HABEL lé ŋku ɖe eƒe alẽ siwo le gbe ɖum bɔkɔɔ le togbɛa dzi la ŋu. Eyome esi wòfɔ ta dzi la, anya kpɔ kekeli aɖe le dzedzem le adzɔge ʋĩi. Enyae be yi si nɔa eɖokui trom ɖaa, eye wòklẽna abe dzo ƒe aɖe ene la le Eden-bɔa ƒe mɔnu. Edzilawo nɔ abɔ ma me kpɔ, gake fifia ya woawo kple wo viwo siaa magate ŋu age ɖe eme o. Kpɔe ɖaa le susu me ko be ɣetrɔ me ƒe ya fafɛ la na Habel ƒe taɖa le ya ƒom esime wòwu mo dzi le Ewɔla la ŋu bum. Ðe Mawu kple amegbetɔwo dome ava nɔ nyuie gbe aɖe gbea? Naneke meganɔ vevie na Habel wu esia o.

Le mɔ aɖe nu la, Habel le nu ƒom na wò egbea. Ke ɖe nàte ŋu ase eƒe gbea? Ðewohĩ àgblɔ be esia manya wɔ o, elabena Adam ƒe vi evelia sia ku gbe aɖe gbe ke. Eƒe kukua nyunyɔ xoxoxo hezu anyi ƒe 6,000 kloe ye nye esia. Biblia gblɔ be: “Kukuawo menya naneke o.” (Nyagblɔla 9:5, 10) Gawu la, Habel ƒe numenya aɖeke medze le Biblia me o. Ekema gɔmesese ka nue wòle nu ƒom na mí le?

Mawu ƒe gbɔgbɔ ʋã apostolo Paulo wògblɔ tso Habel ŋu be: “To esia dzi la, togbɔ be eku hã la, egale nu ƒom.” (Hebritɔwo 11:4) To nu ka dzie Habel gale nu ƒom? Eyae nye xɔse. Habel ye nye ame gbãtɔ si ɖe nɔnɔme nyui sia fia. Xɔse si wòɖe fia la ɖe dzesi ale gbegbe be egakpɔtɔ nye kpɔɖeŋu nyui na mí egbea be míasrɔ̃. Ne míesrɔ̃ nu tso ale si Habel ɖe xɔse fiae ŋu heto eƒe afɔtoƒewo la, ke eƒe ŋutinyaa le nu ƒom na mí le mɔ wɔdɔɖeamedzi aɖe nu.

Ke esi wònye nya ʋɛ aɖewo koe wogblɔ tso Habel ŋu le Biblia me ɖe, nu kae míate ŋu asrɔ̃ tso eyama kple eƒe xɔse ŋu? Na míakpɔe ɖa.

Ɣeyiɣi kpui aɖe le amegbetɔwo wɔɣi megbee wodzi Habel. Emegbe Yesu gblɔ tso Habel ŋu be enɔ anyi tso “xexea ƒe gɔmeɖoanyiɣi.” (Luka 11:50, 51) Edze ƒãa be ameƒomea me tɔ siwo si mɔkpɔkpɔ le be woaɖe wo tso nu vɔ̃ me la dzie Yesu nɔ susu hem yi. Togbɔ be Habel ye nye ame enelia tso Adam dzi hã la, edze abe eyae nye ame gbãtɔ si Mawu kpɔ be edze na ɖeɖekpɔkpɔ ene. * Eme kɔ ƒãa be menye kpɔɖeŋu nyui ɖolawo domee Habel nɔ tsi o.

Togbɔ be ameƒomea dzɔɣi teƒe medidi ɣemaɣi o hã la, wonɔ nɔnɔme wɔnublanui aɖe me. Anɔ eme be Habel dzilawo, Adam kple Xawa, ƒe dzedzeme nyo, eye ŋusẽ nɔ wo ŋu. Gake woda vo gã aɖe, eye esia nɔ nyanya na wo. Tsã la, wode blibo, eye agbe tegbee nɔnɔ ƒe mɔkpɔkpɔ nɔ wo si. Ke wova dze aglã ɖe Yehowa Mawu ŋu, si wɔe be wònyà wo le Eden-bɔa, si nye woƒe Paradiso-ƒe la me. Esi kɔɖiɖi na woƒe dzodzrowo nɔ vevie na wo wu woƒe dzidzimeviwo gɔ̃ hã ƒe nyonyo ta la, blibodede  kple agbe tegbee nɔnɔ ƒe mɔkpɔkpɔa ge le wo si.—1 Mose 2:15–3:24.

Agbea menɔ bɔbɔe na Adam kple Xawa le abɔa godo o. Ke hã, esi wodzi wo vi gbãtɔ si wotsɔ ŋkɔ na be Kain, si gɔmee nye “Ame Si Wodzi” la, Xawa gblɔ be: “Yehowa ɖi nam be, medzi ŋutsu.” Eƒe nyaa na wòdze abe nya si Yehowa gblɔ ɖi le abɔa me ku ɖe nyɔnu aɖe si ƒe ‘dzidzimevi’ ava tsrɔ̃ vɔ̃ɖitɔ si ble Adam kple Xawa gbe ɖeka lae nɔ susu me nɛ ene. (1 Mose 3:15; 4:1) Ðe Xawa susui be yee nye nyɔnu si ŋu nya wogblɔ ɖi, eye Kain nye ‘dzidzimevi’ si ŋugbe wodo la?

Ne nenemae la, ke eda ƒu ŋutɔ. Azɔ hã, ne eya kple Adam woƒã susu sia ɖe Kain me esime wònɔ tsitsim la, ke ɖikekemanɔmee la, wona dada si le eme le eƒe blibomademade ta la gado gã ɖe edzi. Emegbe Xawa dzi ŋutsuvi evelia, gake nuŋlɔɖia megblɔ be egblɔ nya siwo tɔgbi wògblɔ esi wòdzi Kain o. Wotsɔ ŋkɔ nɛ be Habel, si ate ŋu afia “Tofloko,” alo “Ƒuƒu.” (1 Mose 4:2) Ðe wotsɔ woƒe mɔkpɔkpɔ da ɖe Kain dzi wu Habel tae wotsɔ ŋkɔ ma nɛ ɖoa? Míenya ya o.

Aleke kee wòɖale o, egbea, dzilawo ate ŋu asrɔ̃ nu geɖe tso dzila gbãtɔ mawo ƒe nuwɔna me. Ðe nàto wò nyawo kple nuwɔnawo dzi aƒã dada, nɔƒe gã didi kple ɖokuitɔdidi ɖe viwòwo mea? Alo àfia wo be woalɔ̃ Yehowa Mawu ahanɔ ƒomedodo nyui me kplii? Nublanuitɔe la, mía dzila gbãtɔwo do kpo woƒe agbanɔamedzia tsɔtsɔ. Ke hã, mɔkpɔkpɔ li na woƒe dzidzimeviwo.

Esime Kain kple Habel nɔ tsitsim la, anɔ eme be Adam fia dɔ si hiã be woawɔ atsɔ akpɔ ƒomea dzii la wo. Kain zu agbledela, ke Habel zu lãnyila.

Gake Habel ya gawɔ nane si le vevie wu kura. Esi ƒeawo va nɔ yim la, etu xɔse, si nye nɔnɔme nyoameŋu si ŋu Paulo va ƒo nu tsoe emegbe la ɖo. Bu eŋu kpɔ. Amegbetɔ kpɔɖeŋu nyui ɖola aɖeke menɔ Habel si o. Ke aleke wòwɔ va xɔ Yehowa Mawu dzi se? Bu nu etɔ̃ siwo dzi wòanya tu eƒe xɔse ɖo la ŋu kpɔ.

Yehowa ƒe nuwɔwɔwo.

Enye nyateƒe be Yehowa ƒo fi de anyigba, si wɔe be ŋu kple aŋɔkawo miena henana agbledede sesẽna ya. Ke hã, anyigba gawɔa nuku kokoko, si nu Habel kple eƒe ƒometɔwo nɔa agbe ɖo. Azɔ hã, Mawu meƒo fi de lãwo, siwo dome xewo kple tɔmelãwo le la o; meƒo fi de towo, amuwo, tɔsisiwo kple atsiaƒu o; eye meƒo fi de dziŋgɔlia, alilikpowo, ɣe, ɣleti kple ɣletiviwo o. Nu siwo ɖo kpe Yehowa Mawu, ame si wɔ nuwo katã la ƒe lɔlɔ̃ deto, nunya kple nyuiwɔwɔ dzi la ƒo xlã Habel godoo. (Romatɔwo 1:20) Ŋugbledede le nu siawo ŋu ŋudzedzekpɔkpɔtɔe do ŋusẽ eƒe xɔse.

Anɔ eme godoo be Habel dia ɣeyiɣi dea ŋugble le Yehowa ŋu. Kpɔe ɖaa le susu me be ele eƒe alẽwo kplɔm. Azɔlidɔe alẽkpɔkplɔ nye. Ekplɔa lã fafa siawo toa togbɛwo dzi kple baliwo me hekplɔa wo tsoa tɔwoe henɔa gbeɖuƒe damawo, tsita nyuitɔwo kple gbɔɖemeƒe siwo ŋdɔ maɖu wo  le o la dim. Le Mawu ƒe nuwɔwɔwo katã dome la, edze abe alẽwoe hiã na beléle wu, abe ɖe wowɔ wo be amegbetɔwo nanɔ mɔ fiam wo ahanɔ wo ta kpɔm ene. Ðe Habel hã de dzesii be ehiã be Ame si ƒe nunya kple ŋusẽ de ŋgɔ sãsãsã wu amegbetɔwo tɔ la nafia mɔ ye ahakpɔ ye ta? Ðikekemanɔmee la, eɖe susu siawo tɔgbi geɖe gblɔ le gbedodoɖa me, si wɔe be eƒe xɔse ganɔ sesẽm ɖe edzi.

Yehowa ƒe nyagblɔɖiwo.

Adam kple Xawa anya gblɔ Eden-bɔa me nudzɔdzɔ siwo ta wonyà wo le abɔa me ɖo la ŋu nya na wo viŋutsuawo. Eya ta nu geɖe li si ŋu Habel ate ŋu ade ŋugble le.

Yehowa gblɔ be yeaƒo fi ade anyigba. Habel akpɔe adze sii kɔtɛ be ŋu kple aŋɔka siwo mie la ɖo kpe nya mawo me vava dzi. Yehowa gblɔe ɖi hã be Xawa ase veve le fufɔfɔ me, eye wòalé ku hafi adzi vi. Le Habel nɔviwo dziɣi la, ade dzesii be nya ma hã va eme. Yehowa ɖee gblɔ be didi sẽŋu si meda sɔ o anɔ Xawa me be ye srɔ̃ nalɔ̃ ye ahatsɔ ɖe le eme na ye, eye Adam hã anye gã ɖe edzi. Habel ade dzesii be nɔnɔme wɔnublanui ma va eme vavã. Habel de dzesii le go sia go me be kakaɖedzi blibo le Yehowa ƒe nyawo ŋu. Eya ta kpeɖodzi sẽŋuwo li siwo ta Habel axɔ ŋugbe si Mawu do ku ɖe ‘dzidzimevi’ si ava ɖɔ nu siwo gblẽ tso Eden-bɔa me ke la ɖo gbe ɖeka la dzi ase.—1 Mose 3:15-19.

Yehowa subɔlawo.

Habel mekpɔ kpɔɖeŋu nyui ɖola aɖeke le eƒe ƒometɔwo dome o, gake menye amegbetɔwo koe nye nuwɔwɔ siwo si nunya le siwo nɔ anyigba dzi ɣemaɣi o. Esi Yehowa nyà Adam kple Xawa le abɔa me la, ekpɔ egbɔ be wo kple woƒe dzidzimeviwo mate ŋu age ɖe anyigba dzi Paradiso ma me o. Yehowa tsɔ kerubiwo, siwo nye mawudɔla siwo le ɖoƒe kɔkɔ ŋutɔ la kple yi si troa eɖokui heklẽna abe dzo ƒe aɖe ene la ɖo abɔa ƒe mɔnu be woadzɔ eŋu.—1 Mose 3:24.

Kpɔe ɖa le susu me be Habel kpɔa kerubiawo esime wònɔ ɖevime. Mawudɔla mawo siwo do amegbetɔŋutilã la adze ame triakɔwo vavã. Eye “yi” ma si le totrom madzudzɔmadzudzɔe hele dzo dam la hã teƒe kpɔkpɔ aɖi vɔvɔ̃. Esime Habel nɔ tsitsim la, ɖe wòkpɔe kpɔ be nu va ti kɔ na kerubiawo, si wɔe be wogblẽ dɔa ɖi dzoa? Ao. Nuwɔwɔ triakɔ nyanu mawo medzo le afi si woda wo ɖo la o, wonɔ afi ma zã kple keli, ƒe sia ƒe hena ƒe geɖe. Eya ta Habel kpɔe dze sii be subɔla dzɔdzɔe siwo wɔa nuteƒe la le Yehowa Mawu si. Habel de dzesi nuteƒewɔwɔ kple toɖoɖo Yehowa ƒe nɔnɔme si menɔ eƒe ƒometɔwo si o la le kerubi mawo ŋu. Mawudɔlawo ƒe kpɔɖeŋu nyuia anya tu Habel ƒe xɔse ɖo godoo.

Habel kpɔe be ŋugbledede le nu siwo katã Yehowa ɖe fia le eɖokui ŋu to nuwɔwɔwo dzi, eƒe nyagblɔɖiwo me vava kple esubɔlawo ƒe kpɔɖeŋu nyuiwo ŋu gatu yeƒe xɔse ɖo. Ðe menye nyateƒee wònye be míate ŋu asrɔ̃ nu tso eƒe kpɔɖeŋua me oa? Esia ate ŋu ade dzi ƒo na ɖeviwo koŋ be, woate ŋu atu xɔse vavã ɖo na Yehowa Mawu metsɔ le eme afɔ si woƒe ƒometɔwo ɖe o. Nuwɔwɔ wɔnuku siwo katã ƒo xlã mí, Biblia bliboa si le mía si kple xɔse ƒe kpɔɖeŋu nyui ɖola geɖeawo ate ŋu atu woƒe xɔse ɖo egbea.

Esime xɔse si nɔ Habel si na Yehowa nɔ ŋu sẽm ɖe edzi la, edi be yeaɖee afia to nuwɔna me. Gake nu kae amegbetɔ dzro ate ŋu ana xexea katã Wɔla la? Eme kɔ ƒãa be Mawu mehiã na nunana alo kpekpeɖeŋu aɖeke tso amegbetɔwo gbɔ o. Habel va nya nyateƒenya vevi si nye be: Ne susu nyui le ye si, eye yetsɔ yeƒe nu nyuitɔ na ye Fofo lɔ̃ame si le dziƒo, Yehowa la, adze eŋu.

Eya ta Habel ɖoe be yeatsɔ yeƒe alẽawo dometɔ aɖewo asa vɔe. Etia ŋgɔgbeviawo, nyuitɔawo hetsɔ woƒe akpa siwo wòkpɔ be wodze ame ŋu wu la sa vɔe. Kain hã di Mawu ƒe yayra kple amenuveve, eya ta etsɔ eƒe agblemenu aɖewo sa vɔe, gake menye kple susu nyuitɔ, abe Habel ene o. Esia va dze kɔtɛ esi wo ame evea wotsɔ woƒe nunanawo va sa vɔe.

Adam viŋutsu eveawo siaa anya tɔ dzo woƒe vɔsanuawo le vɔsamlekpuiwo dzi, ɖewohĩ le afi si  woate ŋu anɔ kerubiawo, siwo ko ganye Yehowa teƒenɔlawo le anyigba dzi ɣemaɣi la, kpɔm le. Yehowa ɖee fia be yede dzesi nu si wowɔ la! Míexlẽ le Biblia me be: “Habel kple eƒe nunana dze Yehowa ŋu.” (1 Mose 4:4) Nuŋlɔɖia megblɔ mɔ si nu Mawu ɖe esia fia le ya o. Gake nu ka tae wòkpɔ ŋudzedze ɖe Habel ŋu?

Nu si wòtsɔ sa vɔe la taea? Nu si me agbe le, si gbɔna, ye Habel tsɔ sa vɔe hekɔ eƒe ʋu xɔasi la ɖe anyi. Ðe Habel nya asixɔxɔ si gbegbe ava nɔ vɔsa sia tɔgbi ŋua? Ƒe alafa geɖe le Habel ƒe ku megbe la, Mawu zã alẽvi si sɔ blibo ƒe vɔsa tsɔ wɔ kpɔɖeŋui na Eya ŋutɔ ƒe Vi deblibo la ƒe vɔsa, si me wokɔ “Mawu ƒe Alẽvi” sia ƒe ʋu maɖifɔ ɖi le. (Yohanes 1:29; 2 Mose 12:5-7) Gake edze kɔtɛ be esia ŋuti sidzedze alo gɔmesese aɖeke mesu Habel si o.

Nu si dzi míeka ɖoe nye be, Habel tsɔ eƒe nu nyuitɔ kekeake sa vɔe. Menye eƒe nunana la ko ŋue Yehowa kpɔ ŋudzedze ɖo o, ke eya amea ŋutɔ hã. Lɔlɔ̃ si le Habel si na Yehowa kple xɔse akuakua ye ʋãe wòsa vɔa.

Menɔ alea le Kain ya gome o. “Kain kple eƒe nunana ya medze [Yehowa] ŋu o.” (1 Mose 4:5) Menye ɖe nanee gblẽ le Kain ƒe nunanaa ŋu tae o, elabena emegbe la, Mawu ƒe Sea ɖe mɔ be woatsɔ agblemenuwo asa vɔe. (3 Mose 6:7, 8) Gake Biblia gblɔ tso Kain ŋu be “ye ŋutɔ ƒe dɔwɔwɔwo vɔ̃ɖi.” (1 Yohanes 3:12) Edze ƒãa be Kain susui be gotagome mawusosroɖa adze Mawu ŋu, abe ale si ame geɖe susunɛ egbea ene. Xɔse kple lɔlɔ̃ akuakua si menɔ esi na Yehowa o la va dze enumake le eƒe nuwɔnawo me.

Esi Kain kpɔe be yeƒe nu medze Yehowa ŋu o la, ɖe wòdze agbagba be yeasrɔ̃ Habel ƒe kpɔɖeŋua? Ao. Ebi dzi ɖe nɔvia ŋu boŋ. Yehowa kpɔ nu si nɔ edzi yim le Kain ƒe dzi me, eye wòƒo nu kplii dzigbɔɖitɔe. Exlɔ̃ nu Kain be eƒe dzibibia ate ŋu ana wòawɔ nu vɔ̃ gã, eye wòna Kain nya be ne etrɔ le eƒe mɔwo dzi la, yeakpɔ “ŋudzedze” ɖe eŋu.—1 Mose 4:6, 7, NW.

Kain do toku Mawu ƒe nuxlɔ̃amea. Egblɔ na Habel, si ka ɖe edzi la be neva ne yewoayi gbea me. Esi wole gbea me la, Kain tso ɖe Habel ŋu hewui. (1 Mose 4:8) Ne míagblɔ la, Habel va nye xɔsetakula gbãtɔ, alo ame gbãtɔ si wowu le mawusosroɖa ta. Togbɔ be eku hã la, eƒe ŋutinyaa mese ɖe afi ma o.

Le kpɔɖeŋunyagbɔgblɔ nu la, Habel ƒe ʋu le ɣli dom na Yehowa Mawu be wòabia hlɔ̃, alo adrɔ̃ ʋɔnu dzɔdzɔe. Mawu drɔ̃ ʋɔnu dzɔdzɔe hã, elabena ehe to na Kain vɔ̃ɖi la ɖe eƒe nu vlo wɔwɔa ta. (1 Mose 4:9-12) Gawu la, nufiame le Habel ƒe xɔse ŋuti nuŋlɔɖia me na mí egbea. Habel ƒe agbenɔƒewo, si ɖewohĩ anɔ ƒe alafa ɖeka la le kpuie ne wotsɔe sɔ kple eŋɔlimetɔwo tɔ, gake ewɔ ƒe mawo ŋu dɔ nyuie. Hafi wòaku la, enya be yeƒe nu dze Yehowa, ye Fofo si le dziƒo la ŋu, eye wòlɔ̃ ye. (Hebritɔwo 11:4) Eya ta míate ŋu aka ɖe edzi be ele dedie, elabena Yehowa meŋlɔa nu be o, eye aɖo ŋku edzi afɔe ɖe tsitre be wòava nɔ agbe le paradiso me le anyigba dzi. (Yohanes 5:28, 29) Èle afi ma nɔ ge akpɔea? Ate ŋu ava eme nenema ne èɖoe kplikpaa be yeawɔ nu abe Habel ene ahasrɔ̃ eƒe xɔse ɖedzesi la.