Ðe nèxlẽ Gbetakpɔxɔ ƒe tata siwo do nyitsɔ laa la beléletɔea? Ekema kpɔe ɖa be àte ŋu aɖo biabia siwo gbɔna ŋu hã:

Ɣekaɣie wowua Ŋutitotolẽvi la le blema le Nisan 14 lia dzi?

Biblia gɔmeɖeɖe aɖewo gblɔ be woawu alẽvia “le fiẽ eveawo dome,” si nye esime xexea me le tsyɔtsyɔm alo le fiẽ me—si fia be woawu alẽvia le ɣeɖoto megbe esime viviti medo keŋkeŋ haɖe o. (2 Mose 12:6)—12/15, axa 18-19.

Biblia me gɔmeɖose vevi kawoe akpe ɖe sɔhɛwo ŋu woawɔ nyametsotso nyuiwo?

Gɔmeɖose etɔ̃awoe nye (1) Di Fiaɖuƒe la kple Mawu ƒe dzɔdzɔenyenye gbã. (Mat. 6:19-34) (2) Kpɔ dzidzɔ le amewo subɔsubɔ me. (Dɔw. 20:35) (3) Subɔ Yehowa bliboe le wò sɔhɛme. (Nyagb. 12:1)—1/15, axa 19-20.

Sɔdola ene kawoe le du dzi tso ƒe 1914 me?

Yesu, si nye sɔ ɣi la dola ho henya Satana kple eƒe gbɔgbɔ vɔ̃wo ɖa le dziƒowo. Sɔ si biã hɛ̃ la kple edola tsi tre ɖi na aʋawɔwɔ siwo le nu gblẽm le amegbetɔƒomea ŋu. Sɔ yibɔ la kple edola le tsitre ɖi na dɔwuame. Sɔ si fu kpii la kple edola tsɔa dɔvɔ̃ wua ame miliɔn geɖewoe. (Nyaɖ. 6:2-8)—2/1, axa 6-7.

Ɣekaɣie “Alẽvi la ƒe srɔ̃ɖeɖe la” aɖo? (Nyaɖ. 19:7)

Woawɔ “Alẽvi la ƒe srɔ̃ɖeɖe la” ne Fia, Yesu Kristo wu eƒe aʋadziɖuɖu nu, si fia be, ne wotsrɔ̃ Babilon Gã la eye wowɔ Harmagedon-ʋa la vɔ megbe.—2/15, axa 10.

Susu vevi kawo tae ƒe alafa gbãtɔ me Yudatɔwo “nɔ mɔkpɔkpɔ me” na Mesia la? (Luka 3:15)

Mímate ŋu agblɔ kple kakaɖedzi be gɔmesese si su mía si le Daniel ƒe nyagblɔɖi si ku ɖe Mesia ŋu la kee nɔ Yudatɔ siwo nɔ anyi le ƒe alafa gbãtɔ me la si o. (Dan. 9:24-27) Ke hã woanya se nya siwo mawudɔlaa gblɔ na alẽkplɔlaawo alo nya siwo nyɔnu nyagblɔɖila Hana gblɔ esime wòkpɔ vidzĩ Yesu le gbedoxɔa me. Ɣletivimefakala aɖewo hã va nɔ “Yudatɔwo ƒe fia si wodzi” la dim. (Mat. 2:1, 2) Emegbe Yohanes Amenyrɔɖetsimela la na amewo nya be Kristo la ado kpuie.—2/15, axa 26-27.

Nu kae míawɔ be míaƒe nyawo manye Ɛ̃ aganye Ao o? (2 Kor. 1:18)

Ate ŋu adzɔ be nɔnɔme siwo ŋu màte ŋu awɔ naneke le o nawɔe be nàgli ɖoɖo aɖe si nèwɔ kple ame aɖe ɣeaɖewoɣi. Gake ele be nàwɔ nu sia nu si nàte ŋui awɔ ŋugbe siwo nèdo alo nu si dzi nèlɔ̃ ɖo be yeawɔ la dzi.—3/15, axa 32.

Aleke nàwɔ aɖu amamaɖeɖenuwɔnawo kpɔkpɔ ƒe tetekpɔ dzi?

Afɔɖeɖe etɔ̃e nye (1) Ne wò ŋku kli nu si anyɔ gbɔdɔdɔ ƒe dzodzro ɖe mewò la, ɖe ŋku ɖa kaba. (2) Dzɔ wò tamesusu ŋu to ale si nàna wò susu nanɔ nu siwo dze na kafukafu la ŋu eye nàdo gbe ɖa na Mawu. (3) Kpɔ wò zɔzɔme dzi to ale si nàƒo asa na film alo Internet dzi nyatakakadzraɖoƒe siwo amamaɖeɖenuwɔnawo le.—4/1, axa 10-12.

Ne Kristotɔ gblẽ eƒe ƒomea ɖi zɔ mɔ yi duta be yeawɔ dɔ akpɔ ga la, nu siwo womekpɔa mɔ na o kawoe tea ŋu dona tso eme?

Ne dzilawo kple wo viwo mele teƒe ɖeka o la, egblẽa nu le ɖeviawo ƒe seselelãme kple agbenɔnɔ ŋu. Ne wo dzilaa trɔ gbɔ la, medzɔa dzi na wo o. Ne srɔ̃tɔwo zɔ mɔ gblẽ wo srɔ̃wo ɖi la, wotea ŋu wɔa ahasi bɔbɔe.—4/15, axa 19-20.

Nu ka tae woŋea nu vlo wɔla siwo woklã ɖe ati ŋu la ƒe afɔwo?

Romatɔwo wua nu vlo wɔla aɖewo to wo hehe ɖe ati ŋu me. Yudatɔwo bia be woaŋe nu vlo wɔla eve siwo woklã ɖe ati ŋu le Yesu xa la ƒe afɔwo. Esia ana wòasesẽ na wo be woagbɔ eye woaku kaba. Awɔe be womanɔ atia ŋuti ŋu nake ɖe wo dzi o. (5 Mose 21:22, 23)—5/1, axa 11.

Biabia ene kawoe wòle be wòanɔ susu me na mí ne míele gbeƒã ɖem?

Ame ka ƒomevie mele nu ƒom na? Afi kae meke ɖe eŋu le? Ɣeyiɣi kae nye nyuitɔ si mayi amewo gbɔ? Aleke wòle be maƒo nu na wo?—5/15, axa 12-15.

Ame agbɔsɔsɔme ka gbegbee le kukum le atamanono ta?

Ewu ame 100,000,000 le ƒe alafa si va yi me. Fifia, eɖea ame siwo ade 6,000,000 ƒe agbe ɖa ƒe sia ƒe.—6/1, axa 3.