LE April 2006 me la, nyadzɔdzɔgbalẽwo ɖe gbeƒã nya wɔmoyaa aɖe le xexea me godoo be numekulawo le blemanuŋlɔɖi si ŋu woke ɖo, si wotsɔ ŋkɔ na be “Yuda Ƒe Nyanyuigbalẽa” ɖem ɖe go. Nyadzɔdzɔgbalẽawo gblɔ be agbalẽnyalawo be nuŋlɔɖi sia ana amewo natrɔ woƒe susu ku ɖe ale si wobua Yuda, si nye nusrɔ̃la si fia Yesu yomemɔ la ŋu. Woƒe nyawo fia be Yuda nye kalẽtɔ, enye apostolo si se nu gɔme na Yesu wu, eye wòtsɔ Yesu de asi be woawu, abe ale si Yesu bia tso esi ene.

Ðe blemanuŋlɔɖi ma me nyawo le eteƒea? Ne enye nyateƒe la, ke ɖe wòʋu go Yuda Iskariot, Yesu Kristo, alo blema Kristotɔwo ŋuti nya ɣaɣla aɖea? Ðe wòle be emenyawo nakpɔ ŋusẽ ɖe ale si míese Kristotɔnyenye gɔmee dzia?

Ale si wowɔ ke ɖe “Yuda Ƒe Nyanyuigbalẽa” ŋu la mele nyanya gobii ale o. Menye tomenukulawoe ke ɖe eŋu o, ke boŋ kaka woakpɔ la, wotsɔe ɖo asii le blemanuwo dzraƒe le ƒe 1970-awo ƒe nuwuwu alo ƒe 1980-awo ƒe gɔmedzedze lɔƒo. Ate ŋu anye be ƒe 1978 mee woke ɖe eŋu le Egipte le agado ƒuƒlu aɖe si nye ameɖiƒe tsã la me. Enye blemasinuŋɔŋlɔgbalẽ ene siwo wobla ɖekae la dometɔ ɖeka si me nyawo woŋlɔ ɖe Kɔptgbe me (enye gbe aɖe si do ƒome kple blema Egiptegbe).

Egipte-nyigba la ƒe dzoxɔxɔa kpɔ agbalẽ sia si ƒe akpa nye lãgbalẽ la ta ƒe alafa geɖe, ke esi woɖee tso nuto ma me la, ede asi gbegblẽ me kabakaba. Wotsɔe fia agbalẽnyala ʋɛ aɖewo kpuie le ƒe 1983 me; gake womekpɔ eƒlela o, le esi ho si woyɔ ɖe eŋu la sɔ gbɔ akpa ta. Ale si womedzrae ɖo helé be nɛ nyuie o la na wògagblẽ ɖe edzi le ƒe siwo kplɔe ɖo me. Switzerlandtɔ aɖe si nye blemanuwo ƒe asitsala la ƒlee le ƒe 2000 me. Mlɔeba la, etsɔe na agbalẽnyalawo ƒe ƒuƒoƒo aɖe me tɔ siwo tso dukɔ vovovowo me, siwo habɔbɔ aɖewo (Maecenas Foundation for Ancient Art kple National Geographic Society) do alɔe la be woaɖɔe ɖo ahaɖoe ɖe ɖoɖo nu. Dɔ sia sesẽ, elabena agbalẽa ƒe akpa aɖewo va vuvu klayiklayi azɔ. Ele na wo hã be woabu  akɔnta anya ƒe si agbalẽa xɔ ahaɖe emenyawo gɔme.

Dodokpɔ tɔxɛwo ɖee fia be agbalẽa anya nɔ anyi tso ƒe alafa etɔ̃lia alo enelia Mía Ŋɔli (M.Ŋ.) me. Gake agbalẽnyalawo xɔe se be “Yuda Ƒe Nyanyuigbalẽa” ƒe Helagbe me tɔ, si dzi wokpɔ ɖe egɔme ɖe Kɔptgbe me la tsi sãsãsã wu. Aleke nɔnɔmeawo nɔ esime woŋlɔ “Yuda Ƒe Nyanyuigbalẽa”?

Agbalẽŋlɔla Irenaeus, si amewo buna Kristotɔ, si nɔ anyi le ƒe alafa evelia M.Ŋ. ƒe nuwuwu lɔƒo lae ƒo nu tso “Yuda Ƒe Nyanyuigbalẽa” ŋu zi gbãtɔ le eƒe nuŋlɔɖiwo me. Le Irenaeus ƒe agbalẽ aɖe (Against Heresies) me la, eŋlɔ tso ha vovovo siwo ƒe nufiafia ŋu wòtsi tsitre ɖo la dometɔ ɖeka ŋu be: “Wogblɔna be yomemɔfiala Yuda nya nu siawo nyuie, eye ame bubuawo dometɔ aɖeke menya nyateƒea de enu o, eye eyae de eƒe aƒetɔ asi si gɔme amewo mese o. Eto esia dzi na nuwo katã tɔ zi le dziƒo kple anyigba dzi. Wokpa ŋutinya aɖe ku ɖe nya siawo ƒomevi ŋu hetsɔ ŋkɔ nɛ be Yuda Ƒe Nyanyuigbalẽa.”

Irenaeus ɖoe kplikpa be yeaɖee afia be Sidzehawo, siwo be yewonye Kristotɔ siwo si sidzedze tɔxɛ su la ƒe nufiafiawo nye aʋatso. Sidzehawo nye ŋkɔ si wotsɔ na ha vovovo siwo be yewonye Kristotɔwo, eye wo dometɔ ɖe sia ɖe kple ale si wòse “nyateƒea” gɔme heɖea egɔmee. Sidzehawo to woƒe agbalẽwo dzi do woƒe nufiafiawo ɖe ŋgɔ, eye woƒe agbalẽwo va bɔ le ƒe alafa evelia M.Ŋ. me.

Sidzehawo gblɔna le woƒe agbalẽwo me zi geɖe be Yesu ƒe apostolo siwo nɔ eŋu kplikplikpli la mese eƒe nyawo gɔme o, eye be Yesu ɖe nya ɣaɣla aɖe ɖe go si gɔme ame tiatia ʋɛ aɖewo ko se. * Sidzeha aɖewo xɔe se be xexe si me agbagbeawo le la nye gaxɔmenɔnɔ. Le esia ta, “mawu si nye wɔla” si ŋu woƒo nu tsoe le Hebri Ŋɔŋlɔawo me la nye mawu sueawo dometɔ ɖeka si tsi tsitre ɖe mawu gã bubuawo ŋu. Ame si si “sidzedze” vavãtɔ su la sea “nya ɣaɣla” sia gɔme hedina be yeadzo le agbagbeawo ƒe xexea me.

Dzixɔse sia dze le “Yuda Ƒe Nyanyuigbalẽa” me. Wodze emenyawo gɔme ale: “Nya ɣaɣla si Yesu gblɔ na Yuda Iskariot le dze si woɖo le ŋkeke enyi me hewu enu ŋkeke etɔ̃ do ŋgɔ na Ŋutitotoŋkekenyuia.”

Ðe blemasinuŋɔŋlɔgbalẽ sia nye esi ŋu Irenaeus ƒo nu tsoe, si wosusu be ebu ƒe alafawoe nye esia la? Marvin Meyer, si nɔ ame siwo dzro agbalẽ sia me heɖe egɔme zi gbãtɔ dome la, gblɔ be ale si Irenaeus “ɖɔ agbalẽa kpuie la sɔ kple Kɔptgbe me gbalẽ si nye Gospel of Judas (Yuda Ƒe Nyanyuigbalẽa).”

Le “Yuda Ƒe Nyanyuigbalẽa” me la, Yesu ɖe alɔme le eƒe nusrɔ̃lawo ŋu ɖe sidzedze deto si menɔ wo si o ta. Gake Yuda koe nye apostolo 12-awo dometɔ si se ame si Yesu nye gɔme nyuie wu. Eya ta Yesu ɖe “fiaɖuƒe la ŋuti nya ɣaɣlawo” fia eya ɖeka ko.

Nya si Irenaeus gblɔ tso agbalẽ sia ŋu la kpɔ ŋusẽ gã aɖe ɖe agbalẽnyala siwo ɖe emenyawo gɔme zi gbãtɔ la dzi. Le woƒe gɔmeɖeɖea nu la, Yuda ye nye nusrɔ̃la si ŋu Yesu kpɔ ŋudzedze ɖo wu, si sea nya ɣaɣlawo gɔme, eye be “ayi” ɖe “fiaɖuƒea” me. Apostolo masenugɔme bubuawo atia apostolo bubu ɖe Yuda teƒe, gake eyae ava nye “gbɔgbɔ wuietɔ̃lia,” si “aƒo [nusrɔ̃la bubuawo] katã ta,” elabena Yesu gblɔ be, “àtsɔ ŋutilã si medo la asa vɔe.”

Esia megbe kpuie koe agbalẽŋlɔla bibi siwo dome Bart Ehrman kple Elaine Pagels le, siwo hã nye Kristotɔ gbãtɔwo kple Sidzehawo ŋuti nunyala xɔŋkɔwo la, dzro “Yuda Ƒe Nyanyuigbalẽa”  me, eye ale si woɖe egɔmee la de sɔsɔ ge kple gbegɔmeɖela gbãtɔwo tɔ. Gake eteƒe medidi hafi agbalẽnyala April DeConick kple Birger Pearson gblɔ be nya ku ɖe gɔmeɖeɖea ŋu o. Wogblɔ be esi habɔbɔ si nye National Geographic Society di be amewo nase agbalẽa ŋu nya kaba ta la, woƒo dzo ɖe gbegɔmeɖelaawo te. Azɔ hã, womewɔ mɔnu si nye agbalẽa me dzodzro tsitotsito ahana agbalẽnyala bubuwo nagbugbɔ adzro eme la ŋu dɔ o, elabena wobia tso gbegɔmeɖelawo si be woade asi agbalẽ te be yewomaʋu go emenyawo o.

Esi DeConick kple Pearson va dzro agbalẽa me le wo ɖokuiwo si la, wo ame evea siaa ƒo nya ta be agbalẽnyala gbãtɔwo meɖe blemasinuŋɔŋlɔgbalẽ sia ƒe akpa vevi aɖewo gɔme ɖe eteƒe o. Le DeConick ƒe gɔmeɖeɖea nu la, Yesu yɔ Yuda be “Gbɔgbɔ Vɔ̃ Wuietɔ̃lia,” ke menye “gbɔgbɔ wuietɔ̃lia” o. * Tsɔ kpe ɖe eŋu la, Yesu gblɔ na Yuda kaŋ be mayi “fiaɖuƒe” la me o. Eye Yuda ‘maƒo’ nusrɔ̃la bubuawo ta o, ke boŋ Yesu gblɔ nɛ be: “Le wo katã dome la, wòe eme manyo na o. Elabena ŋutilã si medo lae nàtsɔ asa vɔe.” Le DeConick ƒe nya nu la, “Yuda Ƒe Nyanyuigbalẽa” nye blema Sidzehawo ƒe agbalẽ si ɖe alɔme le apostoloawo katã ŋu. DeConick kple Pearson ƒe nyataƒoƒo si dzi woɖo kpee ye nye be, le “Yuda Ƒe Nyanyuigbalẽa” me la, Yuda menye kalẽtɔ o.

Agbalẽnyala siwo dzro agbalẽ sia me la dometɔ aɖeke megblɔ be emenyawo nye nyateƒe o. Aleae wòle le esiwo be enye kalẽtɔ kple esiwo be enye gbɔgbɔ vɔ̃ la siaa gome. Agbalẽnyala Bart Ehrman gblɔ be: “Menye Yuda ye ŋlɔ Nyanyuigbalẽ sia o, eye womegblɔ le eme be eyae ŋlɔe hã o. . . . Menye Yuda ŋɔlimetɔ aɖe si dze sii lae ŋlɔ Nyanyuigbalẽa o . . . Eya ta menye agbalẽ si ana míaganya nu bubuwo tso nu siwo dzɔ le Yesu ŋɔli ŋu lae wònye o.”

“Yuda Ƒe Nyanyuigbalẽa” nye Sidzehawo ƒe agbalẽ aɖe si woŋlɔ ɖe Helagbe me zi gbãtɔ le ƒe alafa evelia M.Ŋ. me. Agbalẽnyalawo meka ɖe edzi nenye be eyae nye “Yuda Ƒe Nyanyuigbalẽa” si ŋu Irenaeus ƒo nu tsoe la o. Gake “Yuda Ƒe Nyanyuigbalẽa” ɖo kpe edzi kɔtɛ be ɣeaɖeɣi va yi la, ame siwo be yewonye Kristotɔwo la ma ɖe kɔmama vovovo siwo ʋlia ho kple wo nɔewo, siwo ƒe nufiafiawo tsi tre ɖe wo nɔewo tɔ ŋu la me. “Yuda Ƒe Nyanyuigbalẽa” menye kpeɖodzi be Biblia meto nyateƒe o, ke boŋ ɖe wòɖo kpe apostolo Paulo ƒe nuxlɔ̃ame si le Dɔwɔwɔwo 20:29, 30 la dzi be: “Menya be le nye dzodzo megbe la, . . . le mia ŋutɔwo dome la, ame aɖewo atsi tsitre, eye woagblɔ nya totrowo, be woahe nusrɔ̃lawo ɖe wo ɖokuiwo ŋu.”