Nyabiabia Siwo Tso Exlẽlawo Gbɔ

Ne Kristotɔ aɖe sea nuƒowo evɔ mekpɔa ame aɖeke o la, ɖe wòfia kokoko be gbɔgbɔ vɔ̃e le fu ɖem nɛa?

Ao. Togbɔ be wokaa nya ta be gbɔgbɔ vɔ̃wo wɔa nu alea hã la, ame geɖe siwo sea nuƒowo evɔ womekpɔa ame aɖeke o alo toa nɔnɔme manyatana bubu siwo ɖea fu na ame me va kpɔe dze sii to numekuku me be dɔléle aɖee le fu ɖem na yewo.

Le ƒe alafa gbãtɔ me gɔ̃ hã la, wode dzesii kɔte be ɣeaɖewoɣi la, gbɔgbɔ vɔ̃wo ƒe amedzidzedze kple dɔlélewo ƒe ŋusẽkpɔɖeamedziwo ɖia wo nɔewo. Le Mateo 17:14-18 la, míexlẽ nu tso ŋutsuvi aɖe si Yesu da dɔ na ŋu. Togbɔ be kpeŋui sesẽ aɖe ƒe dzesie dze le eŋu hã la, gbɔgbɔ vɔ̃wo koŋue nɔ fuwɔmii. Gake le ɣeyiɣi aɖe si do ŋgɔ si me wokplɔ ameha siwo le fu kpem va Yesu gbɔ be wòada gbe le wo ŋu la, ‘amesiwo me gbɔgbɔ vɔ̃wo kple kpeŋuikulawo le la’ nɔ wo dome. (Mateo 4:24) Eme kɔ ƒã be wode dzesii be menye gbɔgbɔ vɔ̃woe le ŋusẽ kpɔm ɖe kpeŋuikula aɖewo dzi o. Dɔlélee nɔ fu ɖem na wo.

Woka nya ta be amesiwo schizophrenia, si nye tagbɔdɔléle si wote ŋu dana zi geɖe kple atikewo, ɖea fu na la sea nuƒowo evɔ womekpɔa ame aɖeke o alo toa nɔnɔme bubu aɖewo siwo adze abe gbɔgbɔ vɔ̃woe le fu ɖem na wo ene me. * Dɔléle bubu aɖewo hã ate ŋu ahe tagbɔdɔléle si ame aɖewo abu vodadatɔe be gbɔgbɔ vɔ̃woe le ewɔm la vɛ. Eyata togbɔ be amesi gblɔna be yesea nuƒowo evɔ yemekpɔa ame aɖeke o alo yeƒe susume ɖea fu bubuwo na ye la madi be yeaŋe aɖaba aƒu edzi be menye gbɔgbɔ vɔ̃woe le fu ɖem na ye o hã la, ehiã kokoko be woade dzi ƒo nɛ be wòalɔ̃ ayi woaɖadoe kpɔ be dɔléle aɖee na nusia le dzɔdzɔm ɖe edzi hã.

[Etenuŋɔŋlɔwo]