Yesu Kristo—Nusiwo Ðo Kpe Edzi Be Enɔ Anyigba Dzi Kpɔ

ÈXƆ ame aɖe si ŋkɔe nye Albert Einstein ƒe anyinɔnɔ dzi sea? Ðewohĩ àlɔ̃ ɖe edzi enumake be ẽ, gake nukatae? Ame akpa gãtɔ mekpɔe kple ŋku kpɔ o. Ke hã, nusiwo wòwɔ ŋuti nyatakaka siwo ŋu kakaɖedzi le ɖo kpe edzi be enɔ anyi kpɔ. Wokpɔa eƒe anyinɔnɔ ŋuti kpeɖodzi dzea sii le nusiwo ŋu wòke ɖo le dzɔdzɔmenuwo sɔsrɔ̃ me la zazã me. Le kpɔɖeŋu me, ame geɖe kpɔa viɖe tso elektrikŋusẽ si wokpɔna tsoa nukliaŋusẽ me ŋu, si ƒe dɔwɔna do ƒome kplikplikpli kple Einstein ƒe akɔntabumɔnu xɔŋkɔ, si nye E=mc² (ŋusẽ si le nu me enye nua ƒe kpekpeme tsɔtsɔ aɖo kekeli ƒe zɔzɔ teƒe zi gbɔ zi alesi kekeli zɔnae) la zazã.

 Nuŋububu alea sɔ le Yesu Kristo, amesi wonya be enye ame xɔŋkɔ le ŋutinya me, hã gome. Nusi woŋlɔ tso eyama ŋu kple ŋusẽ si wòkpɔ ɖe amewo dzi míekpɔ la nye kpeɖodzi si ŋu ɖikeke aɖeke mele o be enɔ anyi kpɔ. Aleke kee Yakobo ŋuti nuŋlɔɖi si tomenukulawo fɔ nyitsɔ laa, si woɖɔ le nyati si do ŋgɔ me, ado dzidzɔ na amee o, Yesu ƒe anyinɔnɔ ŋutɔŋutɔ ƒe kpeɖodzi menɔ te ɖe asinudɔwɔwɔ sia alo bubu aɖeke dzi o. Nyateƒeae nye be, míate ŋu akpɔ Yesu ƒe anyinɔnɔ ŋuti kpeɖodzi le nusi ŋutinyaŋlɔlawo ŋlɔ ku ɖe woa kple eyomedzelawo ŋu me.

Ŋutinyaŋlɔlawo ƒe Ðaseɖiɖi

Le kpɔɖeŋu me, bu ƒe alafa gbãtɔ me Yudatɔ ŋutinyaŋlɔla, Flavius Josephus, si nye Farisitɔ, ƒe ɖaseɖiɖia ŋu kpɔ. Eƒo nu tso Yesu Kristo ŋu le agbalẽ si nye Jewish Antiquities me. Togbɔ be ame aɖewo ke ɖii zi gbãtɔ si Josephus yɔ Yesu be Mesia la hã la, Yeshiva Yunivɛsiti Nufialagã Louis H. Feldman gblɔ be ame ʋɛ aɖewo koe ke ɖii zi evelia si wòyɔe nenema. Josephus gblɔ le afima be: “[Nunɔlagã Ananus] ƒo Sanhedrin la ƒe ʋɔnudrɔ̃lawo nu ƒu hekplɔ ŋutsu aɖe si ŋkɔe nye Yakobo, Yesu si woyɔ be Kristo la nɔvi, va wo ŋkume.” (Jewish Antiquities, XX, 200) Ẽ, Farisitɔ, si nye kɔmama aɖe si me tɔ geɖe ɖee fia gaglã be yewolé fu Yesu lae lɔ̃ ɖe ‘Yakobo, Yesu nɔvi’ ƒe anyinɔnɔ dzi.

Yesu ƒe anyinɔnɔ ƒe ŋusẽkpɔɖeamedzia dze le eyomedzelawo ƒe dɔwɔnawo me. Esi wode apostolo Paulo gaxɔ me le Roma le ƒe 59 M.Ŋ. me lɔƒo la, amesiwo nye amegãwo le Yudatɔwo dome gblɔ nɛ be: “Míese bena, wogblɔ nya ɖe kɔmamã sia ŋuti le afisiafi.” (Dɔwɔwɔwo 28:17-22) Woawo yɔ Yesu ƒe nusrɔ̃lawo be “kɔmama sia.” Ne woƒoa nu tsia tre ɖe wo ŋuti le afisiafi la, ekema ŋutinyaŋlɔlawo aƒo nu tso wo ŋu godoo, alo menye aleae wòle oa?

Tacitus, si wodzi le ƒe 55 M.Ŋ. me lɔƒo si wobuna be enye xexeame ƒe ŋutinyaŋlɔla xɔŋkɔwo dometɔ ɖeka la, ƒo nu tso Kristotɔawo ŋu le Annals si wòŋlɔ me. Le eƒe nuŋɔŋlɔ si ku ɖe alesi Nero bu fɔ wo ɖe dzo gã si bi le Roma le ƒe 64 M.Ŋ. ta ŋu la, eŋlɔ bena: “Nero bla amesiwo dzi woda fɔbubua ɖo eye wòwɔ fu ha si wolé fui le woƒe ŋunyɔnuwo ta, si dua me tɔwo yɔna be Kristotɔwo. Kristo, amesi me woƒe ŋkɔ [Kristotɔwo] dzɔ tso kpe tohehe sesẽ ƒe fu le Tiberio ƒe fiaɖuɣi le míaƒe mɔmefiawo dometɔ ɖeka, Pontio Pilato si me.” Nuŋlɔɖi sia me nyawo sɔ kple nyatakaka siwo le Biblia me ku ɖe Yesu ŋu.

Nuŋlɔla bubu si ƒo nu tso Yesu yomedzelawo ŋu enye Pliny Suetɔ, si nye Bithynia ƒe mɔmefia. Le ƒe 111 M.Ŋ. me lɔƒo la, Pliny ŋlɔ agbalẽ ɖo ɖe Fiagã Trajan, hebia alesi yeawɔ nui kple Kristotɔwo. Pliny ŋlɔ bena amesiwo wobu fɔ vodadatɔe be wonye Kristotɔwo la atrɔ ɖe mawuawo ŋu ayɔ wo ahade ta agu na Trajan ƒe legba, atsɔ aɖee afia be yewomenye Kristotɔwo o. Pliny yi edzi be: “Wogblɔ be womezina amesiwo nye Kristotɔwo ŋutɔŋutɔ la dzi le wɔna siawo dometɔ aɖeke me o.” Ema ɖi ɖase le Kristo, amesi yomedzelawo lɔ̃ faa be yewoatsɔ yewoƒe agbe aɖo anyi hena eyama dzixɔse, ƒe anyinɔnɔ ŋu.

 Esi The Encyclopædia Britannica (ƒe 2002 tɔ) nɔ Yesu Kristo kple eyomedzelawo ŋutinya si ƒe alafa eve gbãtɔawo me ŋutinyaŋlɔlawo ŋlɔ tom ɖe eme la, eƒo nya ta be: “Nuŋlɔɖi ɖekaɖeka siawo ɖo kpe edzi be le blemaɣeyiɣiwo me la, amesiwo tsi tre ɖe Kristotɔnyenye ŋu gɔ̃ hã meke ɖi le Yesu ƒe anyinɔnɔ kpɔ ŋu o, si ŋu woʋli nya le zi gbãtɔ le susu siwo ŋu kpeɖodziwo mele o ta, le ƒe alafa 18 lia ƒe nuwuwu, le ƒe alafa 19 lia me, kple le ƒe alafa 20 lia ƒe gɔmedzedze me.”

Yesu Yomedzelawo ƒe Ðaseɖiɖi

The Encyclopedia Americana gblɔ be: “Kpeɖodzi siwo katã kloe hiã be woafɔ akpe anya Yesu ƒe agbenɔnɔ kple nusi dzɔ ɖe edzi kple alesi Kristotɔ gbãtɔawo ɖe eƒe ame vevi nyenye fiae la le Nubabla Yeyea me.” Ðewohĩ ɖeklemiɖelawo malɔ̃ ɖe edzi be woazã Biblia atsɔ aɖo kpe Yesu ƒe anyinɔnɔ dzi o. Ke hã, susu eve si wotu ɖe Ŋɔŋlɔa me nuŋlɔɖiwo dzi koŋ la kpe ɖe mía ŋu be míekpɔ be Yesu nɔ anyigba dzi kpɔ vavã.

Abe alesi míede dzesii ene la, Einstein ƒe nufiafia xɔŋkɔawo ɖo kpe eƒe anyinɔnɔ kpɔ dzi. Nenema kee Yesu ƒe nufiafiawo ɖo kpe eƒe anyinɔnɔ ƒe nyateƒenyenye dzii. Le kpɔɖeŋu me, bu Todzimawunya si nye dutoƒonuƒo nyanyɛ aɖe si Yesu ƒo ŋu kpɔ. (Mateo, ta 5-7) Apostolo Mateo ŋlɔ nu tso alesi gbegbe mawunya ma wɔ dɔ ɖe amewo dzii la ŋu be: “Kuvia ɖo amehawo le eƒe nufiafia la ŋuti; elabena ele nu fiam wo abe amesi si ŋusẽ le ene.” (Mateo 7:28, 29) Nufialagã Hans Dieter Betz gblɔ le ŋusẽ si mawunyaa kpɔ ɖe amewo dzi le ƒe alafa siwo va yi me ŋu be: “Ne woagblɔe gbadzaa la, ŋusẽ si Todzimawunya la kpɔna ɖe amewo dzi la keke ta gbɔ Yudatɔwo kple Kristotɔwo ƒe liƒo, kple Ɣetoɖoƒetɔwo ƒe kɔnuwo gɔ̃ hã ŋu.” Egblɔ kpee be mawunya sia “dzɔa dzi na amewo le xexeame katã wòwɔ nuku.”

Bu nya kpokploe siawo siwo me susu le si le Todzimawunyaa me la ŋu kpɔ: “Amesi ke ƒo wò nuɖusi tome la, nyẽ ekeme hã nɛ.” “Mikpɔ mia ɖokui dzi nyuie, ne miagawɔ miaƒe dzɔdzɔenyenye nu le amewo ƒe ŋku me . . . o.” “Migatsi dzimaɖi le etsɔ si gbɔna la, ƒe nuwo ŋuti o, elabena etsɔ si gbɔna la, adze agbagba le eya ŋutɔ ƒe nuwo ŋu.” “Migatsɔ miaƒe dzonu nyuiwo . . . ƒu gbe ɖe hawo ƒe ŋku me . . . o.” “Mibia, eye woana mi.” “Nusianu, si mielɔ̃na bena, amewo nawɔ na mi la, miawo hã miwɔ nenema ke na wo.” “Miyi ɖe agbo bii la me.” “Mitsɔ woƒe tsetsewo dze si wo.” “Ati nyui sia ati nyui tsea ku nyui.”—Mateo 5:39; 6:1, 34; 7:6, 7, 12, 13, 16, 17.

Ànya se nya siawo dometɔ aɖewo alo wo me nya vevi aɖewo kpɔ. Ðewohĩ wozu lododowo le mia degbe me. Todzimawunyaa mee woɖe esiawo katã tsoe. Ŋusẽ si mawunya sia kpɔ ɖe amewo kple dekɔnu geɖewo dzi la nye ɖaseɖiɖi si me kɔ ƒã be “nufiala gã la” nɔ anyi kpɔ.

Mina míatsɔe be ame aɖee kpa amesi woyɔ be Yesu Kristo la ƒe ŋutinya. Tsɔe be ame ma nya nu ale gbegbe be wòte ŋu kpa nufiafia siwo Biblia gblɔ be Yesue fia wo la. Ðe makpa nyaa ale be Yesu kple eƒe nufiafiawo navivi amewo katã nu alesi wòanya wɔ oa? Ke hã, apostolo Paulo gblɔ be: “Yudatɔwo biaa dzesiwo, eye Helatɔwo dia nunya yome; ke míawo la míeɖea gbeƒã Kristo, amesi woklã ɖe [fuwɔameti] ŋu la, esi nye nukikli na Yudatɔwo kple bometsinu na Helatɔwo.” (Korintotɔwo I, 1:22, 23) Kristo kaklã ɖe fuwɔameti ŋu ƒe gbedasia medze Yudatɔwo kple Helatɔwo siaa ŋu o. Ke hã, eyae nye Kristo si ƒe alafa gbãtɔ me Kristotɔwo ɖe gbeƒãe. Nukatae woƒo nu tso Kristo ŋu be woklãe ɖe ati ŋu? Ŋuɖoɖoa si dze koe nye be Kristotɔwo ƒe Hela Ŋɔŋlɔawo ŋlɔlawoe ŋlɔ Yesu ƒe agbenɔnɔ kple ku ŋuti nyateƒea ɖi.

Susu bubu si ɖo kpe Yesu ƒe anyinɔnɔ dzi dze le eƒe nufiafia siwo eyomedzelawo ɖe gbeƒã ɖeɖimateameŋutɔe me. Ƒe 30 kloe tso esime Yesu dze eƒe subɔsubɔdɔa gɔme megbe la, Paulo te ŋu gblɔ be ‘woɖe gbeƒã nyanyuia na nuwɔwɔwo katã le dziƒo te.’ (Kolosetɔwo 1:23) Ẽ, Yesu ƒe nufiafiawo kaka ɖe blemaxexea me togbɔ  be wotsi tre ɖe wo ŋu hã. Paulo, amesi ŋutɔ hã nye Kristotɔ si yome woti la, ŋlɔ bena: “Ne Kristo metsi tre o la, ekema míaƒe gbeƒãɖeɖe enye dzodzro, eye míaƒe xɔse hã nye dzodzro.” (Korintotɔwo I, 15:12-17) Nenye be gbeƒãɖeɖe Kristo aɖe si womefɔ ɖe tsitre o anye dzodzro la, ekema gbeƒãɖeɖe Kristo aɖe si menɔ anyi kpɔ kura o la anye nu dzodzro awu. Abe alesi míexlẽe le Pliny Suetɔ ƒe nyatakaka me ene la, ƒe alafa gbãtɔ me Kristotɔwo lɔ̃ faa be yewoaku ɖe Kristo Yesu dzixɔse si nɔ wo si la ta. Woɖo woƒe agbe anyi na Kristo elabena enye ame ŋutɔŋutɔ; enɔ anyigba dzi kpɔ, eye wònɔ agbe abe alesi woŋlɔe ɖe Nyanyuiawo me ene.

Èkpɔ Kpeɖodziawo

Ele be Kristotɔwo naxɔ Yesu Kristo ƒe tsitretsitsia dzi ase hafi woate ŋu aɖe gbeƒã. Wò hã àte ŋu akpɔ Yesu si wofɔ ɖe tsitre la le susu me to ŋusẽ si kpɔm wòle ɖe amewo dzi egbea me.

Ɣeyiɣi kpui aɖe do ŋgɔ hafi woaklã Yesu ɖe ati ŋu la, egblɔ eƒe anyinɔnɔ le etsɔme ŋu nya deŋgɔ aɖe ɖi. Egblɔ hã be woafɔ ye ɖe tsitre eye yeanɔ Mawu ƒe nuɖusi me ahanɔ lalam na ɣeyiɣi si me wòatu nu kple eƒe futɔwo. (Psalmo 110:1; Yohanes 6:62; Dɔwɔwɔwo 2:34, 35; Romatɔwo 8:34) Le ema megbe la, yeanya Satana kple eƒe gbɔgbɔ vɔ̃wo ɖa tso dziƒo.—Nyaɖeɖefia 12:7-9.

Ɣekaɣie nu mawo katã adzɔ? Yesu na ‘eƒe anyinɔnɔ kple nuɖoanyia ƒe nuwuɣi ƒe dzesi’ eƒe nusrɔ̃lawo. Nusiwo ade dzesi eƒe anyinɔnɔ si ŋkuwo makpɔ o la dometɔ aɖewoe nye aʋawɔwɔ, dɔwuame, anyigbaʋuʋuwo, aʋatsonyagblɔɖilawo ƒe vava, sedzimawɔmawɔ ƒe dzidziɖedzi, kple dɔvɔ̃ dziŋɔwo. Ele be woakpɔ mɔ na nusiawo, elabena Satana Abosam nyanya ana woado “baba na anyigba.” Abosam ɖi va anyigba ƒe nutowo me “eye dzi le ekum ŋutɔ; elabena enyae be, vovoɣi vi aɖe ko yekpɔ.” Gakpe ɖe eŋu la, dzesia ƒe akpa aɖe enye gbeƒãɖeɖe Fiaɖuƒe ŋutinya nyuia “le xexe blibo la katã me, bena wòanye ɖaseɖiɖi na dukɔwo katã.”—Mateo 24:3-14; Nyaɖeɖefia 12:12; Luka 21:7-19.

Abe alesi ko woafɔ nɔnɔmetata si wofli kakɛkakɛe akpe pɛpɛpɛ ene la, nenemae nusiwo ƒe nya Yesu gblɔ ɖi la va eme pɛpɛpɛe. Tso esime Xexemeʋa I dzɔ le ƒe 1914 me la, míekpɔ Yesu Kristo ƒe anyinɔnɔ si ŋku mekpɔna o la ƒe kpeɖodzi ƒokpli la. Ele fia ɖum abe Mawu Fiaɖuƒea ƒe Fia ene eye wòle ŋusẽ gã aɖe kpɔm ɖe amewo dzi. Nyateƒe si wònye be magazine sia su asiwò la nye kpeɖodzi be wole gbeƒãɖeɖe Fiaɖuƒea ƒe dɔ wɔm egbea.

Be nàgase ŋusẽ si kpɔm Yesu ƒe anyinɔnɔ le ɖe amewo dzi gɔme ɖe edzi la, ehiã be nàsrɔ̃ Biblia. Nukatae màbia Yesu ƒe anyinɔnɔ ŋuti numeɖeɖe bubuwo Yehowa Ðasefowo o?

[Nɔnɔmetata si le axa 5]

Josephus, Tacitus, kple Pliny Suetɔ ƒo nu tso Yesu Kristo kple eyomedzelawo ŋu

[Nɔnɔmetata Tsoƒe si le axa 5]

Nutata etɔ̃awo katã: © Bettmann/CORBIS

[Nɔnɔmetata si le axa 7]

Kristotɔ gbãtɔwo xɔe se be Yesu nye ame ŋutɔŋutɔ