Yehowa, Mawu Nyateƒetɔ La
Yehowa, Mawu Nyateƒetɔ La
‘Èɖem, Yehowa, wò Mawu nyateƒetɔ.’—PSALMO 31:6.
1. Aleke nɔnɔmewo nɔ le dziƒo kple anyigba dzi esime aʋatsokaka menɔ anyi o?
ƔEAÐEƔI va yi esime aʋatsokaka menɔ anyi o. Gbɔgbɔmenuwɔwɔ deblibowoe nɔ dziƒonuto makpɔmakpɔa me nɔ wo Wɔla ‘Mawu nyateƒetɔ la’ subɔm. (Psalmo 31:6) Alakpadada kple amebeble aɖeke menɔ anyi o. Yehowa gblɔa nusi le eteƒe la na eƒe gbɔgbɔmeviwo. Ewɔ esia le esi wòlɔ̃ wo kple le esi wòtsɔ ɖe le woƒe dedienɔnɔ me vevie ta. Alea kee nɔnɔmea nɔ le anyigba dzi hã. Yehowa wɔ ŋutsu kple nyɔnu gbãtɔawo, eye wòtoa mɔ si wòtia dzi ƒoa nu kpli wo ɣesiaɣi eme kɔna, wònɔa tẽ henyea nyateƒe. Aleke gbegbe wòawɔ nukui enye si!
2. Amekae to aʋatsokaka vɛ, eye nukatae?
2 Gake le ɣeyiɣi aɖe megbe la, Mawu ƒe gbɔgbɔmevi aɖe tsɔ dada ɖo eɖokui mawu bubu, si tsi tre ɖe Yehowa ŋu. Gbɔgbɔmenuwɔwɔ sia, si wova yɔna be Satana kple Abosam la, di be amewo nasubɔ ye. Be esia nava eme nɛ la, eto aʋatsokaka vɛ be wòanye nusi dzi wòato akpɔ ŋusẽ ɖe ame bubuwo dzi. To esia wɔwɔ me la, eva zu “aʋatsokala kple aʋatsokafofo.”—Yohanes 8:44.
3. Aleke Adam kple Xawa wɔ nu ɖe Satana ƒe aʋatsokaka ŋui, eye nukae do tso eme?
3 Satana to da aɖe dzi gblɔ na nyɔnu gbãtɔ, Xawa be ne egbe toɖoɖo Mawu ƒe sededea heɖu ati si wode se be woagaɖu o la, maku o. Nya ma nye aʋatso. Eyi dzi gblɔ nɛ be ne eɖui la, ava zu abe Mawu ene, anya nyui kple vɔ̃. Ema hã nye aʋatso. Togbɔ be womeble Xawa kpɔ o hã la, anya de dzesii be nya si wòse tso da la gbɔ mewɔ ɖeka kple nya si Mawu gblɔ na srɔ̃a, Adam o. Ke hã etiae be yeaɖo to Satana, menye Yehowa o. Esi woblee vɔ keŋ la, egbe atikutsetsea heɖu. Emegbe Adam hã ɖu atikutsetsea ƒe ɖe. (Mose I, 3:1-6) Abe Xawa ene la, Adam hã mese aʋatsonya aɖeke kpɔ o, ke hã womeble eya o. (Timoteo I, 2:14) Etsɔ eƒe nuwɔna ɖee fia be yegbe Wɔla la. Nusiwo do tso eme na ameƒomea la nye dzɔgbevɔ̃e. Le Adam ƒe tomaɖomaɖo ta la, nuvɔ̃ kple ku—tsɔ kpe ɖe nufitifitiwɔwɔ kple nɔnɔme wɔnublanui gbogbo aɖewo ŋu—kaka ɖe eƒe dzidzimeviwo katã me.—Romatɔwo 5:12.
4. (a) Aʋatso kae woka le Eden? (b) Nukae wòle be míawɔ be Satana nagable mí o?
4 Aʋatso hã kaka nenema ke. Ele be míade dzesii be aʋatso si woka le Eden-bɔa me nye tsitretsitsi ɖe Yehowa ŋutɔ ƒe nyateƒetɔnyenye ŋu. Satana he nya ɖe Mawu ŋu be etsɔ beble nɔ nu nyui aɖe tem atsu kple asi gbãtɔawo. Le nyateƒe me la, ema mele eme o. Adam kple Xawa ƒe tomaɖomaɖoa meɖe vi aɖeke na wo o. Woku abe alesi tututu Yehowa gblɔe be adzɔ ɖe wo dzii ene. Ke hã Satana ƒe Yehowa ŋu gbegblẽ ƒe tsitretsiɖeŋua yi edzi ale gbegbe be ƒe alafa geɖewo megbe la, gbɔgbɔ ʋã apostolo Yohanes wòŋlɔ bena Satana ‘le xexeame katã blem.’ (Nyaɖeɖefia 12:9) Be míaƒo asa na Satana Abosam ƒe amebeblea la, ele be míaka ɖe Yehowa ƒe nyateƒetɔnyenye kple eƒe Nya dzi bliboe. Aleke nàte ŋu atu kaka ɖe Yehowa dzi ɖo ahana wòasẽ ŋu ale be nàte ŋu adzra ɖokuiwò ɖo ɖe eƒe Futɔ ƒe amebeble kple aʋatsokaka si wòdaa megbe na la ŋui?
Yehowa Nya Nyateƒea
5, 6. (a) Sidzedze ka gbegbee le Yehowa si? (b) Alekee amegbetɔwo ƒe sidzedze le ne wotsɔe sɔ kple Yehowa tɔ?
5 Biblia yɔa Yehowa enuenu be amesi “wɔ nuwo katã.” (Efesotɔwo 3:9) Eyae nye ‘Amesi wɔ dziƒo kple anyigba kple atsiaƒu kpakple wo me nuwo katã.’ (Dɔwɔwɔwo 4:24) Esi wònye Yehowae nye Wɔlaa ta la, enya nyateƒea ku ɖe nusianu ŋu. Le kpɔɖeŋu me: Bu ame aɖe si de aɖaŋu le eya ŋutɔ ƒe aƒe ŋu hetui, si me eya ŋutɔ da atiwo katã ɖe edzi heƒo gatagbadzɛawo katã ɖe wo me la ŋu kpɔ. Anya nusianu le aƒea ŋu ahanya eme wu amesiame si kpɔe. Amewo nyaa nu le nusiwo ŋu wode aɖaŋu le hewɔ la ŋu. Nenema kee Wɔla la hã nya nusianu si hiã be wòanya tso nusiwo wòwɔ la ŋu.
6 Nyagblɔɖila Yesaya ƒo nu tso alesi Yehowa ƒe sidzedze keke tae ŋu wònya se. Míexlẽe be: “Ameka tsɔ asiʋlo dzidze tsii, eye wòdzidze asi ɖe dziƒo ŋu? Ameka tsɔ nudonui do anyigba dzi kee, etsɔ nudanu da to, eye wòda togbɛwo le nudagbɛ me? Ameka nya ta le Yehowa ƒe gbɔgbɔ nu, eye ameka nye eƒe adaŋudela, si fia nui? Ameka wòde adaŋu kplii, be wòafia nunyae, eye wòafia nui le nu dzɔdzɔe ƒe mɔ ŋu, wòafia sidzedzee, eye wòaɖe gɔmesese ƒe mɔ afiae?” (Yesaya 40:12-14) Nyateƒee, Yehowa nye “Nunyawo ƒe Mawu” kple ‘amesi ƒe sidzedze de blibo.’ (Samuel I, 2:3; Hiob 36:4; 37:16) Aleke nusi míenya le sue ŋutɔ enye si ne wotsɔe sɔ kple etɔe! Togbɔ be sidzedze wɔnuku gbogbo aɖewo su ameƒomea si hã la, alesi míese anyigba dzi nuwɔwɔwo gɔmee meɖo ‘Mawu ƒe mɔwo to’ gɔ̃ hã o. Ele abe “dalĩdodo” tsɔtsɔ asɔ kple ‘dziɖegbe sẽŋu’ ene.—Hiob 26:14.
7. Nukae Dawid de dzesii le Yehowa ƒe sidzedze ŋu, eye nuka dzie wòle be esia nana míalɔ̃ ɖo?
7 Esi wònye Yehowae wɔ mí ta la, eme kɔ ƒã be enya mí nyuie. Fia Dawid kpɔ esia dze sii. Eŋlɔ bena: “Yehowa èdzro menye, eye nèdze sim. Ènya nye anyinɔnɔ kple nye tsitretsitsi, eye nèdze si nye susuwo tso adzɔgedzɔgee ke. Èdo nye azɔlizɔzɔ kple nye anyimɔmlɔ kpɔ, eye nye mɔwo katã le nyanya na wò. Elabena nya aɖeke mele nye aɖe dzi o, kpɔ ɖa, Yehowa, ènya wo keŋ.” (Psalmo 139:1-4) Nyateƒee, Dawid nyae be amegbetɔwo wɔa tiatiawɔblɔɖe ŋudɔ—Mawu na mí ŋutete si na míate ŋu atia be míaɖo to alo agbe toɖoɖo. (Mose V, 30:19, 20; Yosua 24:15) Ke hã Yehowa nya mí wu alesi míenya mía ɖokui. Edi nu nyuitɔ na mí, eye wòte ŋu fiaa mɔ mí. (Yeremya 10:23) Le nyateƒe me la, nufiala aɖeke alo, ame bibi aɖeke, alo aɖaŋuɖola aɖeke meli si ate ŋu afia nyateƒea mí ahana míanya nu eye dzi nadzɔ mí o.
Yehowa Nye Nyateƒetɔ
8. Aleke míewɔ nya be Yehowa nye nyateƒetɔ?
8 Nyateƒea nyanya nye nu ɖeka, gake nyateƒetoto, si nye nyateƒetɔnyenye ɣesiaɣi ganye nu bubu. Le kpɔɖeŋu me, Abosam tiae be yemanɔ “nyateƒe la me” o. (Yohanes 8:44) To vovo nɛ la, Yehowa ya ƒe “nuteƒewɔwɔ sɔ gbɔ.” (Mose II, 34:6) Ŋɔŋlɔawo ɖoa kpe Yehowa ƒe nyateƒetɔnyenye dzi enuenu. Apostolo Paulo gblɔ be “Mawu mate ŋu aka aʋatso o” eye Mawu ‘mekaa aʋatso o.’ (Hebritɔwo 6:18; Tito 1:2) Nyateƒetoto nye Mawu ƒe amenyenye ƒe akpa vevi aɖe. Míate ŋu aɖo ŋu ɖe Yehowa ŋu ahaka ɖe edzi elabena nyateƒetɔe wònye; meblea mawumemewo gbeɖe o.
9. Aleke Yehowa ƒe ŋkɔa do ƒome kple nyateƒee?
9 Yehowa ƒe ŋkɔ la ŋutɔ ɖo kpe eƒe nyateƒetɔnyenye dzi. Mawu ƒe ŋkɔa gɔmee nye “Enana Wòvaa Eme.” Esia ɖee fia be Yehowa nye Amesi kpɔa egbɔ vivivi be eƒe ŋugbedodowo katã vaa eme. Ame aɖeke megali ate ŋu awɔ esia o. Esi Yehowa nye Nuwokatãtaƒola ta la, naneke mate ŋu axe mɔ na eƒe tameɖoɖowo me vava o. Yehowa menye nyateƒetɔ ɖeɖeko o, ke boŋ eya ɖeka ko si ŋusẽ kple nunya le be wòana nusiwo katã wògblɔ la nava eme.
10. (a) Mɔ ka nue Yosua kpɔ Yehowa ƒe nyateƒetɔnyenye le? (b) Yehowa ƒe ŋugbedodo kawo teƒee nèkpɔ wova eme?
10 Yosua nye ame geɖe siwo kpɔ nudzɔdzɔ ɖedzesi siwo ɖi ɖase le Yehowa ƒe nyateƒetɔnyenye ŋu la dometɔ ɖeka. Yosua nɔ Egipte esime Yehowa he fuwɔame ewo, siwo dometɔ ɖesiaɖe wògblɔ ɖi la, va dukɔa dzi. Nusiwo Yosua kpɔ wova eme dometɔ ɖekae nye Yehowa ƒe ŋugbedodo be yeaɖe Israel-viwo tso Egipte ahakplɔ wo yi Ŋugbedodonyigba dzi, eye woaɖu Kanaantɔ sesẽawo ƒe aʋakɔ siwo tsi tre ɖe wo ŋu la dzi. Esi Yosua ɖo eƒe agbemeŋkeke mamlɛawo me la, egblɔ na Israel dukɔa ƒe ame tsitsiwo be: “Mienyae tso dzi blibo kple luʋɔ blibo me bena, nya aɖeke meto le nya nyui, siwo katã Yehowa, mia Mawu la, gblɔ na mi la me o, wo katã va me na mi, eye nya ku ɖeka hɔ̃ hã meto le eme o.” (Yosua 23:14) Togbɔ be mèkpɔ nukunu siwo Yosua kpɔ la teƒe o hã la, ɖe nèkpɔ Mawu ƒe ŋugbedodowo ƒe nyateƒenyenye teƒe le wò agbe mea?
Yehowa He Nyateƒea Ðe Go
11. Nukae fia be Yehowa dina be yeagblɔ nyateƒea na ameƒomea?
11 De ŋugble le dzila aɖe si si sidzedze gbogbo aɖe le gake melɔ̃a nuƒoƒo na viawo o ŋu kpɔ. Ðe mèkpɔa ŋudzedze ɖe eŋu be Yehowa mele nenema oa? Yehowa ƒoa nu kple ameƒomea lɔlɔ̃tɔe, eye ewɔa esia dɔmenyotɔe. Ŋɔŋlɔawo yɔe be ‘Nufiala Gã la.’ (Yesaya 30:20) Eƒoa nu na amesiwo mele klalo be yewoaɖo toe o gɔ̃ hã le eƒe amenuveve me. Le kpɔɖeŋu me, wode dɔ asi na Xezekiel be wòaɖe gbeƒã na amesiwo Yehowa nya be womaɖo to o. Yehowa gblɔ be: “Amevi, yi Israel ƒe aƒe la gbɔ nàgblɔ nye nyawo na wo.” Eye wòxlɔ̃ nui be: ‘Womele to ɖo ge wò o, le esi wogbe toɖoɖom ta; elabena ŋgonu kplala kple dzi kuatri li na Israel ƒe aƒe blibo la.’ Dɔdasi sesẽ aɖee nye ma, gake Xezekiel wɔe nuteƒewɔwɔtɔe eye wòɖe Yehowa ƒe nublanuikpɔkpɔ fia le esia me. Ne èdze ŋgɔ gbeƒãɖeɖedɔ sesẽ aɖe eye nèɖo ŋu ɖe Mawu ŋu la, àte ŋu aka ɖe edzi be ado ŋusẽ wò abe alesi wòdo ŋusẽ nyagblɔɖila Xezekiel ene.—Xezekiel 3:4, 7-9.
12, 13. Mɔ kawo nue Mawu ƒo nu kple amegbetɔwo le?
12 Yehowa di be “woaxɔ amewo katã, bene woava nyateƒe ƒe sidzedze la me.” (Timoteo I, 2:4) Eƒo nu to nyagblɔɖilawo, mawudɔlawo, kple Via lɔlɔ̃a, Yesu Kristo gɔ̃ hã dzi. (Hebritɔwo 1:1, 2; 2:2) Yesu gblɔ na Pilato bena: “Esia ta meva xexeame ɖo, bena maɖi ɖase na nyateƒe la. Amesiame, si tso nyateƒe me la, ɖoa to nye gbe.” Mɔnukpɔkpɔ xɔasi aɖe su Pilato si be wòasrɔ̃ nyateƒea ku ɖe Yehowa ƒe ɖoɖo hena ɖeɖekpɔkpɔ ŋu tso Mawu ƒe Vi la ŋutɔ gbɔ tẽ. Ke hã Pilato mexɔ nyateƒea o, eye medi be yeasrɔ̃e tso Yesu gbɔ o. Ðe eteƒe la, Pilato bia fewuɖuɖutɔe be: “Nukae nye nyateƒe?” (Yohanes 18:37, 38) Nublanuinya kae nye si! Ke hã ame geɖewo ɖo to nyateƒe si Yesu ɖe gbeƒãe. Egblɔ na eƒe nusrɔ̃lawo be: “Woayra miaƒe ŋkuwo, elabena wokpɔa nu, kple míaƒe towo hã, elabena wosea nu.”—Mateo 13:16.
13 Yehowa kpɔ nyateƒea ta to Biblia dzi eye wòna wòsu amewo si le afisiafi. Biblia ɖe nuwo fia abe alesi wole tututu ene. Eƒo nu tso Mawu ƒe nɔnɔmewo, eƒe tameɖoɖowo, kple eƒe sededewo ŋu tsɔ kpe ɖe alesi tututu nyawo le le ameƒomea gome ŋu. Yesu gblɔ le gbedodoɖa me na Yehowa be: “Wò nya la enye nyateƒe.” (Yohanes 17:17) Esia tae Biblia nye agbalẽ tɔxɛ ɖo. Eya ɖeka koe nye agbalẽ si Mawu si nya nusianu la to eƒe gbɔgbɔ la dzi na woŋlɔ. (Timoteo II, 3:16) Nunana xɔasi aɖee wònye na amegbetɔƒomea, si ŋu Mawu subɔlawo dea asixɔxɔe vevie. Enye nuwɔwɔ le nunya me be míaxlẽe gbesiagbe.
Lé Nyateƒe la me Ðe Asi Sesĩe
14. Nukawoe nye nusiwo Yehowa gblɔ be yeawɔ ƒe ɖewo, eye nukatae míaxɔ edzi ase?
14 Ele be míabu nya siwo Yehowa gblɔ na mí le eƒe Nya me nu vevii. Amesi wògblɔ be yenye lae wònye, eye awɔ nusi wògblɔ be yeawɔ la. Susu geɖe le mía si si ta míaka ɖe Mawu dzi. Esi Yehowa gblɔ be yeabia “hlɔ̃ amesiwo menya Mawu o kple amesiwo meɖoa to mía Aƒetɔ Yesu Kristo ƒe nyanyui la o” la, míate ŋu axɔe ase. (Tesalonikatɔwo II, 1:8) Míate ŋu aka ɖe Yehowa dzi hã esi wògblɔ be yelɔ̃ amesiwo tiaa dzɔdzɔenyenye yome kple esi wògblɔ be yeana agbe mavɔ amesiwo ɖea xɔse fiana kpakple esi wògblɔ be yeaɖe vevesese, ɣlidodo, kple ku gɔ̃ hã ɖa. Yehowa ɖo kpe kakaɖedzi si le eƒe ŋugbedodo mamlɛ sia ŋu dzi to nya siawo si wògblɔ na apostolo Yohanes me be: “Ŋlɔe, elabena nya siawo nye nya vavãwo kple nyateƒenyawo.”—Nyaɖeɖefia 21:4, 5; Lododowo 15:9; Yohanes 3:36.
15. Aʋatso siwo Satana kana ƒe ɖewoe nye ekawo?
15 Satana nye amesi to vovo kura tso Yehowa gbɔ. Le esi teƒe be wòafia nu amewo la, eblea wo boŋ. Be wòate ŋu aɖo tame si wòɖo be wòatrɔ amewo ɖa tso tadedeagu vavãtɔ gbɔ gbɔ la, Satana kakaa aʋatso aɖewo. Le kpɔɖeŋu me, Satana adi be míaxɔe ase be Mawu te eɖokui ɖe adzɔge ʋĩ tso mía gbɔ eye metsɔa ɖeke le amesiwo le fu kpem le anyigba dzi me o. Gake Biblia ɖee fia be Yehowa tsɔa ɖe le eƒe nuwɔwɔwo me vevie eye wòtsri nuvɔ̃ɖiwɔwɔ kple fuwɔame. (Dɔwɔwɔwo 17:24-30) Satana di be amewo naxɔe ase hã be gbɔgbɔmenuwo yomenɔnɔ nye ɣeyiɣi gbegblẽ. To vovo na esia la, Ŋɔŋlɔawo ka ɖe edzi na mí be “Mawu menye madzɔmadzɔtɔ be, wòaŋlɔ miaƒe dɔwɔwɔ kple lɔlɔ̃, si mieɖe fia le eƒe ŋkɔ ta . . . la be o.” Gawu la, wogblɔ hã be “[enye] teƒeɖola na amesiwo dinɛ vevie.”—Hebritɔwo 6:10; 11:6.
16. Nukatae wòle be Kristotɔwo nanɔ ŋudzɔ ahalé nyateƒe la me ɖe asi sesĩe?
16 Apostolo Paulo ŋlɔ ku ɖe Satana ŋu be: “Xexe sia me mawu gbã ŋku na dzimaxɔsetɔwo ƒe tamesusu . . . bene Kristo, si nye Mawu ƒe nɔnɔme la, ƒe ŋutikɔkɔe nyanyuie la ƒe kekeli nagaklẽ na wo o.” (Korintotɔwo II, 4:4) Satana Abosam ble ame aɖewo keŋkeŋ abe alesi wòble Xawae ene. Ame aɖewo hã to Adam, si menye ɖe woblee o ke boŋ eya ŋutɔ ɖoe gbe toɖoɖo la, ƒe mɔ dzi. (Yuda 5, 11) Eyata ele vevie be Kristotɔwo nanɔ ŋudzɔ ahalé nyateƒe la me ɖe asi sesĩe.
Yehowa Di “Xɔse si me Alakpa Aɖeke Mele O”
17. Nukae wòle be míawɔ be Yehowa nave mía nu?
17 Esi Yehowa nye nyateƒetɔ le eƒe mɔwo katã dzi ta la, edi tso esubɔlawo si be woawo hã woanye nyateƒetɔwo. Hakpala la ŋlɔ be: “Yehowa, ameka adze wò agbadɔ me, eye ameka anɔ wò to kɔkɔe la dzi ma? Amesi fɔɖiɖi mele eƒe zɔzɔme ŋu o, ewɔa nu dzɔdzɔe, eye wòtoa nyateƒe le eƒe dzi me.” (Psalmo 15:1, 2) Ðikeke mele eme o be le Yudatɔ siwo dzi ha sia gome la, Yehowa ƒe to kɔkɔe si woyɔ la ɖo ŋku Zion-to, si dzi Fia Dawid tsɔ nubablaɖaka si wotu avɔgbadɔ na yii la, dzi na wo. (Samuel II, 6:12, 17) To la kple avɔgbadɔ la he susu yi afisi Yehowa nɔna le kpɔɖeŋunyagbɔgblɔ nu dzi. Le afisia la, amewo te ŋu tena ɖe Mawu ŋu biana eƒe amenuveve.
18. (a) Nukae xɔlɔ̃dzedze Mawu bia? (b) Nuka mee míadzro le nyati si gbɔna me?
18 Ele be amesiame si di be yeanye Yehowa xɔlɔ̃ la nagblɔ “nyateƒe le eƒe dzi me,” menye kple eƒe nu ko o. Ele be anukwareɖiɖi ƒe dzi nanɔ Mawu xɔlɔ̃ vavãtɔwo si eye woaɖe “xɔse, si me alakpa aɖeke mele o la” afia, elabena dzimee nyateƒetɔnyenye nuwɔnawo tsona. (Timoteo I, 1:5; Mateo 12:34, 35) Mawu xɔlɔ̃ menyea nufitiwɔla alo ameblela o, elabena ‘Yehowa tsri . . . alakpatɔ.’ (Psalmo 5:7) Yehowa Ðasefo siwo le xexeame katã ʋlina vevie be yewoanye nyateƒetɔwo le Mawu sɔsrɔ̃ me. Nyati si kplɔe ɖo adzro nya sia me.
Aleke Nàɖo Wo Ŋui?
• Nukatae Yehowa nya nyateƒea ku ɖe nusianu ŋu?
• Nukawoe fia be Yehowa nye nyateƒetɔ?
• Aleke Yehowa ɖe nyateƒea fiae?
• Nukae wobia tso mía si le nyateƒetoto gome?
[Biabiawo]
[Nɔnɔmetata siwo le axa 10]
Mawu nyateƒetɔ la nya nusianu ku ɖe nusiwo wòwɔ ŋu
[Nɔnɔmetata siwo le axa 12, 13]
Yehowa ƒe ŋugbedodowo ava eme