Elɔ̃ Dɔmenyowɔwɔ

MILTON G. HENSCHEL, si nye Yehowa Ðasefowo ƒe Dziɖuha la me tɔ ɣeyiɣi didi aɖe la, wu eƒe anyigba dzi subɔsubɔdɔ nu le Memleɖa, March 22, 2003, dzi. Exɔ ƒe 82.

Milton Henschel va zu Yehowa Ðasefowo ƒe dɔwɔƒea ƒe ta ƒe dɔwɔlawo dometɔ ɖeka esime wònye ɖekakpui eye wòtsɔ ƒe 60 kple edzivɔwo subɔ le afima nuteƒewɔwɔtɔe. Eteƒe medidi o eƒe nuŋububu nyui kple ɖetsɔtsɔ le Fiaɖuƒegbeƒãɖeɖedɔa me vevie va dze wokpɔ. Le ƒe 1939 me la, eva zu N. H. Knorr, si nye Yehowa Ðasefowo ƒe agbalẽtaƒe si le Brooklyn dzikpɔla ɣemaɣi la, ƒe agbalẽŋlɔla. Esi Nɔviŋutsu Knorr va nɔ ŋgɔ na Ðasefowo le xexeame katã le ƒe 1942 me la, ena Nɔviŋutsu Henschel nye eƒe kpeɖeŋutɔ. Nɔviŋutsu Henschel ɖe Lucille Bennett le ƒe 1956 me, eye woa kple evea to agbe me dzidzɔkpɔkpɔwo kple kuxiwo me ɖekae.

Nɔviŋutsu Henschel wɔ dɔ aduadu kple Nɔviŋutsu Knorr vaseɖe Knorr ƒe kugbe le ƒe 1977 me. Nɔviŋutsu Henschel nɔ Nɔviŋutsu Knorr ŋu wozɔ mɔ de dukɔ 150 kple edzivɔwo me, ɖasrã Yehowa Ðasefowo, vevietɔ dutanyanyuigblɔlawo kple alɔdzedɔwɔƒe nɔlawo kpɔ le xexeame godoo henɔ dzi dem ƒo na wo. Mɔzɔzɔ siawo tea ɖeɖi wo ŋu ɣeaɖewoɣi eye afɔku gɔ̃ hã nɔa wo me. Esime Nɔviŋutsu Henschel yi takpekpe aɖe dzi kpɔ ge le Liberia le ƒe 1963 me la, woti eyome vevie le esi wògbe be yemakpɔ gome le dulɔlɔ̃ ƒe nuwɔna aɖe me o ta. * Le ɣleti ʋɛ aɖewo megbe la, Nɔviŋutsu Henschel trɔ yi Liberia ɖakpe kple dukplɔla la ɖabia mawusubɔsubɔblɔɖe si lolo wu na Yehowa Ðasefo siwo le afima.

Le kuxi kple gbetɔame sesẽwo gbɔ kpɔkpɔ me la, wonya Nɔviŋutsu Henschel be enye amesi ƒe nyawo le tẽ, amesi ƒe nya me bɔbɔ, eye wobua ame ŋu. Eƒe dɔwɔhatiwo koŋ kpɔa ŋudzedze ɖe eƒe nuwɔwɔ ɖe ɖoɖo nu, eƒe nudzeamewɔwɔ, kple eƒe nukokoedodoname ŋu ŋutɔ. Etsɔ eƒe ŋkuɖoɖonudzi ƒe nunana ɖedzesi si le esi la doa dzidzɔ na dutanyanyuigblɔla geɖe le xexeame godoo, to woƒe ŋkɔwo yɔyɔ enumake kple wo degbe ɖeka alo eve dodo woaɖi kokoe—siwo wòdona vividoɖeameŋutɔe la ta.

Mixa 6:8 ɖoa ŋku edzi na mí be Yehowa Mawu di be ‘míalɔ̃ dɔmenyowɔwɔ.’ Woatsɔ kpɔɖeŋu si Milton Henschel ɖo le go sia me la aɖo ŋku eyama dzii. Togbɔ be agbanɔamedzi gbogbowo nɔ edzi hã la, ekpɔtɔ nye amesi ŋu wote ŋu tena ɖo, amesi gbɔa dzi ɖi, kple amesi nyoa dɔme. Elɔ̃a gbɔgblɔ be, “Ne menya alesi nàkpɔ nya aɖe gbɔe o la, ɖo ŋku edzi be nuwɔwɔ dɔmenyotɔe nye nu nyuitɔ.” Togbɔ be mía nɔviŋutsu malɔ̃nugbɔa ƒe ku do nuxaxa na mí hã la, edzɔ dzi na mí be edo dzi nuteƒewɔwɔtɔe ɖase nuwuwu, si na kakaɖedzi mí be axɔ eƒe teƒeɖoɖo si nye “agbefiakuku” la.—Nyaɖeɖefia 2:10.

[Etenuŋɔŋlɔ]

[Nɔnɔmetata si le axa 31]

M. G. Henschel kple N. H. Knorr

[Nɔnɔmetata si le axa 31]

Woa kple srɔ̃a, Lucille