Ini Ndikpọn̄ Ufọkisen Bossert
Ke November 2012, Mme Ntiense Jehovah ẹma ẹnyam Ufọkisen Bossert. Ẹma ẹkpọn̄ ukpọhọde ẹnọ andidep, ndien ata ediwak Mme Ntiense ẹma ẹwọrọ ẹnyọn̄ọ nte isenowo ẹsiwọrọde ke ufọkisen ẹnyọn̄ọ. Ẹdida okụk oro ẹnyamde enye ika iso inam utom unọ ukpep Bible emi Mme Ntiense Jehovah ẹnamde ke ofụri ererimbot.
Ufọk emi edi enyọn̄ 14, ndien ẹkebọp enye nte ufọk mbon Italy eset. Mme Ntiense ẹnyam enye sia mme anamutom ke ibuot itieutom mmọ ẹmọn̄ ẹwọrọ ẹkpọn̄ Brooklyn ke New York ẹka obufa ufọk mmọ ke Warwick ke New York. Ayada mmọ isua ifan̄ ndiwọrọ n̄ka obufa ebiet emi.
Se Iketịbede ke Isua Ikie
Louis Bossert, eyen New York emi ekesinyamde eto, ọkọbọp Bossert ke 1909. Ẹkebọp enye ‘nte ufọkisen emi onyụn̄ edide ufọkidụn̄,’ man mme akaisan̄ ye mbon emi mîdịghe mme akaisan̄ ẹkpedụn̄. Sia mme owo ẹkesọpde ẹbọ ẹma, enye ama ọbọp mbọp-ndian ke 1914, emi ekekperede ndikpon utịm ikaba n̄kan idem ata ufọk. Ẹma ẹbọp itie unyamudia ke ọkọm emi ekedide dek ke 1916, ndien ẹkekot enye Marine Roof.
Ke iduọkisua 1980, Mme Ntiense Jehovah ẹma ẹdep ufọk oro ẹnyụn̄ ẹdiọn̄ enye man edi se mme anamutom ke ibuot itieutom mmọ ẹdụn̄de. Mbonutom ẹma ẹnam mme ufọk unek ẹkabade mme ubetudia ẹnyụn̄ ẹnam itie unyamudia ọkọm oro akabade edi ebiet emi mme andidụn̄ ye isenowo mmọ ẹsitiede ẹduọk odudu.
Toto ke 2010, Mme Ntiense Jehovah emi ẹsitode kpukpru ebiet ke ererimbot ẹdi ndise ibuot itieutom mmọ ẹkesidụn̄ ke ufọk oro.
Andidep ufọk emi aduak ndidiọn̄ enye nda nnam ufọkisen. Okposụkedi emi ufọk emi enyenede itie emi ẹsidade ẹmụm ikọ ye vidio ẹdọn̄ ke n̄kpọ ye ufọkidụn̄ emi edide ubet kiet kiet, idisọn̄ke ndida enye nnam uwouwo ufọkisen sia enye enen̄ede ada ọfọn.
Ndinam Enye Afiak Eye
Mbemiso Mme Ntiense Jehovah ẹkedepde ufọk oro, owo iketịmke enye ikama, afia ndom mbakara oro ẹkeyetde ke an̄wa esie ama edehe, n̄kpọ emi ẹkebotde ẹdian ke iso esie ama obomo inyụn̄ isọn̄ke. Mme window ẹma ẹkani ẹnyụn̄ ẹbiara. Ibiom kpọt ẹkedụn̄ ke itie unyamudia enyọn̄ ọkọm oro. Ntre, ẹma ẹtọn̄ọ ata akamba utom ndifiak ndiọn̄ enye. Mme Ntiense Jehovah ke ofụri United States ẹma ẹda ini ye usọ mmọ ẹnam utom emi, ndien ẹkekụre ke 1991.
Ke ini utom edifiak ndiọn̄ emi, Mme Ntiense ẹma ẹyet ẹnyụn̄ ẹdiọn̄ itiat an̄wa ufọk emi. Mmọ ẹma ẹda ọkpọ ẹfiak ẹbot ata ukem ukem n̄kpọ oro ẹkebotde ẹkọn̄ ke iso do. Ẹma ẹdọn̄ mbufa window emi ẹdade ofriyo ẹnam.
Mmọ ẹma ẹfiak ẹdiọn̄ ofụri esịtufọk oro n̄ko, ẹnen̄ede ẹdiọn̄ inuaotop emi ekedide ata ediye ebiet ini kiet ko. Man ẹfiak ẹdiọn̄ mme ibibene marble, mmọ ẹma ẹtobo itiat ẹto ebiet emi ẹkedade enye ke ata akpa ini ke Italy. Mbonutom ẹma ẹdiọn̄ n̄ko mbana dek emi mmọn̄ akabiatde.
Mfịna ekedi ikpọ adaha emi ẹkedade ukwak ẹnam ke inuaotop. Ẹkenam mmọ ke ido ubọpn̄kpọ mbon Italy emi ebietde marble. Edi nsio nsio owo emi ẹkedepde ufọk emi ẹma ẹfiak ẹyet ndom mbakara ediwak ini. Idụhe owo ndomokiet ke otu mme anamutom emi ọkọfiọk ido ubọpn̄kpọ mbon Italy oro. Itie ubonn̄wed ufọkn̄wed ntaifiọk kiet emi ekperede ẹma ẹnọ nnyịn n̄wed emi etemede owo nte ẹkemede ndinam n̄kpọ emi ebietde marble mi. Se mme anamutom ẹkekotde ke n̄wed oro ama anam mmọ ẹnam mme adaha oro ẹnen̄ede ẹbiet nte mmọ ẹketiede ke ata akpa ini.
Ke ini utom edifiak ndiọn̄ okokụrede ke 1991, ufọk emi ama etie nte ẹkeyomde onyụn̄ eye. Ke ntak ukeme emi ẹkesịnde mi ẹma ẹnọ ufọk oro n̄wọrọda ẹnọ emi ẹkotde enọ Lucy G. Moses. Emi edi enọ emi ẹsinọde ke ntak emi ẹtịmde n̄kpọ ẹnịm.
