NYATI SI LE AKPAA DZI | AGBENƆNƆ LE KU MEGBE ÐE WÒANYA WƆA?
Ðe Mɔkpɔkpɔ Aɖe Li Na Ame Siwo Kua?
Ðe ame siwo ku la agava nɔ agbe akea?
ALE SI BIBLIA ÐO EŊUI: “Gaƒoƒo la gbɔna, esime ame siwo katã le ŋkuɖodziyɔdowo me la ase [Yesu ƒe] gbe, eye woado go.”—Yohanes 5:28, 29.
Yesu ƒe nya siawo fia be, ɣeyiɣi aɖe gbɔna esime yɔdowo, alo Tsiẽƒe, atsi ƒuƒlu le yeƒe Fiaɖuƒedziɖuɖua te. Fernando, si ŋu míeƒo nu tsoe le nyati si do ŋgɔ me la gblɔ be: “Esi mexlẽ Yohanes 5:28, 29 zi gbãtɔ la, ɖeko nye nu ku. Ena mɔkpɔkpɔ vavã su asinye, eye tso gbe ma gbe la, mekpɔe be etsɔme nyui aɖe le ŋgɔ gbɔna.”
Nuteƒewɔla Hiob si nɔ anyi le blema la kpɔ mɔ be ne yeku la, Mawu afɔ ye le eƒe ɣeyiɣi ɖoɖi dzi. Hiob bia be: “Ne ame ku la, ɖe wòagagbɔ agbea?” Eyome eɖo eŋu kakaɖedzitɔe be: “Le nye dziziziŋkekewo [alo Tsiẽƒenɔɣi] katã me la, manɔ lalam va se ɖe esime gbɔdzɔe nava nam. Àyɔm, eye matɔ na wò.”—Hiob 14:14, 15.
Lazaro ƒe tsitretsitsia na míele mɔ kpɔm na etsɔme nyui aɖe
Menye nya yeyee tsitretsitsia nye na Lazaro nɔvinyɔnu Marta o. Esi Lazaro ku la, Yesu gblɔ nɛ be: “Nɔviwò la atsi tsitre.” Marta ɖo eŋu be: “Menya be afɔ le tsitretsitsi la me le ŋkeke mlɔetɔ dzi.” Yesu gblɔ nɛ be: “Nyee nye tsitretsitsi la kple agbe la. Ame si xɔa dzinye sena la, ne eku hã la, agagbɔ agbe.” (Yohanes 11:23-25) Esia yome kpuie koe Yesu fɔ Lazaro ɖe tsitre! Nudzɔdzɔ wɔdɔɖeamedzi ma na míekpɔ ale si woava fɔ ame gbogbo aɖewo ɖe tsitre le etsɔme la le susu me. Bu eŋu kpɔ ko be wole amewo fɔm ɖe tsitre le xexea me godoo!
Ðe woafɔ ame aɖewo woayi dziƒoa?
ALE SI BIBLIA ÐO EŊUI: Mawu ƒe Nyaa ɖee fia be Yesu ƒe tsitretsitsia to vovo na tsitretsitsi enyi bubu siwo ŋu Biblia ƒo nu tsoe. Esi wofɔ ame enyi mawo ɖe tsitre la, wogava nɔ agbe le anyigba dzi ake. Gake Biblia gblɔ le Yesu ƒe tsitretsitsia ya ŋu be: ‘Yesu Kristo yi dziƒo, eye wòle Mawu ƒe ɖusime.’ (1 Petro 3:21, 22) Ðe woafɔ ame bubuwo hã woayi dziƒoa, alo Yesu ɖeka koea? Hafi Yesu naku la, egblɔ na eƒe apostolowo be: “Ne meyi ɖadzra teƒe ɖo ɖi na mi vɔ la, magava, eye maxɔ mi ɖe nye ŋutɔ gbɔnye, ale be afi si mele la, miawo hã mianɔ afi ma.”—Yohanes 14:3.
Kristo yi dziƒo heɖawɔ ɖoɖo ɖe eƒe nusrɔ̃la aɖewo ƒe dziƒoyiyi ŋu. Ame siwo woafɔ woayi dziƒo la katã ƒe xexlẽme anye ame 144,000 mlɔeba. (Nyaɖeɖefia 14:1, 3) Gake nu kae Yesu yomedzela mawo, siwo nɔ eŋu kplikplikpli la, ayi aɖawɔ le dziƒo?
Dɔ gbogbo aɖewo adze ŋgɔ wo! Biblia gblɔ be: “Dzidzɔtɔ kple kɔkɔetɔe nye ame si kpɔ gome le tsitretsitsi gbãtɔ la me; ku evelia mekpɔ ŋusẽ ɖe ame siawo dzi o, ke boŋ woanye Mawu kple Kristo ƒe nunɔlawo, eye woaɖu fia kplii ƒe akpe ɖeka.” (Nyaɖeɖefia 20:6) Eya ta ame siwo woafɔ woayi dziƒo la azu nunɔlawo kple fiawo akpe ɖe Kristo ŋu eye woa kplii woaɖu fia ɖe anyigba la dzi.
Ame kawoe woava fɔ ɖe tsitre emegbe?
ALE SI BIBLIA ÐO EŊUI: Woŋlɔ nya sia si Mawu ƒe gbɔgbɔ ʋã apostolo Paulo wògblɔ la ɖe Ŋɔŋlɔawo me be: “Mɔkpɔkpɔ le asinye le Mawu me, eye mɔkpɔkpɔ ma kee le ame siawo ŋutɔ hã si, be tsitretsitsi li na ame dzɔdzɔewo kple ame madzɔmadzɔwo siaa.”—Dɔwɔwɔwo 24:15.
Mawu ƒe Nyaa na míeka ɖe edzi be ame biliɔn geɖe siwo ku la agava nɔ agbe ake
Ame kawoe nye ame siwo Paulo yɔ be “ame dzɔdzɔewo”? Bu kpɔɖeŋu sia ŋu kpɔ. Esi wòsusɔ vie nuteƒewɔla Daniel naku la, wogblɔ nɛ be: “Ke wò la, heyi va se ɖe nuwuwu. Àgbɔ ɖe eme, ke àfɔ le ŋkekeawo ƒe nuwuwu axɔ wò gome.” (Daniel 12:13) Ne wofɔ Daniel tso ku me la, afi kae wòanɔ? Biblia gblɔ be: “Ame dzɔdzɔewo anyi anyigba la dome, eye woanɔ edzi tegbee.” (Psalmo 37:29) Eye Yesu hã gblɔe ɖi be: “Dzidzɔtɔwoe nye ame fafawo, elabena woanyi anyigba la dome.” (Mateo 5:5) Eya ta woafɔ Daniel kpakple ŋutsu kple nyɔnu nuteƒewɔlawo ɖe tsitre woagava nɔ agbe le anyigba dzi ake, eye woanɔ edzi tegbee.
Ame kawoe nye ame siwo Paulo yɔ be “ame madzɔmadzɔwo”? Woawoe nye ame biliɔn geɖe siwo nɔ agbe le anyigba dzi heku evɔ mɔnukpɔkpɔ mesu wo si be woase Biblia me nyateƒea gɔme ahawɔ ɖe edzi o. Ne wofɔ wo ɖe tsitre la, mɔnukpɔkpɔ asu wo si azɔ be woadze si Yehowa * kple Yesu nyuie ahalɔ̃ wo. (Yohanes 17:3) Mɔnukpɔkpɔ asu ame siwo katã atiae be yewoasubɔ Mawu la si be woayi edzi anɔ agbe tegbee, abe ale si ko Yehowa ŋutɔ li tegbee ene.
Mɔnukpɔkpɔ asu ame siwo katã atiae be yewoasubɔ Mawu la si be woayi edzi anɔ agbe le lãmesẽ deblibo kple dzidzɔ me tegbee
Aleke nɔnɔmeawo anɔ le anyigba dzi ɣemaɣi?
ALE SI BIBLIA ÐO EŊUI: Mawu “atutu aɖatsi sia aɖatsi ɖa le woƒe ŋkume, eye ku maganɔ anyi akpɔ o, konyifafa kple ɣlidodo kpakple vevesese hã maganɔ anyi o.” (Nyaɖeɖefia 21:4) “Woatu xɔ anɔ eme, eye woade waingble aɖu eme kutsetse.”—Yesaya 65:21.
Wò ya kpɔe ɖa ko be wò kple wò ame vevi siwo wofɔ ɖe tsitre la miele agbe ɣemaɣi! Gake biabia lae nye be, Aleke nàwɔ aka ɖe edzi be woafɔ ame siwo ku la ɖe tsitre?
^ mm. 15 Biblia na míenya be Mawu ƒe ŋkɔe nye Yehowa.
