“Nuka Wɔƒee Míeva le Agbea Me?”

NOBEL nunanaxɔla aɖe si ŋkɔe nye Elie Wiesel, amesi tsi agbe le nugbe si Nazitɔwo ɖo be yewoatsrɔ̃ Yudatɔwo ɖikaa le Xexemeʋa II me me la, bia nya aɖe heyɔe be “nya vevitɔ kekeake si ŋu wòle be amegbetɔ ɖesiaɖe nade ŋugble le vevie.” Eyae nye nya ka? Eyae nye be: “Nuka wɔƒee míeva le agbea me?”

Ède ŋugble tso biabia sia ŋu kpɔa? Ame geɖe dea ŋugble tsoa eŋu, gake womekpɔa ŋuɖoɖo nɛ o. Esime blemaŋutinyaŋlɔla Britaintɔ Arnold Toynbee nɔ agbagba dzem be yeanya tameɖoɖo si le agbea ŋu la, egblɔ bena: “Tameɖoɖo si koŋ tae amegbetɔ le agbe ɖoe nye be wòakɔ Mawu ŋuti, eye Mawu ana wòakpɔ dzidzɔ tegbee.”

Dzidzɔtɔe la, ƒe akpe etɔ̃ kple edzivɔwoe nye esia si nunyala Fia Salomo, si wonya nyuie be ede ŋugble tso agbea ŋu vevie, ya kpɔ ŋuɖoɖo vevitɔ na nyabiase sia. Egblɔ be: “Mina míase nyaawo katã ƒe taƒonya be: Vɔ̃ Mawu, eye nalé eƒe seawo me ɖe asi; elabena esia nye amegbetɔwo katã tɔ!”—Nyagblɔla 12:13.

Yesu Kristo, Mawu ƒe Vi la hã te gbe ɖe gɔmeɖose vevi sia dzi. Esime Yesu nɔ anyigba dzi la, edze agbagba ɖesiaɖe kɔ Fofoa si le dziƒo la ƒe ŋkɔ ŋu. Yesu se vivi na agbea to Ewɔla la subɔsubɔ me. Esi wònye be ema wɔwɔe de eyama dzi helé eyama ɖe te ta la, ete ŋu gblɔ be: “Nye nuɖuɖu enye bena, mawɔ amesi dɔm ɖa la ƒe lɔlɔ̃nu.”—Yohanes 4:34.

Ekema, nuka wɔƒee míeva le agbea me? Abe alesi wònɔ le Yesu, Salomo, kple Mawusubɔla bubu geɖewo gomee ene la, Mawu ƒe lɔlɔ̃nu wɔwɔe anye nu vevitɔ si akpe ɖe mía ŋu be tameɖoɖo vavãtɔ nate ŋu anɔ míaƒe agbe ŋu, si awɔe be míanɔ dzidzɔ kpɔm ɖaa. Àdi be yeanya nu geɖe tso tadedeagu na Mawu “le gbɔgbɔ kple nyateƒe me” ŋua? (Yohanes 4:24) Adzɔ dzi na Yehowa Ðasefo siwo le miaƒe nutoa me la be yewoakpe ɖe ŋuwò nàkpɔ ŋuɖoɖo na nyabiase si nye be: “Nuka wɔƒee míeva le agbea me?”