• ƑE SI ME WODZII: 1963

• DUKƆ SI ME WÒTSO: BRITAIN

• AME SI TƆGBI WÒNYE TSÃ: ENƆ DƆ GÃ AÐE WƆM

AGBE SI MENƆ TSÃ:

Wodzim le Croydon, le South London. Mí ame asieke ye wodzi, eye nyee nye adelia. Caribbean ƒukpo si nye St. Vincent ye dzinyelawo tso. Danye nɔ Metodist sɔlemehaa me. Togbɔ be melɔ̃a agbalẽsɔsrɔ̃ ŋutɔ hã la, nyemetsɔ ɖeke le nusɔsrɔ̃ tso Mawu ŋu me o. Le suku ƒe mɔkeɣiwo la, menɔa tá aɖe si le nutoa me la to henɔa agbalẽ gbogbo siwo meɣe le agbalẽdzraɖoƒe la xlẽm.

Ƒe aɖewo le nye dodo le suku megbe la, mede dzesii be didia nɔ menye be makpe ɖe wɔnamanɔŋutɔwo ŋu. Meva nɔ dɔ wɔm kple habɔbɔ siwo kpɔa aƒemanɔsitɔwo kple nuwɔametɔwo dzi. Emegbe meva srɔ̃ atikewɔwɔ ŋuti nunya le yunivɛsiti. Esi medo le sukua la, mekpɔ dɔ gãwo nɔ wɔwɔm, eye nu dze edzi nam ale gbegbe. Esi menye ɖokuisidɔwɔla si ɖoa aɖaŋu na asitsahabɔbɔwo heganye hadomenumekula hã ta la, dɔwɔnu siwo hiãm la koe nye nye atadzikɔmpiuta kple Internet. Eya ta metea ŋu zɔa mɔ yia duta ɖadzea amedzrodzeƒe si dze ŋunye, si nya kpɔ nam la kwasiɖa ʋɛ aɖewo henɔa kame dem le kamedeƒe siwo le afi ma la be manɔ lãmesẽ me. Mekpɔe be menɔ agbe ɖum ŋutɔ. Ke hã, megatsia dzi ɖe wɔnamanɔŋutɔwo ŋu kokoko.

ALE SI BIBLIA TRƆ NYE AGBENƆNƆ:

Tso ɣeaɖeɣi ke mebiana be, ‘Nu ka tae míele agbe ɖo, eye taɖodzinu kae le agbea ŋu?’ Ke hã, nyemete kpɔ be madi ŋuɖoɖoawo le Biblia me o. Gbe ɖeka le ƒe 1999 me la, nɔvinye Margaret, si va zu Yehowa Ðasefo, kple exɔlɔ̃ aɖe si hã nye Ðasefo la va srãm kpɔ. Exɔlɔ̃a tsɔ ɖe le eme nam, eye togbɔ be nyemetsɔ ɖe le mawusubɔsubɔ me o hã la, melɔ̃ be wòasrɔ̃ Biblia kplim. Ke hã, nusɔsrɔ̃a menɔ afɔ tsɔm kura o, le esi vovo menɔa ŋunye o le nye dɔwɔɖuia kple hloloetsotsowo ta.

Le ƒe 2002 ƒe dzomeŋɔli la, meʋu yi England ƒe anyieheɣetoɖoƒe. Le afi ma la, megade yunivɛsiti ake ɖasrɔ̃ nu tso amewo dome kadodowo ŋuti, kple susu be maxɔ ɖaseɖigbalẽ kɔkɔtɔ. Mía kple vinyeŋutsuvia míeva nɔ kpekpewo dem le Fiaɖuƒe Akpata si le nutoa me la me edziedzi. Togbɔ be suku kɔkɔa dede dzɔ dzi nam hã la, nu siwo srɔ̃m menɔ le Biblia me la na mese xexe sia me kuxiwo kple ale si woawɔ akpɔ wo gbɔe la gɔme nyuie wu. Meva de dzesii  be nya si Mateo 6:24 gblɔ be míate ŋu asubɔ aƒetɔ eve o la nye nyateƒe. Ele be matiae nenye be masubɔ Mawu loo alo kesinɔnuwo. Mekpɔe be ehiã be matso nya me le nu siwo matsɔ aɖo nɔƒe gbãtɔ le agbe mee ŋu.

Le ƒe si do ŋgɔ me la, mekpɔ gome le aƒe me Biblia nusɔsrɔ̃ si Ðasefowo wɔna le ƒuƒoƒo me la me, eye agbalẽ si wosrɔ̃nae nye Is There a Creator Who Cares About You? (Y a-t-il un Créateur qui se soucie de vous ?) a Nusɔsrɔ̃a na meva ka ɖe edzi be mía Wɔla, Yehowa, koe ate ŋu akpɔ amegbetɔƒomea ƒe kuxiwo gbɔ. Ke le yunivɛsitia ƒe nufiafia nu la, mehiã be míaxɔe ase be Wɔla aɖe li hafi míase nu si tae míele agbe ɖo la gɔme o. Esia ku dzi nam. Ɣleti eve megbe la, medzudzɔ yunivɛsitia dede helé fɔ ɖe nu siwo ana mate ɖe Mawu ŋu wu la wɔwɔ ŋu.

Biblia me nya si ʋãm metrɔ nye agbenɔnɔ lae nye Lododowo 3:5, 6, afi si gblɔ be: “Ðo ŋu ɖe Yehowa ŋu tso dzi blibo me, ke mègaɖo dzi ɖe wò gɔmesese ŋu o. Lé ŋku ɖe eŋu le wò mɔwo katã dzi, ekema ata mɔ na wò.” Nusɔsrɔ̃ tso mía Mawu lɔ̃amea ŋu ɖe vi nam wu kesinɔnuwo kple ɖoƒe kɔkɔ si asu asinye le yunivɛsiti ƒe ɖaseɖigbalẽ kɔkɔtɔ xɔxɔ ta. Zi ale si menɔ nu srɔ̃m tso tameɖoɖo si tae Yehowa wɔ anyigba kple viɖe si do tso Yesu ƒe vɔsakua me na mí ŋu la, zi nenemae meva nɔ didim be maɖe adzɔgbe na mía Wɔla la. Ale mexɔ nyɔnyrɔ le April 2003 me. Vivivi la, medzudzɔ agbe kɔkɔ nɔnɔ heva nɔ agbe tsɛ.

VIÐE SIWO MEKPƆ:

Ƒomedodo si ŋu medea asixɔxɔe ŋutɔ la le mía kple Yehowa dome. Sidzedze Yehowa na mekpɔ dzidzeme vavãtɔ. Hadede kple ame bubu siwo hã dea ta agu na Mawu le nyateƒe me la na mele dzidzɔ kpɔm ŋutɔ.

Medina vevie be masrɔ̃ nu, eye nu siwo srɔ̃m mele le Kristotɔwo ƒe kpekpewo kple Biblia me la le kɔ ɖim na nye didi sia. Edzɔa dzi nam be maƒo nu na amewo tso nye dzixɔsewo ŋu. Esia zu agbemedɔ nam, si wɔnɛ be metea ŋu kpena ɖe amewo ŋu be woanɔ agbe si ɖɔ ʋu wu fifia, eye mɔkpɔkpɔ nyui si nye be woanɔ agbe le xexe yeyea me la nasu wo si. Tso June 2008 me ye medze gbe sia gbe gbeƒãɖeɖedɔa gɔme, eye nyemekpɔ dzidzɔ kple dzidzeme kpɔ abe ale si mele ekpɔm fifia ene o. Meke ɖe taɖodzinu si tututu le agbea ŋu la ŋu azɔ, eye medaa akpe na Yehowa tso dzi me ɖe esia ta.

• ƑE SI ME WODZII: 1973

• DUKƆ SI ME WÒTSO: AUSTRIA

• AME SI TƆGBI WÒNYE TSÃ: TSATSADALA

AGBE SI MENƆ TSÃ:

Du sue si nye Braunau, le Austria, ye menɔ tsi. Ganyawo de ame dzi le nutoa me, eye nu vlo wɔwɔ mebɔ o. Dzinyelawo nye Katolikotɔwo, eye ha sia mee nye hã menɔ tso ɖevime.

Nane si dzɔ le nye ɖevime la ɖe fu nam ale gbegbe. Meɖo ŋku edzi be le ƒe 1984 me, esime mexɔ ƒe 11 la, mía kple  xɔ̃nye kplikplikpliwo dometɔ ɖeka míeƒo bɔl. Ke le ŋdɔ ma ke me la, eku le ʋufɔku aɖe me. Xɔ̃nyea ƒe ku ɖe fu nam vevie ŋutɔ. Ƒe geɖe le afɔkua megbe gɔ̃ hã la, medea ŋugble le nu si dzɔna ɖe ame dzi le ku megbe ŋu.

Esi mewu suku nu la, meva zu elektrikŋudɔwɔla. Togbɔ be megblẽa ga geɖe ɖe tsatsadada ŋu enuenu hã la, gakuxiwo meɖe fu nam o. Megblẽ ɣeyiɣi geɖe ɖe kamedefefewo ŋu, eye meva lɔ̃ heavy metal kple punk rock hadzidziwo. Menɔ aglotuƒewo yim atraɖii. Meƒo ɖokuinye ɖe dzidzɔdonamenuwo kple agbe gbegblẽ nɔnɔ me vĩi, ke hã nyemekpɔ dzidzeme le agbe me o.

ALE SI BIBLIA TRƆ NYE AGBENƆNƆ:

Le ƒe 1995 me la, Ðasefo tsitsi aɖe va ƒo ʋɔ nam, eye wòtsɔ agbalẽ aɖe si dzro ale si Biblia ɖo biabia si nye, Nu kae dzɔna ɖe mía dzi ne míeku? me la nam. Ale si xɔ̃nyea ku nublanuitɔe la gakpɔtɔ nɔ fu ɖem nam, eya ta mexɔ agbalẽa. Menye agbalẽa ƒe ta si ƒo nu tso ku ŋu la koe mexlẽ o, ke boŋ mexlẽ agbalẽ bliboa!

Nu si mexlẽ la na mekpɔ ŋuɖoɖo na nya siwo mebiana tso ku ŋu. Gake megasrɔ̃ nu geɖe kpee. Esi wonyim le Katoliko ƒome me ta la, Yesu koŋ dzie mexɔ se. Ke hã, Biblia sɔsrɔ̃ nyuie na meva le ƒomedodo kplikplikpli me kple Yehowa Mawu, si nye Yesu Fofo. Dzi dzɔm ŋutɔ esi meva nyae be Yehowa menye Mawu si ɣlaa eɖokui ɖe mí si ŋu míate ŋu ate ɖo o, ke boŋ enana ame siwo dinɛ la dzea sii nyuie. (Mateo 7:7-11) Mesrɔ̃e be seselelãme le Yehowa si, eye wòwɔa eƒe nya dzi hã. Esia na meva do vevie numekukuwɔwɔ tso Biblia me nyagblɔɖiwo kpakple ale si wova emee ŋu. Nu siwo mesrɔ̃ la na megava xɔ Mawu dzi se geɖe wu.

Eteƒe medidi o, meva de dzesii be Yehowa Ðasefowo koe tsɔa fɔléleɖenuŋu kpena ɖe amewo ŋu be woase Biblia gɔme. Mede dzesi mawunyakpukpui siwo dze le Ðasefowo ƒe agbalẽwo me hexlẽ wo le Katolikotɔwo ƒe Biblia si nɔ asinye la me. Esi meyi edzi nɔ nu me kum la, mede dzesii be meke ɖe nyateƒea ŋu.

Mede dzesii le Biblia sɔsrɔ̃a me be Yehowa di be manɔ agbe ɖe yeƒe dzidzenuwo nu. Nu si mexlẽ le Efesotɔwo 4:22-24 la na mekpɔe be ehiã be maɖe asi le nye “amenyenye xoxo,” si wɔ ɖeka kple ‘agbe si menɔna tsã’ la ŋu ahado “amenyenye yeye, si wowɔ le Mawu ƒe lɔlɔ̃nu nu.” Eya ta medzudzɔ agbe gbegblẽ nɔnɔ. Mede dzesii hã be ele be madzudzɔ tsatsadada, le esi wòdea ŋukeklẽ kple ŋutilãmenuwo didi ƒe dzi ƒo ta. (1 Korintotɔwo 6:9, 10) Menyae be hafi mate ŋu awɔ tɔtrɔ mawo la, ele be madzudzɔ hadede kple xɔ̃nye tsãtɔwo ahadi xɔlɔ̃ bubu siwo nɔa agbe ɖe nu siwo meva srɔ̃ la nu.

Tɔtrɔ siawo wɔwɔ menɔ bɔbɔe nam o. Ke hã, meva nɔ Ðasefowo ƒe kpekpewo dem le Fiaɖuƒe Akpata me, eye medze xɔlɔ̃ yeyewo le hamea me. Azɔ hã, meyi edzi lé fɔ ɖe Biblia sɔsrɔ̃ le ɖokuinye si ŋu. Afɔɖeɖe siawo na medzudzɔ ha siwo meƒona tsã la sese, metrɔ nye agbemetaɖodzinuwo, eye metrɔ asi le nye dzedzeme ŋu wònyo ɖe edzi. Le ƒe 1995 me la, mexɔ nyɔnyrɔ hezu Yehowa Ðasefo.

VIÐE SIWO MEKPƆ:

Fifia meda sɔ le ale si mebua ga kple nunɔamesiwoe gome. Menye dɔmedzoedola tsã, gake fifia ya meva fa tu wu. Nyemegatsia dzimaɖi ɖe etsɔme ŋu hã o.

 Edzɔ dzi nam be menye Yehowa subɔla siwo le xexea me godoo la dometɔ ɖeka. Mede dzesii be wo dometɔ aɖewo le kuxiwo me tom, gake wogale Mawu subɔsubɔ dzi nuteƒewɔwɔtɔe. Dzi le dzɔyem ale gbegbe be mele nye ŋusẽ kple ɣeyiɣi katã zãm ɖe Yehowa subɔsubɔ kple nyuiwɔwɔ na ame bubuwo ŋu, ke menye ɖe kɔɖiɖi na nye ŋutɔ nye dzodzrowo ŋu o.

• ƑE SI ME WODZII: 1963

• DUKƆ SI ME WÒTSO: ENGLAND

• AME SI TƆGBI WÒNYE TSÃ: ETƆTƆ LE AGBE ME

AGBE SI MENƆ TSÃ:

Wodzim le England, gake esi mexɔ abe ƒe adre ene la, míaƒe ƒomea ʋu yi Australia. Míeva tsi Gold Coast, si nye nuto aɖe si modzakaɖetsaɖilawo lɔ̃a yiyi le Queensland, Australia. Togbɔ be míenye kesinɔtɔwo o hã la, naneke mehiãa mí o.

Togbɔ be ganyawo de mía dzi hã la, dzi medzɔnam tututu o. Meva tɔtɔ le agbe me. Fofonye nye aha tsu nola. Nyemelɔ̃ eƒe nya o, vevietɔ le eƒe ahanonoa kple ale si wòwɔa nu ɖe danye ŋu ta. Esi meva nya nu siwo me wòto esime wònye asrafo le Malaya la megbe ko hafi meva nɔ nu si tae wòwɔa nu nenema ɖo la gɔme sem.

Meva nɔ aha tsu nom esime menɔ sekɛndrisuku (lycée). Esi mexɔ ƒe 16 la, medzudzɔ sukua dede heva zu ƒudzisrafo. Meva nɔ atike vɔ̃ɖiwo zãm, eye atamanono zu numame nam. Ne kuxiwo do mo ɖa la, metrɔna ɖe ahanono ŋu, eye wòva zu numame nam. Tsã la, menoa aha tsu le kwasiɖanuwuwuwo ko, gake emegbe meva nɔ enom gbe sia gbe.

Le nye ƒe 20 xɔxɔ me lɔƒo la, meva nɔ ɖi kem nenye be Mawu li. Mebiaa ɖokuinye be, ‘Ne Mawu li vavã la, ke nu ka tae wòɖe mɔ fukpekpe kple ku li?’ Meŋlɔ hakpanya aɖe gɔ̃ hã si me mebu fɔ Mawu ɖe nu vɔ̃ɖi siwo katã le edzi yim le xexea me la ta.

Meɖe asi le ƒudzisrafodɔa ŋu esi mexɔ ƒe 23. Emegbe mewɔ dɔ vovovowo, eye mezɔ mɔ yi ɖanɔ duta ƒe ɖeka gɔ̃ hã, gake nye mɔkpɔkpɔbuɖeamea nu gbe tsotso. Naneke metsɔa fu lãme nam o, eye agbemetaɖodzinu aɖeke menɔ asinye o. Naneke menyoa ŋunye hã o. Mebua aƒe ƒe ame si nɔnɔ, dɔwɔɖui nyui kple ŋgɔyiyiwɔwɔ le dɔ me nu manyataleŋuwoe. Ahanono kple toɖoɖo haƒoƒo koe naa “dzidzemem.”

Meɖoa ŋku gbe si gbe wòdzrom vevie be manya taɖodzinu si le agbea ŋu dzi. Ɣemaɣi la, meɖi tsa yi Poland ɖakpɔ fuwɔamesaɖa si le Auschwitz. Do ŋgɔ la, mexlẽ nu tso ŋutasẽnuwɔwɔ siwo yi edzi le afi ma ŋu. Ke esi nye ŋutɔ metsi tre ɖe afi ma hekpɔ ale si gbegbe asaɖaa loloe la, ewɔ dɔ ɖe dzinye ŋutɔ. Ewɔ nuku nam ŋutɔ be amegbetɔ te ŋu sẽ ŋuta le ehavi  ŋu nenema gbegbe. Meɖo ŋku edzi be aɖatsi lólo ɖe ŋku dzi nam esime menɔ zɔzɔm le asaɖaa me henɔ ɖokuinye biam be, ‘Nu ka tae?’

ALE SI BIBLIA TRƆ NYE AGBENƆNƆ:

Esi megbɔ tso duta le ƒe 1993 me la, meva nɔ ŋuɖoɖo dim na nye biabiawo le Biblia me. Ema megbe kpuie ko la, Yehowa Ðasefo eve va ƒo ʋɔ nam hekpem na takpekpe aɖe si woawɔ le bɔlƒoƒe aɖe si le nutoa me. Metso nya me be mayi.

Ɣleti ʋɛ aɖewo do ŋgɔ la, meyi bɔlƒoƒe ma ɖakpɔ bɔl, gake nu si teƒe mekpɔ le takpekpea me la to vovo sãsãsã. Ðasefoawo bua ame, wodo awu nyuie, eye wo viwo hã lé wo ɖokuiwo nyuie. Nu si teƒe mekpɔ le ŋdɔnuɖuɣi la hã wɔ dɔ ɖe dzinye ŋutɔ. Ðasefo alafa geɖe ɖu ŋdɔnu le sɔgbea dzi, gake esi wotrɔ yi ɖanɔ woƒe anyinɔƒewo la, nyemekpɔ gbeɖuɖɔ ɖeka pɛ hã le teƒea o! Gawu la, edze kɔtɛ be tomefafa kple dzidzeme si dim menɔ la su vavala siawo si. Nyemeɖo ŋku nya siwo wogblɔ le nuƒoawo me gbe ma gbe la dzi o, gake nɔnɔme si Ðasefoawo ɖe fia ya tsi susu me nam.

Fiẽsi ma me la, meɖo ŋku ƒonyemetɔ aɖe si xlẽa Biblia eye wòsrɔ̃ nu geɖe tso subɔsubɔhawo ŋu la dzi. Ƒe aɖewo do ŋgɔ la, egblɔ nam be Yesu gblɔ be míate ŋu ade dzesi subɔsubɔha vavãtɔ to eƒe kutsetsewo dzi. (Mateo 7:15-20) Mekpɔe be anyo be maku nu me akpɔe ɖa be nu kae na Ðasefoawo to vovo nenema hã. Esiae nye zi gbãtɔ le nye agbe me si mɔkpɔkpɔ vi aɖe su asinye be etsɔme nyui aɖe li.

Le kwasiɖa si kplɔe ɖo me la, Ðasefo eve siwo va kpem na takpekpea gatrɔ va. Melɔ̃ be woava nɔ Biblia srɔ̃m kplim. Meva wɔ ɖeka kpli wo le Kristotɔwo ƒe kpekpewo dede me hã.

Esi menɔ Biblia srɔ̃m la, ale si mebua Mawui tsã la va trɔ keŋkeŋ. Meva nyae be menye egbɔe vɔ̃ɖinyenye kple fukpekpewo tso o, eye nu gbegblẽ siwo amewo wɔna la tena ɖe eya ŋutɔ hã dzi. (1 Mose 6:6; Psalmo 78:40, 41) Meva ɖoe kplikpaa be nyemawɔ naneke wòave Yehowa o. Medi be mado dzidzɔ na eƒe dzi. (Lododowo 27:11) Medzudzɔ aha tsu nono, atamanono kple agbe gbegblẽ nɔnɔ. Le March 1994 me la, mexɔ nyɔnyrɔ hezu Yehowa Ðasefo.

VIÐE SIWO MEKPƆ:

Dzidzɔ kple dzidzeme vavãtɔ su asinye. Nyemegatrɔna ɖe ahanono ŋu be matsɔ akpɔ nye kuxiwo gbɔe o. Ke boŋ meva srɔ̃ ale si madro nye agbawo ɖe Yehowa dzi.—Psalmo 55:23.

Mía kple Ðasefo nyɔnu dzetugbe aɖe si ŋkɔe nye Karen míeɖe mía nɔewo ƒe ewoe nye esia, eye atikɔmevi nyui aɖe si ŋkɔe nye Nella le asinye. Edzɔa dzi na mí ame etɔ̃a be míakpɔ gome le Kristotɔwo ƒe gbeƒãɖeɖedɔa me anɔ Mawu ŋuti nyateƒea fiam amewo, eye míezãa ɣeyiɣi geɖe ɖe dɔ sia ŋu. Taɖodzinu le nye agbe ŋu azɔ.