Kamedefefe ate ŋu aɖe vi na wò eye ate ŋu agblẽ nu le ŋuwò hã. Enɔ te ɖe kamedefefe si ƒomevi si wònye, ale si nèkpɔa gome le eme kple ɣeyiɣi si nèzãna ɖe eŋu la dzi.

•  Vi kawoe wòate ŋu aɖe na wò?

•  Nu kawoe wòate ŋu agblẽ le ŋuwò?

•  Nya siwo hawòtiwo gblɔ

Kamedede dea ame ƒe lãmesẽ dzi. Biblia gɔ̃ hã gblɔ be “kamedede nyo.” (1 Timoteo 4:8, etenuŋɔŋlɔ) Ŋutsuvi aɖe si ŋkɔe nye Ryan gblɔ be: “Kamedede nana ame nɔa afɔte. Eɖea vi na ame wu videofefewo.”

Kamedefefe tea ŋu nana ame srɔ̃a nuwɔwɔ le ha me kpakple ɖokuidziɖuɖu. Wowɔ kamedefefe ƒe kpɔɖeŋu aɖe le Biblia me tsɔ fia nu vevi aɖe mí. Biblia gblɔ be: “Duƒula siwo le ho ʋlim la katãe ƒua dua, gake ame ɖeka koe xɔa dziɖuɖufetu la.” Eye wògblɔ kpee be: “Ame sia ame si le gome kpɔm le hoʋiʋli me la ɖua eɖokui dzi le nuwo katã me.” (1 Korintotɔwo 9:24, 25) Nufiame kae le eme? Ebia ɖokuidziɖuɖu kple nuwɔwɔ aduadu hafi ame nate ŋu awɔ ɖe kamedefefea ƒe sewo dzi. Ðetugbui aɖe si ŋkɔe nye Abigail lɔ̃ ɖe nya sia dzi. Egblɔ be: “Kamedefefe kpe ɖe ŋunye menya ale si mawɔ nu aduadu kple amewo kple ale si maɖo dze kple amewo.”

Kamedefefe nana xɔlɔ̃wɔwɔ me sẽna. Fefe ɖekae tea amewo ƒoa ƒu. Ŋutsuvi aɖe si ŋkɔe nye Jordan gblɔ be: “Hoʋiʋli aɖe si nu nɔa fefe ɖe sia ɖe kloe me, gake nenye dzidzɔdoname ta koe míefe fefe ma la, enye mɔ nyui aɖe si dzi míetona dzea xɔlɔ̃wo.”

Fefe si ƒomevi nèfena. Biblia gblɔ be: “Yehowa doa ame dzɔdzɔe kple ame vɔ̃ɖi siaa kpɔna; eléa fu ame sia ame si lɔ̃a ŋutasẽnuwɔwɔ.”—Psalmo 11:5.

Ŋutasẽnuwo sɔŋ koe wowɔna le kamedefefe aɖewo me. Le kpɔɖeŋu me, ɖetugbui aɖe si ŋkɔe nye Lauren gblɔ be: “Kɔdada ƒe taɖodzinu koŋ ye nye be woaƒo ame aɖe. Gake esi míenye Kristotɔwo ta la, míeƒoa asa na kɔdada, ke nu ka tae míakpɔ kɔdada atsɔ aɖe modzakae?”

Bu eŋu kpɔ: Ðe nèfea fefe siwo me adã le alo kpɔa wo evɔ gblɔna be mana yeawɔ ŋutasẽnu aɖeke oa? Nenye nenemae la, ke ɖo ŋku nya si Psalmo 11:5 gblɔ la dzi. Egblɔ be Yehowa léa fu ame si “lɔ̃a ŋutasẽnuwɔwɔ” ke menye ame si le ewɔm ɖeɖe ko o.

Ale si nèfenae. Biblia gblɔ be: “Migawɔ naneke le dzrehehe alo bubu dzodzro didi ta o, ke boŋ mitsɔ ɖokuibɔbɔ bu ame bubuwo be wonye gã wu mi.”—Filipitɔwo 2:3.

Enye nyateƒe be hoʋiʋli aɖe si nu nɔa fefe ɖe sia ɖe si me ame hatsotso eve le gome kpɔm le la me godoo ya. Gake maɖu-dzi-godoo ƒe nɔnɔme menana fefe la vivina o. Sɔhɛ aɖe si ŋkɔe nye Brian gblɔ be: “Hoʋiʋli ate ŋu aɖo mewò. Ne èbi ɖe fefe aɖe me la, ke ele be nànɔ dɔ wɔm tso ɖokuibɔbɔ hã ŋu.”

Bu eŋu kpɔ: Ðekakpui aɖe si ŋkɔe nye Chris gblɔ be, “Míeƒoa bɔl kwasiɖa sia kwasiɖa, eye nu vevi wɔa mía dometɔ aɖewo.” Eya ta bia ɖokuiwò be, ‘Nu kawoe nana be nu vevi wɔa amewo? Nu kae mate ŋu awɔ aɖe esia dzi akpɔtɔ?’

Ɣeyiɣi si nèzãna ɖe eŋu. Biblia gblɔ be míakpɔ “nu siwo le vevie wu” la adze sii.—Filipitɔwo 1:10.

Ele be nàɖo nu vevitɔwo nɔƒe gbãtɔ; nu siwo ku ɖe mawusubɔsubɔ ŋu naxɔ nɔƒe gbãtɔ. Fefe aɖewo xɔa gaƒoƒo geɖe, wò ŋutɔ èɖale fefea fem loo alo ènɔ anyi le ekpɔm o. Ðetugbui aɖe si ŋkɔe nye Daria gblɔ be: “Nye kple nɔnye míehea nya le ɣeyiɣi gbogbo si mezãna tsɔ kpɔa kamedefefewo le television dzi evɔ wònye be mate ŋu azã ɣeyiɣi ma ɖe nu bubu ŋu hafi la ta.

Bu eŋu kpɔ: Ðe nèɖoa to dziwòlawo ne woɖo aɖaŋu na wò ku ɖe nu siwo le vevie na wò wu ŋua? Ðetugbui aɖe si ŋkɔe nye Trina gblɔ be: “Ne nye kple nɔvinyewo míele kamedefefe aɖe kpɔm la, nɔnye ɖoa ŋku edzi na mí be, ne míekpɔ fefea loo alo mímekpɔe o, woaxe fe na fefea wɔlawo ya godoo. Eye wòbiaa mí be, ‘Gake ame kae axe fe na miawo ya?’ Nu si gblɔm wòlee nye be: Fefewɔlaawo ya ƒe dɔwɔɖui ye nye ema. Gake ne míedo kpo míaƒe sukudɔdeasiwo kple aƒemedɔwo wɔwɔ la, agbea made mía dzi le etsɔme o. Nya si ko gblɔm dada le na míe nye be mele be televisionkpɔkpɔ alo fefe nanye nu vevitɔ na mí le agbe me o.”