‘Kpɔ Ða, Mía Mawu Enye Si’

Wotu nya siwo me míedzro le nusɔsrɔ̃nyati eve siawo me la ɖe agbalẽ si nye Te Ðe Yehowa Ŋu, si woɖe ɖe go le nutome gã takpekpe siwo wowɔ le xexeame godoo le ƒe 2002/03 me dzi.—Kpɔ nyati si nye “Exe Teƒe Gbɔlo aɖe le Nye Dzi Me,” le axa 20.

“Kpɔ ɖa, mía Mawu, amesi ŋu míeɖo ŋu ɖo be, aɖe mí la, enye si; Yehowa . . . enye si.”—YESAYA 25:9.

1, 2. (a) Aleke Yehowa yɔ blemafofo Abraham, eye nya kae esia ate ŋu ana míabia mía ɖokui? (b) Aleke Biblia ka ɖe edzi na mí be míate ŋu ado ka kplikplikpli kple Mawu?

“XƆ̃NYE.” Aleae Yehowa, dziƒo kple anyigba Wɔla, yɔ blemafofo Abraham. (Yesaya 41:8) Wò ya bu eŋu kpɔ ko—be amegbetɔ tsɛ dze xɔlɔ̃ xexeame katã ƒe Aƒetɔ Dziɖulagã la! Àbia ɖokuiwò be, ‘Ðe wòanya wɔ be mate ɖe Mawu ŋu kplikplikpli nenema?’

² Biblia ka ɖe edzi na mí be míate ŋu anɔ kadodo kplikplikpli me kple Mawu. Wona kadodo kplikplikpli sia ƒe mɔnukpɔkpɔ Abraham elabena ‘exɔ Mawu dzi se.’ (Yakobo 2:23) Egbea hã, “tsi metoa [Yehowa] kple dzime dzɔdzɔe tɔ domee o.” (Lododowo 3:32) Biblia xlɔ̃ nu mí le Yakobo 4:8 be: “Mite ɖe Mawu ŋu, eye wòate ɖe mia ŋu.” Eme kɔ ƒã be ne míedze agbagba be míate ɖe Yehowa ŋu la, awɔ nu ɖe enu. Le nyateƒe me la, ate ɖe mía ŋu. Gake ɖe nya siawo siwo tso gbɔgbɔ me la le fiafiam be mí—nuvɔ̃me, madeblibowoe—wɔa afɔɖeɖe gbãtɔa? Kura o. Le esi mía Mawu lɔlɔ̃a ɖe afɔ vevi eve ta koe kadodo kplikplikpli kple Yehowa va le bɔbɔe ɖo.—Psalmo 25:14.

3. Afɔ eve kawoe Yehowa ɖe si na wòle bɔbɔe be míate ŋu ava zu exɔlɔ̃wo?

³ Gbã la, Yehowa wɔ ɖoɖo be Yesu ‘natsɔ eƒe agbe ana tafee ɖe ame geɖe ƒe xɔxɔ ta.’ (Mateo 20:28) Tafevɔsa mae wɔe be míete ŋu tena ɖe Mawu ŋu. Biblia gblɔ be: ‘Míawo ya míelɔ̃e le esi wòtre mí lɔlɔ̃ ta.’ (Yohanes I, 4:19) Ẽ, esi Mawu ‘tre mí lɔlɔ̃’ ta la, eɖo gɔmeɖoanyi ɖi na mí be míate ŋu awɔ xɔlɔ̃ kplii. Evelia, Yehowa ɖe eɖokui fia mí. Le xɔlɔ̃wɔwɔ ɖesiaɖe me la, amea nyanya nyuie kple ŋudzedzekpɔkpɔ  ɖe eƒe nɔnɔme tɔxɛwo ŋue wɔnɛ be míenɔa kadodo kplikplikpli me. Bu nusi esia afia ŋu kpɔ. Ne ɖe Yehowa nye Mawu aɖe si ɣla eɖokui, si míate ŋu anya o la, míate ŋu ate ɖe eyama ŋu gbeɖe o. Gake le esi teƒe be Yehowa naɣla eɖokui la, edi be míanya ye boŋ. (Yesaya 45:19) Le eƒe Nya, Biblia, me la ezã nya siwo gɔme míate ŋu ase tsɔ ɖe eɖokui fia mí—siwo nye kpeɖodzi siwo fia be menye ɖe wòlɔ̃ mí ɖeɖeko o, ke edi be míadze si ye ahalɔ̃ ye hã abe míaƒe Dziƒofofo ene.

4. Aleke míava se le mía ɖokui me le Yehowa ŋu ne míeva le eƒe nɔnɔmewo nyam ɖe edzi nyuie wu?

⁴ Èkpɔ ɖevi sue aɖe fia asi fofoa na exɔlɔ̃wo hetsɔ dzidzɔ kple dada gblɔ faa be, “Fofonyee ma” kpɔa? Mawu subɔlawo tɔ dzɔ le go sia go me be woase le wo ɖokui me nenema ɖe Yehowa ŋu. Biblia gblɔ ɣeyiɣi aɖe ɖi si me nuteƒewɔlawo agblɔ le be: ‘Kpɔ ɖa, mía Mawu enye si.’ (Yesaya 25:8, 9) Zi alesinu míeva le Yehowa ƒe nɔnɔmewo gɔme sem ɖe edzii la, zi nenemae míase le mía ɖokui me be Fofo nyuitɔ kekeake kple Xɔlɔ̃ vevitɔ si ɖeke mesɔ kplii o ye le mía si. Ẽ, Yehowa ƒe nɔnɔmewo gɔmesese ana míakpɔ susu geɖe siwo ta wòle be míate ɖe eŋu geɖe wu ɖo. Eyata mina míadzro alesi Biblia ɖe Yehowa ƒe nɔnɔme vevitɔwo—siwo nye ŋusẽ, dzɔdzɔenyenye, nunya, kple lɔlɔ̃—fia me kpɔ. Le nyati sia me la, míadzro nɔnɔme vevi etɔ̃ gbãtɔwo me.

‘Eƒe Ŋusẽ Tri Akɔ’

5. Nukatae wòsɔ be woyɔ Yehowa ɖeka ko be “ŋusẽkatãtɔ,” eye mɔ kawo nue wòzãa eƒe ŋusẽ triakɔ la le?

⁵ Yehowa ƒe “ŋusẽ tri akɔ.” (Hiob 37:23) Yeremya 10:6 gblɔ be: “Yehowa, ame aɖeke mede nuwò o, èlolo, eye wò ŋusẽ na wò ŋkɔ lolo.” To vovo na nuwɔwɔ bubuwo la, ŋusẽ si seɖoƒe meli na o ye le Yehowa si. Esia tae woyɔa eya ɖeka ko be “ŋusẽkatãtɔ” ɖo. (Nyaɖeɖefia 15:3) Yehowa zãa eƒe ŋusẽ triakɔa tsɔ wɔa nuwoe, tsɔ tsrɔ̃a nuwoe, tsɔ kpɔa ame tae, hetsɔnɛ ɖɔa nuwo ɖoe. Bu kpɔɖeŋu eve ko ŋu kpɔ—eƒe nuwɔŋusẽ kple eƒe ametakpɔŋusẽ.

6, 7. Aleke ɣea ƒe ŋusẽ le, eye nyateƒenya vevi ka dzie wòɖo kpee?

⁶ Ne ètsi tre ɖe gota gbesigbe ŋdɔ le ʋuʋum gbagbagbã la, nukae nèsena le lã me? Ŋdɔ ƒe dzoxɔxɔ. Le nyateƒe me la, Yehowa ƒe nuwɔŋusẽ ƒe ŋusẽkpɔɖeamedzi enye ma sem nèle le wò lã me. Ŋusẽ ka gbegbee le ɣea si? Ɣea tome ƒe dzoxɔxɔ aɖo dzidzenu Celsius miliɔn 15. Ne ɖe nàte ŋu aka ɣea tome ƒe kakɛ sue aɖe si ƒe lolome le abe abui ƒe ta ko ene atsɔ ada ɖe anyigba dzi afisia la, màte ŋu anɔ te ɖe eƒe dzoxɔxɔ nu ne èle adzɔge kilometa 140 tso dzoxi ma gɔ̃ hã gbɔ o! Sɛkɛnd ɖesiaɖe la, ŋusẽ si gbegbe dona le ɣea me ade nukliabɔmb miliɔn alafa geɖe ƒe wowo nu. Gake afisi anyigba la le hafi le xlã ƒom dzo wɔnuku sia sɔ pɛpɛpɛ. Ne ɣea gogo anyigba akpa la, tsi siwo le edzi avɔ; ne  eyi adzɔge akpa la, tsia abla azu tsikpe. Ne ete ɖe eŋu akpa alo didi tso egbɔ akpa la, naneke matsi agbe le míaƒe ɣletinyigbaa dzi o.

⁷ Ame akpa gãtɔ medea asixɔxɔ boo aɖeke ɣea ŋu o togbɔ be eya dzie woƒe agbe nɔ te ɖo hã. Ewɔe be womede dzesi nufiame si woate ŋu akpɔ tso ɣea gbɔ o. Psalmo 74:16 gblɔ le Yehowa ŋu be: “Wòe ɖo kekeli kple ɣe.” Ẽ, ɣea hea kafukafu vɛ na Yehowa, “amesi wɔ dzi kple anyi.” (Psalmo 146:6) Ke hã, nuwɔwɔ gbogbo siwo fiaa nu mí le Yehowa ƒe nuwɔŋusẽ triakɔ ŋu la dometɔ ɖeka pɛ koe nye esia. Zi alesinu míesrɔ̃ nu tso Yehowa ƒe nuwɔŋusẽ ŋui la, zi nenemae vɔvɔ̃ kple bubu si le mía me nɛ la gadea to ɖe edzii.

8, 9. (a) Kpɔɖeŋu si me lɔlɔ̃ le kae ɖee fia be Yehowa le lɔlɔ̃m faa be yeakpɔ ye subɔlawo ta ahalé be na wo? (b) Beléle kae alẽkplɔla siwo nɔ anyi le Biblia ƒe ɣeyiɣiwo me tsɔ naa alẽwo, eye nukae esia fia mí ku ɖe Alẽkplɔla Gãtɔ si le mía si ŋu?

⁸ Yehowa gazãa eƒe ŋusẽ gã la tsɔ kpɔa esubɔlawo ta heléa be na wo. Biblia zã kpɔɖeŋu siwo me kɔ eye wowɔa dɔ ɖe ame dzi tsɔ ɖe ŋugbe siwo Yehowa do be yeakpɔ yeƒe amewo ta fia. Le kpɔɖeŋu me, de dzesi nya si le Yesaya 40:11. Le afima la, Yehowa tsɔ eɖokui sɔ kple alẽkplɔla, eye eƒe amewoe nye alẽawo. Afima xlẽ be: “Anyi eƒe alẽhawo abe alẽkplɔvi ene, alé alẽviawo ɖe abɔ dome, eye wòakɔ wo ɖe akɔnu, eye wòakplɔ vinɔwo ɖɔɖɔɖɔ.” Àte ŋu akpɔ nusi ŋu woƒo nu tsoe le kpukpui sia me la le susu mea?

⁹ Lã ʋɛ aɖewo koe nye wɔnamanɔŋutɔwo abe alẽ ene. Ele be dzi nanɔ alẽkplɔla siwo nɔ anyi le Biblia ƒe ɣeyiɣiwo me ƒo bene woate ŋu akpɔ woƒe alẽwo ta tso amegãxiwo, sisiblisiwo, kple dzatawo si me. (Samuel I, 17:34-36; Yohanes 10:10-13) Gake ɣeyiɣi aɖewo li siwo me alẽawo takpɔkpɔ biaa beléle na wo tufafatɔe. Le kpɔɖeŋu me, ne alẽ aɖe dzi vi ɖe afisi didi tso alẽkpɔa gbɔ la, aleke alẽkplɔla alé be na alẽvi yeye masẽmasẽ lae? Ðewohĩ akɔe ŋkeke geɖe, ɖe “akɔnu”—si nye awu ʋlaya ƒe akpa si avɔa keke le. Gake, aleke alẽvi suea wɔna va nɔa alẽkplɔla la ƒe akɔnu? Alẽvia ate ɖe alẽkplɔla la ŋu ahatiti eɖokui ɖe eƒe afɔ ŋu gɔ̃ hã. Gake alẽkplɔla lae abɔbɔ, ado asi ɖa ahakɔ alẽvia ɖe eƒe akɔnu, afisi wòanɔ dedie le. Kpɔɖeŋu si me lɔlɔ̃ le kae nye si si fia alesi Alẽkplɔla Gãtɔ si le mía si la le lɔlɔ̃m faa be yeakpɔ ye subɔlawo ta ahalé be na wo!

10. Ametakpɔkpɔ kae Yehowa nana egbea, eye nukatae takpɔkpɔ sia le vevie koŋ?

¹⁰ Menye ametakpɔkpɔ ƒe ŋugbe koe Yehowa do ko evɔ o. Le Biblia ƒe ɣeyiɣiwo me la, eto nukumɔwo nu ɖee fia be yeate ŋu ‘aɖe mawumemewo atso tetekpɔwo me.’ (Petro II, 2:9) Ke egbea hã ɖe? Míenya be mezãa eƒe ŋusẽa tsɔ kpɔa mía ta tso afɔkuwo katã me fifia ya o. Gake enaa nusi le vevie wu mí—eyae nye gbɔgbɔmetakpɔkpɔ. Mía Mawu lɔ̃ame la kpɔa mía ta tso gbɔgbɔmefɔku me to nusiwo hiã mí bene míate ŋu ado dzi le dodokpɔwo me ahakpɔ mía kplii dome ƒomedodo ta la nana mí me. Le kpɔɖeŋu me, Luka 11:13 gblɔ be: “Azɔ mi, amesiwo nye ame vɔ̃ɖiwo, mienya alesi miana nunana nyui mia viwo, ʋuu keke Fofo, si le dziƒo la, mana Gbɔgbɔ kɔkɔe amesiwo bianɛ la o mahã?” Ŋusẽ triakɔ ma ate ŋu ana míakpe akɔ kple dodokpɔ alo kuxi ɖesiaɖe si míado goe. (Korintotɔwo II, 4:7) Yehowa toa nusiawo dzi kpɔa míaƒe agbe ta, menye na ƒe vɛ aɖewo ko o, ke boŋ tegbee. Ne esia le susu me na mí la, míabu fu sia fu si míakpe le nuɖoanyi sia me be enye ‘ɣeyiɣi kpui aɖe ƒe nu kple esi mesesẽ o.’ (Korintotɔwo II, 4:17) Ðe esia meʋã mí be míate ɖe Mawu si zãa eƒe ŋusẽ tsɔ kpɔa mía ta lɔlɔ̃tɔe alea ŋu oa?

‘Yehowa Nye Dzɔdzɔenyenye Lɔ̃la’

11, 12. (a) Nukatae Yehowa ƒe dzɔdzɔenyenye tea mí ɖe eŋu? (b) Nya ta kae Dawid ƒo ku ɖe Yehowa ƒe dzɔdzɔenyenye ŋu, eye aleke nya siawo siwo tso mawu ƒe gbɔgbɔ me la ate ŋu afa akɔ na míi?

¹¹ Yehowa wɔa nusi dzɔ hesɔ, eye ewɔnɛ ɣesiaɣi ameŋkumemakpɔmakpɔe. Mawu ƒe dzɔdzɔenyenye menye vevemaseɖeamenu ƒe nɔnɔme si nyaa mí ɖa le eŋu o, ke boŋ enye nɔnɔme lédziname si tea mí ɖe Yehowa ŋu boŋ. Biblia ƒo nu tso eƒe nɔnɔme lédziname sia ŋu  eme kɔ ƒã. Eyata mina míadzro mɔ etɔ̃ siwo dzi Yehowa ɖea eƒe dzɔdzɔenyenye fiana le la me.

¹² Gbã, Yehowa ƒe dzɔdzɔenyenye ʋãnɛ wòwɔa nuteƒe na esubɔlawo eye megblẽa wo ɖi o. Hakpala Dawid va se Yehowa ƒe dzɔdzɔenyenye ƒe akpa sia gɔme nyuie wu. Aleke Dawid ŋutɔ ƒo nya tae le eƒe nuteƒekpɔkpɔ kpakple nusiwo wòsrɔ̃ tso Mawu ƒe mɔwo ŋu megbe? Egblɔ be: “Yehowa lɔ̃a nya dzɔdzɔe, eye megblẽa eƒe mawumemewo ɖi o; akpɔ wo ta tegbee.” (Psalmo 37:28) Kakaɖedzinya fakɔname kawoe nye si! Mía Mawu magblẽ amesiwo wɔa nuteƒe nɛ la ɖi ɣeaɖekeɣi akpɔ gbeɖe o. Eyata míate ŋu aɖo ŋu ɖe eƒe xɔlɔ̃wɔwɔa kple eƒe beléle na ame lɔlɔ̃tɔe la ŋu. Eƒe dzɔdzɔenyenye ɖo kpe esia dzi na mí!—Lododowo 2:7, 8.

13. Aleke Yehowa ƒe ɖetsɔleme na wɔnamanɔŋutɔwo dze le Se si wòtsɔ na Israel-viwo me?

¹³ Evelia, Mawu ƒe dzɔdzɔenyenye na wòtsɔa ɖe le amesiwo le fu kpem ƒe hiahiãwo me. Alesi Yehowa tsɔ ɖe le eme na amesiwo dzi nu mede o la dze ƒã le Se si wòna Israel-viwo me. Le kpɔɖeŋu me, ɖoɖowo le Sea me be woakpɔ egbɔ be wokpɔ tsyɔ̃eviwo kple ahosiwo ƒe nuhiahiãwo gbɔ. (Mose V, 24:17-21) Esi Yehowa nya alesi agbenɔnɔ ate ŋu asesẽ na ƒome siawoe ta la, eya ŋutɔ va zu fofo Ʋɔnudrɔ̃la kple Ametakpɔla na wo. (Mose V, 10:17, 18) Exlɔ̃ nu Israel-viwo be ne wote nyɔnuwo kple ɖeviwo, siwo nye wɔnamanɔŋutɔwo ɖe anyi la, yease woƒe ɣlidodo. Egblɔ le Mose II, 22:21-23 be: “Nye dɔmedzoe abi ɖe mia ŋu.” Togbɔ be dɔmedzoedodo menye Mawu ƒe nɔnɔme veviawo dometɔ aɖeke o hã la, edoa dɔmedzoe le dzɔdzɔenyenye ta ne amewo ɖoe koŋ wɔ nu madzɔmadzɔ, vevietɔ ne wɔnamanɔŋutɔwo ŋue wowɔe ɖo.—Psalm 103:6.

14. Yehowa ƒe ameŋkumemakpɔmakpɔ ƒe kpeɖodzi ɖedzesi ŋutɔ aɖee nye ka?

¹⁴ Etɔ̃lia, Biblia ka ɖe edzi na mí le Mose V, 10:17 be Yehowa nye “amesi medea ame dzi o, eye mexɔa zãnu aɖeke o.” To vovo na amegbetɔ geɖe siwo si ŋusẽ alo ɖoƒe kɔkɔ le la, wometsɔa ŋutilã me nunɔamesiwo alo gotagome dzedzeme flua Yehowae o. Medea akpa ɖeka dzi alo kpɔa ame ŋkume kura o. Eƒe ameŋkumemakpɔmakpɔ ƒe kpeɖodzi ɖedzesi aɖee nye si: Menye ame ŋkuta ʋɛ aɖewo koe mɔnukpɔkpɔ ʋu ɖi na be woava zu esubɔla vavã siwo akpɔ agbe mavɔ o. Ke boŋ Dɔwɔwɔwo 10:34, 35 gblɔ be: “Mawu mekpɔa ame ŋkume o, hafi boŋ le dukɔ sia dukɔ me, amesi ke vɔ̃nɛ, eye wòwɔa nu dzɔdzɔe la, eya dzea eŋu.” Mɔnukpɔkpɔ sia le ʋuʋu ɖi na amesiame metsɔ le ɖoƒe si le wo si, woƒe ŋutigbalẽ ƒe amadede, alo dukɔ si me wole me o. Ðe menye esiae nye dzɔdzɔenyenye vavãtɔ kple nyuitɔ kekeake oa? Nyateƒee, Yehowa ƒe dzɔdzɔenyenye gɔmesese nyuie wu tea mí ɖe eyama ŋu!

‘Oo, Mawu ƒe Nunya Me Goglo Loo!’

15. Nukae nye nunya, eye aleke Yehowa wɔa eŋudɔe?

¹⁵ Ewɔ dɔ ɖe apostolo Paulo dzi wògblɔ nya si wòŋlɔ ɖe Romatɔwo 11:33 be: “Oo, Mawu ƒe . . . nunya kple sidzedze me goglo loo!” Nyateƒee, ne míede ŋugble le Yehowa ƒe nunya gogloa ƒe akpa vovovoawo ŋu la, ɖeko wòle be vɔvɔ̃ kple bubu deto nayɔ mía me godoo. Gake aleke míaɖɔ nɔnɔme siae? Nunya mee wokpɔa sidzedze, dzesidede vovototo si le nuwo me, kple nugɔmesese le. To eƒe sidzedze kple nunya gogloawo zazã me la, Yehowa wɔa nyametsotso nyuitɔ kekeake eye wòtoa mɔ nyuitɔ kekeake nu wɔa wo ŋudɔ.

16, 17. Aleke Yehowa ƒe nuwɔwɔwo ɖo kpe eƒe nunya goglo la dzii? Gblɔ eƒe kpɔɖeŋu.

¹⁶ Yehowa ƒe nunya gogloa ƒe kpeɖodzi aɖewoe nye kawo koŋ? Psalmo 104:24 gblɔ be: “Yehowa, wò dɔwɔwɔwo sɔ gbɔ loo! Èwɔ wo katã le nunya me; anyigba yɔ fũ kple wò nuwɔwɔwo.” Nyateƒee, zi alesinu míesrɔ̃ nu tso nusiwo Yehowa wɔ ŋu me la, zi nenemae eƒe nunya wɔa nuku na míi. Wò ya kpɔe ɖa ko, dzɔdzɔmeŋutinunyalawo srɔ̃ nu geɖe to ŋkuléle ɖe Yehowa ƒe nuwɔwɔwo ŋu me! Fifia mɔ̃ɖaŋudɔwɔwɔ ŋuti nusɔsrɔ̃ ƒe akpa aɖe gɔ̃ hã li, si woyɔna be nugbagbewo sɔsrɔ̃, si me wotena kpɔna be woasrɔ̃ dzɔdzɔmenuwo ƒe nɔnɔme adee nutovɛwo me.

 ¹⁷ Le kpɔɖeŋu me, ànya lé ŋku ɖe yiyiɖɔ ŋu dũ le eƒe nɔnɔme dzeania ta. Enye aɖaŋudɔ wɔnuku aɖe vavã. Yiyiɖɔa ƒe ka siwo dze abe ɖe ŋusẽ aɖeke mele wo ŋu kura o ene la sesẽ wu gayibɔ ne woawɔ eya hã wòanɔ lɛ nenema, eye esesẽ wu ka siwo wotsɔ wɔ awu si me tukpe mete ŋu tona o. Nuka tututue ema fia? Tsɔe be wowɔ yiyiɖɔ wòlolo ɖe edzi va zu abe ɖɔ si tɔdzidelawo tsɔ ɖea lãe ene. Yiyiɖɔ si lolo nenema asesẽ ale gbegbe be ate ŋu aɖe yameʋu gã si tsɔ amewo le du dzi sesĩe va yina, mate ŋu ato ame o! Ẽ, Yehowa wɔ nusiawo katã “le nunya me.”

18. Aleke Yehowa ƒe nunya dze le alesi wòzã amegbetɔwo woŋlɔ eƒe Nya, Biblia ɖii la me?

¹⁸ Míate ŋu akpɔ Yehowa ƒe nunya ŋuti kpeɖodzi gãtɔ kekeake le eƒe Nya Biblia me. Nuxlɔ̃ame siwo me nunya le siwo dze le eme la fiaa mɔ nyuitɔ kekeake si nu míanɔ agbe ɖo la mí. (Yesaya 48:17) Gake Yehowa ƒe nunya si ɖeke mede enu o la dze le alesi woŋlɔ Biblia lae hã me. Le mɔ ka nu? Yehowa ŋutɔ zã eƒe nunya tsɔ tia amegbetɔwo be woaŋlɔ eƒe Nya la ɖi. Ne mawudɔlawoe wòzã woŋlɔ Nya siwo tso gbɔgbɔ me ɖe Biblia me la, anye ne ɖe nyaawo awɔ dɔ ɖe ame dzi abe alesi wòle enea? Nyateƒee, mawudɔlawo ate ŋu azã woƒe nukpɔsusu deŋgɔa atsɔ aƒo nu tso Yehowa ŋui, eye woate ŋu agblɔ alesi woa ŋutɔwo wotsɔ wo ɖokui ɖo anyi na esubɔsubɔe. Gake ɖe míate ŋu ase gbɔgbɔ me nuwɔwɔ deblibowo, siwo ƒe sidzedze, nuteƒekpɔkpɔ, kple ŋusẽ de ŋgɔ boo wu mía tɔ la, ƒe nukpɔsusu gɔme tututua?—Hebritɔwo 2:6, 7.

19. Kpɔɖeŋu kae ɖee fia be amegbetɔwo zazã atsɔ ŋlɔ Bibliae na eme nyawo lé dzi na ame heʋã ame?

¹⁹ Amegbetɔwo zazã be woaŋlɔ Biblia la na be emenyawo léa dzi na ame heʋãa ame ŋutɔ. Eŋlɔlawo nye amewo siwo ƒe seselelãmewo le abe mía tɔ ene. Esi woawo hã nye blibomadelawo ta la, woto tetekpɔ kple nuteɖeamedzi siwo ɖi mía tɔwo me. Le go aɖewo me la, wozã nya siwo ku ɖe woa ŋutɔwo ŋu tsɔ ŋlɔ woƒe seselelãmewo kple fukpekpewoe. (Korintotɔwo II, 12:7-10) Eyata woŋlɔ nya siwo manyagblɔ na mawudɔla aɖeke o. Le kpɔɖeŋu me, bu Dawid ƒe nya siwo woŋlɔ ɖe Psalmo 51 ŋu kpɔ. Tanya si woɖo nɛ ɖee fia be Dawid ƒe nuvɔ̃ gã aɖe wɔwɔ megbee wòkpa ha sia. Eɖe eƒe dzimenya gblɔ, eye wòfa konyi vevie hebia Mawu ƒe  tsɔtsɔke. Kpukpui 4 lia kple 5 lia gblɔ be: “Le tsi nam keŋkeŋ tso nye vodada me, eye naklɔ ŋunye tso nye nuvɔ̃ me! Elabena nye dzidadawo la, medze si wo, eye nye nuvɔ̃ le ŋkunye me ɖaa.” De dzesi kpukpui 7 lia: “Kpɔ ɖa, vodada me wodzim ɖo, eye nuvɔ̃ me danye fɔ nye fu ɖo.” Kpukpui 19 lia gblɔ kpee be: “Vɔsawo na Mawu wonye gbɔgbɔ, si wote ɖe anyi; Mawu, màdo vlo dzi gbagbã, si tugu la o.” Ðe mèse alesi gbegbe eŋlɔla nɔ nu xamee la le ɖokuiwò me oa? Ðe menye amegbetɔ madeblibo koe ate ŋu aɖe dzimenya siawo tɔgbe agblɔ oa?

20, 21. (a) Nukatae woate ŋu agblɔ be togbɔ be amegbetɔwoe wozã tsɔ ŋlɔ Bibliae hã la, Yehowa ƒe nunyae le eme? (b) Nuka mee míadzro le nyati si kplɔe ɖo me?

²⁰ Yehowa to amegbetɔ madeblibo siawo zazã me na nusi tututu míehiã la mí—si nye nuŋlɔɖi si ‘tso Mawu ƒe gbɔgbɔ me,’ gake wòganye nusi gɔme amegbetɔwo ate ŋu ase. (Timoteo II, 3:16) Ẽ, gbɔgbɔ kɔkɔeae fia mɔ eŋlɔlawo. Eyata Yehowa ƒe nunyae woŋlɔ, ke menye woa ŋutɔwo tɔ o. Kakaɖedzi blibo le nunya ma ŋu. Ede ŋgɔ boo wu mía ŋutɔwo ƒe nunya ale gbegbe be Mawu de dzi ƒo na mí lɔlɔ̃tɔe be: “Ðo ŋu ɖe Yehowa ŋu tso dzi blibo me, ke megaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.” (Lododowo 3:5, 6) Ne míewɔ ɖe aɖaŋuɖoɖo ma si me nunya le dzi la, míate ɖe mía Mawu si ƒe nunya ƒo ɖesiaɖe ta la ŋu.

²¹ Yehowa ƒe nɔnɔme si léa dzi na ame henyoa ame ŋu wu ɖesiaɖe enye lɔlɔ̃. Míadzro alesi Yehowa ɖe lɔlɔ̃ fiae me le nyati si kplɔe ɖo me.

Àte Ŋu Aɖo Ŋku Wo Dzia?

• Afɔ kawoe Yehowa ɖe be míate ŋu anɔ kadodo kplikplikpli me kplii?

• Yehowa ƒe nuwɔŋusẽ kple eƒe ametakpɔŋusẽ ƒe kpɔɖeŋuwo dometɔ aɖewo ɖe?

• Mɔ kawo nue Yehowa wɔa eƒe dzɔdzɔenyenye ŋudɔ le?

• Mɔ kawo nue Yehowa ƒe nunya dze le le eƒe nuwɔwɔwo kple le Biblia me?

[Biabiawo]

[Nɔnɔmetata si le axa 10]

Abe alẽkplɔla si kɔa alẽvi ɖe akɔnu ene la, Yehowa léa be na Eƒe alẽwo lɔlɔ̃tɔe

[Nɔnɔmetata si le axa 13]

Yehowa ƒe nunya dze le mɔ si dzi woto ŋlɔ Biblia la me