Exlẽlawo Bia Be

Nu Ka Tae Yehowa Ðasefowo Meyia Aʋa o?

Afi ka kee Yehowa Ðasefowo ɖale o, wonya wo le ŋutinya katã me be womekpɔa gome le aʋawɔwɔ siwo yia edzi le dukɔwo dome alo dukɔmeviʋawo me o. Numekugbalẽ aɖe si nye Australian Encyclopædia de dzesii ƒe 50 aɖewoe nye esi va yi be, “Yehowa Ðasefowo léa woƒe akpaɖekedzimademade me ɖe asi le aʋawɔɣiwo.”

Susu vevi aɖe si ta Ðasefowo mekpɔa gome le aʋawɔwɔ aɖeke me o enye be, gomekpɔkpɔ le aʋa siawo me atsi tsitre ɖe woƒe Kristotɔwo ƒe dzitsinya si wotsɔ Biblia na hehee la ŋu. Wotsɔ Biblia me sewo kple Aƒetɔ Yesu Kristo ƒe kpɔɖeŋuwo na hehe woƒe dzitsinya. Yesu fia eyomedzelawo be woalɔ̃ wo havi. Egade se na wo be: “Miyi edzi mialɔ̃ miaƒe futɔwo, miawɔ nyui na ame siwo le fu lém mi.” (Luka 6:27; Mateo 22:39) Esime Yesu ƒe nusrɔ̃lawo dometɔ ɖeka di be yeatsɔ yi aʋli eta la, egblɔ nɛ be: “Gbugbɔ wò yi la ɖo eteƒe, elabena ame siwo katã tsɔa yi la, yi nue woatsi.” (Mateo 26:52) Eya ta Yesu to nyagbɔgblɔ kple nuwɔna dzi ɖee fia be mele be ye yomedzelawo nakpla aʋawɔnuwo hena aʋawɔwɔ o.

Susu bubu aɖe si ta Yehowa Ðasefowo meyia aʋa o ye nye be, wonye subɔsubɔha aɖe si me tɔwo le xexea me godoo. Aʋawɔwɔ ana be fuléle nanɔ nɔvi kple nɔvi dome, eye esia atsi tsitre ɖe se si Yesu de be, ‘lɔlɔ̃ nanɔ wo dome’ la ŋu.—Yohanes 13:35.

Gɔmeɖose siwo ku ɖe lɔlɔ̃ ŋu siwo dze le etame la menye nane siwo ŋu Yehowa Ðasefowo ƒoa nu tsoe ko o. Le kpɔɖeŋu me, bu ale si wowɔ nu le Xexemeʋa II wɔɣi le ƒe 1939-1945 me ŋu kpɔ. Le United States la, wode Yehowa Ðasefo siwo wu 4,300 gaxɔ me le esi wogbe be yewomawɔ asrafodɔwo o ta. Le Britain la, wode wo dometɔ siwo wu 1,500, siwo dome nyɔnu siwo wu 300 le la, gaxɔ me le esi wogbe gomekpɔkpɔ le aʋawɔnyawo me ta. Le Germany si dzi Nazitɔwo nɔ ɖuɖum la, wowu Ðasefo 270 le Dukɔa ƒe sedede nu le esi wogbe be yewomawɔ aʋa o ta. Le Nazitɔwo ƒe dziɖuɖu ma te la, wode Ðasefo siwo wu 10,000 gaxɔ me loo alo fuwɔamegaxɔwo me. Ðasefo siwo nɔ Japan hã kpe fu ŋɔdzitɔe nenema ke. Ame sia ame si ƒe ame aɖe ku le Xexemeʋa II alo aʋa siwo wova wɔ emegbe dometɔ aɖe me la, ate ŋu aka ɖe edzi be Yehowa Ðasefo ɖeka pɛ hã ƒe asi menɔ ame mawo ƒe kua me o.

Nukpɔsusu si le Yehowa Ðasefowo si ku ɖe aʋawɔwɔ ŋu la dze nyuie le nya mamlɛtɔ siwo Wolfgang Kusserow gblɔ la me. Le ƒe 1942 me la, Nazitɔwo tso ta le Germanytɔ sia si xɔ ƒe 20 la nu, elabena egbe be yemayi aʋa o. (Yesaya 2:4) Egblɔ le asrafowo ƒe ʋɔnudrɔ̃ƒea ŋkume be: “Wonyim abe Yehowa Ðasefowo dometɔ ɖeka ene le ɖekawɔwɔ me kple Mawu ƒe nya si le Ŋɔŋlɔ Kɔkɔeawo me. Se gãtɔ kple esi le kɔkɔe wu si wòde na ameƒomea ye nye esi: ‘Nàlɔ̃ wò Mawu la wu nu bubu ɖe sia ɖe kple hawòvi abe ɖokuiwò ene.’ Sedede bubu enye: ‘Megawu ame o.’ Atiwoe mía Wɔla la na woŋlɔ se siawo ɖi naa?”—Marko 12:29-31; 2 Mose 20:13.

Yehowa Ðasefowo xɔe se be Yehowa, Mawu ŋusẽkatãtɔ la, koe ate ŋu ahe ŋutifafa mavɔ ava anyigba la dzi. Wokpɔa mɔ nɛ be wòawɔ ŋugbe si wòdo be ‘yeatsi aʋawɔwɔwo nu va se ɖe anyigba ƒe mlɔenu ke’ la dzi.—Psalmo 46:10.