“Meke Ðe Nusianu si Hiãm la Ŋu”

NYATAKAKA aɖe si Xexeame ƒe Lãmesẽhabɔbɔ na ɖee fia be wobu akɔnta be blanuiléle le fu ɖem na ame miliɔn 120 kple edzivɔ le xexeame godoo fifia. Ƒe sia ƒe la, ame miliɔn ɖeka wua wo ɖokui eye tso ame miliɔn 10 va ɖo 20 tenɛ kpɔna be yewoaɖe yewoƒe agbe ɖa. Kpekpeɖeŋu kae li na amesiwo blanuiléle le fu ɖem na? Kɔdzitikewɔwɔ ate ŋu aɖe dɔlélea dzi akpɔtɔ, eye kpekpeɖeŋunana amea le seselelãme gome hã le vevie. Gawu la, amesiwo seselelãme siawo ɖea fu na la dometɔ aɖewo va ke ɖe nu bubu aɖe hã ŋu si kpe ɖe wo ŋu, le Yehowa Ðasefowo ƒe agbalẽ nyui siwo wotu ɖe Biblia dzi la me, abe alesi lɛta sia si tso France la ɖee fia ene.

“Le ɣeyiɣi aɖe si va yi nyitsɔ laa me la, nyemegava nya nusitae wòle be mayi edzi anɔ agbe o. Medo gbe ɖa na Mawu be wòana maku. Ewɔ nam abe ɖe meku ɖe tsitrenu ene. Medo gbe ɖa na Yehowa vevie be wòafia mɔm. Metso nya me hã be maxlẽ 2002 Yearbook of Jehovah’s Witnesses, eye mewu exexlẽ nu le ŋkeke etɔ̃ me. Magblɔ be ede dzi ƒo nam vevie hedo ŋusẽ nye xɔse.

“Mewɔ numekuku aɖewo le Gbetakpɔxɔ kple Nyɔ! magazinewo me, eye nu wɔnuku kawo gbegbee nye si mekpɔ! Mexlẽa magazine siawo edziedzi ƒe 15 kple edzivɔe nye sia, gake nyemekpɔ alesi gbegbe nyati siwo le wo me la dea dzi ƒo na ame hedoa ŋusẽ amee la dze sii o. Lɔlɔ̃—si nye nɔnɔme si mebɔ kura egbea o la—yɔ wo me fũ. Meke ɖe nusianu si hiãm la ŋu.”

Biblia gblɔ be: “Yehowa tsɔ ɖe amesiwo ƒe dzi gbã gudugudu la gbɔ, eye wòxɔna na amesiwo ƒe gbɔgbɔ woƒo ƒu anyi.” (Psalmo 34:19) Ðikekemanɔmee la, amesiwo katã ƒe “dzi gbã gudugudu” alo ƒe “gbɔgbɔ woƒo ƒu anyi” ate ŋu akpɔ dzideƒoname kple etsɔme mɔkpɔkpɔ le Biblia me. Yehowa Ðasefowo maa Biblia-srɔ̃gbalẽwo be woatsɔ akpe ɖe amesiwo le hiahiã me ŋu bena akɔfafa tsoƒe ma si tso gbɔgbɔ me la naɖe vi na wo.