1, 2. Nu kae Yesu wɔ esi eya kple eƒe apostolo wɔnuteƒeawo ɖu ƒe 33 M.Ŋ. ƒe Ŋutitotoŋkekenyuia vɔ?

NISAN 14, ƒe 33 M.Ŋ. ƒe zã mee. Yesu kple exɔlɔ̃wo ɖu Ŋutitotoŋkekenyui la vɔ koe nye ema. Azã sia ɖoa ŋku ale si Mawu ɖe wo tɔgbuiwo tso kluvinyenye me le Egipte dzi na wo. Gake “ɖeɖekpɔkpɔ mavɔ” ye le eƒe nusrɔ̃la wɔnuteƒewo ya lalam. Le ŋufɔke la, futɔwo awu woƒe Kplɔla si ŋu nu vɔ̃ mele o. Gake Yesu ƒe agbe deblibo si wòatsɔ asa vɔe la aʋu mɔ na amegbetɔwo katã be woaɖe wo tso nu vɔ̃ kple ku si me.—Heb. 9:12-14.

² Be míagaŋlɔ ɖoɖo sia si Mawu wɔ lɔlɔ̃tɔe be o la, Yesu ɖo ŋkuɖodzizã yeye anyi, si xɔ ɖe Ŋutitotoŋkekenyui si woɖuna ƒe sia ƒe la teƒe. Etsɔ abolo maʋamaʋã, ŋe eme, eye wòtsɔe na eƒe apostolo wɔnuteƒe 11-awo hegblɔ be: “Esia tsi tsitre ɖi na nye ŋutilã si woatsɔ ana ɖe mia ta. Minɔ esia wɔm hena ŋkuɖoɖo dzinye.” Ewɔ nenema ke le kplu la hã gome hegblɔ be: “Kplu sia tsi tsitre ɖi na nubabla yeye si wowɔ to nye ʋu, si woakɔ ɖe anyi ɖe mia ta dzi.”—Luka 22:19, 20.

3. (a) Tɔtrɔ gã kae va le Yesu ƒe ku megbe? (b) Nya kawoe míate ŋu abia tso Yesu ƒe gbedodoɖa si le Yohanes ta 17 lia me ŋu?

³ Eteƒe madidi o, Se ƒe nubabla si nɔ Mawu kple dzɔdzɔme Israel dome la nu ayi. Woatsɔ nubabla yeye si anɔ Yehowa kple Yesu yomedzela amesiaminawo dome la aɖɔ lii. Yesu tsi dzi vevie ɖe gbɔgbɔmedukɔ yeye sia ƒe dedienɔnɔ ŋu. Dzɔdzɔme Israel viwo mewɔ ɖeka le mawusubɔsubɔ me kura o, si na wodo vlo Mawu ƒe ŋkɔ kɔkɔe la. (Yoh. 7:45-49; Dɔw. 23:6-9) Gake Yesu di vevie be ye yomedzelawo nawɔ ɖeka bliboe ale be woate ŋu awɔ dɔ asi-le-asi-me ahato esia me ado Mawu ƒe ŋkɔ la ɖe dzi. Eya ta nu kae Yesu wɔ? Edo gbe ɖa. Gbedodoɖa wɔdɔɖeamedzi  siae nye nyuitɔ kekeake si mɔnukpɔkpɔ asu ame si be wòaxlẽ. (Yoh. 17:1-26; kpɔ nɔnɔmetata si le nyati sia ƒe gɔmedzedze.) Esi míele gbedodoɖa sia me dzrom la, mina míanɔ ŋugble dem le biabia sia ŋu: “Ðe Mawu ɖo Yesu ƒe gbedodoɖaa ŋua?” Eye míanɔ mía ɖokui me dzrom hã kple biabia si nye: “Ðe mele agbe nɔm ɖe eƒe gbedodoɖaa nua?”

4, 5. (a) Nu kae míesrɔ̃ tso nya siwo Yesu tsɔ dze eƒe gbedodoɖaa gɔmee me? (b) Aleke Yehowa ɖo nu si Yesu bia na eɖokui la ŋu?

⁴ Yesu fia nu geɖe eƒe nusrɔ̃lawo gbe ma gbe tso Mawu ŋu va se ɖe zãtiƒe ke. Emegbe efɔ mo dzi kpɔ dziƒo hedo gbe ɖa be: “Fofo, gaƒoƒo la de; do viwò la ɖe dzi, ne viwò la nado wò ɖe dzi, abe ale si nèna ŋusẽe ɖe ŋutilãwo katã dzi, be ame siwo nètsɔ nae la ƒe xexlẽme bliboa la, wòana agbe mavɔ wo ene. . . . Medo wò ɖe dzi le anyigba dzi, esi mewu dɔ si nètsɔ nam be mawɔ la nu. Eya ta Fofo, tsɔ ŋutikɔkɔe si nɔ asinye le gbɔwò hafi xexea va dzɔ la dom ɖe dzi le ɖokuiwò gbɔ.”—Yoh. 17:1-5.

⁵ Nu siwo le vevie wu na Yesu le agbe mee wòtsɔ dze eƒe gbedodoɖa la gɔme. Nu si koŋ ŋu Yesu tsi dzi ɖoe nye Fofoa si le dziƒo ƒe ŋkɔ dodo ɖe dzi, eye esia wɔ ɖeka kple nu gbãtɔ si wòbia le eƒe kpɔɖeŋugbedodoɖa la hã me be: “Fofo, wò ŋkɔ ŋuti nakɔ.” (Luka 11:2) Nu bubu si ŋu Yesu tsi dzi ɖoe nye eƒe nusrɔ̃lawo ƒe nuhiahiãwo, ale be “wòana agbe mavɔ wo.” Ema megbe la, Yesu bia nane Fofoa etɔxɛ: “Fofo, tsɔ ŋutikɔkɔe si nɔ asinye le gbɔwò hafi xexea va dzɔ la dom ɖe dzi le ɖokuiwò gbɔ.” Yehowa tsɔ nu si yi ŋgɔ wu nu si Yesu bia la ɖo eteƒe nɛ esi wòtsɔ “ŋkɔ si nyo wu” mawudɔlawo katã “tɔ sãsãsã” na Via wɔnuteƒe la.—Heb. 1:4.

6. Nu kae wòle be apostoloawo nawɔ hafi akpɔ agbe mavɔ, eye aleke míewɔ nya be wokpɔ dzidzedze?

⁶ Yesu do gbe ɖa tso nu si mí amegbetɔ nu vɔ̃ wɔlawo míawɔ be míadze axɔ agbe mavɔ nunana la hã ŋu. (Mixlẽ Yohanes 17:3.) Egblɔ be míayi edzi ‘anɔ’ Mawu kple Kristo ŋuti ‘sidzedze xɔm.’ Mɔ siwo dzi míato awɔ esia dometɔ ɖekae nye be, míazã míaƒe ŋkuwo kple towo atsɔ anɔ nu geɖe srɔ̃m tso Yehowa kple Via ŋu. Mɔ bubue nye be míawɔ ɖe nu siwo míesrɔ̃ dzi. Nu eve siawo tututue apostoloawo wɔ, abe ale si wòdze le Yesu ƒe gbedodoɖaa me ene be: “Nya siwo nètsɔ de asi nam la, metsɔ wo na wo, eye woxɔ wo.” (Yoh. 17:8) Gake hafi agbe mavɔ nasu wo si la, ele be woayi edzi anɔ ŋugble dem le Mawu ƒe nyawo ŋu ahanɔ agbe nɔm ɖe wo nu. Ðe apostolo wɔnuteƒeawo te ŋu wɔ esia dzidzedzetɔe va se ɖe esime wowu woƒe anyigbadzigbenɔnɔ nua? Ɛ̃! Míenya esia elabena woŋlɔ apostolo wɔnuteƒeawo ƒe ŋkɔwo ɖe Yerusalem Yeyea ƒe gɔmeɖokpe 12-awo ŋu tegbee.—Nyaɖ. 21:14.

7. Nu kae “sidzedze” Mawu fia, eye nu ka tae esia le vevie ŋutɔ?

⁷ Helagbe ŋuti nunyalawo gblɔ be woagate ŋu aɖe Helagbe me nya si gɔme woɖe be “woanɔ sidzedze xɔm” gɔme be “woayi edzi anɔ si dzem.” Reference Bible ƒe etenuŋɔŋlɔ si le Yohanes 17:3 na gɔmeɖeɖe bubu, si nye, “be woanya wò.” Eya ta be woanɔ Mawu ŋuti “sidzedze xɔm” fia be woayi edzi anɔ nu srɔ̃m tso eŋu ʋuu ‘ava nya’ Mawu nyuie. Mɔnukpɔkpɔ gã aɖee esia nye. Gake Mawu Ŋusẽtɔ gãtɔ kekeake nyanya bia nu geɖe wu eƒe nɔnɔme  nyuiwo kple eƒe tameɖoɖo nyanya ko. Ebia be míana lɔlɔ̃ ƒe kadodo sẽŋu nanɔ mía kple Yehowa kpakple mía kple haxɔsetɔwo dome. Biblia gblɔ be: “Ame si melɔ̃a ame o la medze si Mawu o.” (1 Yoh. 4:8) Mawu nyanya bia hã be míawɔ eƒe sewo dzi. (Mixlẽ 1 Yohanes 2:3-5.) Mɔnukpɔkpɔ gã ŋutɔe wònye be woabu mí ɖe ame siwo nya Yehowa dome! Gake abe ale si wòdzɔ ɖe Yuda Iskariot dzi ene la, ƒomedodo xɔasi sia dome ate ŋu agblẽ. Mina míaku kutri akpɔ eta. Ne míewɔ esia la, míadze na agbe mavɔ ƒe nunana wɔnuku la mlɔeba.—Mat. 24:13.

8, 9. Le Yesu ƒe anyigbadzisubɔsubɔdɔa me la, nu kae nye eƒe taɖodzinu vevitɔ? Alakpadzixɔse kae Yesu anya gbe keŋkeŋ?

⁸ Esi míele Yesu ƒe gbedodoɖa si le Yohanes ta 17 me dzrom la, míava kpɔe be menye eƒe apostoloawo koe wòlɔ̃ vevie o, ke elɔ̃ mí ame siwo katã va zu eƒe nusrɔ̃lawo hã vevie. (Yoh. 17:20) Ke hã ele be míanyae be, menye míaƒe ɖeɖekpɔkpɔe nye nu si ŋu Yesu tsi dzi ɖo wu o. Tso eƒe anyigbadzisubɔsubɔdɔa ƒe gɔmedzedze va se ɖe eƒe nuwuwu la, eƒe taɖodzinu vevitɔe nye be yeakɔ ye Fofo ƒe ŋkɔ ŋu ahado ŋkɔa ɖe dzi. Le kpɔɖeŋu me, esi Yesu nɔ nu si ta wòva anyigba dzi ɖo me ɖem le Nazaret ƒe ƒuƒoƒea la, exlẽ le Yesaya ƒe agbalẽa me be: “Yehowa ƒe gbɔgbɔ le dzinye, elabena esi ami nam be magblɔ nya nyui na ame dahewo.” Ðikeke mele eme o be Yesu anya yɔ Mawu ƒe ŋkɔa nyuie esime wònɔ ŋɔŋlɔ siawo xlẽm.—Luka 4:16-21.

⁹ Ɣeyiɣi didi aɖe hafi Yesu nava anyigba dzi la, Yuda-subɔsubɔhakplɔlawo na amewo dzudzɔ Mawu ƒe ŋkɔa zazã. Míate ŋu aka ɖe edzi be Yesu gbe woƒe alakpadzixɔse sia keŋkeŋ. Egblɔ na subɔsubɔhakplɔla mawo be: “Meva le Fofonye ƒe ŋkɔ me, gake miexɔm o; ne ame bubu aɖe va le ye ŋutɔ ƒe ŋkɔ me la, anye ne miaxɔ ame ma ya.” (Yoh. 5:43) Emegbe ŋkeke ʋɛ aɖewo hafi Yesu naku la, egaɖe nu si nye nu vevitɔ nɛ le agbe me la gblɔ esi wòdo gbe ɖa be: “Fofo, do wò ŋkɔ ɖe dzi.” (Yoh. 12:28)  Eya ta mewɔ nuku o be Yesu gblɔ ale si wòtsi dzi ɖe Fofoa ƒe ŋkɔ ŋu vevie la zi geɖe le eƒe gbedodoɖa wɔdɔɖeamedzi sia si me dzrom míele la me.

10, 11. (a) Aleke Yesu ɖe Fofoa ƒe ŋkɔ fiae? (b) Susu ka tae Yesu yomedzelawo di be amewo nanya Yehowa ƒe ŋkɔa?

¹⁰ Yesu do gbe ɖa be: ‘Meɖe wò ŋkɔ la fia ame siwo nèɖe tso xexea me nam. Tɔwòe wonye, eye nètsɔ wo nam, eye wowɔa wò nya la dzi. Azɔ hã, mele dzodzom le xexea me, gake woawo ya wole xexea me, eye megbɔna gbɔwò. Fofo kɔkɔe, kpɔ wo ta le wò ŋutɔ wò ŋkɔ si nènam la ta, bene woawɔ ɖeka abe ale si míawo hã míewɔ ɖeka ene.’—Yoh. 17:6, 11.

¹¹ Esi Yesu ɖe Fofoa ƒe ŋkɔ fia eƒe nusrɔ̃lawo la, ewɔ nu si yi ŋgɔ wu ŋkɔa yɔyɔ ko. Ekpe ɖe wo ŋu wonya ame si tututu Yehowa nye. Ena wonya Mawu ƒe nɔnɔme wɔnukuawo kple ale si wòwɔa nu ɖe mía ŋu lɔlɔ̃tɔe. (2 Mose 34:5-7) Gawu la, Yesu yi edzi le kpekpem ɖe eyomedzelawo ŋu tso dziƒo be woana amewo nanya Yehowa ƒe ŋkɔa le anyigba la katã dzi. Susu ka tae? Be woaƒo nusrɔ̃la geɖewo nu ƒu hafi nuɖoanyi vɔ̃ɖi sia nawu enu. Ɣemaɣi la, Yehowa awɔ ŋkɔ gã aɖe ŋutɔ na eɖokui ne eɖe eƒe ɖasefo wɔnuteƒewo!—Eze. 36:23.

12. Nu etɔ̃ kawoe wòle vevie be míawɔ hafi akpɔ dzidzedze le agbeɖeɖedɔa me?

¹² Esime Yesu nɔ anyigba dzi la, eku kutri vevie be yeakpe ɖe yeƒe nusrɔ̃lawo ŋu woaɖu woƒe gbɔdzɔgbɔdzɔwo dzi. Esia le vevie ŋutɔ hafi woate ŋu awu dɔ si gɔme Yesu dze la nu. Yesu do gbe ɖa be: “Abe ale si nèdɔm ɖe xexea me ene la, nye hã medɔ wo ɖe xexea me.” Be woakpɔ dzidzedze le agbeɖeɖedɔ sia me la, Yesu do gbe ɖa tso nu vevi etɔ̃ aɖewo siwo wòle be woawɔ ŋu. Gbã, edo gbe ɖa be yeƒe nusrɔ̃lawo naɖe wo ɖokuiwo ɖa tso Satana ƒe xexe makɔmakɔ sia me. Evelia, edo gbe ɖa be woanɔ agbe ɖe Mawu ƒe Nya la me nyateƒea nu ale be woanɔ kɔkɔe. Etɔ̃lia, Yesu ƒo koko enuenu be ɖekawɔwɔ nanɔ yeƒe nusrɔ̃lawo dome abe ale si wòle le ye kple ye Fofo dome ene. Ehiã be mía dometɔ ɖe sia ɖe nadzro eɖokui me ahabia eɖokui be: ‘Ðe mele agbe nɔm ɖe Yesu ƒe biabia etɔ̃ siawo nua?’ Yesu ka ɖe edzi be ne yeƒe nusrɔ̃lawo wɔ esiawo la, ‘xexea anyae be Mawue dɔ ye ɖa.’—Mixlẽ Yohanes 17:15-21.

13. Aleke woɖo Yesu ƒe gbedodoɖaa ŋu le ƒe alafa gbãtɔ M.Ŋ. me?

¹³ Ne míedzro Biblia gbalẽ si kplɔ Nyanyuigbalẽ eneawo ɖo, si nye Apostoloawo ƒe Dɔwɔwɔwo me la, míakpɔe be woɖo Yesu ƒe gbedodoɖaa ŋu. Yudatɔwo kple ame siwo menye Yudatɔwo o, kesinɔtɔwo kple ame dahewo, kluviwo kpakple woƒe aƒetɔwoe ƒo ƒu wɔ ƒe alafa gbãtɔ me Kristo hamea. Kpɔ ale si gbegbe mama ate ŋu anɔ wo domee hafi ɖa! Ke hã wowɔ ɖeka ale gbegbe be wotsɔ wo sɔ kple ŋutinu vovovo siwo le amegbetɔ ƒe ŋutilã ŋu, eye Yesue nye woƒe ta. (Ef. 4:15, 16) Ðekawɔwɔ wɔnuku kae nye esi le wo dome le Satana ƒe xexe si me mama le ŋutɔ me! Míatsɔ esia ŋuti kafukafu katã ana Yehowa, ame si wɔ esia to eƒe gbɔgbɔ kɔkɔe sẽŋu la dzi.—1 Kor. 3:5-7.

14. Aleke Yehowa ɖo Yesu ƒe gbedodoɖaa ŋu egbeae?

¹⁴ Nublanuitɔe la, ɖekawɔwɔ nyui sia meyi edzi nɔ anyi le apostoloawo ƒe ku megbe o. Ke boŋ xɔsegbegbe gã si ŋu nya wogblɔ ɖi la he Kristodukɔa ƒe kɔmamawo vɛ. (Dɔw. 20:29, 30) Gake le ƒe 1919 me la, Yesu ɖe eyomedzela  amesiaminawo tso alakpasubɔsubɔhawo ƒe kluvinyenye me, eye wòƒo wo nu ƒu le “ɖekawɔwɔ ƒe nublanu deblibo” me. (Kol. 3:14) Nu kae do tso gbeƒãɖeɖedɔ si wɔm wole ɖekae me? Wohe “alẽ bubuwo,” siwo wu miliɔn adre, “tso dukɔwo kple towo kple ame ƒomeviwo kpakple gbegbɔgblɔwo katã me” la vɛ ale be wo kple Mawu ƒe amesiaminawo va zu alẽha wɔɖeka. (Yoh. 10:16; Nyaɖ. 7:9) Yesu ƒe gbedodoɖa be “xexea nanyae be [wò Yehowa ye] dɔm ɖa, eye be èlɔ̃ wo abe ale si nèlɔ̃m ene” la ƒe ŋuɖoɖo ɖedzesi kae nye esi!—Yoh. 17:23.

15. Nu tɔxɛ kae Yesu bia na eyomedzela amesiaminawo?

¹⁵ Le Nisan 14 ma ƒe fiẽ me la, Yesu de bubu gã eƒe apostoloawo ŋu esi wòbla nu kpli wo be woaɖu fia kpli ye le yeƒe Fiaɖuƒea me. (Luka 22:28-30; Yoh. 17:22) Eya ta Yesu do gbe ɖa ɖe ame siwo katã ava zu eyomedzela amesiaminawo ta be: “Fofo, ku ɖe nu si nètsɔ nam ŋuti la, medi be, afi si mele la, woawo hã nanɔ gbɔnye, bene woakpɔ nye ŋutikɔkɔe si nètsɔ nam, elabena èlɔ̃m do ŋgɔ na xexea ƒe gɔmeɖoanyiɣi.” (Yoh. 17:24) Yesu ƒe alẽ bubuawo kpɔa dzidzɔ ɖe teƒeɖoɖo ma ŋu eye mebiãa ŋu na wo o, eye esia ganye ɖekawɔwɔ si le Kristotɔ vavã siwo katã le anyigba dzi dome egbea ƒe kpeɖodzi bubu.

16, 17. (a) Le Yesu ƒe gbedodoɖaa ta ƒoƒo me la, nu kae wògblɔ be yeayi edzi awɔ? (b) Nu kae wòle be míaɖo kplikpaa awɔ?

¹⁶ Le alakpanya siwo subɔsubɔhakplɔlawo gblɔna na amewo egbea ta la, xexea me nɔla akpa gãtɔ ŋea aɖaba ƒua kpeɖodzi siwo dze ƒãa be dukɔ wɔɖeka aɖe le Yehowa si, si me tɔwo nya eyama nyuie la dzi. Nenema kee wònɔ le Yesu ƒe ŋkekea hã me. Eya ta eƒo eƒe gbedodoɖaa ta kple nya dedzigbɔname siawo be: “Fofo dzɔdzɔe, nyateƒee, xexea menya wò o; gake nye ya menya wò, eye ame siawo va nyae be wòe dɔm ɖa. Eye mena wonya wò ŋkɔ la, eye mana woanyae, ale be lɔlɔ̃ si nètsɔ lɔ̃m la nanɔ wo me, eye manɔ ɖekawɔwɔ me kpli wo.”—Yoh. 17:25, 26.

¹⁷ Mía dometɔ kae malɔ̃ ɖe edzi be Yesu wɔ nu le ɖekawɔwɔ me kple eƒe gbedodoɖaa o? Abe hamea ƒe Ta ene la, eyi edzi le kpekpem ɖe mía ŋu be míana amewo nanya Fofoa ƒe ŋkɔ kple eƒe tameɖoɖowo. Mina míayi edzi abɔbɔ ɖe eƒe tanyenye te, eye míayi edzi awɔ ɖe se si wòde na mí be míaɖe gbeƒã ahawɔ nusrɔ̃lawo la dzi dzonɔamemetɔe. (Mat. 28:19, 20; Dɔw. 10:42) Neva eme be míadze agbagba akpɔ míaƒe ɖekawɔwɔ xɔasia ta. Ne míewɔe alea la, ke míele agbe nɔm ɖe Yesu ƒe gbedodoɖaa nu hena Yehowa ƒe ŋkɔa dodo ɖe dzi kple míaƒe dzidzɔkpɔkpɔ mavɔ.