Nyabiabia Siwo Tso Exlẽlawo Gbɔ

Nukae wofia be woade mawutsi ta le ame kukuwo ta?

Esi apostolo Paulo nɔ nu ŋlɔm tso tsitretsitsi ayi dziƒo ŋu la, eŋlɔ nya dodzidzɔname aɖe. Le King James Version me la, exlẽ be: “Elabena nuka wɔm amesiwo na wode mawutsi ta na wo le ame kukuwo ta la le? Ne womafɔ ame kukuwo ɖe tsitre kura o la, nuka wona wode mawutsi ta na wo le woamawo ta mahã?” Eye The New Jerusalem Bible ɖe akpa sia gɔme be: “Nuka dim amesiwo na wode mawutsi ta na wo ɖe ame kukuwo ta la le? Ne womafɔ ame kukuwo ɖe tsitre kura o la, viɖe kae le mawutsidede ta ɖe wo ta ŋu?”—Korintotɔwo I, 15:29.

Ðe Paul nɔ gbɔgblɔm le afisia be woanyrɔ agbagbeawo ɖe amesiwo mexɔ nyɔnyrɔ hafi ku o la nua? Aleae wòadze le Biblia ƒe gɔmeɖeɖe siawo kple bubuwo mee. Gake Ŋɔŋlɔawo kple Helagbe gbãtɔ me nya si Paulo zã me dzodzro nyuie wu nana gɔmesese bubu. Paulo nɔ gbɔgblɔm be wonyrɔa Kristotɔ amesiaminawo ɖe agbenɔnɔ si akplɔ wo ade nuteƒewɔwɔ ƒe ku abe Kristo tɔ ene me. Emegbe la, woafɔ wo ayi gbɔgbɔ me gbenɔnɔ me abe eyama ke ene.

Ŋɔŋlɔawo ɖo kpe numeɖeɖe sia dzi. Paulo ŋlɔ le lɛta si woɖo ɖe Romatɔwo me be: “Ðe mienyae bena, mí amesiwo katã wonyrɔ ɖe Kristo Yesu me la, wonyrɔ mí ɖe eƒe ku la me oa?” (Romatɔwo 6:3, NW) Le lɛta si Paulo ŋlɔ ɖo ɖe Filipitɔwo me la, egblɔ le eɖokui ŋu be: ‘Madze si Kristo ƒe fukpekpewo ƒe hadede, eye masɔ kplii le eƒe ku me, negbe godoo la made ame kukuwo ƒe tsitretsitsi la gbɔ.’ (Filipitɔwo 3:10, 11) Paulo nɔ eɖem fia be Kristo yomedzela amesiaminawo ƒe agbenɔnɔ lɔ nuteƒewɔwɔ le dodokpɔ me, ŋgɔdzedze ku gbesiagbe, ava ku mlɔeba le nuteƒewɔwɔ me ɖe eme, emegbe woafɔ yewo ɖe tsitre ayi dziƒoe.

Ele be woade dzesii be mawunyakpukpui siawo kple bubu siwo me woyɔ ku kpe ɖe nyɔnyrɔxɔlawo ŋu le tẽ la ku ɖe ame gbagbe siwo xɔ nyɔnyrɔ ŋu ke menye amesiwo ku lae o. Paulo gagblɔ na hati Kristotɔ amesiaminawo be: “Woɖi mi kpakplii le [nyɔnyrɔxɔxɔ, NW] me, ame si me wofɔ mi ɖe tsitre hã le to Mawu, si fɔe ɖe tsitre tso ame kukuwo dome la ƒe ŋusẽdɔwɔwɔ dzixɔse la me.”—Kolosetɔwo 2:12.

Helagbe me ŋgɔnɔnya hy·perʹ, si gɔme woɖe be “le ame ta” alo “ɖe ame ta” le Biblia vovovo me le Korintotɔwo I, 15:29 la, agate ŋu afia hã be “kple susu be.” Eyata le ɖekawɔwɔ me kple Biblia kpukpui bubuwo la, New World Translation of the Holy Scriptures ɖe kpukpui sia me wòsɔ nyuie be: “Nukae wo amesiwo na wonyrɔ wo kple susu be wozu ame kukuwo la awɔ? Ne womafɔ ame kukuwo ɖe tsitre kura o la, nukatae wole woawo hã nyrɔm nenema ke?”