo abe Himenaio, Aleksandro, kple Fileto ene nɔ nukpɔsusu siwo mesɔ kple ‘nya siwo le blibo ƒe kpɔɖeŋu la’ o dom ɖe ŋgɔ. (Timoteo I, 1:18-20; Timoteo II, 2:16, 17) Aleke Kristotɔ gbãtɔwo awɔ nui be xɔsegbelawo nagakplɔ wo atrae o? To nuŋlɔɖi siwo tso gbɔgbɔ me la sɔsrɔ̃ nyuie kple wo ŋudɔwɔwɔ le agbe me me. Amesiwo le zɔzɔm ɖe kpɔɖeŋu siwo wosrɔ̃ le Paulo kple nuteƒewɔla bubuwo gbɔ nu la te ŋu kpɔa nusianu si mewɔ ɖeka kple nyateƒea ƒe kpɔɖeŋu si wofia wo o la dzea sii hegbenɛ. (Filipitɔwo 3:17; Hebritɔwo 5:14) Le esi teƒe be ‘woanɔ anukutsyɔtsyɔwo kple nyaʋawɔwɔ ƒe dɔ lém’ la, woyia edzi léa woƒe mawusosroɖagbenɔnɔ nyui la me ɖe asi. (Timoteo I, 6:3-6) Míawo hã míewɔa nenema ke ne míeyi edzi le nyateƒe siwo míesrɔ̃ la ŋudɔ wɔm. Aleke wodoa ŋusẽ ame ƒe xɔse enye si be woakpɔe be ame miliɔn gbogbo siwo le Yehowa subɔm le anyigba dzi godoo la lé Biblia me nyateƒe ƒe kpɔɖeŋu si wofia wo la me ɖe asi sesĩe.—Tesalonikatɔwo I, 1:2-5.
Gbe Nu le “Gliwo” Gbɔ
8. (a) Aleke Satana dina be yeagblẽ míaƒe xɔse me egbeae? (b) Paulo ƒe nuxlɔ̃ame kae le Timoteo II, 4:3, 4?
8 Satana dzea agbagba be yeagblẽ míaƒe nuteƒewɔwɔ me to nana be míake ɖi nusi wofia mí me. Abe alesi wònɔ le ƒe alafa gbãtɔ me ene la, xɔsegbelawo kple ame bubuwo dina be yewoagblẽ mokakamanɔŋutɔwo ƒe xɔse me egbea. (Galatiatɔwo 2:4; 5:7, 8) Ɣeaɖewoɣi la, wozãa nyakakamɔnuwo tsɔ kakaa Yehowa ƒe amewo ƒe dɔwɔnawo kple tameɖoɖowo ŋuti nya totrowo alo alakpanyawo ŋutɔ gɔ̃ hã. Paulo xlɔ̃ nu be ame aɖewo aɖe to ɖa le nyateƒea ŋuti. Eŋlɔ bena: “Ɣeyiɣi le vava ge, esime womaxɔ nufiafia, si le blibo la o; ke boŋ, le alesi tome fiẽ wo nu la, woaƒo nufialawo nu ƒu na wo ɖokui le woa ŋutɔwo ƒe nudzodzrowo la nu. Eye woaɖe to ɖa le nyateƒe la ŋuti, eye woatrɔ ayi gliwo gbɔ.”—Timoteo II, 4:3, 4.
9. Nukae anya nɔ susu me na Paulo esime wòyɔ “gliwo”?
9 Le esi ame aɖewo nalé nya siwo le blibo ƒe kpɔɖeŋu me ɖe asi teƒe la, “gliwo” vivia to me na wo. Nukawoe nye gli siawo? Ðewohĩ xotutu ɖikokoewo, abe esiwo le Tobit ƒe gligbalẽ me ene, ye nɔ susu me na Paulo. * Nyasegblɔ kple nususugblɔ wɔdɔɖeamedziwo nɔa gliwo hã me. Eye amesiwo ƒe nukpɔsusue nye be Mawu ƒe dzidzenuwo ɖe mɔ ɖe nusianu ŋu alo amesiwo nɔa vodada dim le amesiwo le ŋgɔ xɔm le hamea me ŋu anya tsɔ agbalẽnyanya able ame aɖewo hãe—“le woa ŋutɔwo ƒe nudzodzrowo la nu.” (Yohanes III, 9, 10; Yuda 4) Nu ka kee ɖado kplamatse wo o, edze ƒã be alakpanyawo dzɔa dzi na ame aɖewo wu Mawu ƒe Nya la me nyateƒea. Eteƒe medidina o wodzudzɔa nusiwo wosrɔ̃ la ŋudɔwɔwɔ, eye esia gblẽa nu le wo ŋu le gbɔgbɔ me.—Petro II, 3:15, 16.
10. Glitoto kawoe li egbea, eye aleke Yohanes te gbe ɖe alesi wòhiã be míaɖɔ ŋu ɖoe dzi?
10 Míate ŋu aƒo asa na tɔtrɔ ɖe gliwo ŋu egbea ne míeléa ŋku ɖe nusiwo míeɖoa toe kple nusiwo míexlẽna ŋu nyuie hetiaa wo me. Le kpɔɖeŋu me, nyakakamɔnuwo doa agbegbegblẽnɔnɔ ɖe ŋgɔ zi geɖe. Ame geɖe doa Mawu ƒe anyinɔnɔ ŋuti ɖikeke alo mawudzimaxɔse ɖe ŋgɔ. Ðeklemiɖela deŋgɔwo ɖua fewu le Biblia ƒe gbɔgbɔ me tsotso ŋu. Eye egbeŋkekea me xɔsegbelawo yi edzi le agbagba dzem be yewoaƒã ɖikeke ƒe kuwo ɖe Kristotɔwo me ne yewoatsɔ agblẽ woƒe xɔse domee. Apostolo Yohanes gblɔ le afɔku si aʋatsonyagblɔɖilawo nye ŋu le ƒe alafa gbãtɔ me be: “Lɔlɔ̃tɔwo, migaxɔ gbɔgbɔ sia gbɔgbɔ dzi se o, ke mido gbɔgbɔawo kpɔ, nenye ɖe wotso Mawu gbɔ; eye gbɔgbɔ sia gblɔɖila geɖewo do go yi ɖe xexeame.” (Yohanes I, 4:1) Eyata ehiã be míakpɔ nyuie.
11. Mɔ si dzi míato anya ne míele xɔse la me dometɔ ɖeka ɖe?
11 Paulo ŋlɔ le esia ŋu be: ‘Minɔ mia ɖokui dom kpɔ be miele xɔse la me hã.’ (Korintotɔwo II, 13:5) Apostoloa xlɔ̃ nu mí be míanɔ mía ɖokuiwo dom kpɔ be míele wɔwɔm ɖe Kristotɔwo ƒe dzixɔsewo katã dzi hã. Ne míeɖoa to ɖeklemiɖelawo la, ahiã be míalé ŋku ɖe mía ɖokuiwo ŋu gbedodoɖatɔe. (Psalmo 139:23, 24) Ðe míelɔ̃a vodada didi le Yehowa ƒe amewo ŋua? Ne nenemae la, nukatae? Ðe ame aɖe ƒe nyawo alo nuwɔnawo do dzivee na mía? Ne nenemae la, ɖe míele nuwo ŋu bum nyuiea? Ɣeyiɣi kpui aɖe koe xaxa ɖesiaɖe si míedzea ŋgɔe le nuɖoanyi sia me la anɔ anyi. (Korintotɔwo II, 4:17) Ne dodokpɔ aɖewo va mía dzi le hamea me hã la, nukatae wòle be míaɖe asi le Mawu subɔsubɔ ŋu ɖo? Ne nane do dziku na mí la, ɖe manyo wu be míawɔ nusi míate ŋui atsɔ akpɔ nyaa gbɔ ahagblẽe ɖe Yehowa si me oa?—Psalmo 4:5; Lododowo 3:5, 6; Efesotɔwo 4:26.
12. Aleke Beroiatɔwo ɖo kpɔɖeŋu nyui ɖi na míi?
12 Le esi teƒe be míanɔ nyatoƒoe tom la, mina nusiwo míesrɔ̃ to ɖokuisinusɔsrɔ̃ kple le hame ƒe kpekpewo me ŋuti gbɔgbɔmenukpɔsusu nyui nanɔ mía si. (Korintotɔwo I, 2:14, 15) Eye le esi teƒe be míanɔ ɖi kem Mawu ƒe Nya la, aleke nunya le eme wu enye si be ƒe alafa gbãtɔ me Beroiatɔ siwo dzroa Ŋɔŋlɔawo me tsitotsito ƒe nɔnɔme nanɔ mía sii! (Dɔwɔwɔwo 17:10, 11) Ekema mina míawɔ ɖe nusiwo míesrɔ̃na la dzi, agbe nu le gliwo gbɔ ahalé ɖe nyateƒea ŋu.
13. Aleke míate ŋu akaka alakpanyawo le manyamanya mee?
13 Gli ƒomevi bubu aɖe gali si ŋu wòhiã be míanɔ ŋudzɔ ɖo. Nyakpakpa wɔdɔɖeamedzi gbogbo aɖewo le tsatsam, vevietɔ to Internet dzi. Nunya le eme be míaɖɔ ŋu ɖo le nyakpakpa mawo ŋu, vevietɔ ne míenya afisi tututu nyatakakaa tso o. Ne Kristotɔ aɖe si ŋu bubu lee ɖo nuteƒekpɔkpɔ alo nyatakakaa ɖa gɔ̃ hã la, ɖewohĩ manye eya gbɔe wòtso tẽ ne wòanya eŋu nya ɖesiaɖe o. Ema tae wòle vevie be míaɖɔ ŋu ɖo le nyatakaka siwo ŋu kpeɖodzi boo aɖeke mele o la léle ɖe nu alo eɖoɖo ɖe ame bubuwo me. Míadi be míalé “yakagli makɔmakɔ,” alo ‘alakpanya siwo gblẽa nu le nusi le kɔkɔe ŋu’ la ɖe nu o. (Timoteo I, 4:7) Esi agba le mía dzi be míato nyateƒe na mía nɔewo ta la, míawɔ nu le nunya me to asaƒoƒo na nusianu si ate ŋu ana míakaka alakpanyawo le manyamanya me gɔ̃ hã me.—Efesotɔwo 4:25.
Viɖe Siwo Dona Tsoa Nyateƒea Ŋudɔwɔwɔ Me
14. Viɖe kawoe dona tsoa nusiwo srɔ̃m míele le Mawu ƒe Nya la me ŋudɔwɔwɔ me?
14 Nusiwo míesrɔ̃na to ɖokuisi Biblia nusɔsrɔ̃ kple Kristotɔwo ƒe kpekpewo dede me la ŋudɔwɔwɔ ahe viɖe geɖe vɛ. Le kpɔɖeŋu me, míakpɔe be mía kple haxɔsetɔwo dome ƒomedodowo me anyo ɖe edzi. (Galatiatɔwo 6:10) Ne míetsɔ Biblia me gɔmeɖosewo wɔ dɔe la, mía ŋutɔwo ƒe nɔnɔme anyo ɖe edzi. (Psalmo 19:9) Gawu la, ne míewɔa nusi srɔ̃m míele ŋudɔ la, ‘míeɖoa atsyɔ̃ na Mawu ƒe nufiafia la’ eye míate ŋu ahe ame bubuwo ɖe tadedeagu vavãtɔ ŋu.—Tito 2:6-10.
15. (a) Aleke sɔhɛ aɖe tsɔ dzideƒo ɖi ɖase le sukui? (b) Nukae míesrɔ̃ tso nuteƒekpɔkpɔ sia me?
15 Sɔhɛ geɖewo le Yehowa Ðasefowo dome siwo wɔa nusi wosrɔ̃ le Biblia kple Kristotɔwo ƒe agbalẽwo sɔsrɔ̃ le wo ɖokui si kpakple le hamea ƒe kpekpewo dede edziedzi me la ŋudɔ. Woƒe agbenyuinɔnɔ la nye ɖaseɖiɖi sẽŋu aɖe na nufialawo kple hatisukuviwo le suku. (Petro I, 2:12) Bu Leslie, si nye nyɔnuvi ƒe 13 vi aɖe si le United States ŋu kpɔ. Elɔ̃ ɖe edzi be esesẽna na ye tsã be yeaƒo nu tso yeƒe dzixɔse ŋu na sukuhatiwo, gake gbeɖeka la, nɔnɔmea trɔ. “Sukuviawo nɔ nu ƒom tso alesi amewo dzea agbagba be yewoadzra nuwo na amewoe la ŋu. Nyɔnuvi ɖeka do asi ɖe dzi tsɔ Yehowa Ðasefowo wɔ kpɔɖeŋui.” Abe Ðasefo ene la, aleke Leslie wɔ nu ɖe eŋui? Egblɔ be: “Meʋli nye xɔse ta, eye le si menɔa anyi kpoo le suku ta la, meka ɖe edzi nya siwo megblɔ wɔ nuku na amesiame.” Nukae do tso Leslie ƒe dzinɔameƒoa me? Leslie gblɔ be: “Mete ŋu na agbalẽ gbadza kple trakt sukuvia, le esi biabia bubuwo ganɔ esi ta.” Aleke dzi dzɔa Yehowa enye si ne sɔhɛ siwo wɔa nusi srɔ̃m wole la ŋudɔ tsɔ dzideƒo ɖi ɖasee le suku!—Lododowo 27:11; Hebritɔwo 6:10.
16. Aleke Teokrasi Subɔsubɔ Sukua ɖe vi na sɔhɛ Ðasefo aɖee?
16 Kpɔɖeŋu bubue nye Elizabeth tɔ. Tso esime wòxɔ ƒe adre vaseɖe esime wòwu gɔmedzesuku nu la, nyɔnuvi sue sia kpea eƒe nufialawo vaa Fiaɖuƒe Akpata me ɣesiaɣi si wòawɔ dɔ le Teokrasi Subɔsubɔ Sukua me. Ne nufialaa mate ŋu ava o la, Elizabeth wɔa dɔdasia fiaa nufiala la le kpakpã le suku vɔ megbe. Le Elizabeth ƒe kɔledzi ƒe ƒe mamlɛa me la, eŋlɔ viɖe siwo le Teokrasi Subɔsubɔ Sukua ŋu la ŋuti nyatakaka si xɔ agbalẽ ƒe axa ewo hexlẽe na nufiala ene wose. Wokpee hã be wòawɔ Teokrasi Subɔsubɔ Suku me dɔdasi ƒe wɔwɔfia, si me wòtia tanya si be “Nukatae Mawu Ðe Mɔ Ðe Vɔ̃ɖinyenye Ŋu?” Elizabeth kpɔ viɖe tso hehenana ƒe ɖoɖo si Yehowa Ðasefowo wɔ le Teokrasi Subɔsubɔ Sukua me la me. Enye sɔhɛ Kristotɔ geɖe siwo hea kafukafu vɛ na Yehowa to nusiwo wosrɔ̃ le eƒe Nya la me ŋudɔwɔwɔ me la dometɔ ɖeka ko.
17, 18. (a) Aɖaŋu kae Biblia ɖo ku ɖe anukwareɖiɖi ŋu? (b) Aleke Yehowa Ðasefo aɖe ƒe anukwareɖiɖi wɔ dɔ ɖe ŋutsu aɖe dzii?
17 Biblia xlɔ̃ nu Kristotɔwo be woaɖi anukware le nusianu me. (Hebritɔwo 13:18) Anukwaremaɖimaɖi ate ŋu agblẽ mía kple ame bubuwo dome ƒomedodo me, eye vevietɔ wu la, mía kple Yehowa ŋutɔ tɔ dome. (Lododowo 12:22) Míaƒe agbenyuinɔnɔ nyea kpeɖodzi be míele nusiwo míesrɔ̃ la ŋudɔ wɔm, eye ena ame geɖe dea bubu Yehowa Ðasefowo ŋu geɖe.
18 Bu asrafo aɖe si ŋkɔe nye Phillip ƒe nuteƒekpɔkpɔa ŋu ko. Eƒe gaxɔgbalẽ aɖe si te wòde asii, evɔ meŋlɔ ga aɖeke ɖe edzi o la bu eye menya o vaseɖe esi wogbugbɔe ɖo ɖee to posu me. Yehowa Ðasefo aɖee fɔ gaxɔgbalẽa, eye nusi wòŋlɔ kpe ɖe eŋu ɖo ɖee la gblɔ be amesi fɔe la ƒe subɔsubɔ dzixɔsewoe ʋãe be wògbugbɔe ɖo ɖa. Phillip ƒe nu ku. Egblɔ be: “Woate ŋu aɖe $9,000 si katã nɔ asinye la hafi!” Ɣebubuɣi la, eƒe mo tsi yaa esime wofi eƒe kuku le sɔleme. Anɔ eme be ame nyanyɛ aɖee tsɔ eƒe kukua, evɔ ame sagaa aɖe ya trɔ gaxɔgbalẽ aɖe si woate ŋu atsɔ aɖe dɔlar akpe gbogbowo vɛ! Le nyateƒe me la, Kristotɔ ɖianukwarewo hea bubu vɛ na Yehowa Mawu!
Yi Edzi Nànɔ Nusi Nèsrɔ̃ la Ŋudɔ Wɔm
19, 20. Aleke míakpɔ viɖe tso nusiwo míesrɔ̃na le Ŋɔŋlɔawo me la dzi wɔwɔ mee?
19 Amesiwo wɔa nusiwo wosrɔ̃ tso Mawu ƒe Nya la me ŋudɔ kpɔa viɖe geɖe. Nusrɔ̃la Yakobo ŋlɔ bena: “Amesi kpɔ se blibo, si nye ablɔɖese la me, eye wònɔ edzi la, eya menye nyasela, si ŋlɔa nu be o, ke boŋ dɔ ƒe wɔla, eye woayra eyama le eƒe nuwɔwɔ me.” (Yakobo 1:25) Ẽ, ne míewɔ nu wòsɔ ɖe Ŋɔŋlɔawo me nu siwo míesrɔ̃ dzi la, míakpɔ dzidzɔ vavã eye míate ŋu akpe akɔ kple agbemenuteɖeamedziwo nyuie wu. Ƒo wo katã ta la, Yehowa ƒe yayra kple agbe mavɔ ƒe mɔkpɔkpɔ anɔ mía si!—Lododowo 10:22; Timoteo I, 6:6.
20 Eyata to mɔ sia mɔ dzi nànɔ Mawu ƒe Nya la srɔ̃m. Kpe ta kple Yehowa subɔlawo edziedzi, eye nàlé to ɖe nusiwo me dzrom wole le Kristotɔwo ƒe kpekpewo me ŋu. Tsɔ nusiwo srɔ̃m nèle la de dɔwɔna me, yi edzi nànɔ eŋudɔ wɔm, eye ‘ŋutifafa Mawu la anɔ anyi kpli wò.’—Filipitɔwo 4:9.
[Etenuŋɔŋlɔ]
^ mm. 9 Yudatɔ aɖe si ŋkɔe nye Tobias ƒe aʋatsodzixɔse ŋuti nyakpakpawoe le Tobit, si woanya ŋlɔ le ƒe alafa etɔ̃lia D.M.Ŋ. me, la me. Wogblɔ be ete ŋu zãa tɔmelã gãwo ƒe dzi, veve, kple aklã tsɔ daa dɔe eye wònyaa gbɔgbɔ vɔ̃wo le amewo me.
Èɖo Ŋku Wo Dzia?
• Nukae nye ‘nya siwo le blibo ƒe kpɔɖeŋu la,’ eye aleke míate ŋu alé eme ɖe asii?
• ‘Gli’ kawoe wòahiã be míagbe?
• Viɖe kawoe amesiwo wɔa nusiwo wosrɔ̃ le Mawu ƒe Nya me ŋudɔ la kpɔna?
[Biabiawo]
[Nɔnɔmetata si le axa 17]
Aleke Kristotɔ gbãtɔ ƒo asa na xɔsegbelawo ƒe wo kpɔkplɔ atrae?
[Nɔnɔmetata siwo le axa 18]
Nyakakamɔnuwo ate ŋu ato Internet, kple egbeŋkekea me xɔsegbelawo dzi aƒã ɖikeke ƒe kuwo ɖe ame me
[Nɔnɔmetata si le axa 19]
Nunya mele eme be woakaka nya siwo ŋu kakaɖedzi mele o
[Nɔnɔmetata siwo le axa 20]
Yehowa Ðasefowo wɔa nusi woxlẽna le Mawu ƒe Nya la me ŋudɔ le dɔme, le suku, kple teƒe bubuwo hã