N̄kamana ke Gomba ke Uganda. Ediwak owo do ẹma ẹbuene etieti. Ikan̄ ilektrik ikodụhe ke obio nnyịn, ntre ikesida utuenikan̄ ikụt usụn̄ okoneyo.

 Ete ye eka mi ẹkesitọ in̄wan̄. Mmọ ẹma ẹkpọn̄ Rwanda ẹdi Uganda. Mmọ ẹkesitọ mboro ye kọfi ẹnyụn̄ ẹsida mboro oro ẹnam ọkpọsọn̄ mmịn emi ẹkotde waragi. Ete ye eka mi ẹma ẹsinyụn̄ ẹbọk unen, ebot, edi, ye enan̄. Ido obio nnyịn ye nte ẹkebọkde mi ama anam mi nnịm ke se ebe ekpetetịn̄ ana n̄wan anam, ke inyụn̄ inaha n̄wan ededei etịn̄ ekikere esie.

 Mma n̄ka Rwanda ini n̄kedide isua 23, do ke n̄kesitiene mme ubọkn̄ka mi n̄ka club. Odu club kiet emi n̄kesikade ndien ndien, tutu andinyene club oro ọnọ mi kad emi edide mma n̄ka ẹyak ndụk ke mfọn. Mma nsima n̄ko ndise mme fim emi ẹsin̄wanade en̄wan ẹnyụn̄ ẹnamde n̄kpọ afai afai. Nte ẹkesinamde n̄kpọ ke ebiet n̄kodụn̄de ye mme n̄kpọ oro n̄kesidade nnem idem esịt ẹma ẹnam nsinam n̄kpọ afai afai, nsidu oburobụt uwem, nnyụn̄ n̄kpa mmịn.

 Ke isua 2000, mma ntọn̄ọ ndidụn̄ ye eyenan̄wan kiet emi ekerede Skolastique Kabagwira, ima inyụn̄ inyene nditọ ita. N̄koyom Skolastique esitọtọn̄ọ edọn̄ ini ọkọmde mi m̀mê ke ini oyomde ndiben̄e mi n̄kpọ, sia se n̄kekpepde edi oro toto ke ekpri. N̄kesinyụn̄ ndọhọ ke kpukpru se inyenede edi okịm, ke mmekeme ndida nnam se mmama. Mma nsiwak ndiwọrọ okoneyo ndien nte nnyọn̄ ndi n̄kanika ita usenubọk; ntetịn̄ mi, mma n̄n̄wọn̄ mma n̄kpọt. Ekesidi mma nnyọn̄ ndikọn̄ usụn̄, Skolastique ekpebịghi ndiberede, enye ọbọ umia.

 Ini oro n̄kesinam utom ke kọmpeni emi ẹsinọde mbonutom mmọ ẹkekpeme mme owo ye mme itie. Ami n̄kesise enyịn ke kọmpeni oro, ẹma ẹsinyụn̄ ẹkpe mi ọfọn. Skolastique ama esidomo ndikpak mi yak ntiene imọ ndi ufọkabasi Pentecostal emi enye akakade. Enye ekekere ke oro ayanam n̄kpụhọde, edi ikọdọn̄ke mi ndika ufọkabasi mmọ. Utu ke oro mma ntọn̄ọ ufan ye n̄wan en̄wen. Nte n̄kọdiọkde uwem ye Skolastique nnyụn̄ n̄kade n̄kama n̄wan en̄wen ama anam Skolastique atan̄ nditọ nnyịn mbita ọnyọn̄ okodụn̄ ye ete ye eka esie.

 Ufan nnyịn kiet emi ekenen̄erede ọsọn̄ọ nnyịn ama okot mi etịn̄ ikọ ke ntak etịme etịme uwem mi. Enye ama ọdọhọ yak n̄kemen Skolastique nnyọn̄ ndi, onyụn̄ ọdọhọ ke ndiye nditọ mi oro ẹkpedụn̄ ye ami, ikpodụn̄ke ye owo en̄wen. Ntre ke 2005, mma ntre un̄wọn̄ mmịn, n̄kpọn̄ n̄wan oro n̄kamade, nnyụn̄ nnam Skolastique ọnyọn̄ edi. Ke 2006 ima inam ndọ. Edi n̄kosụk nnanam n̄kpọ afai afai nnyụn̄ ndiọk uwem ye n̄wan mi.

 Ke 2008, Ntiense Jehovah kiet emi ekekerede Joël ama edi ufọk mi edikwọrọ ikọ ọnọ mi, mma nnyụn̄ n̄kpan̄ utọn̄ n̄kop. Enye ye Ntiense Jehovah efen emi ekekerede Bonaventure, ẹma ẹsisan̄a kiet ẹdi ndien ndien ke ediwak ọfiọn̄ ẹdineme Ikọ Abasi ye ami. Mma nsifan̄a n̄kpọ etieti ye mmọ nnyụn̄ mbụp mmọ ediwak mbụme, akpan akpan ke se ẹtịn̄de ke n̄wed Ediyarade. N̄koyom ndiwụt mmọ ke se Mme Ntiense Jehovah ẹkpepde inenke. Ke uwụtn̄kpọ, mma mbụp mmọ se inamde mmọ ẹdọhọ ke “akwa otuowo” emi ẹtịn̄de ẹban̄a ke Ediyarade 7:9 ẹdidu uwem ke isọn̄, ke ini edide ufan̄ikọ oro ọdọhọ ke mmọ ‘ẹda ke iso ebekpo Abasi ye ke iso Eyenerọn̄’ emi edide Jesus Christ. Joël ama enyene ime ọbọrọ mme mbụme mi. Enye ama owụt mi Isaiah 66:1 emi Abasi ọdọhọde ke isọn̄ edi “udoriukot” imọ. Mma ndikụt ke akwa otuowo emi ẹdude ke isọn̄ ẹda ke iso ebekpo Abasi. Mma nnyụn̄ n̄kot Psalm 37:29 emi ọdọhọde ke ndinen owo ẹyedụn̄ ke isọn̄ ke nsinsi.

 Nte ini akakade, mma nnyịme ẹkpep mi Bible. Bonaventure ekekpep mi ye Skolastique Bible. Nte ikekpepde Bible ika, ama ọdọn̄ mi ndikpụhọde nte n̄kesidude uwem. Mma ntọn̄ọ ndinam n̄kpọ ukpono ukpono ye n̄wan mi nnyụn̄ nyomke enye ọtọtọn̄ọ edọn̄ ke ini ọkọmde mi m̀mê ke ini eben̄ede mi n̄kpọ. N̄konyụn̄ ndaha aba se inyenede nte ke ami ikpọn̄ nnyene mmọ. Mma ntre n̄ko ndise mme fim afai. Ndinam kpukpru oro ikedịghe ifia ubọk kiet. Akana nsụhọde idem nsinyụn̄ mmụm idem n̄kama ke ini ndiọi ekikere ẹdụkde mi esịt ye ke ini ndiọi n̄kpọ ẹdọn̄de mi.

 Isua ifan̄ mbemiso n̄kọtọn̄ọde ndikpep Bible, mma nnọ akpa eyen nnyịn emi ekerede Christian okodụn̄ ye iman nnyịn ke Uganda. Ke mma n̄kokot Deuteronomy 6:​4-7, mma ndikụt ke Abasi oyom ami ye n̄wan mi ise iban̄a nditọ nnyịn, ke emi esịne nnyịn ndikpep mmọ Ikọ Abasi. Esịt ama enem nnyịn ye eyen nnyịn etieti ini ikemende enye ọnyọn̄ edidụn̄ ye nnyịn!

 Se n̄kpepde edi ke Jehovah edi Abasi mbọm, mmonyụn̄ nnịm ke enye efen ọnọ mi ke etịme etịme uwem oro n̄kesidude. Esịt enem mi nte Skolastique eketienede mi ekpep Bible. Nnyịn mbiba ima iyak idem nnyịn inọ Jehovah inyụn̄ ina baptism ke December 4, 2010. Ndịk inamke n̄wan mi aba m̀mê nyọkpọn̄ enye, ndịk inyụn̄ inamke mi m̀mê enye ọyọkpọn̄ mi, onyụn̄ enenem nnyịn ndinam se Bible ọdọhọde ke ubon nnyịn. Esịt enem n̄wan mi etieti nte esidide utom ama asuana ami mbe nnennen nnyọn̄ ufọk. Esịt enem enye n̄ko nte nnamde n̄kpọ ukpono ukpono ye enye nnyụn̄ mfọnde ido ye enye, ye nte ntrede mmịn ye etịme etịme uwem. Ke 2015, ẹma ẹmek mi ebiowo man ntiene n̄n̄wam nse mban̄a esop. Ke otu nditọ nnyịn ition, ita ẹna baptism.

 Ini n̄kọtọn̄ọde ndikpep Bible ye Mme Ntiense Jehovah, n̄kenịmke se mmọ ẹkekpepde mi nnan nnan. Ama enem mi nte mmọ ẹkedade Bible ẹbọrọ mme mbụme mi. Ami ye n̄wan mi imedikụt ke mbon emi ẹkponode Jehovah ana ẹnam kpukpru se enye ọdọhọde, idịghe enye emi enemde mmọ kpọt. N̄kpọ emi enemde mi esịt akan edi nte Jehovah anamde mi ndi ufan esie nnyụn̄ nsịne ke otu mbon emi ẹsọn̄ọde ẹda ẹnam n̄kpọ ẹnọ enye. Nte n̄kodude uwem akpa ye nte ndude idahaemi anam nnen̄ede nnịm ke Jehovah ekeme ndin̄wam owo ekededi emi enen̄erede oyom ndikpụhọde okpụhọde onyụn̄ edikpono enye.