Ao, ɖekawɔwɔ le Biblia bliboa me nyawo me. Togbɔ be emenya aɖewo adze abe ɖe wotsi tsitre ɖe wo nɔewo ŋu ene hã la, míate ŋu ase nu si tae wòdze nenema la gɔme ne míewɔ mɔnu siwo gbɔna la dometɔ ɖeka alo esi wu ema ŋu dɔ:

1.   Lé ŋku ɖe nya siwo ƒo xlãe ŋu. Woate ŋu abu agbalẽŋlɔla ɖe sia ɖe ƒe nyawo be wotsi tsitre ɖe wo nɔewo ŋu ne womebu nya siwo ƒo xlã nya mawo o.

2.   Nya agbalẽa ŋlɔla ƒe susu. Ame siwo kpɔ nudzɔdzɔ ɖeka teƒe ate ŋu agblɔ nu siwo dzɔ la wòade pɛpɛpɛ evɔ woƒe nyawo kple numeɖeɖewo ate ŋu ato vovo.

3.   Bu ŋutinyawo kple dekɔnuwo ŋu.

4.   De dzesi kpɔɖeŋunyagbɔgblɔwo kple nyagbɔgblɔ siwo ƒe gɔmesese le tẽe.

5.   De dzesii be woate ŋu agblɔ be ame aɖe wɔ nane togbɔ be menye eya ŋutɔe wɔe tẽe o gɔ̃ hã. a

6.   Zã Biblia gɔmeɖeɖe si de pɛpɛpɛ.

7.   Ƒo asa na agbagbadzedze be yeazã nufiafia totrowo alo subɔsubɔhawo ƒe nufiafiawo atsɔ aɖe Biblia me nyawo me.

 Kpɔɖeŋu siwo gbɔna la ɖe ale si míate ŋu awɔ mɔfiame sia ŋu dɔ atsɔ aɖe Biblia ƒe mawunyakpukpui siwo dzena abe ɖe wotsi tre ɖe wo nɔewo ŋu ene la me.

Mɔfiame 1: Nya siwo ƒo xlã kpukpuia

  Ne Mawu le ɖiɖim ɖe eme tso ŋkeke adrelia dzi la, ke aleke wɔ wògale dɔ dzi? Nya siwo ƒo xlã Mose Ƒe Agbalẽ Gbãtɔ me nyagbɔgblɔ si nye be Mawu te “ɖiɖi ɖe eme le ŋkeke adrelia dzi tso dɔ siwo katã wɔm wònɔ la me” ku ɖe anyigbadzinuwo wɔwɔ ŋu koŋ. (1 Mose 2:2-4) Nya si Yesu gblɔ be “Fofonye le dɔ wɔm va se ɖe fifi” metsi tre ɖe nya sia ŋu o, elabe dɔ si Yesu wɔnɛ la to vovo na anyigbadzinuwo wɔwɔ. (Yohanes 5:17) Mawu ƒe dɔ siwo wòwɔnɛ la dometɔ aɖewoe nye amewo ʋaʋã be woaŋlɔ Biblia, mɔfiafia amegbetɔƒomea kple beléle na wo.​—Psalmo 20:6; 105:5; 2 Petro 1:21.

Mɔfiame 2 kple 3: Agbalẽa ŋlɔla ƒe susu kple ŋutinyawo

Afi kae Yesu ʋu ŋku na ŋkuagbãtɔ la le? Luka ƒe agbalẽa gblɔ be Yesu da gbe le ŋkuagbãtɔ aɖe ŋu “esi Yesu le Yeriko gogom” evɔ esi Mateo nɔ nu ƒom tso nudzɔdzɔ ma ke ŋu la, egblɔ be ŋkuagbãtɔ eve ye, eye be nua dzɔ esi Yesu nɔ “dzodzom le Yeriko.” (Luka 18:35-43; Mateo 20:29-34) Ŋutinya eve siawo dometɔ ɖe sia ɖe ɖe nyatakaka vevi aɖewo ɖe go siwo medze le evelia me o. Mateo ya yɔ ŋkuagbãtɔwo ƒe xexlẽme pɛpɛpɛ, evɔ Luka ya he susu yi ŋkuagbãtɔawo dometɔ si Yesu nɔ nu ƒom na la dzi. Le teƒeawo ƒe vovototo gome ya la, tomenukulawo va de dzesii be du evee woyɔna be Yeriko. Yudatɔwo ƒe Yeriko-du xoxotɔ didi tso Yeriko-du yeye si Romatɔwo tso la gbɔ ade kilometa ɖeka kple afã. Anɔ eme be teƒe aɖe si le du eveawo domee Yesu nɔ esime wòwɔ nukunuawo.

Mɔfiame 4: Kpɔɖeŋunyagbɔgblɔwo kple nyagbɔgblɔ siwo ƒe gɔmesese le tẽe

Ðe woatsrɔ̃ anyigba la? Biblia gblɔ le Nyagblɔla 1:4 be, “anyigba ya li tegbee.” Ame aɖewo gblɔna be Biblia me nya sia tsi tsitre ɖe emenya bubu si nye be “anyigba kple eme dɔwɔwɔwo lafiã keŋ” la ŋu. (2 Petro 3:10, Eʋegbe Biblia) Ke hã le Biblia me la, wotea ŋu zãa nya “anyigba” wòfiaa anyigba ŋutɔŋutɔ eye wogatea ŋu zãnɛ le kpɔɖeŋunyagbɔgblɔ nu hã wòfiaa amegbetɔ siwo le anyigba dzi. (1 Mose 1:1; 11:1) “Anyigba” la tsɔtsrɔ̃ si ŋu woƒo nu tsoe le 2 Petro 3:​10 mefia be míaƒe anyigba si dzi míele la ŋutɔŋutɔ afiã le dzo me o, ke boŋ “ame mavɔ̃mawuwo ƒe ʋɔnudɔdrɔ̃ kple tsɔtsrɔ̃” ye wowɔnɛ.​—2 Petro 3:7.

Mɔfiame 5: Woate ŋu agblɔ be ame aɖe wɔ nane evɔ menye eya ŋutɔe wɔe tẽe o

Le Kapernaum la, ame kae va bia kpekpeɖeŋu tso Yesu gbɔ na asrafomegã? Mateo 8:​5, 6 gblɔ be asrafomegã ŋutɔe yi Yesu gbɔ evɔ Luka 7:3 ya gblɔ be Yudatɔwo ƒe dumegãwoe asrafomegã la dɔ ɖe Yesu gbɔ. Míate ŋu ase nu si ta wòdzɔ alea gɔme togbɔ be edze abe ɖe Biblia me nya eve siawo tsi tsitre ɖe wo nɔewo ŋu hã. Nu si wòfia koe nye be asrafomegã ŋutɔ gblɔ be woabia kpekpeɖeŋu tso Yesu gbɔ na ye, gake edɔ dumegãwo ɖo ɖe Yesu gbɔ abe eteƒenɔlawo ene.

Mɔfiame 6: Biblia gɔmeɖeɖe si de pɛpɛpɛ

Ðe mí katã míewɔa nu vɔ̃a? Biblia na míenya be mí katã míenyi nu vɔ̃ dome tso ŋutsu gbãtɔ Adam gbɔ. (Romatɔwo 5:​12) Ale si woɖe Biblia aɖewo gɔme la di be yeatsi tre ɖe nya sia ŋu, esi wogblɔ le wo me be ame nyui “mewɔa nu vɔ̃ o.” (1 Yohanes 3:6, Eʋegbe Biblia) Gake fifiɣeyiɣi mee Helagbe me nya si gɔme woɖe be “nu vɔ̃” le 1 Yohanes 3:6 la le. Eye ne wozã fifiɣeyiɣi le gbe ma me la, efiaa nuwɔna aɖe si le edzi yim. Vovototo le nu vɔ̃ si ƒe dome míenyi kple nu vɔ̃ ɖowɔe, si fia be ame naɖoe koŋ anɔ Mawu ƒe sewo dzi dam la dome. Eya ta Biblia-gɔmeɖela aɖewo dze agbagba de vovototo nu vɔ̃ ƒomevi eve siawo dome ale be magadze abe ɖe Biblia tsi tsitre ɖe eɖokui ŋu ene o, eye woɖe kpukpui ma gɔme wòde pɛpɛpɛ be “metsɔa nu vɔ̃ wɔwɔ ɖoa dɔe o” alo “meyia edzi nɔa nu vɔ̃ wɔm o.”​—Xexe Yeye Gɔmeɖeɖe; Phillips.

Mɔfiame 7: Zã Biblia, ke menye sɔlemehawo ƒe nufiafiawo o

Ðe Yesu sɔ kple Mawu loo alo ɖe Mawu lolo wu Yesua? Yesu gblɔ gbe ɖeka bena: “Nye kple Fofo la míele ɖeka.” Ewɔna na ame aɖewo be eƒe nya siawo tsi tsitre ɖe nya bubu si wògblɔ be “Fofo la lolo wum” la ŋu. (Yohanes 10:30; 14:28) Hafi míate ŋu ase eƒe nya mawo gɔme nyuie la, ele be míadzro nya siwo tututu Biblia gblɔ tso Yehowa kple Yesu ŋu me, ke manye be míadze agbagba be míaɖe Biblia me wòasɔ ɖe sɔlemehawo ƒe nufiafia si nye Mawuɖekaetɔ̃ alo Trinita Kɔkɔea, si wometu ɖe Biblia dzi o la, nu o. Biblia ɖee fia be Yehowae nye Yesu Fofo eye wòganye eƒe Mawu hã. Yehowa ye Yesu ŋutɔ gɔ̃ hã dea ta agu na. (Mateo 4:10; Marko 15:34; Yohanes 17:3; 20:17; 2 Korintotɔwo 1:3) Yesu mesɔ kple Mawu o.

 Nya si Yesu nɔ gbɔgblɔm hafi gblɔ be “nye kple Fofo la míele ɖeka” ɖee fia be ale si eƒe susu wɔ ɖeka kple Fofoa Yehowa Mawu ƒe tameɖoɖowo ye wòwɔnɛ. Yesu gblɔ emegbe be: “Fofo la wɔ ɖeka kplim, eye nye hã mewɔ ɖeka kple Fofo la.” (Yohanes 10:38) Yesu kple eƒe nusrɔ̃lawo hã wɔ ɖeka le tameɖoɖo ma ke gome, elabe edo gbe ɖa na Mawu le wo ta be: “Metsɔ ŋutikɔkɔe si nètsɔ nam la na wo, ne woazu ɖeka, abe ale si míele ɖeka ene. Mewɔ ɖeka kpli wo, eye nèwɔ ɖeka kplim.”​—Yohanes 17:22, 23.