Ke ẹma ẹkesịn idem ẹkpep n̄kpọ ke ọfiọn̄ ition, nditọ ufọkn̄wed 48 ẹma ẹkụre ukpep ke Ufọkn̄wed Enyọn̄-Ukpeme Ukpep Bible Eke Gilead, emi odude ke itie unọ ukpep Mme Ntiense Jehovah ke Patterson ke New York. Owo 9,694 ẹkedụk edinam emi; mmọ ekedi mbonubon nditọ ufọkn̄wed emi, mme ufan mmọ, ye mbon emi ẹkekade ndisịn udọn̄ nnọ mmọ.

Toto ke 1943, ẹmenọ se iwakde ibe mme asan̄autom 8,000 ukpep ndidi isụn̄utom. Bible edi akpan n̄wed ukpepn̄kpọ, ndien ukpep emi ọsọn̄ọ mbuọtidem nditọ ufọkn̄wed onyụn̄ an̄wam mmọ ẹnyene nti edu emi mmọ ẹdidade ẹkan mme mfịna ke nsio nsio ikpehe utom isụn̄utom mmọ.

“Tịm Kere Ban̄a Mme N̄kpọ Eke Ẹmade.” Ikọ emi Anthony Morris, owo Otu Ukara Mme Ntiense Jehovah emi ekedide etieibuot okpokoro ke edinam emi, akadade ọtọn̄ọ ndutịm emi okoto Philippi 4:8: “N̄kpọ ekededi eke ẹmade, . . . ẹka iso ẹkere mme n̄kpọ emi.”

Brọda Morris ọkọdọhọ ke ndikere mban̄a mme n̄kpọ eke ẹmade ekeme ndin̄wam ika iso inyene nti ekikere ke ererimbot emi mme owo mînyeneke ima mi. Enye ọkọdọhọ ete: “Ẹyom mme n̄kpọ eke ẹdotde ẹma ẹnyụn̄ ẹnyene ima.”

Ke uwụtn̄kpọ, Ete nnyịn eke heaven enịm eti uwụtn̄kpọ ke emi enye mîsisehe ndudue nnyịn. (Psalm 130:3) Brọda Morris ọkọdọhọ ete: “Ẹkûse ndudue nditọete mbufo, ẹka iso ẹnyene ima.”

“Ẹkọ Ifiọk—Edi Ẹkûda Idem ke Mbon Ọniọn̄ Ẹkaha.” Harold Corkern, owo Kọmiti N̄kọk Itieutom United States, ama eneme ibuotikọ esie emi ẹkedade ẹto Ecclesiastes 7:16. Abasi oyom nnyịn ida ifiọk nnyịn inam n̄kpọ ke nnennen usụn̄, ikûnyụn̄ iyak ifiọk nnyịn “ọdọk nnyịn ibuot.”

Brọda Corkern ama owụt n̄ko ntak emi anade inam n̄kpọ ima ima ke ini inọde owo item m̀mê ke ini inen̄erede owo. Ikpanaha iyom n̄kpọ ito mbon en̄wen ikan se Abasi oyomde oto mmọ. Enye ọkọdọhọ ete: “Ẹda ọniọn̄, ifiọk, ye mbufiọk mbufo ẹnam n̄kpọ ọfọn ndien nditọete mbufo ẹyema ndinam n̄kpọ ye mbufo.”

“Ẹkûfre Mme Edinam Abasi.” (Psalm 78:7) Guy Pierce, owo Otu Ukara, ọkọtọn̄ọ utịn̄ikọ esie ke ndidọhọ ete ke se ededi emi eyenọwọn̄ anamde—edide eti m̀mê idiọk—esitụk ete ye eka esie. (Mme N̄ke 20:11) Kpasụk ntre, se inamde esitụk Ete nnyịn eke heaven. “Ẹda emi ẹyarade ẹfiọk nditọ Abasi ye nditọ Devil: Owo ekededi eke mîkaha iso ndinam edinen ido itoho Abasi.”—1 John 3:10.

Brọda Pierce ọkọdọhọ ke ẹkekot nditọ ufọkn̄wed emi ẹdi Ufọkn̄wed Gilead ke ntak nti edu mmọ, esịnede nsụhọdeidem. Enye ama eti mmọ ete ẹka iso ẹsụhọde idem. Ukpep oro ẹkenọde mmọ inamke mmọ ẹfọn ẹkan mbon en̄wen. Utu ke oro, akam anam mmọ ẹnịm uwụtn̄kpọ ke nsụhọdeidem onyụn̄ anam mmọ ẹkeme ndin̄wam ofụri otu nditọete ẹtetịm ẹdiana kiet. (Psalm 133:1) Brọda Pierce ama ọdọhọ ete: “Mbufo ẹmetịm ẹfiọk Bible idahaemi, ẹmekeme ndida ifiọk emi ntịm mfiọk Jehovah Abasi nnyụn̄ ntịm n̄kpere enye.”

“Nnyịn Inam Se Ikpanamde.” William Samuelson, emi edide esenyịn Itieutom Emi Esede Aban̄a Mme Ufọkn̄wed Ukara Abasi, ama obụp ete: “Ikpanam n̄kpọ didie edieke utom emi ẹnọde nnyịn inam atuahade ye se idọn̄de nnyịn, se iduakde ndinam, ye se imade?” Imekeme ndikpep n̄kpọ nto se ẹwetde ke Luke 17:7-10: “Ke ini mbufo ẹnamde kpukpru se ẹnọde mbufo ẹnam, ẹdọhọ ẹte, ‘Nnyịn idi ifịn eke mînyeneke ufọn. Nnyịn inam se ikpanamde.’” Edieke ẹmende nnyịn ẹdomo ye Jehovah, Eteufọk nnyịn, ke akpanikọ nnyịn ‘inyeneke ufọn.’

Nditọ ufọkn̄wed ẹma ẹdu ke ubet ukpepn̄kpọ ediwak urua ẹkpep n̄kpọ. Anaedi emi ikememke utom inọ ndusụk mmọ. Brọda Samuelson ọkọdọhọ ete: “Edi ẹma ẹnam se ẹkpenamde, idahaemi ẹmekụt ufọn oro mbufo ẹbọde, mbuọtidem mbufo ẹtetịm okpon.” Brọda Samuelson ekeberi utịn̄ikọ esie ntem ete: “Mbufo ẹdi mme akama-ukpọhọde emi ẹnamde akpanikọ, ẹka iso ẹma ifet emi mbufo ẹnyenede ndinam n̄kpọ nnọ Andikara ekondo.”

“Ẹti Mme Un̄wọn̄ọ Jehovah ke Ini Ẹsobode Mfịna.” Sam Roberson, udiana esenyịn Itieutom Emi Esede Aban̄a Mme Ufọkn̄wed Ukara Abasi, ama ọdọhọ nditọ ufọkn̄wed ete ke mmọ ẹyesobo mfịna ndusụk ini. Ntre enye ama eteme mmọ ete ẹsiti mbụk mme owo ke Bible emi Abasi ọkọsọn̄ọde mmọ idem. Ke uwụtn̄kpọ, Moses ama ọsọn̄ọ Joshua idem ete: “Jehovah . . . idikpọn̄ke fi, idinyụn̄ iduọkke fi tutu amama.” (Deuteronomy 31:8) Mbemiso Joshua akpade, enye ama ọdọhọ ete: “Baba ikọ kiet ke otu kpukpru nti ikọ emi Jehovah Abasi mbufo eketịn̄de ọnọ mbufo ikpụhu.”—Joshua 23:14.

Jehovah Abasi ọn̄wọn̄ọ ọnọ mme asan̄autom esie ete: “Ndidehedei n̄kpọn̄ fi, ndinyụn̄ nsịnke fi.” (Mme Hebrew 13:5) Enye ọn̄wọn̄ọ ọnọ nnyịn ke imọ iyanam n̄kpọ ekekem ye se enyịn̄ imọ Jehovah (“Enye Anam Akabade Edi”) ọwọrọde, inyụn̄ inam se ededi oro anade inam man ise iban̄a mme asan̄autom imọ. Brọda Roberson ọkọdọhọ ete: “Ẹkûduọk idotenyịn. Ẹkûkpa mba. Ẹkûkop ndịk. Ẹti ẹte ke enye idikpọn̄ke mbufo tutu amama.”

“Uyom Mmọ Ọmọwọrọ Ekesịm Ofụri Isọn̄.” (Rome 10:18) Mark Noumair, andikpep ke ufọkn̄wed Gilead ekese aban̄a ibuotikọ emi ndien nditọ ufọkn̄wed emi ẹtode nsio nsio idụt ẹma ẹbụk mîdịghe ẹfiak ẹnam ifiọkutom oro mmọ ẹkenyenede ke an̄wautom ke Patterson ẹwụt. Ke uwụtn̄kpọ, ebe ye n̄wan emi ẹtode South Africa ẹma ẹkop idatesịt ndikụt iban ita emi ẹtode idụt mmọ, ẹnyụn̄ ẹsem Zulu ye Xhosa ye mmọ. Ebe ye n̄wan emi ẹtode Sri Lanka ẹma ẹkụt ete kiet emi otode India, emi n̄wan esie ye eyen esie an̄wan ẹdụn̄de ke Sri Lanka. Akananam ete emi ikwe Bible, ntre ebe ye n̄wan oro ẹma ẹnọ enye Bible kiet.

“Ẹben̄e Idem Ndinam Eti Utom Ekededi.” Gene Smalley, emi esin̄wamde Kọmiti Uwetn̄wed, ama anam ndụn̄ọde ye nditọ ufọkn̄wed iba ye iban mmọ, emi ẹkụrede ukpep. Ebe ye n̄wan emi ẹtode Sierra Leone ẹma ẹtịn̄ nte mmọ ẹsikade anyan ebiet ẹkebọ mmọn̄ kpukpru usenubọk. Edi ke ẹmende emi ẹdomo ye idatesịt oro mmọ ẹnyenede ke ndikpep owo 50 n̄kpọ, mmọ ibatke emi ke n̄kpọ ndomokiet. Nditọ ufọkn̄wed iba oro ye iban mmọ ẹma ẹdọhọ ke imokop inemesịt nte ukpep oro etịmde mmimọ idem ndinam eti utom ekededi ke ebiet oro ẹnọde mmọ ẹka.—2 Timothy 3:16, 17.

“Ẹyọ Ẹsịm Utịt—ye ke Oro Ebede.” Gerrit Lösch, emi edide owo Otu Ukara, ọkọtọn̄ọ akpan utịn̄ikọ edinam oro ke nditịn̄ usụn̄ nte mbon emi ẹfehede itọk anyan usụn̄ ẹsifehede man mmọ ẹkeme ndifehe nsịm utịt mbuba oro. Ke ata ata mbuba, owo kiet kpọt esidi andikan, edi ke mbuba mme Christian, kpukpru mbon emi ẹyọde ẹsịm utịt ẹdidi mme andikan.

Owo ndiyọ ọwọrọ ke ana owo aka iso anam n̄kpọ Abasi, aka iso enyene idotenyịn ke ini ẹbiọn̄ọde enye, ke ini ẹkọbọde enye, ke ini enye osobode idomo m̀mê afanikọn̄. Jesus ọkọdọhọ ete: “Ẹyenyan̄a owo eke ediyọde tutu esịm utịt.” (Matthew 24:13) Imokop ndọn̄esịt ndifiọk ke Jehovah ye Jesus ẹkụt ke nnyịn ke iyọ! Ekem, Brọda Lösch ama etịn̄ ediwak n̄kpọ emi ẹdin̄wamde nnyịn iyọ ke ini inyenede mfịna. Ndusụk ke otu mme n̄kpọ emi ẹdi emi:

• Ẹbọn̄ akam ẹnọ Abasi, “emi anamde nnyịn iyọ” onyụn̄ “obiomde mbiomo nnyịn ke usen ke usen.”—Rome 15:5; Psalm 68:19.

• Ẹbiere ke iyaka iso inam akpanikọ, ẹnyụn̄ ẹnịm ẹte ke “Abasi edi anam-akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ọnọ mbufo ke ini idomo man mbufo ẹkeme ndiyọ enye.”—1 Corinth 10:13.

• Ẹkûfre idotenyịn emi mbufo ẹnyenede nte Christian. “Koro ke ntak idatesịt oro ẹkenịmde [Jesus] ke iso enye ama ọyọ eto ndutụhọ.”—Mme Hebrew 12:2.

Brọda Lösch ama ọdọhọ ke idịghe idahaemi inen̄erede ikpere utịt mi ke ikpakpa mba. “Ẹyak nnyịn ifehe mbuba eke ẹnịmde nnyịn ke iso ye ime.”—Mme Hebrew 12:1.

Ke utịt inem inem ndutịm emi, kiet ke otu nditọ ufọkn̄wed emi ẹkụrede ukpep ama okot leta ke ibuot nditọ ufọkn̄wed eken, ndiwụt esịtekọm ke eti ukpep oro ẹkenọde mmọ. Ke leta oro mmọ ẹma ẹdọhọ ke nditịm ndụn̄ọde nnyụn̄ n̄kpep mban̄a mme n̄kpọntịbe Bible ke nde ke nde ama anam uduak Abasi etịm an̄wan̄a mmimọ onyụn̄ enen̄ede ọsọn̄ọ mbuọtidem mmimọ. Leta oro ọkọdọhọ ete: “Imebiere ndinam kpukpru nti n̄kpọ oro ikpepde.”