“NU KA TA dzinyee wòadzɔ ɖo? Nu ka tae Mawu ɖe mɔ nu sia dzɔ ɖe dzinye?” Nya siawoe ɖe fu na Sidnei, si xɔ ƒe 24, si tso Brazil. Edze afɔku le modzakaɖeƒe aɖe, si wɔe be wòva tsi bunɔkeke me.

Ne afɔku, dɔléle, ame vevi aɖe ƒe ku, dzɔdzɔmefɔku, alo aʋawɔwɔ na amewo le fu kpem la, zi geɖe la, ewɔna na wo be Mawu gblẽ yewo ɖi. Menye nu yeyee esia nye o. Esi nya vɔ̃wo tu blemafofo Hiob tre ɖe enu la, ebu fɔ Mawu vodadatɔe gblɔ bena: “Medoa ɣli be nàxɔ nam, ke mètɔna nam o; metso ɖe tsitrenu, ke ɖeko nèle kpɔyem dũu. Ètrɔ zu ŋutasẽla ɖe ŋunye; ètsɔ wò alɔkame sesẽ la dze dzinye.”—Hiob 30:20, 21.

Hiob menya ame si gbɔ eƒe fukpekpewo tso o, menya nu si tae wodzɔ alo nu si tae Mawu ɖe mɔ ɖe wo ŋu o. Dzidzɔtɔe la, Biblia na míenya nu si tae nu mawo dzɔna kple ale si wòle be míawɔ nui ne wodzɔ.

Biblia gblɔ tso Mawu ŋu be: “Eƒe dɔwɔwɔ de blibo, elabena eƒe mɔwo katã dzɔ. Mawu nyateƒetɔ, ame si mewɔa nu madzɔmadzɔ gbeɖe o; dzɔdzɔetɔ kple nuteƒewɔla wònye.” (5 Mose 32:4) Ekema ɖe wòasɔ be woagblɔ be Mawu si nye “dzɔdzɔetɔ kple nuteƒewɔla” la ɖoe be amegbetɔwo nakpe fu alo ezãa afɔku dziŋɔwo tsɔ hea to na wo alo tsɔ kɔa wo ŋua? Ðe gɔmesese le nya ma ŋua?

Nu si Biblia gblɔ boŋue nye be: “Ne ame aɖe le tetekpɔ me tom la, megagblɔ be: ‘Mawue le teyem kpɔ’ o. Elabena womate ŋu atsɔ nu vɔ̃ɖiwo ate Mawu akpɔ o, eye eya ŋutɔ hã metea ame aɖeke kpɔna o.” (Yakobo 1:13) Le nyateƒe me la, Biblia na míenya be esi Mawu wɔ amegbetɔwo le gɔmedzedzea me la, nu sia nu de blibo. Esi wòwɔ Adam kple Xawa, siwo nye amegbetɔ gbãtɔwo la, ena nɔƒe nyui aɖe wo, ena nu siwo katã wohiã la wo hekpe ɖe dɔ si me dzidzeme le ŋu. Mawu gblɔ na wo be: “Midzi ne miasɔ gbɔ, miayɔ anyigba la dzi, eye miaɖu edzi.” Eya ta susu aɖeke menɔ anyi si tae Adam kple Xawa nase le wo ɖokuiwo me be Mawu gblẽ yewo ɖi o.—1 Mose 1:28.

Gake egbea, nɔnɔmeawo mede blibo le mɔ aɖeke nu o. Amegbetɔwo le fu kpem tso keke blema ke. Ŋɔŋlɔawo gblɔe ɖe eteƒe be: “Nuwɔwɔ blibo la katã le ŋeŋem, eye wòle veve sem va se ɖe fifi.” (Romatɔwo 8:22) Aleke wòdzɔe?

Hafi míate ŋu anya nu si tae fukpekpe li ɖo la, ele be míatrɔ ayi ɣeyiɣi si me wòdze egɔme. Mawudɔla dzeaglã aɖe si wova yɔ emegbe be Satana Abosam la na Adam kple Xawa tu afɔkpo mɔfiame si Mawu na wo le nyui kple vɔ̃ ŋu la. Mɔfiame mae nye se si Mawu de na wo be woagaɖu “sidzedze nyui kple vɔ̃ ƒe atia” ƒe tsetse o. Ke Abosam va gblɔ na Xawa be ne wogbe toɖoɖo Mawu la, womaku o, si fia be enɔ gbɔgblɔm be Mawu nye alakpatɔ. Tsɔ kpe ɖe eŋu la, Satana tso Mawu nu be meɖe mɔ na eteviwo be woawo ŋutɔwo natso nya me le nu si nye nyui kple vɔ̃ ŋu o. (1 Mose 2:17; 3:1-6) Satana ƒe nyawo fia be Mawu ƒe dziɖuɖu ɖe amegbetɔwo dzi made wo dzi o. Esiawo katã fɔ biabia vevi aɖe ɖe te, si nye: Ðe Mawu dze aɖu dzia?

Abosam gafɔ nya bubu aɖe hã ɖe te. Egblɔ be ɖokuitɔdidi tae amegbetɔwo subɔa Mawu ɖo. Hiob nye nuteƒewɔla, gake Abosam gblɔ tso eŋu na Mawu be: “Ðe menye wòe tɔ kpɔ ɖe eya ŋutɔ kple eƒe aƒe kpakple eƒe nuwo katã ŋu godoo va kpe oa? . . . Gake ne èdo wò asi ɖa gblẽ nu siwo katã le esi dome la, aƒo fi ade wò le wò ŋutɔ wò ŋkume godoo.” (Hiob 1:10, 11) Togbɔ be Hiob ŋue Satana gblɔ nya siawo le hã la, eƒe nyaa fia be ɖokuitɔdidi tae amegbetɔwo katã subɔa Mawu ɖo.

Mɔ kae nye nyuitɔ si dzi woato akpɔ nya vevi mawo siwo fɔ ɖe te la gbɔ zi ɖeka ɖe ɣeyiɣiawo katã nu? Mawu, si nye nunyala ɖeka hɔ̃ la nya egbɔkpɔnu nyuitɔ, si mana míase le mía ɖokui me be egblẽ mí ɖi o. (Romatɔwo 11:33) Eɖe mɔ be amegbetɔwo  naɖu wo ɖokuiwo dzi hena ɣeyiɣi aɖe, ale be emetsonua nana míakpɔ ame si ƒe dziɖuɖu nye nyuitɔ.

Nɔnɔme wɔnublanui siwo le anyigba dzi egbea la ɖee fia kɔtɛ be amegbetɔwo ƒe dziɖuɖu do kpo nu keŋkeŋ. Menye ɖeko xexemedziɖuɖuwo do kpo ŋutifafa, dedienɔnɔ kple dzidzɔkpɔkpɔ hehe vɛ o, ke esusɔ vie woagblẽ anyigbaa keŋkeŋ. Esia ɖo kpe Biblia me nyateƒenya matrɔmatrɔ sia dzi be: “Ŋusẽ mele amegbetɔ si be eya ŋutɔ nafia mɔ eƒe zɔzɔme o.” (Yeremiya 10:23) Mawu ƒe dziɖuɖu koe ate ŋu ahe ŋutifafa, dzidzɔkpɔkpɔ kple nudzedziname si anɔ anyi ɖaa la avɛ, elabena esiae nye Mawu ƒe tameɖoɖo.—Yesaya 45:18.

Ke aleke Mawu awɔ ana tame si wòɖo ɖe amegbetɔwo ŋu la nava eme? Ðo ŋku edzi be Yesu fia eyomedzelawo be woado gbe ɖa be: “Wò Fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene.” (Mateo 6:10) Ɛ̃, ne ɣeyiɣia de la, Mawu ato eƒe Fiaɖuƒea dzi aɖe nu siwo katã nana míekpea fu la ɖa. (Daniel 2:44) Ahedada, dɔléle kple ku nu ayi. Biblia gblɔ tso ame dahe la ŋu be, Mawu “aɖe ame dahe si le ɣli dom be woaxɔ na ye la.” (Psalmo 72:12-14) Ŋugbedodo si le Biblia me na dɔnɔwoe nye be: “Dua me tɔ aɖeke magblɔ be, ‘Mele dɔ lém’ o.” (Yesaya 33:24) Yesu gblɔ le ame kuku siwo dzi Mawu ƒe susu le la gɔ̃ hã ŋu be: “Gaƒoƒo la gbɔna, esime ame siwo katã le ŋkuɖodziyɔdowo me la ase eƒe gbe, eye woado go.” (Yohanes 5:28, 29) Ŋugbedodo nyui kawo gbegbee nye esi!

Ƒe 17 megbe tso esime Sidnei, si ŋu míeƒo nu tsoe le nyati sia ƒe gɔmedzedze dze afɔkua la, egblɔ be: “Nyemebu fɔ Yehowa Mawu gbeɖe ɖe afɔku si medze ta o, gake magblɔ be le gɔmedzedzea me la, mese le ɖokuinye me be egblẽm ɖi. Ɣeaɖewoɣi la, meléa blanui ŋutɔ, eye mefaa avi le esi mezu nuwɔametɔ ta. Ke hã Biblia na mekpɔe be afɔkua menye tohehe tso Mawu gbɔ o. Biblia gblɔ be, ‘azãgbe kple nuɖiɖeame li na mí katã.’ Medoa gbe ɖa na Yehowa hexlẽa ŋɔŋlɔ siwo ku ɖe nye nɔnɔmea ŋu, eye esia doa ŋusẽm henana nye dzi dzea eme.”—Nyagblɔla 9:11; Psalmo 145:18; 2 Korintotɔwo 4:8, 9, 16.

Ne ewɔ na mí be Mawu gblẽ mí ɖi la, ŋkuɖoɖo susu siwo ta Mawu ɖe mɔ fukpekpe li kple ale si wòava ɖee ɖa kpuie dzi akpe ɖe mía ŋu míakpɔe be megblẽ mí ɖi o. Míeka ɖe edzi be Mawu nye “teƒeɖola na ame siwo dinɛ vevie la.” Ame sia ame si ziɔa eƒe xɔse ɖe eya kple Via ŋu la, mɔkpɔkpɔ mabu ɖee o.—Hebritɔwo 11:6; Romatɔwo 10:11.