Imesida okụk oro ẹtịpde inam utom Abasi inyụn̄ ida in̄wam mme owo. Emi ẹsịne ke otu akpan utom nnyịn, oro edi ndinam mme owo ẹdi mbet Jesus Christ.—Matthew 28:19, 20.

 Nnyịn isidaha okụk nnyịn inam owo ndomokiet oforo. Nnyịn inyeneke mbiowo m̀mê ikpọ owo emi isikpede okụk, nnyịn isinyụn̄ ikpehe-kpe Mme Ntiense Jehovah oro ẹsan̄ade ke ufọk ke ufọk ẹkwọrọ ikọ. Mbon oro ẹnamde utom ke n̄kọk itieutom ye ibuot itieutom nnyịn, esịnede Otu Emi Ẹsede Ẹban̄a Utom Nnyịn, isibọhọ okụk ọfiọn̄.

•   Mme N̄kpọ Oro Ision̄ode: Kpukpru isua, imesikabade Bible ye mme n̄wed Ikọ Abasi, imịn̄ ata ediwak, inyụn̄ inọ ẹsọk mme owo ke nsio nsio itie. Isinam kpukpru emi ke mfọn. N̄ko, imọdọn̄ ediwak n̄kpọ ke JW Library ye ke ikpehe Intanet nnyịn, jw.org, man mme owo ẹsion̄o ke mfọn. Nnyịn isidaha ikpehe Intanet emi isuan etop n̄kpọurua ke ukpe-okụk.

•   Ndibọp Nnyụn̄ Ndiọn̄ Mme Ufọk: Imesibọp inyụn̄ idiọn̄ mme ufọk emi isibonode ikpono Abasi, man mme esop ke nsio nsio itie ẹnyene eti itie emi mmọ ẹbonode ekpono Abasi. Imesinyụn̄ ibọp inyụn̄ idiọn̄ n̄kọk itieutom ye mme itie ukabade n̄wed nnyịn. Owo isikpehe-kpe ediwak mbon oro ẹnamde utom emi, ndien oro esinam nnyịn ikûnen̄ede ubiat okụk.

•   Ndutịm: Okụk oro ẹtịpde ẹnọ ẹda ẹnam utom Abasi ke ofụri ererimbot ke ẹsida ẹse ẹban̄a se ẹnamde ke ibuot itieutom nnyịn, mme n̄kọk itieutom nnyịn, ye mme itie ukabade n̄wed nnyịn. Okụk oro n̄ko ke ẹsida ẹn̄wam mbon oro ẹsisan̄ade ẹse mme esop.

•   Ukwọrọikọ: Owo isikpehe-kpe Mme Ntiense Jehovah ẹkwọrọ ikọ m̀mê ẹkpep mme owo “ikọ Abasi.” (2 Corinth 2:17) Edi enyene ndusụk mme ọkwọrọikọ emi ẹnọde san̄asan̄a ukpep, emi ẹsidade ofụri ini mmọ ẹkwọrọ ikọ. Mmọ ntre ke ẹsibọ ekpri ufọk ẹnọ, ẹnyụn̄ ẹnọ mmọ se ẹdade ẹdu uwem nte ẹkesinamde ke eyo mme apostle.—Philippi 4:16, 17; 1 Timothy 5:17-18

•   Ndikpep Owo N̄kpọ: Okụk emi ẹtịpde man ẹda ẹnam n̄kpọ Abasi ke ẹsida ẹtịm n̄kpri ye ikpọ mbono nnyịn. Imesinyụn̄ ision̄o mme vidio ye mme n̄kpọ ikọ Abasi emi ẹkopde uyo uyo. Imenyene mme ufọkn̄wed emi ẹsikpepde mbiowo ye mbon emi ẹnamde utom Abasi ofụri ini man mmọ ẹnen̄ede ẹfiọk ndinam utom mmọ.

•   Ndin̄wam Mme Owo ke Ini Afanikọn̄: Ke ini afanikọn̄ etịbede, edide oto-obot m̀mê enye emi mme owo ẹnamde, imesinọ mbon oro afanikọn̄ esịmde udia, mmọn̄, ye ufọk. Idịghe mbon oro “ẹbuanade n̄kpọ ye nnyịn ke mbuọtidem” kpọt ke isin̄wam, imesin̄wam n̄ko mbon emi mîdịghe Mme Ntiense Jehovah.—Galatia 6:10.