“Mite Ðe Mawu Ŋu”
“Mite Ðe Mawu Ŋu”
“Mite ɖe Mawu ŋu, eye wòate ɖe mia ŋu.”—YAKOBO 4:8.
1, 2. (a) Nya kae amewo gblɔna zi geɖe? (b) Nuxlɔ̃ame kae Yakobo na, eye nukatae wòhiã?
“MAWU li kpli mí.” Wotsɔ nya siawo ɖo atsyɔ̃e na dukɔteƒenɔnuwo kple asrafowo ƒe awuwo gɔ̃ hã. Woŋlɔ “Mawu ŋue míeɖoa ŋu ɖo” ɖe gaku kple gagbalẽ gbogbo aɖewo siwo wozãna egbea dzi. Enye nusi bɔ be amegbetɔwo nagblɔ be ƒomedodo kplikplikpli le yewo kple Mawu dome. Gake ɖee màlɔ̃ ɖe edzi be ƒomedodo ma me nɔnɔ bia nu geɖe wu egbɔgblɔ alo eŋɔŋlɔ ɖe nuwo dzi gaglãa ɖeɖeko oa?
2 Biblia ɖee fia be anya wɔ be woado ƒome kple Mawu. Gake ebia agbagbadzedze. Ehiã be ƒe alafa gbãtɔ me Kristotɔ amesiamina aɖewo gɔ̃ hã nado ŋusẽ woƒe ƒomedodo kple Yehowa Mawu. Eva hiã be dzikpɔla Kristotɔ Yakobo naxlɔ̃ nu ame aɖewo ku ɖe woƒe ŋutilã me nuwɔnawo kple gbɔgbɔmeɖiƒoƒo ŋu. Le aɖaŋuɖoɖo ma me la, ena nuxlɔ̃ame sẽŋu sia be: “Mite ɖe Mawu ŋu, eye wòate ɖe mia ŋu.” (Yakobo 4:1-12) Nukae Yakobo wɔnɛ esime wògblɔ be ‘mite ɖe eŋu’?
3, 4. (a) Nuka dzie nyagbɔgblɔ “mite ɖe Mawu ŋu” anya ɖo ŋkui na Yakobo ƒe ƒe alafa gbãtɔ me nuxlẽlawo? (b) Nukatae míate ŋu aka ɖe edzi be míate ŋu ate ɖe Mawu ŋu?
3 Yakobo zã nyagbɔgblɔ si anɔ eme be eƒe nuxlẽlawo dometɔ geɖe nya nyuie. Mose ƒe Sea na mɔfiame siwo le tẽ nunɔlawo le alesi ‘woate ɖe’ Yehowa ‘ŋu’ ɖe eƒe amewo nu ŋu. (Mose II, 19:22) Eyata esia anya ɖo ŋku edzi na Yakobo ƒe nuxlẽlawo be tete ɖe Yehowa ŋu menye nusi wòle be woabu nu tsɛe o. Yehowae nye bubume gãtɔ kekeake le xexeame godoo.
4 Gake, abe alesi Biblia ŋunyala aɖe gblɔ ene la, “nuxlɔ̃ame sia [si le Yakobo 4:8] ɖe mɔkpɔkpɔ sẽŋu aɖe fia.” Yakobo nyae be Yehowa kpe amegbetɔ madeblibo edzidzi lɔlɔ̃tɔe be woate ɖe Ye ŋu. (Kronika II, 15:2) Yesu ƒe vɔsaa ʋu mɔ be woate ɖe Yehowa ŋu bliboe wu. (Efesotɔwo 3:11, 12) Egbea, woʋu mɔ si dzi woato ate ɖe Mawu ŋu la na ame miliɔn geɖe! Gake aleke míate ŋu awɔ mɔnukpɔkpɔ wɔnuku sia ŋudɔ wòaɖe vie? Míadzro mɔ etɔ̃ siwo dzi míate ŋu ato ate ɖe Yehowa Mawu ŋu la me kpuie.
Yi Edzi ‘Nànɔ Mawu Ŋuti Sidzedze Xɔm’
5, 6. Aleke ɖevi sue Samuel ƒe kpɔɖeŋua ɖe nusi Mawu ŋuti ‘sidzedze xɔxɔ’ lɔ ɖe eme fiae?
5 Le Yohanes 17:3 la, Yesu gblɔ be: “Esia fia agbe mavɔ, be woanɔ wò, Mawu vavãtɔ ɖeka la, kple Yesu Kristo, amesi nèdɔ ɖa la, ŋuti sidzedze xɔm.” (NW) Alesi woɖe kpukpui sia gɔmee le gɔmeɖeɖe geɖe me la to vovo vie tso New World Translation la tɔ gbɔ. Le esi teƒe be woaɖe egɔme be ‘woanɔ’ Mawu ‘ŋuti sidzedze xɔm’ la, ɖeko wòɖe dɔwɔnyaa gɔme be ‘woanya’ Mawu alo Mawu “nyanya.” Gake agbalẽnyala geɖe de dzesii be gɔmesese si le nya si wozã le Helagbe gbãtɔ me ŋu la lɔ nusi de ŋgɔ wu ɖe eme—enye nusi woayi edzi anɔ wɔwɔm, nusi ate ŋu ana ame nava nɔ ƒomedodo kplikplikpli gɔ̃ hã me kple nɔvia.
6 Be woadze si Mawu nyuie menye nu yeye le Yesu ŋɔli o. Le kpɔɖeŋu me, le Hebri Ŋɔŋlɔawo me la, míexlẽ be esime Samuel nye ɖevi la, “menya Yehowa haɖe o.” (Samuel I, 3:7) Ðe esia fia be Samuel menya nu boo aɖeke tso eƒe Mawu ŋu oa? Ao. Edzilawo kple nunɔlawo anya fia nu geɖee godoo. Gake, agbalẽnyala aɖe gblɔ be, woate ŋu “azã” Hebrigbe me nya si wozã le kpukpui ma me “na ame nyanya nyuie wu.” Samuel mekpɔ nya Yehowa nyuie, abe alesi wòava nyae emegbe ne eva zu Yehowa ƒe nyanuɖela ene haɖe o. Esi Samuel nɔ tsitsim la, eva dze si Yehowa nyateƒe eye ƒomedodo kplikplikpli va nɔ woa kplii dome.—Samuel I, 3:19, 20.
7, 8. (a) Nukatae mele be Biblia ƒe nufiafia gogloawo nado vɔvɔ̃ na mí o? (b) Nukawoe nye Mawu ƒe Nyaa me nyateƒe goglo siwo wòanyo be míasrɔ̃ la dometɔ aɖewo?
7 Ðe nèle Yehowa ŋuti sidzedze xɔm ale be nàva nyae nyuie wua? Be nàte ŋu awɔ ema la, ehiã be nàna gbɔgbɔmenuɖuɖu si Mawu nana la ‘nanɔ dzrowòm.’ (Petro I, 2:2) Gɔmedzenufiafiawo ɖeɖeko megasɔ gbɔ na wò o. Dze agbagba be nasrɔ̃ Biblia me nufiafia detoawo dometɔ aɖewo. (Hebritɔwo 5:12-14) Ðe nufiafia mawo doa vɔvɔ̃ na wò eye nèbua wo be wosesẽ akpaa? Ne nenemae la, ke ɖo ŋku edzi be Yehowae nye ‘Nufiala Gãtɔ’ la. (Yesaya 30:20) Enya alesi wòafia nyateƒe goglowo amegbetɔ madeblibowo be woƒe susu nalée. Eye ate ŋu ayra ɖe agbagba siwo dzem nèle vevie be yease nusi fiam wòle wò la gɔme dzi.—Psalmo 25:4.
8 Nukata madzro ɖokuiwò me le “Mawu ƒe nu gogloawo” dometɔ aɖewo ŋu o? (Korintotɔwo I, 2:10) Esiawo menye nya madodzidzɔname abe esiwo ŋu mawunyaŋununyalawo kple subɔsubɔhakplɔlawo hea glãka le ene o. Wonye nufiafia vavã siwo naa míesea nu dodzidzɔnamewo tso mía Fofo lɔlɔ̃tɔ la ŋu. Le kpɔɖeŋu me, tafea, ‘nya ɣaɣla kɔkɔea,’ kple nubabla vovovo siwo Yehowa wɔ tsɔ kpɔ eƒe amewo ta si na eƒe tameɖoɖowo va eme—nya siawo kple wo ƒomevi geɖewo nye esiwo ŋu ame ŋutɔ ate ŋu awɔ numekuku ahasrɔ̃ nu le kple dzidzɔ eye wòaɖe vi hã.—Korintotɔwo I, 2:7.
9, 10. (a) Nukatae afɔku le dada me, eye nukae akpe ɖe mía ŋu míaƒo asa nɛ? (b) Le Yehowa ŋuti sidzedze gome la, nukatae wòle be míadze agbagba abɔbɔ mía ɖokui?
9 Esi nèle gbɔgbɔmenyateƒea nyam ɖe edzi la, nɔ ŋudzɔ ɖe afɔku si sidzedze hena vɛ ŋu—eyae nye dada. (Korintotɔwo I, 8:1) Afɔku le dada me, elabena etea ame ɖa le Mawu ŋu. (Lododowo 16:5; Yakobo 4:6) Ðo ŋku edzi be naneke meli si tae wòle be ame aɖe nada le sidzedze si su esi ta o. Abe kpɔɖeŋu ene la, de ŋugble le nya siawo siwo woɖe tso agbalẽ aɖe si kafu ameƒomea ƒe ŋgɔyiyi le mɔ̃ɖaŋununya me ƒe ŋgɔdonya me ŋu kpɔ ko: “Zi alesi míenya nu geɖe ɖe edzii la, zi nenemae míedzea sii be míenya nu boo aɖeke hafi o. . . . Ne míetsɔ nusiwo katã míenya la ɖo nusi li míagasrɔ̃ ŋu la, esiwo míenya xoxo mede afi aɖeke o.” Ðokuibɔbɔ sia nya se ŋutɔ. Azɔ, le nunya si lolo wu—si nye Yehowa Mawu ŋuti nunya—gome la, ehiã be míayi edzi abɔbɔ mía ɖokui wu. Nukatae?
10 Se Biblia me nya aɖewo siwo wogblɔ le Yehowa ŋu ɖa. “Wò susuwo me goglo ŋutɔ!” (Psalmo 92:6) “Goléƒe mele [Yehowa ƒe] nunya ŋu o.” (Psalmo 147:5) “[Yehowa ƒe] nunya ƒe ta metsɔ o.” (Yesaya 40:28) “Oo, Mawu ƒe kesinɔnuwo kple nunya kple sidzedze me goglo loo!” (Romatɔwo 11:33) Edze ƒã be míanya nuwo katã tso Yehowa ŋu gbeɖe o. (Nyagblɔla 3:11) Efia nu wɔnuku geɖewo mí, ke hã sidzedze si seɖoƒe meli na o si me míasrɔ̃ nu geɖe tsoe la akpɔtɔ anɔ anyi ɖaa. Ðe mɔkpɔkpɔ ma medoa dzidzɔ na mí hebɔbɔa mí oa? Ekema esi míele nua srɔ̃m la, mina míazã míaƒe sidzedzea ɣesiaɣi wòanye nusi dzi míanɔ totom anɔ tetem ɖe Yehowa ŋu ahanɔ kpekpem ɖe ame bubuwo ŋu be woawɔ nenema—ke menye nusi dzi míato ado mía ɖokui ɖe dzi ɖe ame bubuwo ŋu o.—Mateo 23:12; Luka 9:48.
Ðe Wò Lɔlɔ̃ na Yehowa Fia
11, 12. (a) Aleke wòle be Yehowa ŋuti sidzedze si sua mía si la nakpɔ ŋusẽ ɖe mía dzii? (b) Nukae ɖenɛ fiana be lɔlɔ̃ si le ame si na Mawu la nye vavãtɔ?
11 Esɔ be apostolo Paulo gblɔ ƒomedodo si le sidzedze kple lɔlɔ̃ dome. Eŋlɔ bena: “Esia ŋuti medoa gbe ɖa ɖo, bena miaƒe lɔlɔ̃ la nanɔ agbɔ sɔm ɖe dzi wu le sidzedze kple dzimenusese katã me.” (Filipitɔwo 1:9) Le esi míada mía ɖokui teƒe la, ele be nyateƒe xɔasi ɖesiaɖe si míesrɔ̃na tsoa Yehowa kple eƒe tameɖoɖowo ŋu nadzi míaƒe lɔlɔ̃ na míaƒe Dziƒofofo la ɖe edzi boŋ.
12 Gake ame siwo gblɔna be yewolɔ̃ Mawu la dometɔ geɖe melɔ̃e nyateƒe o. Woase seselelãme sẽŋuwo le woƒe dzi me ya. Seselelãme mawo nyo eye ne wole ɖekawɔwɔ me kple sidzedze vavãtɔ la, wodze na kafukafu gɔ̃ hã. Gake woƒe amemenɔnɔ ɖeɖe mefia be lɔlɔ̃ vavãtɔ le ame si na Mawu o. Nukatae? Kpɔ alesi Mawu ƒe Nya ɖɔ lɔlɔ̃ siae ɖa: “Lɔlɔ̃ na Mawu enye si bena, míalé eƒe seawo me ɖe asi.” (Yohanes I, 5:3) Ekema lɔlɔ̃ na Yehowa nyea nu vavã ne woɖee fia le nuwɔwɔ toɖoɖotɔe me.
13. Aleke Mawu-vɔvɔ̃ akpe ɖe mía ŋu be míaɖe míaƒe lɔlɔ̃ na Yehowa afiae?
13 Mawu-vɔvɔ̃ akpe ɖe mía ŋu be míaɖo to Yehowa. Sisiɖa nyui sia kple bubu deto dede Yehowa ŋu tsona sidzedze eyama, nusɔsrɔ̃ tso eƒe kɔkɔenyenye, ŋutikɔkɔe, ŋusẽ, dzɔdzɔenyenye, nunya kple lɔlɔ̃ si seɖoƒe meli na o ŋu me. Vɔvɔ̃ sia le vevie le tete ɖe eyama ŋu me. Le nyateƒe me la, de dzesi nusi Psalmo 25:14 gblɔ: “Yehowa bɔa ha kple amesiwo vɔ̃nɛ.” Eyata ne míevɔ̃na be míawɔ nusi ana míaƒe nu manyo míaƒe Dziƒofofo malɔ̃nugbɔa ŋu o la, míate ŋu ate ɖe eŋu. Mawu-vɔvɔ̃ akpe ɖe mía ŋu be míawɔ ɖe aɖaŋuɖoɖo si me nunya le, si woŋlɔ ɖe Lododowo 3:6, dzi be: “Lé ŋku ɖe eŋu le wò mɔwo katã dzi, ekema ata mɔ na wò.” Nukae ema fia?
14, 15. (a) Nyametsotso siwo míedzea ŋgɔe le gbesiagbegbenɔnɔ me la dometɔ aɖewo ɖe? (b) Aleke míate ŋu awɔ nyametsotsowo le mɔ si ɖea míaƒe Mawu-vɔvɔ̃ fiana nui?
14 Ehiã be nàwɔ nyametsotsowo, gãwo kple sueawo siaa, gbesiagbe. Le kpɔɖeŋu me, dze ka ƒomevie nàɖo kple wò dɔwɔhatiwo, sukuhatiwo, aƒelikawo? (Luka 6:45) Ðe nàwɔ dɔ siwo woɖo ŋkuwò me la moveviɖoɖotɔea, alo ɖe nàwɔe ɖewoɖewoe ko game nasu nàkpãa? (Kolosetɔwo 3:23) Ðe nàde ha kple amesiwo melɔ̃a Yehowa tututu o alo melɔ̃e kura o la kplikplikplia, alo ɖe nàdi be yeana ye kpakple amesiwo ƒe susu le gbɔgbɔmenuwo ŋu la dome ƒomedodo me nasẽ ɖe edzia? (Lododowo 13:20) Nukae nàwɔ, le mɔ suewo gɔ̃ hã nu, atsɔ ado Mawu Fiaɖuƒea ƒe nuwo ɖe ŋgɔe? (Mateo 6:33) Ne èwɔ Ŋɔŋlɔawo me gɔmeɖosewo abe esiwo woyɔ ɖe afisia ene ŋudɔ le nyametsotso siwo nèwɔna gbesiagbe me la, ekema èle ŋku lém ɖe Yehowa ŋu “le wò mɔwo katã dzi” vavã.
15 Efia be le nyametsotso ɖesiaɖe si míawɔ me la, ele be nukpɔsusu si nye be: ‘Nukae Yehowa adi be mawɔ? Afɔɖeɖe kae ado dzidzɔ nɛ wu?’ nafia mɔ mí. (Lododowo 27:11) Mawu-vɔvɔ̃ ɖeɖe fia le go sia me nye mɔ nyui aɖe si dzi míato aɖe Yehowa lɔlɔ̃ afia. Mawu-vɔvɔ̃ aʋa mí hã be míanɔ dzadzɛ—le gbɔgbɔ, agbenɔnɔ, kple ŋutilã me. Ðo ŋku edzi be, Yakobo de dzi ƒo le kpukpui si me wòxlɔ̃ nu Kristotɔwo le be ‘woate ɖe Mawu ŋu’ la ke me be: “Miklɔ miaƒe asiwo, mi nuvɔ̃wɔlawo, eye miwɔ miaƒe dziwo kɔkɔe, mi dzimevesusulawo!”—Yakobo 4:8.
16. Ne míele nu nam Yehowa la, nukae míate ŋu awɔ gbeɖegbeɖe o, gake nuka wɔwɔ mee míate ŋu akpɔ dzidzedze le ɣesiaɣi?
16 Gake míaƒe lɔlɔ̃ na Yehowa ɖeɖe fia lɔ nu geɖe ɖe eme wu nu gbegblẽ tsitsri. Lɔlɔ̃ ʋãa mí hã be míawɔ nusi nyo. Le kpɔɖeŋu me, aleke míewɔa nu ɖe Yehowa ƒe dɔmenyonyo gbogbowo ŋui? Yakobo ŋlɔ bena: “Nunana nyuiwo katã kple nunana blibowo katã la dziƒo wotso, tso kekeliwo ƒe Fofo la gbɔ.” (Yakobo 1:17) Le nyateƒe me la, ne míetsɔ míaƒe nunɔamesiwo na Yehowa la, míenaa wòzua kesinɔtɔ o. Etɔe nu nyui kple nunɔamesi siwo katã li la nye xoxo. (Psalmo 50:12) Eye ne míetsɔ míaƒe ɣeyiɣi kple ŋusẽ na Yehowa la, menye nusi mate ŋu awɔ o la wɔmee míele nɛ o. Ne míagbe be míaɖe gbeƒã Mawu ƒe Fiaɖuƒe ŋuti nyanyuia o gɔ̃ hã la, ate ŋu ana kpewo nado ɣli! Ekema nukatae wòle be míatsɔ míaƒe nunɔamesiwo, ɣeyiɣi kple ŋusẽ ana Yehowa? Vevitɔe nye be, esia nana míeɖea míaƒe lɔlɔ̃ na eyama fiana kple míaƒe dzi, luʋɔ, susu, kpakple ŋusẽ blibo.—Marko 12:29, 30.
17. Nukae ate ŋu aʋã mí be míana nu Yehowa kple dzidzɔ?
17 Ne míele nu nam Yehowa la, ele be míawɔe kple dzidzɔ, “elabena amesi na nu kple dzidzɔ la, eyae Mawu lɔ̃na.” (Korintotɔwo II, 9:7) Gɔmeɖose si woŋlɔ ɖe Mose V, 16:17 me ate ŋu akpe ɖe mía ŋu be míana nu kple dzidzɔ: “Amesiame nana nusi su esi, abe alesi Yehowa, wò Mawu, yrae ene.” Ne míede ŋugble le alesi Yehowa nyo dɔme na míi ŋu la, edzroa mí be míana nui faa. Nunana sia ƒomevi dzɔa dzi nɛ, abe alesi tututu nu sue aɖe si vi si gbɔ womelɔ̃a nu le o nana dzila la wɔna ene. Míaƒe lɔlɔ̃ ɖeɖe fia le mɔ sia nu akpe ɖe mía ŋu míate ɖe Yehowa ŋu.
Tu Ƒomedodo Kplikplikpli Ðo To Gbedodoɖa Dzi
18. Nukatae wònyo be míade ŋugble le alesi míana míaƒe gbedodoɖawo nanyo ɖe edzi ŋu?
18 Ɣeyiɣi siwo me míedoa gbe ɖa le mía ɖokui si la ʋua mɔnukpɔkpɔ xɔasi aɖe na mí—ɣeyiɣi siwo me míegblɔa míaƒe dzimenya veviwo na míaƒe Dziƒofofoa. (Filipitɔwo 4:6) Esi gbedodoɖa nye mɔnu vevi aɖe si dzi míetona tena ɖe Mawu ŋu ta la, anyo ŋutɔ be míatɔ vie ade ŋugble le míaƒe gbedodoɖawo ƒe nyonyome ŋu. Menye alesi woavivi ahanɔ ɖoɖo nu ƒe nyae o, ke boŋ ele be woanye nyateƒenya siwo dona tsoa dzi me. Aleke míate ŋu atu míaƒe gbedodoɖawo ƒe nyonyome ɖoe?
19, 20. Nukatae wòle be míade ŋugble hafi ado gbe ɖa, eye nusiwo sɔ kawo ŋue míate ŋu ade ŋugble le?
19 Anyo be míadze agbagba ade ŋugble hafi ado gbe ɖa. Ne míede ŋugble do ŋgɔ la, míate ŋu ana míaƒe gbedodoɖawo nanɔ tẽ eye gɔmesese nanɔ wo ŋu, si awɔe be míaƒo asa na nya nyanyɛ siwo vaa susume la ko gbɔgblɔ kple wo gbugbɔgagblɔ. (Lododowo 15:28, 29) Ðewohĩ ŋugbledede le nyati siwo ŋu Yesu ƒo nu tsoe le eƒe kpɔɖeŋugbedodoɖaa me kple alesi esiawo do ƒome kple mía ŋutɔwo ƒe nɔnɔmewoe ŋu akpe ɖe mía ŋu. (Mateo 6:9-13) Le kpɔɖeŋu me, míate ŋu abia mía ɖokui se be akpa sue kae míekpɔ mɔ be míawɔ le Yehowa ƒe lɔlɔ̃nu wɔwɔ le anyigba dzi afisia me hã. Ðe míate ŋu agblɔ alesi míedi be míanye ŋudɔwɔnuwo alesi wòanya wɔe la na Yehowa ahabia eƒe kpekpeɖeŋu le dɔ ɖesiaɖe si wode mía si la wɔwɔ mea? Ðe dzitsitsi ɖe míaƒe ŋutilãmenuhiahiãwo ŋu wu tsɔtsɔ na mía? Nuvɔ̃ kawoe wòhiã be woatsɔ ake mí, eye amekawoe wòhiã be míatsɔ ake wu? Tetekpɔ kawoe le fu wɔm mí, eye ɖe míekpɔe dze sii be míehiã Yehowa ƒe ametakpɔkpɔ le wo me kpataa?
20 Gakpe ɖe eŋu la, míate ŋu abu amesiwo míenya be wohiã na Yehowa ƒe kpekpeɖeŋu vevie la ŋu. (Korintotɔwo II, 1:11) Gake nusi hã mele be míaŋlɔ be o enye akpedada. Ne míetɔ hebu eŋu kpɔ la, míakpɔ susu siwo ta wòle be míada akpe na Yehowa ahakafui gbesiagbe ɖe eƒe dɔmenyo gbogboawo ta ɖo la godoo. (Mose V, 8:10; Luka 10:21) Viɖewo gale esia wɔwɔ ŋu—ate ŋu akpe ɖe mía ŋu mɔkpɔkpɔ kple ŋudzedzekpɔkpɔ nyui nasu mía si le agbe ŋu.
21. Ŋɔŋlɔawo me kpɔɖeŋu kawo sɔsrɔ̃e ate ŋu akpe ɖe mía ŋu ne míete ɖe Yehowa ŋu le gbedodoɖa me?
21 Nusɔsrɔ̃ ate ŋu atu míaƒe gbedodoɖa ɖo hã. Woŋlɔ ŋutsu kple nyɔnu wɔnuteƒewo ƒe gbedodoɖa ɖedzesiwo ɖe Mawu ƒe Nya la me. Le kpɔɖeŋu me, ne míedze ŋgɔ kuxi sesẽ aɖe, si na míetsi dzimaɖi eye wòle ŋɔdzi dom na mí alo míaƒe lɔlɔ̃tɔwo ƒe nyonyo la, míate ŋu axlẽ nu tso Yakob ƒe gbedodoɖa si ku ɖe eƒe gododo nɔvia hlɔ̃biala, Esau, ŋu la ŋu. (Mose I, 32:9-12) Alo míate ŋu asrɔ̃ gbe si Fia Asa do ɖa esime Etiopiatɔwo ƒe aʋakɔ si ade ame miliɔn ɖeka do ŋɔdzi na Mawu ƒe amewo la. (Kronika II, 14:11, 12) Ne kuxi aɖe si dze abe ahe vlodoame va Yehowa ƒe ŋkɔ nyui la dzi le fu ɖem na mí la, ekema asɔ be míade ŋugble le gbe si Eliya do ɖa le Baal subɔlawo ŋkume le Karmel-to dzi kple gbe si Nexemya do ɖa ku ɖe nɔnɔme gbegblẽ si me Yerusalem nɔ ŋu la ŋu. (Fiawo I, 18:36, 37; Nexemya 1:4-11) Gbedodoɖa mawo xexlẽ kple ŋugbledede le wo ŋu ate ŋu ado ŋusẽ míaƒe xɔse ahana míakpɔ alesi míate ŋu atsɔ míaƒe dzimaɖitsitsiwo ado ɖe Yehowa ŋkumee nyuie wu.
22. Nukae nye ƒe 2003 ƒe mawunyakpukpuia, eye nya kae míate ŋu anɔ mía ɖokui biam edziedzi le ƒea me?
22 Edze ƒã be bubu gã aɖeke, taɖodzinu kɔkɔ aɖeke, meli si ƒo wɔwɔ ɖe Yakobo ƒe aɖaŋuɖoɖoa be ‘míate ɖe Mawu ŋu’ dzi ta o. (Yakobo 4:8) Mina míawɔ esia to Mawu ŋuti sidzedze si su mía si la dzidzi ɖe edzi, to didi be míaɖe míaƒe lɔlɔ̃ na eyama afia geɖe wu, kple to ƒomedodo kplikplikpli tutuɖo kplii le míaƒe gbedodoɖawo me dzi. Esi Yakobo 4:8 le susume na mí le ƒe 2003 bliboa me abe ƒea ƒe mawunyakpukpui ene la, mina míayi edzi anɔ mía ɖokui me dzrom kpɔ be míele tetem ɖe Yehowa ŋu nyateƒe hã. Ke nya ma ƒe akpa mamlɛa ya ɖe? Susu ka nue Yehowa ‘ate ɖe ŋuwò’ le, eye viɖe kawo wòahe vɛ? Nyati si kplɔe ɖo aɖe nya sia me.
Èɖo Ŋku Wo Dzia?
• Nukatae tete ɖe Yehowa ŋu nye nane si wòle be míabu nu vevii?
• Taɖodzinu kawoe míate ŋu aɖo ku ɖe Yehowa ŋuti sidzedze xɔxɔ ŋu?
• Aleke míate ŋu aɖee fia be lɔlɔ̃ vavãtɔ le mía si na Yehowa?
• Mɔ kawo nue míate ŋu atu ƒomedodo kplikplikpli ɖo kple Yehowa le gbedodoɖa me?
[Biabiawo]
[Nya si ɖe dzesi si le axa 12]
Ƒe 2003 ƒe mawunyakpukpuia anye: “Mite ɖe Mawu ŋu, eye wòate ɖe mia ŋu.”—Yakobo 4:8.
[Nɔnɔmetata si le axa 8, 9]
Esi Samuel nɔ tsitsim la, eva nya Yehowa nyuie wu
[Nɔnɔmetata si le axa 12]
Gbe si Eliya do ɖa le Karmel-toa dzi nye kpɔɖeŋu nyui aɖe na mí