Aleke Nàwɔ Ado Dzi Le Subɔsubɔdɔa Me?

EDZƆ ɖe dziwò kpɔ be dzi ɖe le ƒowò ale gbegbe be nèdi be yeadzudzɔ gomekpɔkpɔ le gbeƒãɖeɖedɔa mea? Tsitretsiɖeŋu si nu sẽ, dzimaɖitsitsi, lãmesẽkuxiwo, hatiwo ƒe nyaƒoɖeamenu, alo ɖaseɖiɖidɔa ƒe kumatsematse ate ŋu ado míaƒe dzidodo kpɔ. Gake bu Yesu ƒe kpɔɖeŋu ŋu kpɔ. Edo dzi le dodokpɔ sesẽtɔ kekeake me “le dzidzɔ si wotsɔ ɖo eŋkume ta.” (Heb. 12:2) Enyae be ne yeyi edzi nɔ kpe ɖom edzi be nutsotso siwo wotsɔ ɖe Mawu ŋu la nye aʋatso la, ekema yeanɔ dzidzɔ dom na Yehowa ƒe dzi.—Lod. 27:11.

Wò hã àte ŋu ado dzidzɔ na Yehowa ƒe dzi ne èyi edzi do dzi le subɔsubɔdɔa me. Ke ne edze abe kuxi aɖewo na be ŋusẽ boo meganɔa ŋuwò na gbeƒãɖeɖedɔa wɔwɔ o ene ya ɖe? Krystyna, si nye ame tsitsi eye lãmegbegblẽ ɖea fu nɛ la, lɔ̃ ɖe edzi be: “Mesena le ɖokuinye me zi geɖe be ɖeɖi te ŋunye alo dzi mele dzɔyem o. Nye tsitsimekuxiwo, abe lãmegbegblẽ kple gbe sia gbe dzimaɖitsitsiwo ene, tea ŋu nana be dzo si le menye la nu fana vie ɣeaɖewoɣi.” Aleke nàwɔ ayi edzi anɔ gome kpɔm le subɔsubɔdɔa me togbɔ be kuxi siawo tɔgbi anɔ fu ɖem na wò hã?

Srɔ̃ Nyagblɔɖilawo

Be Fiaɖuƒegbeƒãɖela wɔnuteƒewo nate ŋu ado dzi ayi edzi anɔ gbeƒãɖeɖedɔa wɔm la, ele be woadze agbagba be tamesusu si nɔ nyagblɔɖila siwo nɔ anyi le blema si la nanɔ woawo hã si. Le kpɔɖeŋu me, bu Yeremiya ŋu kpɔ. Esi Mawu yɔe be wòazu nyagblɔɖila la, enɔ hehem ɖe megbe le gɔmedzedzea me. Ke hã, Yeremiya te ŋu yi edzi do dzi le nyagblɔɖidɔ sesẽ si wode esi la wɔwɔ me ƒe 40 kple edzivɔ sɔŋ, elabena esrɔ̃ ale si wòaɖo ŋu ɖe Mawu ŋu bliboe.—Yer. 1:6; 20:7-11.

Henryk kpɔ dzideƒo tso Yeremiya ƒe kpɔɖeŋua me. Egblɔ be: “Le ƒe 70 siwo metsɔ wɔ subɔsubɔdɔa me la, amewo ƒe nuwɔna—woƒe tsitretsiɖeameŋu, alo woƒe ɖekematsɔleme—naa dzi ɖena le ƒonye ɣeaɖewoɣi. Le ɣeyiɣi mawo me la, meɖoa ŋku Yeremiya ƒe kpɔɖeŋua dzi na ɖokuinye. Lɔlɔ̃ si nɔ esi na Yehowa kple ƒomedodo sẽŋu si nɔ woa kplii dome la do ŋusẽe be wòyi edzi wɔ nyagblɔɖidɔ la.” (Yer. 1:17) Rafał, ame bubu si hã Yeremiya ƒe kpɔɖeŋua do ŋusẽe la, gblɔ be: “Yeremiya ɖo ŋu ɖe Mawu ŋu, ke mena eƒe susu nɔ eya ŋutɔ ɖokui kple eƒe seselelãmewo ŋu o. Eyi dɔ sia wɔwɔ dzi vɔvɔ̃manɔmee togbɔ be ame geɖe lé fui hã. Medzea agbagba be nya sia nanɔ susu me nam.”

Nyagblɔɖila bubu aɖe si ƒe kpɔɖeŋu kpe ɖe ame geɖe ŋu be wodo dzi le subɔsubɔdɔa mee nye Yesaya. Mawu na wònya be, wo detɔwo maɖo to eƒe gbedeasia o. Yehowa gblɔ be, “Na dukɔ sia ƒe dzi naku atri, tsi to nɛ.” Ðe wòfia be Yesaya mekpɔ dzidzedze oa? Ao, Mawu ya mebui nenema o! Esi Mawu de nyagblɔɖidɔa mawusubɔla sia si la, egblɔ be: “Nyee nye esi, dɔm!” (Yes. 6:8-10) Yesaya yi eƒe nyagblɔɖidɔa wɔwɔ dzi nuteƒewɔwɔtɔe. Nenemae wò hã nèwɔa nu ɖe se si wode be míaɖe gbeƒã la ŋua?

Be míayi edzi ado dzi le subɔsubɔdɔa me togbɔ be amewo metsɔa ɖeke le eme o hã, abe ale si Yesaya hã wɔe ene la, mele be míana míaƒe susu nanɔ amewo ƒe nuwɔna ɖedzileameƒowo ŋu o. Rafał gblɔ ale si wòwɔna nɔa te ɖe dziɖeleameƒo nu ale: “Medzea agbagba be nye susu naganɔ nya veame siwo amewo gblɔna la dzi o. Ame siwo le nye anyigbamama me kpɔ mɔ awɔ nu ale si woawo ŋutɔwo dii.” Anna gblɔ be: “Nyemeɖea mɔ nye susu nɔa nu madodzidzɔname alo nu ɖedzileameƒo aɖeke ŋu o. Nu si kpena ɖe ŋunye metea ŋu wɔa esiae nye be medoa gbe ɖa hedzroa gbe sia gbe mawunyakpukpuia me hafi yia gbeadzi. Eye esia nana be nye susu dzona le nya ɖedzileameƒo ɖe sia ɖe dzi kaba.”

Nyagblɔɖila Xezekiel wɔ nyagblɔɖidɔ le Yudatɔ aboyome sẽtowo dome le Babilon. (Xez. 2:6) Ne ɖe Xezekiel gbe Mawu ƒe nya la gbɔgblɔ na  dukɔa eye ame vɔ̃ɖi aɖe ku evɔ mese nuxlɔ̃amenya la o la, Mawu abia akɔnta tso nyagblɔɖila la si. Yehowa gblɔ na Xezekiel be: “Asiwò me mabia eƒe ʋu le.”—Xez. 3:17, 18.

Henryk dzea agbagba be Xezekiel ƒe nukpɔsusu ma tɔgbi nanɔ ye hã ye si. Egblɔ be: “Medi be ŋutinye nakɔ tso amewo katã ƒe ʋu me. Amegbetɔwo ƒe agbe xɔasiwo le afɔku me.” (Dɔw. 20:26, 27) Zbigniew hã se le eɖokui me nenema ke. Egblɔ be: “Enɔ na Xezekiel be wòayi eƒe nyagblɔɖidɔa dzi metsɔ le nu siwo amewo susuna tso eŋu me o. Esia kpena ɖe ŋunye be Wɔlaa ƒe nukpɔsusu le gbeƒãɖeɖedɔa ŋu nɔa asinye.”

Menye Wò Ðekae O

Ne èle gbeƒãɖeɖedɔa wɔm la, mègasusu be ye ɖeka koe le ewɔm o. Abe ale si ko apostolo Paulo gblɔe ene la, míawo hã míate ŋu agblɔ be: “Mawu ƒe hadɔwɔlawo míenye.” (1 Kor. 3:9) Krystyna si lɔ̃ ɖe edzi be dzi ɖena le ye ƒo ɣeaɖewoɣi la gblɔ be: “Esia tae meyia edzi ɖea kuku na Yehowa be wòado ŋusẽm ɖo. Megblẽm ɖi kpɔ o.” Vavãe, míehiã Mawu ƒe gbɔgbɔa ƒe kpekpeɖeŋu le míaƒe subɔsubɔdɔa me!—Zax. 4:6.

Ne míekpɔa gome le gbeadzisubɔsubɔdɔa me la, gbɔgbɔ kɔkɔe la hã kpena ɖe mía ŋu be míeɖea nɔnɔme siwo ƒo ƒu wɔ “gbɔgbɔ la ƒe kutsetse” la fiana. (Gal. 5:22, 23) Esia kpena ɖe mía ŋu be míedoa dzi yia gbeƒãɖeɖedɔa dzi nu ka kee ɖale dzɔdzɔm o. Henryk gblɔ be: “Gomekpɔkpɔ le gbeadzisubɔsubɔdɔa me kpena ɖe ŋunye be metrɔa asi le nye amenyenye ŋu. Mesrɔ̃ ale si magbɔ dzi ɖi na amewo, abu ame ŋu, eye nyemagana ta bɔbɔe o.” Dzidodo le gbeƒãɖeɖedɔa me togbɔ be kuxi vovovowo adze ŋgɔ mí hã ate ŋu akpe ɖe mía ŋu be míatu gbɔgbɔa ƒe kutsetsea ɖo geɖe wu.

Yehowa le eƒe mawudɔlawo zãm tsɔ le mɔ fiam eƒe amewo le dɔ tɔxɛ sia wɔwɔ me. (Nyaɖ. 14:6) Biblia ɖee fia be gbɔgbɔmenuwɔwɔ siawo “akpe ewo teƒe akpe ewo kpakple akpe teƒe akpewo” ye li. (Nyaɖ. 5:11) Le Yesu ƒe mɔfiafia te la, mawudɔlawo le kpekpem ɖe Mawu subɔlawo ŋu le anyigba dzi. Ðe esia nɔa susu me na wò ɣesiaɣi si nèle gbeadzia?

Anna gblɔ be: “Ŋugbledede le nyateƒenya si nye be mawudɔlawo li kpli mí le subɔsubɔdɔa me ŋu dea dzi ƒo nam ale gbegbe. Medea asixɔxɔ kpekpeɖeŋu siwo wonana le Yehowa kple Yesu ƒe mɔfiafia te la ŋu.” Mɔnukpɔkpɔ gã ka gbegbee nye esi wònye be míanɔ dɔ wɔm kple mawudɔla wɔnuteƒewo!

Ke hati Fiaɖuƒegbeƒãɖelawo ya ɖe? Yayrae wònye na mí be míeva le ha dem kple Ðasefo wɔnuteƒewo ƒe ha gã aɖe. Ðikeke mele eme o be èkpɔ Biblia me lododo sia ƒe nyateƒenyenye dze sii be: ‘Ale si wotsɔa ga nyrea gae la, nenema ame nyrea nɔviae.’—Lod. 27:17.

Dɔwɔwɔ ɖekae kple gbeƒãɖela bubuwo le subɔsubɔdɔa me naa mɔnukpɔkpɔ nyui geɖewo sua mía si míesrɔ̃a ɖaseɖimɔnu nyui siwo ɖewohĩ míenya tsã o. Elżbieta gblɔ be: “Gbeƒãɖeɖedɔa wɔwɔ kple gbeƒãɖela vovovowo naa mɔnukpɔkpɔ sua asinye be meɖea lɔlɔ̃ fiaa haxɔsetɔwo kple ame siwo míedoa go le gbeadzi la siaa hã.” Dze agbagba nànɔ gome kpɔm le gbeƒãɖeɖedɔa me kple gbeƒãɖela vovovowo. Ana nàse vivi na wò subɔsubɔdɔa.

Lé Be Na Ðokuiwò Nyuie

Be dzo nakpɔtɔ anɔ mía me ɖe subɔsubɔdɔa ŋu la, ele be míawɔ ɖoɖo nyuie, anɔ ɖokuisinusɔsrɔ̃ wɔm edziedzi ahanɔ ɖiɖim ɖe eme nyuie. Ne míagblɔe bubui la, ele be míalé be na mía ɖokuiwo le gbɔgbɔ me kple ŋutilã me siaa.

Biblia gblɔ be: “Veviedola ƒe tameɖoɖo hea viɖe vɛ.” (Lod. 21:5) Zygmunt si xɔ ƒe 88 fifia gblɔ be: “Ðoɖo nyui dzi zɔzɔ le subɔsubɔdɔa me na taɖodzinu le nye gbeƒãɖeɖedɔa ŋu. Mewɔa ɖoɖo ɖe nye ɣeyiɣiwo ŋu nyuie ale be mekpɔa ɣeyiɣi si sɔ ɖe ɖaseɖiɖidɔa ŋu.”

Ŋɔŋlɔawo nyanya nyuie doa ŋusẽ mí henana míenɔa dzadzraɖoɖi ɖe subɔsubɔdɔa wɔwɔ ŋu. Abe ale si ko wòhiã be míanɔ ŋutilãmenuɖuɖu ɖum bene míayi edzi anɔ agbe ene la, nenema kee wòhiã be míanɔ gbɔgbɔmenuwo hã ɖum edziedzi bene míate ŋu ayi edzi anɔ gome kpɔm le gbeƒãɖeɖedɔa me. Mawu ƒe Nya la tsɔtsɔ nyi mía ɖokuiwo gbe sia gbe kple ‘nuɖuɖu si wona le ɣeyiɣi nyuitɔ dzi’ la ɖuɖu ana ŋusẽ naɖo mía ŋu hena subɔsubɔdɔa wɔwɔ.—Mat. 24:45-47.

Elżbieta wɔ asitɔtrɔ vevi aɖewo le eƒe agbe me ale be wòate ŋu ana eƒe subɔsubɔdɔa nanyo ɖe  edzi. Egblɔ be: “Meɖe ɣeyiɣi si mezãna ɖe television kpɔkpɔ ŋu la dzi kpɔtɔ geɖe ŋutɔ si wɔe be ɣeyiɣi geɖe sua asinye metsɔ dzrana ɖo ɖe gbeƒãɖeɖedɔa ŋu. Ne mele Biblia xlẽm fiẽ sia fiẽ la, mebua ame siwo medo go le anyigbamama me la ŋu. Media mawunyakpukpui kple nyati siwo ate ŋu akpe ɖe wo ŋu.”

Ðiɖiɖeme nyuie ate ŋu ana be ŋusẽ geɖe wu nanɔ ŋuwò, eye wòate ŋu akpe ɖe ŋuwò nàkpɔ gome le subɔsubɔdɔa me bliboe. Ke hã, modzakaɖeɖe atraɖii ate ŋu agblẽ nu le wò gbeadzisubɔsubɔdɔa ƒe nyonyome ŋu. Andrzej, si nye gbeƒãɖela dovevienu aɖe la, gblɔ be: “Ne ame meɖina ɖe eme o la, enaa ɖeɖi tea eŋu wògbɔa eme, eye ɖeɖiteameŋu ma kple dziɖeleameƒo gbɔ medidi kura o. Mewɔa nu sia nu si mate ŋui be esia nagadzɔ ɖe dzinye o.”—Nyagb. 4:6.

Togbɔ be míekua kutri vevie hã la, ame ʋɛ aɖewo koe va kpɔa ŋudzedze ɖe nya nyuia ŋu. Gake Yehowa ya maŋlɔ míaƒe dɔwɔwɔwo be gbeɖe o. (Heb. 6:10) Nenye be ame geɖewo medi be yewoaxɔ mí o gɔ̃ hã la, ɖewohĩ woaƒo nu tso míaƒe sasrãkpɔa ŋu le míaƒe dzodzo megbe. Anɔ ko abe nu si míexlẽ tso Xezekiel ŋu ene be: “Woanyae be, nyagblɔɖila aɖe nɔ yewo dome kpɔ.” (Xez. 2:5) Le nyateƒe me la, míaƒe subɔsubɔdɔa mebɔbɔ o, gake míekpɔa viɖe ŋutɔŋutɔwo tso eme, eye ame siwo ɖoa to mí la hã kpɔnɛ.

Zygmunt gblɔ be: “Gomekpɔkpɔ le subɔsubɔdɔa me kpena ɖe mía ŋu míedoa amenyenye yeyea heɖea lɔlɔ̃ fiaa Mawu kple mía haviwo siaa.” Andrzej hã gblɔ be: “Mɔnukpɔkpɔe wònye na mí be míakpɔ gome le agbeɖeɖedɔ sia me. Womagawɔ dɔ sia le xexea me godoo alo agawɔe le nɔnɔme sia tɔgbi me gbeɖe o.” Wò hã àte ŋu akpɔ yayra geɖe ne èdo dzi yi edzi le gome kpɔm le subɔsubɔdɔa me egbea.—2 Kor. 4:1, 2.

[Nɔnɔmetata si le axa 31]

Míaƒe ŋutilã me kple gbɔgbɔ me nu hiahiãwo gbɔ kpɔkpɔ kpena ɖe mía ŋu míedoa dzi le subɔsubɔdɔa me