Sidzedze Xɔxɔ​—Tso Fifia Yi Ðe Mavɔmavɔ Me

GERMANYTƆ atikewɔla Ulrich Strunz ŋlɔ agbalẽ aɖewo tsiã ɖe enu si wona ŋkɔe be Forever Young (Sɔhɛmenɔnɔ Tegbee). Eɖe nu me le agbalẽawo me be kamedede, nu nyui ɖuɖu, kple agbe ɖɔʋu nɔnɔ ate ŋu ana lãmesẽ nanɔ ame si nyuie wòanɔ agbe adidi wu. Ke hã medo ŋugbe na eƒe nuxlẽlawo be woate ŋu anɔ agbe tegbee ŋutɔŋutɔ ne wowɔ ɖe yeƒe aɖaŋuɖoɖo dzi o.

Gake sidzedze aɖe li si me agbe mavɔ ƒe ŋugbedodo le. Esia fia be ne àte ŋu anɔ agbe tegbee la, ekema àte ŋu axɔ sidzedze nyuiwo tegbee. Yesu gblɔ le gbedodoɖa me na Mawu be: ‘Esiae nye agbe mavɔ la bena, woaxɔ wò, Mawu vavã ɖeka la, kple Yesu Kristo, si nèdɔ ɖa la ŋuti sidzedze.’ (Yohanes 17:3) Gbã la, na míaɖe nusi “agbe mavɔ” nye gɔme eye emegbe míaɖe nusi eŋutisidzedze lɔ ɖe eme kple alesi nàwɔ akpɔe me.

Biblia gblɔ be eteƒe madidi o Wɔla la atrɔ anyigba wòazu paradiso ŋutɔŋutɔ si awɔe be woate ŋu anɔ agbe mavɔ le edzi. Paradiso ma hehe vɛ alɔ afɔɖeɖe sesẽ aɖe si sɔ kple Noa ƒe ŋkekea me Tsiɖɔɖɔa tɔ ɖe eme. Mateo ta 24, kpukpui 37 vaseɖe 39, ɖee fia be Yesu tsɔ míaƒe ɣeyiɣi la sɔ kple “Noa ƒe ŋkekewo,” si me amewo ‘medze sii’ le be enye ɣeyiɣi vɔ̃ na yewo o. Woŋe aɖaba ƒu gbedasi si Noa ɖe gbeƒãe hã dzi. Emegbe ‘ŋkekea va de Noa yi ɖe aɖakaʋua me’ eye tsiɖɔɖɔa tsrɔ̃ amesiwo katã gbe sidzedze sia. Noa  kple amesiwo kpe ɖe eŋu le aɖakaʋua me tsi agbe.

Yesu ɖee fia be “ŋkeke” ma tɔgbe gbɔna le míaƒe ɣeyiɣia me. Menye agbetsitsi ƒe mɔkpɔkpɔ ɖeɖekoe asu amesiwo nɔ agbe ɖe nudzɔdzɔ sia ŋuti sidzedze nu la si o, ke boŋ agbe tegbee nɔnɔ ƒe mɔkpɔkpɔ hã asu wo si. Azɔ hã Mawu afɔ amesiwo le ŋkuɖodziyɔdowo me ɖe tsitre kple mɔkpɔkpɔ be womagaku akpɔ gbeɖe o. (Yohanes 5:28, 29) De dzesi alesi Yesu ɖe nya eve siawo gblɔe. Esime wònɔ nu ƒom le ame kukuwo ƒe tsitretsitsi ŋu na Marta la, egblɔ be: “Amesi xɔa dzinye sena la, ne eku hã la, anɔ agbe eye amesiame, si le agbe, eye wòxɔa dzinye sena la, maku akpɔ o.” Dzesiawo katã le kpe ɖom edzi be “ŋkeke” sia tu aƒe ŋutɔ, si fia be ate ŋu ava eme be ‘màku akpɔ o.’—Yohanes 11:25-27.

Yesu bia Marta azɔ be: “Èle esia xɔm le sesema?” Eɖo eŋu be: “Ẽ, Aƒetɔ.” Ne Yesu bia nya ma ke wò egbea ɖe, aleke nàɖo eŋui? Ðewohĩ mɔkpɔkpɔ be woanɔ agbe eye womaku akpɔ o dzixɔxɔse asesẽ na wò. Gake ne aleae nèsena le ɖokuiwò me le eŋuti gɔ̃ hã la, ɖikeke mele eme o be àdi be edzixɔxɔse nanɔ bɔbɔe na ye. De ŋugble tso nusiwo gbegbe nàte ŋu asrɔ̃ ne ‘màku akpɔ o’ ŋu kpɔ! Tsɔe ko be yee ma le nusiwo katã nèkpɔa mɔ na be yeanya wɔwɔ gake mevona ɖe wo sɔsrɔ̃ ŋu o la wɔm. Eye tsɔe be yee ma gawɔ ɖeka kple yeƒe ame vevi siwo ku! Sidzedze kae li si ana esiawo nava eme, eye aleke nàwɔ wòasu asiwò?

Sidzedze si Naa Agbe Mavɔ Xɔxɔ​—Eƒe Ŋutete Le Mía Si

Ðe Mawu kple Kristo ŋuti sidzedze sɔsrɔ̃ nye nane si míate ŋui oa? Ao. Nyateƒee wònye be seɖoƒe meli na Wɔla la ƒe asinudɔwo ŋuti sidzedze ya o. Ke hã Yesu menɔ susu hem yi ɣletiviŋutinunya alo dzɔdzɔmeŋutinunya bubuawo dzi le eƒe nuƒoƒo tso ‘sidzedze’ kple “agbe mavɔ” ŋu me o. Lododo ta 2, kpukpui 1 kple 5 fia be “nuƒoƒo” kple ‘se’ siwo le Biblia me hiã vevie be míate ŋu atu “sidzedze Mawu” ɖo. Eye Yohanes 20:30, 31 fia be nusiwo woŋlɔ ɖi ku ɖe Yesu ŋu la sɔ gbɔ na míaƒe ‘agbe kpɔkpɔ.’

Eyata Yehowa kple Yesu Kristo ŋuti sidzedze si le Biblia me la sɔ gbɔ be wòafia alesi nàwɔ akpɔ agbe mavɔ la wò. Biblia nye agbalẽ tɔxɛ. Yehowa tso eƒe dɔmenyo me ʋã amewo woŋlɔe ale gbegbe be amesiwo si agbalẽsɔsrɔ̃ mɔnukpɔkpɔ vi aɖe ko su gɔ̃ hã ate ŋu axɔ sidzedze geɖe si ana woakpɔ agbe mavɔ. Nenema ke amesi ƒe susu ɖa eye ɣeyiɣi kple nu geɖewo le esi wòate ŋu azã la hã ate ŋu asrɔ̃ nu yeye aɖe tso Ŋɔŋlɔ si tso gbɔgbɔ me la me ɣesiaɣi. Nyateƒe si wònye be nàte ŋu axlẽ nyati sia la nye kpeɖodzi be nusɔsrɔ̃ ƒe ŋutete le asiwò, gake alekee nàzã ŋutete sia?

Le xexeame godoo la nuteƒekpɔkpɔ ɖee fia be mɔnu si wɔa dɔ nyuie wu ɖesiaɖe si dzi nàto axɔ sidzedze sia enye ɖokuisi Biblia nusɔsrɔ̃ si ame aɖe si si sidzedze sia su xoxo la awɔ kpli wò. Abe alesi Noa dze agbagba be yeafia nu eŋɔlimetɔwo ene la, Yehowa Ðasefowo le lɔlɔ̃m faa be yewoava wò aƒeme adzro Biblia me kpli wò. Woazã agbalẽ gbadza si nye Nukae Mawu Di tso Mía Si? alo kotoku me gbalẽ si wona ŋkɔe wòsɔ be Sidzedze  si Kplɔa Ame Yia Agbe Mavɔ Me. * Ne nukpɔsusu si nye be nuteƒewɔla siwo anɔ anyigba dzi Paradiso me “maku akpɔ o” dzixɔse sesẽ na wò kura gɔ̃ hã la, àte ŋu asrɔ̃ alesi nàka ɖe ŋugbedodo ma dzi to Biblia me dzodzro siawo me. Eyata ne èdi be yeanɔ agbe tegbee alo èdi ko be yeakpɔe ɖa ne nunya le eme be yeate ŋu axɔe se hã la, nukae wòle be nàwɔ? Wɔ Biblia-nusɔsrɔ̃ ƒe mɔnukpɔkpɔ sia ŋu dɔ.

Ɣeyiɣi didi kae wòaxɔ? Axa 32-gbalẽ gbadza si míeyɔ la le gbegbɔgblɔ alafa geɖe me, eye nusɔsrɔ̃ kpui 16 koe le eme. Alo ne àte ŋu azã gaƒoƒo ɖeka le kwasiɖa ɖeka me la, ɣleti ʋɛ aɖewo koe nàtsɔ asrɔ̃ Biblia me nya veviwo le Sidzedze si Kplɔa Ame Yia Agbe Mavɔ Me ƒe agbalẽa zazã me. Agbalẽ siawo kpe ɖe ame geɖewo ŋu wosrɔ̃ nu geɖe tso Mawu ŋu eye wotu lɔlɔ̃ ɖo nɛ. Wɔla la aɖo eteƒe na amesiwo lɔ̃nɛ vavã, akpe ɖe wo ŋu be agbe mavɔ nasu wo si.

Sidzedze si kplɔa ame yia agbe me xɔxɔ ƒe ŋutete le mía si vavã, eye sidzedze sia li míakpɔ bɔbɔe hã. Woɖe Biblia bliboa katã alo eƒe akpa aɖewo gɔme ɖe gbegbɔgblɔ siwo wu 2,000 me. Edzɔa dzi na Yehowa Ðasefo siwo le dukɔ 235 me be yewoakpe ɖe amewo ŋu ɖekaɖekae eye woana Biblia-srɔ̃gbalẽ wò be nàte ŋu adzi wò sidzedze ɖe edzi.

Ðokuisinusɔsrɔ̃

Mia kple Mawu dome ƒomedodo nye wò ŋutɔ kple Wɔla la dome nya. Wò ŋutɔ koe ate ŋu alé eme ɖe asi ana wòasẽ ŋu, eye eyama koe ate ŋu ana agbe mavɔ wò. Eyata ele be nàyi edzi asrɔ̃ eƒe Nya si woŋlɔ ɖi la le ɖokuiwò si. Ne èna ame aɖe va gbɔwò le aƒeme edziedzi la, àkpɔe be anɔ bɔbɔe na wò be nàgblẽ ɣeyiɣi aɖe ɖi na nusɔsrɔ̃.

Esi wònye “sidzedze Mawu” ye le Biblia kple Biblia-srɔ̃gbalẽwo me ta la, ele vevie be nàlé be na wo. (Lododowo 2:5) Ale woanɔ anyi na wò ƒe geɖe. Ne dukɔ madeŋgɔ mee nèle la, anɔ eme be mèzã agbalẽ geɖe le suku o, ke boŋ toléle ɖe nya ŋu kple dzesidede nuwo me koŋue nèto srɔ̃ nu. Le kpɔɖeŋu me, wodoa gbegbɔgblɔ siwo wu 50 le Benin. Mesesẽ be nàkpɔ amesi te ŋu doa gbegbɔgblɔ ene alo atɔ̃ bɔbɔe o, togbɔ be nusrɔ̃gbalẽ menɔ wo si kpɔ le gbe mawo me o hã. Ŋutete si le asiwò be nète ŋu toa toléle ɖe nya ŋu, dzesidede nu, kpakple susu ƒe nuŋunɔnɔ me srɔ̃a nu la nye yayra na wò. Ke hã àva kpɔe be agbalẽwo ate ŋu akpe ɖe ŋuwò ŋutɔ le wò nusɔsrɔ̃ me.

Ne wò xɔdɔme melolo kura o gɔ̃ hã la, dze agbagba be teƒe nyui aɖe nanɔ asiwò nadzra wò Biblia kple Biblia-srɔ̃gbalẽwo ɖo. Dzra wo ɖo ɖe asitsɔƒe kple afisi nu nagblẽ wo le o.

Ƒomenusɔsrɔ̃

Ne dzilae nènye la ekema ele be nàtsɔ ɖe le kpekpe ɖe viwòwo ŋu me be sidzedze si xɔm nèle la nasu woawo hã si. Le dukɔ madeŋgɔ geɖewo me la, dzilawo lɔ̃a aɖaŋudɔwo fiafia wo viwo. Esia ƒe ɖewo te ŋu nyea nuɖaɖa, nakefɔfɔ, tɔmedede, agbledede, tɔƒodede, kple liɖɔɖɔ nuwo le asime. Esiawo nye agbenɔnɔ ŋu nufiafia nyateƒe. Gake dzila geɖewo metsɔa sidzedze si ate ŋu akplɔ ame yi agbe mavɔ me kpena ɖe nufiafia siawo ŋu o.

Aleke kee nɔnɔmea le na wòe o, ɖewohĩ àse le ɖokuiwò me be vovo boo aɖeke mele ye ŋu o. Wɔla la hã nya esia. De dzesi nya siwo wògblɔ ɣeyiɣi didi aɖe va yi ku ɖe alesi woafia eƒe mɔwo ɖeviwoe ŋu: “Ku wo ɖe to me na viwòwo, eye naƒo nu le wo ŋu, ne èbɔbɔ nɔ aƒewò me, alo nèle mɔ dzi, ne èmlɔ anyi, alo nèfɔ.” (Mose V, 6:7) Ne ele alea la, ɖe manyo be nàtrɔ asi le wò ŋutɔ wò nufiafia ɖoɖo ŋu abe le mɔ si gbɔna la ene nu oa:

1. “Ne èbɔbɔ nɔ aƒewò me”: Dze agbagba be mia kple viwòwo miadzro Biblia me edziedzi  le aƒeme, ɖewohĩ kwasiɖa sia kwasiɖa, abe alesi ame aɖe wɔe kpli wò ene. Yehowa Ðasefowo naa Biblia-srɔ̃gbalẽ siwo nyo na nufiafia ɖevi siwo xɔ ƒe ɖesiaɖe.

2. ‘Ne èle mɔ dzi’: Ƒo nu na viwòwo tso Yehowa ŋu le vome, abe alesi nèfiaa agbemenuwo alo naa mɔfiafia wo le vome ene.

3. “Ne èmlɔ anyi”: Do gbe ɖa kple viwòwo fiẽ ɖesiaɖe.

4. ‘Ne èfɔ’: Ƒome geɖewo ɖe vi gbogbo aɖe tso mawunyakpukpui ɖeka me dzodzro gbesiagbe ŋdi me. Yehowa Ðasefowo zãa Ŋɔŋlɔawo Me Dzodzro Gbesiagbe * tsɔ wɔa esiae.

Le dukɔ madeŋgɔwo me la, dzila geɖewo kua kutri be yewoakpɔ egbɔ be yewo viwo dometɔ ɖeka nade suku ade ŋgɔ le agbalẽsrɔ̃nyawo me. Ne edzɔ nenema la ɖevia te ŋu va kpɔa wo dzilawo dzi ne wo tsi. Ke hã ne èsrɔ̃ Biblia eye nèkpe ɖe viwòwo katã ŋu be woawɔ nenema la, àxɔ sidzedze si akpe ɖe mia kple wò ƒome bliboa ŋu be mianɔ agbe tegbee.

Ðe woava dzɔ gbeɖeka be míanya nusianua? Ao. Esi míaƒe xexea yi edzi le zɔzɔm to yamenuto si seɖoƒe meli na o me ta la, míayi edzi anɔ nu srɔ̃m. Le nyateƒe me la, Nyagblɔla 3:11 gblɔ be: “[Mawu wɔ] nuwo katã nyuie ɖe wo wɔɣi, eye wòde mavɔmavɔ dzi me na wo, negbe ɖeko amegbetɔ menya mɔnu le nusiwo Mawu wɔ la ƒe agɔmegbɔ kple tagbɔ ŋu o.” Nusɔsrɔ̃ nye dzidzɔ si nu mayi akpɔ gbeɖe o.

[Etenuŋɔŋlɔwo]

[Nya si ɖe dzesi si le axa 5]

‘Esiae nye agbe mavɔ la bena, woaxɔ . . . sidzedze’

[Nɔnɔmetata siwo le axa 7]

Kpe ɖe wò ƒomea ŋu be woaxɔ sidzedze tso fifia yi ɖe mavɔmavɔ me