Woɖe Xexe Yeye Gɔmeɖeɖe Biblia ƒe akpa gbãtɔ ɖe go le ƒe 1950 me. Tso ɣemaɣi la, ame aɖewo ƒo nu tso Xexe Yeye Gɔmeɖeɖe a ŋu alo gblɔ be womeɖe egɔme wòde pɛpɛpɛ o, elabena emenya aɖewo to vovo na Biblia bubuwo tɔ. Zi geɖe la, susu siwo gbɔna la dometɔ ɖeka tae vovototo nɔa eya kple Biblia bubuwo dome ɖo.

•   Kakaɖedzi le eŋu. Nu yeye siwo ŋu numekulawo ke ɖo kple blemasinuŋɔŋlɔgbalẽ siwo ŋu kakaɖedzi le wu la woe wozã le Xexe Yeye Gɔmeɖeɖe Biblia gɔme ɖeɖe me. Evɔ le King James Version ƒe 1611 tɔ ya gome la, blemasinuŋɔŋlɔgbalẽ siwo ŋu kakaɖedzi mele tututu o kple esiwo do megbe na esiwo wozã tsɔ ɖe Xexe Yeye Gɔmeɖeɖe Biblia gɔme lae wozã tsɔ ɖe egɔme.

•   Nuteƒewɔwɔ. Wodze agbagba ɖe Xexe Yeye Gɔmeɖeɖe Biblia gɔme be wòasɔ pɛpɛpɛ kple gbedeasi gbãtɔ si Mawu ʋã amewo woŋlɔ la. (2 Timoteo 3:16) Biblia-gɔmeɖela geɖewo meɖe Mawu ƒe gbedeasia gɔme nuteƒewɔwɔtɔe o, ke boŋ woɖe mɔ amegbetɔwo ƒe nufiafiawo kpɔ ŋusẽ ɖe wo dzi. Le kpɔɖeŋu me, wotsɔ bubuŋkɔ Aƒetɔ alo Mawu ɖɔli Mawu ƒe ŋkɔ ŋutɔŋutɔ si nye Yehowa.

•   Egɔmeɖeɖe nya-ɖe-nya-nu. Xexe Yeye Gɔmeɖeɖe Biblia gɔmeɖelawo mewɔ nu abe ale si Biblia-gɔmeɖela bubuwo gbugbɔa nyawo gblɔna alo ɖea wo me la ene o, ke boŋ woɖe Biblia sia gɔme nya-ɖe-nya-nu le afi siwo wòanya wɔ le, ne mawɔe be nyawo ƒe tutuɖo nanɔ trama alo awɔe be amewo mase gbedeasi si le nuŋlɔɖi gbãtɔawo me gɔme o ko. Biblia-gɔmeɖela siwo gbugbɔa Biblia ƒe nuŋlɔɖi gbãtɔawo me nyawo gblɔna alo ɖea wo me tea ŋu tsɔa amegbetɔwo ƒe susuwo tɔtɔa gbedeasi la alo ɖea nyatakaka vevi aɖewo le eme.

 Agbalẽ siwo mele eme. Biblia-gbalẽ siwo woyɔna be Apokrifa-gbalẽwo nɔa Roma Katolikotɔwo kple Ɣedzeƒe Ortodɔks-sɔlemeha ƒe Bibliawo me. Ke hã Yudatɔwo meda asi ɖe agbalẽ mawo dzi be wonye Biblia-gbalẽwo o, evɔ ele be míade dzesii be Biblia gblɔ be Yudatɔwoe “wotsɔ Mawu ƒe nya kɔkɔeawo de asi na.” (Romatɔwo 3:1, 2) Eya tae wòsɔ nyuie be agbalẽ siawo siwo woyɔna be Apokrifa-gbalẽwo mele Xexe Yeye Gɔmeɖeɖe Biblia kple egbegbe Biblia geɖewo me o.

 Mawunyakpukpui siwo mele eme o. Wotsɔ mawunyakpukpuiwo alo nyagbe aɖewo kpe ɖe Biblia aɖewo me nyawo ŋu evɔ nu mawo mele Biblia ƒe nuŋlɔɖi gbãtɔ siwo li la me o. Womede mawunyakpukpui alo nyagbe mawo Xexe Yeye Gɔmeɖeɖe­ Biblia ya me o. Mawunyakpukpui alo nyagbe mawo mele Biblia yeye siwo li egbea la dometɔ geɖe me o, eye le ɖewo hã gome la, woɖea nu me be kpeɖodzi aɖeke meli be nya mawo nɔ Biblia ƒe asinuŋɔŋlɔ siwo ŋu kakaɖedzi le wu la me o. b

 Nyawo ƒe vovototo. Ɣeaɖewoɣi la, nyawo gɔme ɖeɖe nya-ɖe-nya-nu menana nyawo me kɔna o eye etea ŋu flua ame gɔ̃ hã. Le kpɔɖeŋu me, woɖea Yesu ƒe nya siwo le Mateo 5:3 gɔme be: “Woayra ame siwo da ahe le gbɔgbɔ me la.” (Eʋegbe Biblia; English Standard Version; King James Version; New International Version) Ame geɖewo mesea nyagbɔgblɔ “da ahe le gbɔgbɔ me” gɔme o, eye ame aɖewo hã susui be ɖe Yesu nɔ gbe tem ɖe ɖokuibɔbɔ alo ahedada ƒe vevienyenye dzi. Ke hã nu si Yesu wɔnae nye be ne ame kpɔe dze sii be yehiã Mawu ƒe mɔfiame lae wòkpɔa dzidzɔ vavã. Xexe Yeye Gɔmeɖeɖe Biblia ɖe Yesu ƒe nyaa gɔme ale be eƒe gɔmesesea de pɛpɛpɛ be “Dzidzɔtɔwoe nye ame siwo nyae be gbɔgbɔmenuwo hiã yewo.”​—Mateo 5:3. c

•   Biblia-gɔmeɖela kple Biblia-ŋutinunyala xɔŋkɔ Aƒetɔ Edgar J. Goodspeed ŋlɔ lɛta aɖe le December 8, 1950 tso Kristotɔwo Ƒe Hela Ŋɔŋlɔawo​—Xexe Yeye Gɔmeɖeɖe la ŋu be: “Miaƒe amewo ƒe nya nyui kakadɔ si wowɔ, kple ale si wòɖo xexea me katã do dzidzɔ nam ŋutɔ, eye esi gado dzidzɔ nam wue nye ale si woƒe gɔmeɖeɖea me kɔ, hele tẽe eye nyawo de pɛpɛpɛ. Abe ale si mate ŋu aɖo kpe edzii ene la, eɖee fia be ameawo do vevie nusɔsrɔ̃.”

•   Aƒetɔ Allen Wikgren si nye Nufialagã le Yunivɛsiti Chicago he susu yi Xexe Yeye Gɔmeɖeɖea dzi be enye Biblia si me nyawo sɔ kple ale si míeƒoa nu egbea, womesrɔ̃ Biblia siwo nɔ anyi do ŋgɔ nɛ la ƒe nyagbɔgblɔwo o, zi geɖe la “eƒe nyagbɔgblɔwo toa vovo evɔ viɖe nɔa wo ŋu.”​—The Interpreter’s Bible, Volume I, axa 99.

•   Eŋlisitɔ Biblia ŋuti numekula Alexander Thomson ŋlɔ tso Kristotɔwo Ƒe Hela Ŋɔŋlɔawo​—Xexe Yeye Gɔmeɖeɖe la ŋu bena: “Edze ƒãa be agbalẽnyala siwo bi, siwo ƒe susu ɖa eye wodi be yewoaɖe Helagbe me nyawo gɔme pɛpɛpɛ ale si wòanya wɔ le Eŋlisigbe me la woe ɖe egɔme.”​—The Differentiator, April 1952, axa 52.

•   Togbɔ be agbalẽŋlɔla Charles Francis Potter de dzesi nya aɖewo le Biblia sia me siwo wòbe wowɔ moya na ye hã la, egblɔ be: “Gbegɔmeɖela siawo siwo ƒe ŋkɔwo womeʋu goe o la ɖe asinuŋɔŋlɔgbalẽawo, Helagbe me tɔwo kple Hebrigbe me tɔwo siaa gɔme kple gbegɔmeɖeɖe ƒe ŋutete deŋgɔwo eye woƒe nyametsotso hã sɔ nyuie.”​—The Faiths Men Live By, axa 300.

•   Aƒetɔ Robert M. McCoy kpɔe dze sii be nanewo to vovo le Xexe Yeye Gɔmeɖeɖe Biblia me eye woɖe egɔme nyuie hã, eye wògblɔ tsɔ ƒo eta be: “Ale si woɖe Nubabla Yeyea gɔme ɖee fia be agbalẽnyala bibi siwo ate ŋu akpɔ Biblia-gɔmeɖeɖe ƒe kuxi gbogboawo gbɔ le nunya me la le [Yehowa Ðasefowo ƒe] habɔbɔ sia me.”​—Andover Newton Quarterly, January 1963, axa 31.

•   Togbɔ be Nufialagã S. MacLean Gilmour meda asi ɖe ale si woɖe nya aɖewo gɔme le Xexe Yeye Gɔmeɖeɖe Biblia me dzi o hã la, elɔ̃ ɖe edzi be ale si Biblia sia gɔmeɖelawo “ɖu tu na Helagbea la mebɔ kura o.”​—Andover Newton Quarterly, September 1966, axa 26.

•   Esi Nufialagã Thomas N. Winter nɔ nu ƒom tso Xexe Yeye Gɔmeɖeɖe si wozã le Kingdom Interlinear Translation of the Greek Scriptures me ŋu la, egblɔ be: “Gbegɔmeɖela siawo siwo ƒe ŋkɔwo womeʋu go o la zã nyatakaka yeye siwo li egbea le woƒe gbegɔmeɖeɖedɔa me eye woɖe egɔme wòde pɛpɛpɛ.”​—The Classical Journal, April-May 1974, axa 376.

•   Nufialagã Benjamin Kedar, si nye Hebri-nunyalagã le Israel gblɔ le ƒe 1989 me be: “Ne mele gbegɔmeɖeɖe ŋuti numekuku wɔm ku ɖe Hebrigbe me Biblia kple gɔmeɖeɖewo ŋu la, zi geɖe la, media nyawo le Eŋlisigbe me tɔ si ŋkɔe nye New World Translation me. Ne mele esia wɔm la, mekpɔnɛ enuenu be Biblia sia gɔmeɖelaawo dze agbagba anukwaretɔe be yewoƒe gɔmeɖeɖea nanye esi de pɛpɛpɛ.”

•   Esi Jason David BeDuhn si nye mawusubɔsubɔ ŋuti nufialagã ku nu me tso Eŋlisigbe me Biblia vevitɔ asieke aɖewo ŋu la, egblɔ be: “NW [Xexe Yeye Gɔmeɖeɖe] ye nye Biblia si gɔme woɖe wòde wu le Biblia siwo katã metsɔ sɔ kple wo nɔewo la dome.” Togbɔ be ame aɖewo kple Biblia-ŋutinunyala geɖewo gblɔna be vovototo siwo le Xexe Yeye Gɔmeɖeɖe Biblia me tso ale si Biblia sia gɔmeɖelawo ŋutɔ trɔ asi le nyawo ŋu be wòade yewoƒe mawunyafiafiawo dzi gbɔ hã la, aƒetɔ BeDuhn gblɔ be: “Vovototo akpa gãtɔ tso ale si NW Biblia gɔmeɖelawo dze agbagba ɖe nyawo gɔme wòde pɛpɛpɛ kple ale si wodze agbagba ɖe Nubabla Yeyea ŋlɔlawo ŋutɔ ƒe nyagbɔgblɔwo gɔme pɛpɛpɛ la gbɔ.”​—Truth in Translation, axa 163, 165.