AME aɖewo gblɔna be mesɔ be míabia nya Mawu o. Wosusuna be anye amemabumabu be míabia Mawu be nu ka tae wòɖea mɔ ɖe nanewo nu eye meɖea mɔ ɖe bubuwo ya nu o. Nenemae nèsena le ɖokuiwò mea?

Ne èsena le ɖokuiwò me nenema la, ke ɖewohĩ awɔ nuku na wò be nàva kpɔe be ame nyui geɖewo hã bia nya Mawu. Kpɔ nya siwo wobiae la dometɔ aɖewo ɖa:

Nuteƒewɔla Hiob bia be: “Nu ka ŋuti ame vɔ̃ɖiwo tsia agbe, wokua amegã, eye woƒe ŋusẽ dzina ɖe edzi?”—Hiob 21:7.

Nuteƒewɔla Xabakuk bia be: “Nu ka ŋuti nèle ame tovo kpɔm kple ŋku, eye nèzi kpi, ne ame vɔ̃ɖi mi ame si nye ame dzɔdzɔe wui la?”—Xabakuk 1:13.

Yesu Kristo bia be: “Nye Mawu, nye Mawu, nu ka ta nègblẽm ɖi?”—Mateo 27:46.

Ne èxlẽ nya siwo ƒo xlã nya siawo la, màkpɔ naneke si ɖee fia be dzi ku Yehowa a ɖe nya mawo siwo wotsɔ susu nyui biae la ta o. Le nyateƒe me la, mele be esia nawɔ nuku na mí o. Le kpɔɖeŋu me, Mawu mebunɛ be enye amemabumabu be míabia be wòakpɔ míaƒe ŋutilãmenuhiahiã siwo nana míenɔa lãmesẽ me gbɔ na mí o. Ke boŋ, elɔ̃na faa be yeana nu siwo hiã mí la mí. (Mateo 6:11, 33) Nenema kee wònaa nyatakaka siwo nana míenɔa lãmesẽ me le susu kple seselelãme gome la mí faa. (Filipitɔwo 4:6, 7) Yesu gblɔ na eƒe nusrɔ̃lawo be: “Minɔ ebiabia dzi, eye woana mi.” (Mateo 7:7) Edze ƒãa le nu si ŋu Yesu nɔ nu ƒom tsoe hafi do ŋugbe ma me be menye ŋutilãmenuwo koe woana mí o, ke woaɖo nyabiase vevi siwo le susu me na mí la hã ŋu na mí.

Ne mɔnukpɔkpɔa su asiwò la, nyabiase siwo gbɔna la dometɔ kae nàdi be yeabia Mawu?

• Taɖodzinu aɖe tae mele agbe ɖoa?

• Nu kae adzɔ ɖe dzinye ne meku?

• Nu ka tae nèɖe mɔ mele fu kpem?

Esi “Ŋɔŋlɔ blibo la tso Mawu ƒe gbɔgbɔ me” ta la, àkpɔ ale si Mawu ɖo nya siawo ŋui le eƒe Nya, Biblia, la me. (2 Timoteo 3:16) Na míade ŋugble le nu si tae ame aɖewo bia nya siwo dze le etame la ŋu, ne míakpɔe ɖa be aleke Biblia ɖo wo ŋui hã.