‘Milé Dzitsinya Nyui Me Ðe Asi’

“NA WÒ dzitsinya nafia mɔ wò” ye nye aɖaŋuɖoɖo si míesena zi geɖe. Gake hafi míaƒe dzitsinya nate ŋu anye mɔfiala si dzi míate ŋu aka ɖo la, ele be míahee nyuie le nusi nye nyui kple vɔ̃ ŋuti, eye ele be míatsɔ ɖe le nusi fiam wòle mí la me.

Bu ŋutsu aɖe si ŋkɔe nye Zaxeo ƒe nuteƒekpɔkpɔ si woŋlɔ ɖe Biblia me ŋu kpɔ. Zaxeo, amesi nɔ Yerixo, nye nudzɔlawo ƒe amegã eye wònye kesinɔtɔ. Le eya ŋutɔ ƒe nya nu la, adzodada—si nye nuwɔna si na ame bubuwo kpe fu—dzie wòto kpɔ kesinɔnu siawo. Ðe Zaxeo ƒe dzitsinya ɖe fu nɛ ɖe eƒe numadzɔmadzɔ wɔwɔa ta? Ne eɖea fu nɛ la, ke anye be enɔ aɖaba ŋem ƒu edzi.—Luka 19:1-7.

Gake nane va dzɔ si na Zaxeo gbugbɔ bu eƒe agbenɔnɔ ŋu. Yesu va Yerixo. Zaxeo, si nye ame kpui la, di be yeakpɔe, gake mete ŋui o le ameha la ta. Eyata eƒu du dze ŋgɔ ɖalia atia aɖe be yeate ŋu akpɔe nyuie. Esi Zaxeo ƒe ɖetsɔlemea wɔ dɔ ɖe Yesu dzi ta la, egblɔ nɛ be yeava egbɔ le eƒeme. Zaxeo xɔ eƒe amedzro tɔxɛ la kple dzidzɔ.

Nusiwo Zaxeo kpɔ hese esime wòde ha kple Yesu la ʋã dzi nɛ ale be wòtrɔ eƒe agbenɔnɔ. Egblɔ be: ‘Kpɔ ɖa Aƒetɔ, metsɔ nye nuwo ƒe afã le ame dahewo nam, eye nusianu si medzɔ le ame aɖe si dzro la maɖo eteƒe nɛ zi ene.’—Luka 19:8.

Wona hehe Zaxeo ƒe dzitsinya, eye wòɖo toe hewɔ nu ɖe enu. Emetsonu nyuiawo ɖe vi ale gbegbe. Bu alesi Zaxeo se le eɖokui me le susu me ŋu kpɔ esime Yesu gblɔ nɛ bena: “Egbe xɔxɔ va aƒe sia me.”—Luka 19:9.

Kpɔɖeŋu dedziƒoname kae enye esi! Efia be agbe ka kee míeɖanɔ le ɣeyiɣi aɖe si va yi me o, míate ŋu atrɔ. Abe Zaxeo ene la, míate ŋu awɔ ɖe Yesu ƒe nya—si woŋlɔ ɖe Biblia me—dzi ahatu nyui kple vɔ̃ ŋuti nukpɔsusuwo ɖo. Ekema míate ŋu awɔ abe alesi apostolo Petro xlɔ̃ nui ene be, ‘míalé dzitsinya nyui me ɖe asi.’ Míate ŋu aɖo to míaƒe dzitsinya si wona hehee la ahawɔ nusi dze.—Petro I, 3:16.