1, 2. (a) Aɖaŋu kae gbɔgbɔ ʋã Salomo wòɖo na sɔhɛwo? (b) Nu ka tae wòle be Kristotɔ tsitsi siwo xɔ tso ƒe 50 heyina hã natsɔ ɖe le Salomo ƒe aɖaŋuɖoɖoa me?

GBƆGBƆ ʋã Fia Salomo wòɖo aɖaŋu na sɔhɛwo be: ‘Ðo ŋku Wɔwòla Gã la dzi . . . hafi ne ŋkeke vɔ̃wo nava.’ Nu kae nye ‘ŋkeke vɔ̃’ mawo? Salomo zã hakpanya wɔdɔɖeamedziwo tsɔ ɖɔ nɔnɔme sesẽ siwo vana le ame ƒe tsitsime—woawoe nye ale si ame tsitsiwo ƒe asiwo nɔa ƒoƒom, ŋusẽ meganɔa woƒe afɔwo ŋu o, woƒe aɖuwo tuna, nukpɔkpɔ zua dɔ na wo, womegasea nu nyuie o, woƒe ta ƒoa wɔ, eye woxana gobaa. Mele be ame aɖeke nalala ʋuu va se ɖe xaxaɣi mawo hafi adze Yehowa subɔsubɔ gɔme o.—Mixlẽ Nyagblɔla 12:1-5.

² Ŋusẽ geɖe gale Kristotɔ siwo xɔ tso ƒe 50 heyina la ŋu. Woƒe ta anya ƒo wɔ ya, gake ɖewohĩ womekpɔ le lãmesẽkuxi sesẽ siwo ŋu Salomo ƒo nu tsoe la me tom haɖe o. Ðe aɖaŋu si woɖo na sɔhɛwo be ‘woaɖo ŋku wo Wɔla Gã dzi’ la ate ŋu aɖe vi na Kristotɔ tsitsiwo hã? Gbã la, nu kae aɖaŋuɖoɖo sia fia?

3. Nu kae ŋkuɖoɖo mía Wɔla Gã la dzi fia?

 ³ Togbɔ be ɖewohĩ míele Yehowa subɔm ƒe geɖewoe nye esia hã la, anyo be míadi ɣiyiɣi ade ŋugble le mía Wɔla la ƒe gãnyenye ŋu tso ɣeyiɣi yi ɣeyiɣi. Ðe agbea mewɔ nuku ŋutɔ oa? Amegbetɔwo mate ŋu ase ale si tututu Yehowa wɔ nu gbagbewoe gɔme bliboe gbeɖe o. Yehowa wɔ nuwo hamehame ale gbegbe be míate ŋu anɔ vivi sem le agbe me tegbee. Ne míedea ŋugble le Yehowa ƒe nuwɔwɔwo ŋu la, míaƒe ŋudzedzekpɔkpɔ ɖe eƒe lɔlɔ̃, nunya kple ŋusẽ ŋu adzi ɖe edzi. (Ps. 143:5) Gake be míaɖo ŋku mía Wɔla Gã la dzi fia hã be míade ŋugble le nu siwo wòdi tso mía si ŋu. Ŋugbledede le nu siawo katã ŋu ʋãa mí be míada akpe na mía Wɔla la eye míawɔ míaƒe ŋutete katã le esubɔsubɔ me le míaƒe agbemeŋkekewo katã me.—Nyagb. 12:13.

4. Nya kae Kristotɔ siwo si ƒe geɖe ƒe nuteƒekpɔkpɔ su ate ŋu abia wo ɖokui? Nu ka tae?

⁴ Ne ƒe geɖe ƒe nuteƒekpɔkpɔ su asiwò la, bia nya vevi sia ɖokuiwò: ‘Nu kae mazã nye agbea atsɔ awɔe fifia esi ŋusẽ gale ŋunye?’ Abe Kristotɔ kpɔnuteƒe ene la, mɔnukpɔkpɔ geɖe su asiwò, si mesu ame bubuwo si o. Le kpɔɖeŋu me, àte ŋu afia nu siwo nèsrɔ̃ tso Yehowa gbɔ la sɔhɛwo. Àte ŋu ado ŋusẽ ame bubuwo to nuteƒekpɔkpɔ siwo su asiwò le Mawu subɔsubɔ me la gbɔgblɔ na wo me. Fia David do gbe ɖa be mɔnukpɔkpɔ nasu ye si yeawɔ esia. Egblɔ be: “Mawu, èfia num tso nye ɖevime ke . . . Eya ta, Mawu, mègagblẽm ɖi o va se ɖe nye amegãkuku kple nye wɔƒoƒo me, va se ɖe esime maɖe gbeƒã wò alɔ na dzidzimeviwo kple wò ŋusẽ na megbeviwo katã!”—Ps. 71:17, 18.

5. Nu kae Kristotɔ tsitsiwo ate ŋu awɔ be nu siwo wosrɔ̃ naɖe vi na ame bubuwo?

⁵ Nu kae nàwɔ be nunya si su asiwò ƒe geɖe la naɖe vi na ame bubuwo? Ðe nàte ŋu akpe sɔhɛ Mawu subɔlawo va aƒewò me be miaɖo dze tuameɖowoa? Ðe nàte ŋu akpe wo be woawɔ dɔ kpli wò le gbeƒãɖeɖedɔa me be woakpɔ dzidzɔ si kpɔm nèle le Yehowa subɔsubɔ me la teƒea? Elihu si nɔ anyi le blema gblɔ be: “Tsitsi neƒo nu, eye ƒe geɖe neɖe nunya fia!” (Hiob 32:7) Apostolo Paulo xlɔ̃ nu nyɔnu Kristotɔ tsitsiwo be woade dzi ƒo na ame bubuwo to nya kple kpɔɖeŋu me. Eŋlɔ bena: “Nyɔnu tsitsiwo . . . [nanye] nu nyui fialawo.”—Tito 2:3.

6. Nu ka tae mele be Kristotɔ siwo si ƒe geɖe ƒe nuteƒekpɔkpɔ su nabu akpa si wowɔna la nu tsɛ o?

⁶ Ne Kristotɔ kpɔnuteƒe ye nènye la, ke nu geɖe li nàte ŋu awɔ atsɔ akpe ɖe amewo ŋu. Bu nu siwo nènya fifia siwo mènya le ƒe 30 alo 40 siwo va yi me o ŋu kpɔ. Èva nya ale si tututu nàwɔ Biblia me gɔmeɖosewo ŋu dɔ le agbe me. Eye nènya ale si nàfia Biblia me nyateƒea wòade amewo ƒe dzi gbɔ wu. Ne hamemetsitsie nènye la, ènya ale si nàkpe ɖe nɔvi siwo ɖe afɔ baɖa la ŋu. (Gal. 6:1) Ðewohĩ èsrɔ̃ ale si nàkpɔ hamea ƒe dɔ vovovowo, takpekpe ƒe dɔwɔƒewo, alo Fiaɖuƒe Akpata tutudɔwo dzi. Ate ŋu anye be ènya ale si nàde dzi ƒo na ɖɔktawo be woazã dɔdamɔnu siwo me womezãa ʋu le o. Ne ƒe ʋɛ aɖewo koe nye esia nèsrɔ̃ nyateƒea hã la, nuteƒekpɔkpɔ nyuiwo su asiwò. Le kpɔɖeŋu me, ne èhe viwòwo wotsi la, ekema aɖaŋu siwo aɖe vi geɖe la su asiwò. Kristotɔ tsitsiwo ate ŋu anye dzideƒotsoƒe gã aɖe na Yehowa ƒe amewo to nufiafia, ŋgɔxɔxɔ kple ŋusẽdodo nɔviwo me.—Mixlẽ Hiob 12:12.

7. Hehe nyui kawoe Kristotɔ tsitsiwo ate ŋu ana sɔhɛwo?

⁷ Aleke nàte ŋu awɔ ŋutete si le asiwò la ŋu dɔ nyuie wu? Àte ŋu afia sɔhɛwo  ale si woadze Biblia-nusɔsrɔ̃ gɔme ahayi edzii. Ne nɔvinyɔnue nènye la, ɖe nàte ŋu aɖo aɖaŋu na vidada siwo si vihehe ƒe nuteƒekpɔkpɔ mesu o ku ɖe ale si woada asɔ le mawusubɔsubɔ me esime wole be lém na wo viwo hã la ŋua? Ne nɔviŋutsue nènye la, ɖe nàte ŋu afia nɔviŋutsu sɔhɛwo ale si woaƒo nuƒo dzonɔamemetɔe ahaɖe gbeƒã nya nyuia nyuie wua? Ðe nàte ŋu afia ale si nèyina ɖakpɔa Kristotɔ tsitsiwo ɖa hedoa ŋusẽ woƒe xɔse la woa? Ne ŋusẽ mele ŋuwò abe tsã ene o hã la, mɔnukpɔkpɔ nyui geɖe ʋu ɖi na wò be nàna hehe sɔhɛwo. Mawu ƒe Nya la gblɔ be: “Ðekakpuiwo ƒe atsyɔ̃ enye woƒe ŋusẽ, eye ta ɣi enye amegãɖeɖiwo ƒe bubu.”—Lod. 20:29.

8. Nu kae apostolo Paulo wɔ le eƒe tsitsime?

⁸ Apostolo Paulo subɔ Mawu kple eƒe ŋusẽ katã le eƒe tsitsime gɔ̃ hã. Kaka ɣeyiɣi si me woɖe asi le eŋu le gaxɔ me le Roma le ƒe 61 M.Ŋ. me naɖo la, eku kutri geɖe hedo dzi to dodokpɔ geɖewo me le dutanyanyuigbɔgblɔdɔa me, eye ate ŋu atiae be yeanɔ Roma kpoo ahanɔ gbeƒã ɖem hafi. (2 Kor. 11:23-27) Ðikeke mele eme o be ado dzidzɔ na nɔvi siwo le dugã ma me be Paulo nayi edzi anɔ yewo gbɔ ahanɔ kpekpem ɖe yewo ŋu. Gake Paulo kpɔe be hiahiã geɖe wu le dukɔ bubuwo me. Eya ta eɖoe be yeayi dutanyanyuigbɔgblɔdɔa dzi. Eya kple Timoteo kpakple Tito wozɔ mɔ yi Efeso, emegbe woyi Kreta, eye ɖewomahĩ ema megbee woyi Makedonia. (1 Tim. 1:3; Tito 1:5) Míenya ne eyi Spania hã o, gake eɖoe be yeayi hafi.—Rom. 15:24, 28.

9. Ɣekaɣie Petro anya ʋu yi afi si hiahiã geɖe wu le? (Kpɔ nɔnɔmetata si le nyati sia ƒe gɔmedzedze.)

⁹ Apostolo Petro anya xɔ wu ƒe 50 esime wòʋu yi afi si hiahiã geɖe wu le. Aleke míewɔ nya? Ne ƒe ɖekae eya kple Yesu woxɔ alo ne ɖewohĩ etsi wu Yesu la, ke exɔ abe ƒe 50 ene esime eya kple apostolo bubuawo kpe ta le Yerusalem le ƒe 49 M.Ŋ. me. (Dɔw. 15:7) Ɣeyiɣi aɖe le kpekpe ma megbe la, Petro yi ɖanɔ Babilon, eye ɖikeke mele eme o be, eyi kple susu be yeaɖe gbeƒã na Yudatɔ gbogbo siwo nɔ nuto ma me. (Gal. 2:9) Afi mae wònɔ esi wòŋlɔ eƒe lɛta gbãtɔ le ƒe 62 M.Ŋ. me. (1 Pet. 5:13) Dutanyigba dzi nɔnɔ mele bɔbɔe o, gake Petro mena tsitsi xe mɔ nɛ be dzidzɔ si wòakpɔ tso Yehowa subɔsubɔ bliboe me la to eŋu o.

10, 11. Gblɔ nuteƒekpɔkpɔ si ku ɖe nɔvi aɖewo siwo ʋu yi ɖasubɔ le afi si hiahiã geɖe wu le le woƒe tsitsime ŋu.

¹⁰ Egbea Kristotɔ geɖe siwo xɔ ƒe 50 heyina la kpɔnɛ be yewoƒe nɔnɔmewo trɔ eye yewoate ŋu awɔ mɔnukpɔkpɔ yeyewo ŋu dɔ asubɔ Yehowa geɖe wu. Wo dometɔ aɖewo ʋu yi afi si hiahiã geɖe wu le. Le kpɔɖeŋu me, Robert gblɔ be: “Nye kple srɔ̃nye míexɔ abe ƒe 55 ene esi míekpɔe be míate ŋu awɔ mɔnukpɔkpɔ yeye siwo ʋu ɖi na mí la ŋu dɔ. Mía vi ɖeka kolia megale mía gbɔ o, dzila tsitsiwo hã megale mía si míakpɔ wo dzi o, eye domenyinu sue aɖe hã su mía si. Mekpɔe be ne míedzra míaƒe aƒea la, míate ŋu axe mía ŋu fewo katã eye ga asusɔ na mí míazã va se ɖe esime maxɔ nye dzudzɔxɔledɔmega. Míesee be ame geɖe lɔ̃na be woasrɔ̃ Biblia kpli yewo le Bolivia, eye nuwo mexɔ asi boo hã le afi ma o. Eya ta míetso nya me be míaʋu ayi. Tɔtrɔ ɖe nɔnɔmeawo ŋu le teƒe yeyea menɔ bɔbɔe o. Nuwo to vovo na ale si wonɔ le Dziehe Amerika. Gake míaƒe agbagbadzedzewo mezu dzodzro o.”

¹¹ Robert gblɔ kpee be: “Fifia míaƒe agbe katã ku ɖe subɔsubɔdɔa ŋu. Ame siwo míesrɔ̃ Biblia kplii la dometɔ aɖewo xɔ nyɔnyrɔ. Míesrɔ̃ Biblia kple ƒome dahe aɖe si nɔ kɔƒe si gbɔ didi agbadroƒe geɖe la me. Gake ƒome ma me tɔwo zɔa mɔ  didi ma vaa kpekpe le dugã me kwasiɖa sia kwasiɖa. Àte ŋu akpɔ dzidzɔ si míekpɔ esi ƒome ma wɔ ŋgɔyiyi eye wo vi tsitsitɔa zu mɔɖela gɔ̃ hã la le susu mea?”

12, 13. Esi Brian xɔ dzudzɔ le dɔme la, nu kae eya kple srɔ̃a wowɔ?

¹² Dutagbedolawo ƒe hamewo kple ƒuƒoƒowo ate ŋu akpɔ viɖe geɖe tso kpɔɖeŋu siwo nɔviŋutsu kple nɔvinyɔnu tsitsiwo ɖona me. Eye dɔwɔwɔ le anyigbamama mawo me tea ŋu nyea dzidzɔ. Le kpɔɖeŋu me, Brian gblɔ be: “Esi mexɔ ƒe 65, si nye ƒe si Britaintɔwo xɔa dzudzɔ le dɔme la, nye kple srɔ̃nye míegakpɔa dzidzɔ aɖeke o. Mía viwo tsi dzo le aƒe me, eye ƒãa hafi míekpɔa ɖetsɔlemetɔwo srɔ̃a Biblia kpli wo. Gake gbe ɖeka la, medo go Chinatɔ aɖe si va nɔ numekuku wɔm le yunivɛsiti sukukpodzi. Mekpee na kpekpea eye wòlɔ̃ va, eye medze Biblia sɔsrɔ̃ gɔme kplii. Kwasiɖa ʋɛ aɖewo megbe la, ekplɔ eƒe sukuhati Chinatɔ bubu va kpekpea. Kwasiɖa eve megbe la, ekplɔ ame etɔ̃lia vɛ eye emegbe wòkplɔ ame enelia vɛ.

¹³ “Esi Chinatɔ atɔ̃lia si wòkplɔ vɛ bia be masrɔ̃ Biblia kpli ye la, megblɔ na ɖokuinye be, ‘Ne mexɔ ƒe 65 hã la, esia mefia be maxɔ dzudzɔ le Yehowa subɔsubɔ me o.’ Eya ta mebia srɔ̃nye si metsi wu ƒe eve la be adi be yeasrɔ̃ Chinagbe mahã. Míezã kasɛt si dzi wolé Chinagbe ɖo tsɔ srɔ̃ Chinagbea. Ƒe ewoe nye esi va yi. Gbeƒãɖeɖe na dutagbedolawo na míese le mía ɖokui me be míegale ko abe ɖekakpui kple ɖetugbui ene. Va se ɖe fifia la, míesrɔ̃ Biblia kple Chinatɔ 112 sɔŋ! Wo dometɔ akpa gãtɔ le kpekpeawo dem. Wo dometɔ ɖeka nye mɔɖela hele subɔsubɔm kpli mí.”

14. Nu ka nyanyae ana Kristotɔ tsitsiwo nanɔ dzidzɔ kpɔm? Eye aleke Paulo ƒe kpɔɖeŋua ade dzi ƒo na woe?

¹⁴ Menye Kristotɔ siwo xɔ ƒe 50 heyina la katãe nɔnɔmea ɖea mɔ na wokekea woƒe subɔsubɔdɔa ɖe enu alea le Yehowa  subɔsubɔ me o. Lãmesẽkuxiwo le ame aɖewo ŋu, eye ɖewo le wo viwo alo wo dzila tsitsiwo dzi kpɔm. Gake àte ŋu akpɔ dzidzɔ ne ènya be Yehowa dea asixɔxɔ akpa si wɔm nèle le eƒe subɔsubɔdɔa me ŋu. Eya ta le esi nàtsi dzimaɖi ɖe nu siwo mète ŋu le wɔwɔm o ŋu teƒe la, na nu si wɔm nèle fifia la nadze ŋuwò. Bu apostolo Paulo ƒe kpɔɖeŋua ŋu kpɔ. Wosikae ɖe aƒe me ƒe geɖe, si wɔe be mete ŋu yi eƒe dutanyanyuigbɔgblɔdɔa dzi o. Gake ɣesiaɣi si amewo va egbɔ la, edzroa Ŋɔŋlɔawo me kpli wo eye wòdoa ŋusẽ woƒe xɔse.—Dɔw. 28:16, 30, 31.

15. Nu ka tae asixɔxɔ gã le Kristotɔ tsitsiwo ŋu?

¹⁵ Yehowa kpɔa ŋudzedze ɖe nu si Kristotɔ siwo tsi le ƒe me ate ŋu awɔ le eƒe subɔsubɔdɔa me ŋu vavã. Togbɔ be Salomo gblɔ be ŋkeke vɔ̃ siwo vana le ame ƒe tsitsime menye ɣeyiɣi nyuitɔ o hã la, Yehowa kpɔa ŋudzedze ɖe nu siwo Kristotɔ tsitsiwo wɔna tsɔ kafunɛ ŋu. (Luka 21:2-4) Hamewo hã kpɔa ŋudzedze ɖe nɔvi siwo subɔ nuteƒewɔwɔtɔe ƒe geɖe la ƒe kpɔɖeŋu nyuiwo ŋu.

16. Mɔnukpɔkpɔ kawoe manya su Hana si o, gake nu kae wòte ŋu wɔ le Mawu subɔsubɔ me?

¹⁶ Biblia ka nya ta be nyɔnu tsitsi aɖe si ŋkɔe nye Hana yi edzi subɔ Yehowa nuteƒewɔwɔtɔe le eƒe tsitsime gɔ̃ hã. Enye ahosi si xɔ ƒe 84 esime wodzi Yesu. Kaka Yesu nadze eƒe subɔsubɔdɔa gɔme la, Hana anya ku xoxo, eya ta anɔ eme be mɔnukpɔkpɔ mesu esi wòva zu Yesu yomedzela, alo ame si wotsɔ gbɔgbɔ kɔkɔe si ami na, alo wòɖe gbeƒã Fiaɖuƒeŋutinya nyuia o. Gake Hana wɔ nu si wòate ŋui kple dzidzɔ. ‘Eƒe afɔ metsona le gbedoxɔa me gbeɖe o, eye wòwɔa subɔsubɔdɔ kɔkɔe zã kple keli.’ (Luka 2:36, 37) Anɔ eme be ne nunɔla le dzudzɔ ʋeʋĩ dom le ŋdi kple fiẽ me la, Hana nɔa ameha la dome le xɔxɔnua henɔa gbe dom ɖa le susu me, ɖewohĩ hena gaƒoƒo ɖeka kple afã. Esi wòkpɔ Yesu vidzĩa la, eƒo nu “tso ɖevi la ŋu na ame siwo katã nɔ Yerusalem ƒe ɖeɖe la lalam.”—Luka 2:38.

17. Aleke míate ŋu akpe ɖe mía nɔvi Kristotɔ tsitsiwo kple nɔvi siwo le dɔ lém la ŋu?

¹⁷ Egbea, ele be míadi mɔnukpɔkpɔwo akpe ɖe mía nɔvi Kristotɔ tsitsiwo kple nɔvi siwo le dɔ lém ŋu. Wo dometɔ aɖewo adi vevie be yewoade kpekpeawo kple takpekpewo, gake ɣeaɖewoɣi la, wometea ŋui o. Le teƒe aɖewo la, hamewo wɔa ɖoɖo be ame tsitsi siawo naɖo to kpekpeawo me nyawo to telefon dzi. Esia manya wɔ le teƒe aɖewo o. Ke hã, Kristotɔ siwo mate ŋu ade kpekpeawo o ate ŋu akpe asi ɖe tadedeagu vavãtɔ ŋu. Le kpɔɖeŋu me, woate ŋu anɔ gbe dom ɖa be nuwo nadze edzi nyuie na Kristo hamea.—Mixlẽ Psalmo 92:14, 15.

18, 19. (a) Mɔ ka nue Kristotɔ tsitsiwo ƒe kpɔɖeŋu ate ŋu ade dzi ƒo na ame bubuwo? (b) Ame kawoe ate ŋu awɔ ɖe aɖaŋu si Biblia ɖo be, ‘Ðo ŋku Wɔwòla Gã dzi’ la dzi?

¹⁸ Kristotɔ tsitsiwo manya de dzesi ale si gbegbe woƒe kpɔɖeŋu dea dzi ƒo na amewoe o. Le kpɔɖeŋu me, togbɔ be Hana subɔ Mawu nuteƒewɔwɔtɔe ƒe gbogbo mawo hã la, anɔ eme be menyae be yeƒe kpɔɖeŋua ade dzi ƒo na amewo le ƒe alafa geɖewo megbe o. Woŋlɔ lɔlɔ̃ si nɔ Hana si na Yehowa la ŋu nya ɖe Ŋɔŋlɔawo me. Ðikeke mele eme o be lɔlɔ̃ si le asiwò na Mawu la tsi dzi me na wò haxɔsetɔwo. Mewɔ nuku o be Mawu ƒe Nya la gblɔ be: “Atsyɔ̃fiakuku enye ta ƒowɔ, dzɔdzɔenyenye ƒe mɔ dzi wokpɔnɛ lena”!—Lod. 16:31.

¹⁹ Seɖoƒe li na nu si mía dometɔ ɖe sia ɖe ate ŋu awɔ le Yehowa subɔsubɔ me. Gake mina mía dometɔ siwo ŋu ŋusẽ kpɔtɔ le la naɖoe kplikpaa awɔ nya siawo siwo tso gbɔgbɔ me la dzi be: ‘Ðo ŋku Wɔwòla Gã la dzi hafi ne ŋkeke vɔ̃wo nava.’—Nyagb. 12:1.