Gilead Suku Ƒe Klass 131 Lia Nu Wuwu

“Na Dzi Nadzɔ Yehowa”

ƑOMETƆWO, xɔlɔ̃wo, kple nyuidinamelawo kpe ta le September 10, 2011 lia dzi hena Gbetakpɔxɔ Habɔbɔa Ƒe Gilead Biblia Suku ƒe klass 131 lia ƒe sukunuwuwu wɔna. Hafi wɔnaa nadze egɔme la, nuƒolawo kple sukuviawo tsɔ dzidzɔ kple dzodzodzoetsitsi nɔ mɔ kpɔm. Ke hã, esi wokpã la, ame 9,063 siwo va la katã ɖe dzi ɖi henɔ alɔgbɔnu kom, le esi wose vivi na nuƒowo, wɔwɔfiawo, kple gbebiamewo ta.

Stephen Lett, si nye Yehowa Ðasefowo ƒe Dziɖuha me tɔ kple wɔnaa ƒe zimenɔla, ye ƒo nuƒo gbãtɔ. Edzro mawunyakpukpui siwo ɖɔ Yehowa Mawu abe ɖe amegbetɔ ŋutilãe le esi ene la me, eye wòhe susu yi kpukpui siwo ƒo nu tso ale si Yehowa zãa eƒe kpɔɖeŋu ŋkuwo, towo, asiwo, kple abɔwoe ŋu la dzi.

Gbã la, edzro 2 Kronika 16:9 lia me, si gblɔ tso Yehowa ŋu be, eƒe “ŋku kpɔa anyigba blibo la dzi, eye wòdoa ŋusẽ ame siwo ku ɖe eŋu kple woƒe dzi blibo.” Ede dzi ƒo na sukuviawo be woana woƒe dzi naku ɖe Yehowa ŋu bliboe. Egblɔ na sukuviawo be woate ŋu asrɔ̃ Mawu to ale si woana woƒe ŋkuwo nanɔ amewo ƒe nyuiƒewo ŋu dzi. Eyome Nɔviŋutsu Lett dzro 1 Petro 3:12, si gblɔ be Yehowa ƒe towo le ame dzɔdzɔewo ƒe kokoƒoƒowo ŋu la me. Ede dzi ƒo na sukuviawo be woanɔ gbedodoɖa dzi na Yehowa, eye woaɖo ŋku edzi be edina vevie be yease woƒe gbedodoɖawo.

Nuƒolaa gadzro Yesaya 41:13 hã me, afi si Yehowa do ŋugbe le be: “Nye Yehowa, wò Mawu, ame si le gbɔgblɔm na wò be, mègavɔ̃ o, makpe ɖe ŋuwò lae lé wò nuɖusi ɖe asi.” Nɔviŋutsu Lett gblɔ le mɔ wɔdɔɖeamedzi aɖe nu be: “Aleke gbegbe Yehowa ƒe nya siawo léa dzi na amee nye esi! Edoa asi ɖa léa míaƒe asi.” Eyome egblɔ na sukuviawo be woaɖe mɔ ɣesiaɣi be Yehowa nakpe ɖe wo ŋu, eye woagagbe eƒe kpekpeɖeŋu xɔxɔ gbeɖe o. Egblɔ hã be sukuviawo ate ŋu asrɔ̃ Yehowa to asikpekpe ɖe ame bubuwo ŋu me.

Mlɔeba, Nɔviŋutsu Lett xlẽ Yesaya 40:11, eye wògblɔ na nyaselawo be woade ŋugble le ale si mawunyakpukpui ma ɖe lɔlɔ̃ si gbegbe le Yehowa sii la fia ŋu. Egblɔ be: “Yehowa kɔa mí ɖe abɔdome, ekɔa mí ɖe akɔnu.” Aleke wòle be míawɔ nui? Ede dzi ƒo na sukuviawo be woafa tu ahabɔbɔ wo ɖokuiwo abe alẽvi ene, ale be Yehowa nadi be yeakɔ wo ɖe akɔnu.

“Nu Xɔasi Sia Le Mía Si Le Anyigoewo Me”

David Splane, si hã nye Dziɖuhaa me tɔ la, ɖe Ŋɔŋlɔawo me nyati sia me. (2 Korintotɔwo 4:7) Nu kae nye nu xɔasia? Sidzedze alo nunya yea? Nuƒolaa ɖo eŋu be, “Kpao.” Egblɔ be: “Kesinɔnu si ŋu apostolo Paulo nɔ nu ƒom tsoe ye nye ‘subɔsubɔdɔ sia’ si me míenana ‘nyateƒea dzena’ le.” (2 Korintotɔwo 4:1, 2, 5) Nɔviŋutsu Splane ɖo ŋku edzi na sukuviawo be ɣleti atɔ̃ siwo wotsɔ srɔ̃ nui la dzra wo ɖo ɖe subɔsubɔdɔ tɔxɛ aɖe ŋu. Ele be woade asixɔxɔ gã dɔdeasi sia ŋu.

Nuƒolaa ɖe nu me be “anyigoewo,” si ŋu Paulo ƒo nu tsoe la, le tsitre ɖi na míaƒe ŋutilã. Etsɔ anyigoe sɔ kple nugoe si wotsɔ sika wɔ. Womezãa nugoe siwo wowɔ kple sika la edziedzi o. Ke wozãa anyigoewo ya ɖe dɔ vovovowo wɔwɔ ŋu. Ne míetsɔ nu xɔasi aɖe de sikanugoe me la, ɖewohĩ míatsi dzi ɖe nugoa ŋutɔ ŋu abe ale si ko míetsia dzi ɖe nu xɔasia ŋui ene. Nɔviŋutsu Splane gblɔ na sukuviawo be: “Menye mia ŋutɔwo mia ɖokuiwo dzie miedi be yewoahe susu ayii o. Abe dutanyanyuigblɔlawo  ene la, miedi be yewoahe susu ayi Yehowa dzi. Anyigoewo koe mienye.”

Le kpɔɖeŋua dzi yiyi me la, nuƒolaa gblɔ be le Biblia ƒe ɣeyiɣiwo me la, wotea ŋu trɔa asi le anyigoe ŋu be wòanɔ te ɖe dzoxɔxɔ nu alo wofaa klosaloŋuka ɖe eŋu, bene eŋu nagaka bɔbɔe o. Nu kae nye nufiamea? Ðikeke mele eme o be nɔnɔme sesẽ siwo me dutanyanyuigblɔlaawo ato le woƒe ɣleti gbãtɔwo me la ana woasrɔ̃ dzidodo. Amewo ƒe nya manyomanyowo gbɔgblɔ ɖe wo ŋu magate ɖe wo dzi boo o. Nɔviŋutsu Splane gblɔ be: “Miava de dzesii be miate ŋu ado dzi wu ale si miesusui.” Menye mawudɔlawoe Yehowa tsɔ subɔsubɔdɔ xɔasi sia na o, ke boŋ amegbetɔ siwo nye anyigoewo ye. Eƒo nya ta be: “Esia fia be Yehowa ka ɖe mia dzi.”

‘Mia Kple Afɔzɔlawo Mieƒu Du, Ðe Nàte Ŋu Ake Duɖime Kple Sɔwoa?’

Samuel Herd, si nye Dziɖuhaa me tɔ bia be, “Aleke gbegbee nàte ŋu aƒu dui?” Nu ka tae wòbia nya sia sukuviawo ɖo? Etsɔ sukuviawo ƒe nuteƒekpɔkpɔwo sɔ kple nu siwo me nyagblɔɖila Yeremiya to. Menɔ bɔbɔe na ŋutsu nuteƒewɔla sia be wòanɔ te ɖe kuxi siwo me wòto la nu o. Ke hã, kuxi sesẽ bubuwo ganɔ ŋgɔ nɛ. Eya ta Yehowa biae be: “Mia kple afɔzɔlawo mieƒu du, eye ɖeɖi te ŋuwò, aleke nàhayi duɖime ke ge kple sɔwo?”—Yeremiya 12:5.

Esime Nɔviŋutsu Herd nɔ ale si mawunyakpukpui sia ka sukuviawoe me ɖem la, egblɔ be: “Ðewohĩ miase le mia ɖokui me be mieƒu du kple sɔwo, le dodokpɔ siwo mieŋlɔ ta. Gake le nyateƒe me la, mia kple afɔzɔlawoe ke duɖimea. Ne mieyi dɔa gbe la, miake duɖime kple sɔwo, si fia be miado go kuxi siwo sesẽ wu ale si miesusui fifia. Aleke miawɔ nui? Hehe si miexɔ le Gilead sukua me la dzra mi ɖo be miake duɖime kple sɔwo, eye ɖeɖi mate mia ŋu o.” Ede dzi ƒo na sukuviawo be woanɔ Biblia sɔsrɔ̃ kple gbedodoɖa dzi edziedzi atsɔ anɔ hehe nam wo ɖokui.

Nɔviŋutsu Herd gblɔ be dutanyanyuigblɔlaawo dometɔ aɖewo ado go dziɖeleameƒonyawo kple amewo ƒe ɖekematsɔleme le woƒe dɔa me. Ame bubuwo ƒe kuxiwo anye dɔléame kple sese le ame ɖokui me be yemedze o. Gake eka ɖe edzi na sukuviawo be ŋusẽtsoƒe aɖe li si akpe ɖe wo ŋu woanɔ te ɖe nɔnɔme madeamedzi ɖe sia ɖe nu ɖeɖimateameŋutɔe. Egblɔ be: “Mieɖa ƒu du kple afɔzɔlawo loo alo sɔwo o, mika ɖe edzi be Mawu ƒe asi sesẽ la ate ŋu ana miaƒu dua ade goe dedie. Ekema miava zu dutanyanyuigblɔla kpɔdzidzedzewo, wòanye bubu kple kafukafu na Yehowa.”

Wɔnaa Ƒe Akpa Vevi Bubuwo

‘Na Woasɔ Gbɔ.’ John Ekrann, si nye United States Alɔdzedɔwɔƒea ƒe Kɔmiti me tɔ, ƒo nu tso ŋutinya si ku ɖe Elisa kple ahosi si fetɔ aɖe di be yealé viaŋutsu eveawo awɔ kluviwoe la ŋu. (2 Fiawo 4:1-7) Amigo sue aɖe koe nɔ ahosia si. Elisa gblɔ nɛ be wòaɣe amigoe bubuwo le eƒe aƒelikawo gbɔ, eye wògblɔ kpee be: ‘Na woasɔ gbɔ.’ Yehowa wɔ nukunu aɖe to Elisa dzi. Ena amigoe siwo katã ahosia yi ɖaxɔ la yɔ kple ami. Azɔ, ahosi la yi ɖadzra amia hekpɔ ga xe eŋufewo hetsɔ ɖe kpɔ eƒe ƒomea dzii.

Nufiame kae le ŋutinya sia me na ame siwo ava zu dutanyanyuigblɔlawo? Anɔ eme be ahosia manɔ nuwo me tiam le nugoeawo ɣeɣe me o. Nɔviŋutsu Ekrann gblɔ be: “Axɔ goe sia goe si me woate ŋu akɔ ami ɖo, eye ɖewohĩ goe siwo lolo lae wòadi wu.” Eyome ede dzi ƒo na sukuviawo be woalɔ̃ awɔ dɔdeasi ɖe sia ɖe, eɖanye gãa alo suea o. Egblɔ na wo be: “Miganɔ nuwo me tiam o.” Eɖo ŋku edzi na sukuviawo hã be ale si ahosia wɔ ɖe Elisa ƒe nyawo dzi pɛpɛpɛ la gbɔe wòtso be wòkpɔ yayra geɖe ɖo. Nu kae nye nufiamea? Dzonɔameme kple xɔse si gbegbe míeɖena fiana la kple eƒe yayrawoe zɔna. Eya ta nuƒolaa gblɔ be: “Migawɔ alɔgblɔlɔ o.”

“Wole Na Mí Abe Abolo Ene.” William Samuelson, si nye dzikpɔla le Teokrasi Sukuwo Ƒe Dɔdzikpɔƒea dzro tanya sia si wotu ɖe  4 Mose 14:9 lia dzi la me. Ehe susu yi kpɔɖeŋu nyui si Yosua kple Kaleb ɖo la dzi. Nya “abolo” si dze le kpukpui sia me la fia be yewoate ŋu aɖu Kanaantɔwo dzi bɔbɔe, eye esia ado ŋusẽ Israel viwo. Nufiame kae le esia me na sukuviawo? Egblɔ be: “Le dɔ si miava wɔ atsɔ akpe asi ɖe gbeƒãɖeɖedɔa ŋu me la, mibu nɔnɔme sesẽ siwo miado goe la be wonye nu siwo ado ŋusẽ mi.”

“Ðe Woƒe Xɔse Ali Ke Le Ahomtuɣi Abe Tɔdziʋu Si Woda Seke Na Enea?” Sam Roberson, si nye sukunufialaawo dometɔ ɖeka, ƒo nu tso apostolo Paulo ƒe nuxlɔ̃ame si ku ɖe ale si ame aɖewo ƒe “xɔse dome gblẽ abe tɔdziʋu si gbã” ene la ŋu. (1 Timoteo 1:19) Ede dzi ƒo na sukuviawo be woakpe ɖe amewo ŋu woatu xɔse sẽŋu ɖo ɖe Yehowa Mawu me. Egblɔ be: “Míate ŋu atsɔ miaƒe dɔa asɔ kple gbede tɔ.” Le mɔ ka nu? Gbede tua gakpowo tsɔ wɔa seke ƒe kɔsɔkɔsɔ si léa tɔdziʋu ɖe te. Le mɔ ma ke nu la, dutanyanyuigblɔlawo kpena ɖe Biblia nusrɔ̃viwo ŋu wotua Kristotɔwo ƒe nɔnɔme nyui siwo hiã hena ɖeɖekpɔkpɔ la ɖo.

Nuƒolaa tsɔ gakpo siwo wode wo nɔewo me wòzu kɔsɔkɔsɔ la sɔ kple nɔnɔme enyi siwo ŋu woƒo nu tsoe le 2 Petro 1:5-8. Nɔviŋutsu Roberson gblɔ be ne dutanyanyuigblɔlawo kpe ɖe woƒe Biblia nusrɔ̃viwo ŋu be wokpɔ ale si Yehowa ɖea nɔnɔme mawo fianae la, anɔ bɔbɔe na nusrɔ̃viawo be wo kple Yehowa dome nanɔ kplikplikpli. Awɔe hã be woanɔ te ɖe xaxa ɖe sia ɖe si ate ŋu ado woƒe xɔse akpɔ la nu.

Nuteƒekpɔkpɔ Kple Gbebiamewo

Michael Burnett, si hã nye sukunufialaawo dometɔ ɖeka, na Gilead sukuviawo gblɔ nu siwo teƒe wokpɔ le gbeƒãɖeɖedɔa me le sukuadeɣi, eye wòna wowɔ wo dometɔ aɖewo ƒe wɔwɔfiawo. Sukuviawo ƒo nu tso ale si woɖe gbeƒã na amewo le fiase, yameʋudzeƒe, kple tso aƒe me yi aƒe me ŋu. Woɖe gbeƒã na ame aɖe le telefon dzi togbɔ be menye woawo yɔm amea nɔ hafi o hã. Nuteƒekpɔkpɔ siawo sese do dzidzɔ na vavalawo.

Michael Hansen, si nye dɔwɔla le United States ƒe Betel, bia gbe ŋutsu etɔ̃ siwo wɔ dutanyanyuigbɔgblɔdɔa ƒe geɖe va yi. Woawoe nye Stephen McDowell, si wɔ dutanyanyuigbɔgblɔdɔ le Panama, Mark Noumair, si wɔe le Kenya, kple William Yasovsky, si wɔe le Paraguay. Nya siwo wogblɔ la te gbe ɖe wɔnaa ƒe akpa ma si ƒe tanyae nye “Dzi Nedzɔ Mi Le Yehowa Ƒe Lɔlɔ̃nu Wɔwɔ Me” la dzi. (Psalmo 40:9) Le kpɔɖeŋu me, Mark Noumair ƒo nu tso nu siwo na woa kple srɔ̃a wokpɔ dzidzɔ le dutanyanyuigbɔgblɔdɔa me ŋu. Ale si atsu kple asi sia dze xɔ̃ Ðasefo siwo le nutoa me la na wokpɔ dzidzeme geɖe. Nu bubu siwo na wokpɔ dzidzɔe nye ale si nɔvi Kristotɔwo wɔa mɔfiamewo dzi, ale si wowɔ tɔtrɔ ɖedzesiwo le woƒe agbe me, kple ale si Yehowa yra ɖe woƒe agbagbadzedzewo dzii. Eka ɖe edzi na sukuviawo be dzidzɔ geɖe le ŋgɔ na wo.

Esi Gilead sukua ƒe klass 131 lia me tɔ ɖeka va xlẽ lɛta nyui aɖe si ɖe sukuviawo ƒe ŋudzedzekpɔkpɔ fia vɔ la, Nɔviŋutsu Lett va de dzi ƒo na sukuviawo be woadze nunya hetsɔ ƒo wɔnaa tae. Egblɔ be ne wowɔe alea la, “[woa]na dzi nadzɔ Yehowa.” Ðikeke mele me o be dutanyanyuigblɔla siawo ana dzi nadzɔ Yehowa esime wole esubɔm nuteƒewɔwɔtɔe le dɔ si wode wo si la wɔwɔ me.—Yesaya 65:19.

 [Nyaɖoɖo/Anyigbatata si le axa 31]

CLASS STATISTICS

10 Dukɔ siwo me wotso

34.7 Woƒe ƒe le mama dedie nu

19.0 Ƒe ale si nu va yi tso esime woxɔ nyɔnyrɔ

13.5 Ƒe si wole ɣeyiɣiawo katã ƒe subɔsubɔdɔa wɔm le mama dedie nu

[Anyigbatata]

(Edze nyuie le agbalẽa ŋutɔ me)

Woɖo sukuviawo ɖe dukɔ siwo dze le afi sia me

DUKƆ SIWO ME WOÐO WO ÐO

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

GERMANY

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

SOUTH AFRICA

UNITED STATES OF AMERICA

VENEZUELA

[Nɔnɔmetata si le axa 30]

Ale si Gilead sukuviwo ɖe gbeƒãe ŋuti wɔwɔfia ɖeka

[Nɔnɔmetata si le axa 31]

Gbetakpɔxɔ Habɔbɔa Ƒe Gilead Biblia Suku Ƒe Klass 131 Lia Nuwulawo

Ðoɖo si nu woŋlɔ ŋkɔawo ɖo le ete yi ale: Woxlẽ fliawo tso ŋgɔgbe yi megbe, eye woŋlɔ ŋkɔawo tso miame yi ɖusime le fli ɖe sia ɖe dzi.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.