Èɖo Ŋku Wo Dzia?

Ðe Gbetakpɔxɔ ƒe tata siwo do nyitsɔ laa xexlẽ do dzidzɔ na wòa? Ke kpɔe ɖa be yeate ŋu aɖo biabia siwo gbɔna ŋu hã:

• Aleke “tamebubu ŋutete” ate ŋu anye ametakpɔnui? (Lododowo 1:4, NW)

Ate ŋu ana míanɔ ŋudzɔ ɖe nusiwo ado afɔku mí le gbɔgbɔ me ŋu ahaʋã mí be míawɔ nu nunyatɔe, abe asaƒoƒo na gbɔdɔdɔ ƒe tetekpɔwo le dɔwɔƒe ene. Ekpena ɖe mía ŋu be míakpɔe be hati Kristotɔwo nye ame madeblibowo, si ate ŋu aʋã mí be míaƒo asa na nuwɔwɔ dzimagbɔɖitɔe ne wodo dziku na mí. Ate ŋu akpe ɖe mía ŋu hã be míaƒo asa na ŋutilãmenuwo ƒe nyaƒoɖeamenu siwo ate ŋu ana míadze anyi le mɔ dzi le gbɔgbɔ me.—8/15, axa 21-4.

• Aleke ame awɔ ate ŋu anye aƒelika nyui?

Mɔ eve siwo dzi woato anye aƒelika nyui enye be woanye nunala nyui kple nuxɔla akpedala. Enye nusi ŋu asixɔxɔ le be woanye aƒelika nyui le afɔkuɣiwo. Yehowa Ðasefowo dzea agbagba be yewoanye aƒelika nyuiwo to nuxɔxlɔ̃ amewo le nusiwo ava dzɔ kpuie, si nye nusi Mawu awɔ atsɔ atsi vɔ̃ɖinyenye nui, ŋu.—9/1, axa 4-7.

• Le Biblia ƒe nya nu la, amekawoe nye ame kɔkɔe vavãwo, eye aleke woakpe ɖe ameƒomea ŋui?

Kristotɔ gbãtɔwo katã nye ame kɔkɔe vavã siwo Mawu ɖo, ke menye amewo alo habɔbɔwo o. (Romatɔwo 1:7) Ne wonya fɔ ame kɔkɔewo ɖe tsitre yi dziƒogbenɔnɔ me ko la, woakpɔ gome kple Kristo le nuteƒewɔla siwo le anyigba dzi la yayra me. (Efesotɔwo 1:18-21)—9/15, axa 5-7.

• Vi kae blema Helatɔwo ƒe kamedefefewo ŋu nya aɖewo nyanya ate ŋu aɖe na Kristotɔwo?

Blema kamedefefewo ŋuti kpɔɖeŋuwo alo nyawo le apostolo Petro kple Paulo ƒe agbalẽwo me. (Korintotɔwo I, 9:26; Timoteo I, 4:7; Timoteo II, 2:5; Petro I, 5:10) Ele vevie be hehenala nyui nanɔ blema kamedefefewɔla si, wòanye ɖokuidziɖula, eye wòado vevie nu le mɔ nyuitɔ nu. Nenemae wòle le agbagba siwo Kristotɔwo dzena le gbɔgbɔ me egbea hã gomee.—10/1, axa 28-31.

• Kuxi kple teƒeɖoɖo kawoe le vihehe le dutanyigba dzi me?

Ðevi geɖe srɔ̃a gbegbɔgblɔ yeye kaba wu wo dzilawo, amesiwo wòasesẽ na be woase wo viwo ƒe tamebubuwo kple nuwɔnawo gɔme. Eye ɖewohĩ ɖeviawo mate ŋu ase Biblia ƒe nufiafia gɔme tututu le wo dzilawo degbe me o. Ke hã, ŋusẽ ate ŋu aɖo ƒomea me kadodo ŋu ne dzilawo fiaa gbe siwo wodona la wo viwo, si awɔe be woase gbe eve eye woanya nu tso dekɔnu eve ŋu.—10/15, axa 22-6.

• Nukatae alesi woaɖe kukui sɔsrɔ̃ le vevie?

Zi geɖe la, kukuɖeɖe si tso dzime nyea mɔ si dzi woato aɖɔ ƒomedodo si me gblẽ ɖo. Biblia na ŋusẽ si kukuɖeɖe ate ŋu akpɔ la ƒe kpɔɖeŋuwo. (Samuel I, 25:2-35; Dɔwɔwɔwo 23:1-5) Ne masɔmasɔ ɖo ame eve dome zi geɖe la, fɔbubu aɖe nɔa akpa evea sia dzi. Le esia ta, ehiã be woalɔ̃ ɖe edzi ahaɖe kuku.—11/1, axa 4-7.

• Nukata tsatsadada, ne ga home sue aɖee woatsɔ adae gɔ̃ hã, nye nu gbegblẽ?

Tsatsadada ate ŋu anyɔ ɖokuidodoɖedzi, hoʋiʋli ƒe gbɔgbɔ, kple ŋukeklẽ, siwo ŋu Biblia ƒo nu tsi tre ɖo la ɖe ame me. (Korintotɔwo I, 6:9, 10) Amesiwo tsatsadada zu numame na la dze egɔme le ɖevi me kple ga home sue aɖewo tsɔtsɔ tso gbee.—11/1, axa 31.

• Esi wònye Helagbe mee woŋlɔ Biblia-gbalẽ geɖe ɖo la, nukatae wògahiã be woaɖe Biblia gɔme ɖe Helagbe me, eye nukae do tso eme?

Helagbe si wodona fifia la to vovo kura tso Helagbe si me woɖe Septuagint Hebri Ŋɔŋlɔawo kple Kristotɔwo ƒe Hela Ŋɔŋlɔawo gɔme ɖo la gbɔ. Le ƒe alafa siwo va yi nyitsɔ laa me la, wotee kpɔ zi geɖe be woaɖe Biblia bliboa alo eƒe akpa aɖewo gɔme ɖe Helagbe si wodona fifia me. Egbea, Biblia bliboa alo eƒe akpa aɖe, siwo ade 30 ƒe gɔmeɖeɖewo li, siwo Helatɔwo te ŋu xlẽna eye esi ɖe dzesi wue nye New World Translation of the Holy Scriptures, si wota le ƒe 1997 me.—11/15, axa 26-9.

• Nukatae womebia nu ewolia nana tso Kristotɔwo si o?

Le Se si wotsɔ na blema Israel me la, nu ewolia nana nye mɔ aɖe si dzi wotona doa alɔ Lewi-toa kple hiãtɔwo ƒe nuhiahiãwo gbɔ kpɔkpɔ. (Mose III, 27:30; Mose V, 14:28, 29) Yesu ƒe vɔsakua ɖe Sea kple eƒe nu ewolia nana ƒe nudidiwo ɖa. (Efesotɔwo 2:13-15) Le hame gbãtɔwo me la, kpɔɖeŋuae nye be Kristotɔwo dometɔ ɖesiaɖe nadzɔ nu le eƒe ŋutete kple alesi wòɖo le eƒe dzime nu. (Korintotɔwo II, 9:5, 7)—12/1, axa 4-6.

• Ðe Nyaɖeɖefia 20:8 fia be le dodokpɔ mamlɛa me la, Satana akplɔ ameha gbogbo ŋutɔ aɖewo atraea?

Mawunyakpukpuia gblɔ be amesiwo wokplɔ trae la anɔ “abe ƒutake ene.” Le Biblia me la, nyagbɔgblɔ ma fiaa xexlẽme si mele nyanya o, eye mefiana gbeɖe be esɔ gbɔ ale gbegbe be womate ŋu axlẽ o. Abraham ƒe dzidzime si wogblɔ be anɔ ‘abe ƒutake ene’ la va nye ame 144,000, ne míeɖe Yesu Kristo le eme. (Mose I, 22:17; Nyaɖeɖefia 14:1-4)—12/1, axa 29.