Mme Ntiense Jehovah ẹsin̄wam kpukpru owo ke ini afanikọn̄, m̀mê mmọ ẹdi Mme Ntiense m̀mê idịghe. Ima emi ẹdade ẹdiọn̄ọ ata mme Christian anam mmọ ẹn̄wam mme owo.—John 13:35.

Iyom nditịn̄ mban̄a nte ikan̄wamde mme owo ke nsio nsio ebiet ke ufan̄ isua kiet, ọtọn̄ọde ke 2011 tutu esịm 2012. Edi nnyịn iditịn̄ke iban̄a nte ikọdọn̄de mmọ esịt ye nte ikadade Ikọ Abasi in̄wam mmọ. Mme ọfis nnyịn ke nsio nsio idụt ẹma ẹda kọmiti emi ẹsin̄wamde mme owo ke ini afanikọn̄ ẹn̄wam mme owo. Mme esop ke mme itie emi afanikọn̄ eketịbede ẹma ẹtiene ẹn̄wam.

Japan: Ke March 11, 2011, unyekisọn̄ ye oyobio emi ẹketịbede ke Japan ama ọnọmọ ediwak owo. Mme Ntiense Jehovah ke ofụri ererimbot ẹma ẹtat ubọk ẹn̄wam. Ẹma ẹtịp okụk ẹnyụn̄ ẹnọ mme n̄kpọ en̄wen, ndusụk ẹkaka do ẹken̄wam. Mbọk se vidio nnyịn emi ẹwụtde nte ẹken̄wamde mme owo ke Japan ke unyekisọn̄ ama eketịbe.

Brazil: N̄kpọ ama etịbe emi okowotde ediwak owo. Mmọn̄ ama ọtọ emen ofụk ndusụk ebiet, obot esịbe ofụk ufọk mme owo, mbat onyụn̄ ofụk ufọk ndusụk owo. Mme Ntiense Jehovah ẹma ẹnọ udia, mmọn̄, ọfọn̄, suọp, ibọk, ye mme n̄kpọ en̄wen ẹsọk mme owo do.

Congo (Brazzaville): Ke ini ikan̄ okodụkde itie emi ẹsibonde n̄kani n̄kpọekọn̄ ndien enye otop obomo, n̄kpọ emi ama owụri ufọk Mme Ntiense Jehovah 4 onyụn̄ ababiat eke Mme Ntiense 28 efen. Mme Ntiense ẹma ẹnọ mbon emi mfịna emi ẹkesịmde ọfọn̄ ye udia ẹnyụn̄ ẹnọ mbon emi ufọk mmọ okowụrede ebiet ẹdụn̄.

Congo (Kinshasa): Ẹma ẹnọ mbon emi ẹkedọn̄ọde utọrọ ibọk, ẹnọ mbon emi mmọn̄ ọkọtọde emen ufọk mmọ ọfọn̄, ẹnyụn̄ ẹnọ mbon itọkekọn̄ ibọk, ọfọn̄, ye n̄kpọ ẹtọ ke in̄wan̄.

Venezuela: Ọkpọsọn̄ edịm ama anam mmọn̄ ọtọ emen ufọk mme owo, mbat onyụn̄ ofụk ufọk ndusụk owo. Mbon kọmiti emi ẹsin̄wamde owo ke ini afanikọn̄ ẹma ẹn̄wam Mme Ntiense 288. Ẹma ẹbọp mbufa ufọk emi ẹbede 50 ẹnọ mme owo. Mbon kọmiti emi ke ẹn̄wam mbon emi mmọn̄ Lake Valencia oyomde ndimen ufọk mmọ.

Philippines: Oyobio ama anam mmọn̄ ọtọ emen ndusụk obio ke idụt oro. Ọfis nnyịn ke idụt oro ama ọnọ udia ye ọfọn̄ ẹsọk mbon emi afanikọn̄ emi ekesịmde ndien Mme Ntiense ke n̄kan̄ oro ẹma ẹn̄wam mme owo ẹnam ufọk mmọ asana ke mmọn̄ ama akasat.

Canada: Ikan̄ ama odụk ikọt ke Alberta onyụn̄ abiat n̄kpọ etieti. Mme Ntiense do ẹma ẹnọ n̄kpọ ẹsọk nditọete mmọ emi ẹdude ke Slave Lake Congregation ke Alberta. Okụk oro ẹkenọde ẹsọk esop oro ama awak akan se mmọ ẹkeyomde. Mbon esop oro ẹma ẹsio okụk do ẹnọ ẹda ẹken̄wam mbon en̄wen emi afanikọn̄ esịmde ke nsio nsio itie efen ke ererimbot.

Côte d’Ivoire: Mbemiso ekọn̄ ọtọn̄ọde ke idụt emi, ẹma ẹnọ udia, ọfọn̄ ye ibọk ẹsọk mme owo do. Ẹma ẹnọ mmọ ufọk n̄ko. Ẹkesụk ẹnanam emi ke ini ekọn̄ ye ke ekọn̄ ama okokụre.

Fiji: Mmọn̄ ama ọtọ emen in̄wan̄ Mme Ntiense 192 abiat n̄kpọ. In̄wan̄ emi ke mmọ ẹkesida ẹn̄wam idem. Ẹma ẹnọ udia ẹsọk mmọ.

Ghana: Ẹma ẹnọ mbon emi ukwọ akabiatde n̄kpọ mmọ udia ye ufọk ẹnyụn̄ ẹnọ mmọ n̄kpọ ẹtọ ke in̄wan̄.

United States: Oyobio ama abiat ufọk Mme Ntiense 66 ke stet ita onyụn̄ owụri ufọk Mme Ntiense 12. Ndusụk mme enyeneufọk emi ẹma ẹnam insurance edi ẹkesụk ẹnọnọ mmọ okụk ẹdian ẹdiọn̄ ufọk mmọ.

Argentina: Mme Ntiense Jehovah ke mme esop do ẹma ẹn̄wam mme owo emi ntọn̄ obot emi obomode akabiatde ufọk mmọ ke ebiet kiet ke idụt oro.

Mozambique: Ke ini edịm mîkedepke ke ini emi ekpedepde, ufiop ama owot se mme owo ẹketọde. Ẹma ẹnọ udia ẹsọk se ibede owo 1000 emi mfịna emi ekesịmde.

Nigeria: Ẹma ẹnọ owo 24 emi ẹkedade unan ke aksiden okụk ẹda ẹn̄wam idem. Ẹma ẹnyụn̄ en̄wam mbon emi ẹdude ke obio sanu emi mîkenyeneke ufọk aba ke ntak en̄wan.

Benin: Ẹma ẹn̄wam mbon emi mmọn̄ akabiatde n̄kpọ ke ufọk mmọ. Ẹma ẹnọ mmọ ibọk, ọfọn̄, ufọkọbọn̄, nsasana mmọn̄, ye ufọk.

Dominican Republic: Ke oyobio emi ẹkotde Hurricane Irene ama okodobo, mme esop ke idụt oro ẹma ẹn̄wam mme owo ẹdiọn̄ ufọk mmọ ẹnyụn̄ ẹnọ mmọ mme n̄kpọ en̄wen emi mmọ ẹkeyomde.

Ethiopia: Edịm ikedepke ke anyan ini ke itie iba tutu ufiop owot se ẹketọde. Ke itie kiet, ukwọ ama abiat n̄kpọ mme owo. Ẹma ẹnọ mme owo ke nsio nsio itie emi okụk ẹda ẹn̄wam idem.

Kenya: Sia edịm mîkedepke ini ekpedepde, ufiop ama owot se ẹketọde. Ẹma ẹnọ okụk ẹsọk mbon emi mfịna emi ekesịmde.

Malawi: Ẹma ẹn̄wam mbon itọkekọn̄ emi ẹdụn̄de ke itienna mbon itọkekọn̄ ke Dzaleka.

Nepal: Obot ama esịbe ofụk ufọk Ntiense kiet. Nditọete ke esop mmọ ẹma ẹyom ekpri itie ẹnọ enye odụn̄ ẹnyụn̄ ẹnọ enye mme n̄kpọ efen emi enye okoyomde.

Papua New Guinea: Mbon ibak ẹma ẹsịn ikan̄ ke ufọk Mme Ntiense itiaita edi ẹma ẹfiak ẹbọp mme ufọk oro ẹnọ mmọ.

Romania: Mmọn̄ ama ọtọ emen ufọk ndusụk Mme Ntiense. Ẹma ẹn̄wam mmọ ẹfiak ẹbọp ufọk mmọ.

Mali: Ufiop ama owot se mme owo ẹketọde ke Mali sia edịm ikedepke. Udia inua ọkọsọsọn̄. Edi Mme Ntiense ke Senegal ẹma ẹnọ okụk ẹsọk ndusụk mmọ ẹda ẹdia n̄kpọ.

Sierra Leone: Mme Ntiense emi ẹdide dọkta ẹma ẹto France ẹkesọbọ nditọete mmọ emi ẹdude ke mme ebiet emi ẹken̄wanade ekọn̄ do ke idụt oro.

Thailand: Mmọn̄ ama abiat n̄kpọ etieti ke ediwak itie ke idụt emi. Nditọete ẹma ẹka ẹken̄wam ẹdiọn̄ ufọk 100 ye Ufọkmbono Obio Ubọn̄ 6.

Czech Republic: Mmọn̄ ama abiat ufọk ediwak owo ke Czech Republic, edi Mme Ntiense ẹma ẹto Slovakia ẹken̄wam mmọ.

Sri Lanka: Ndusụk mbon emi ẹkekade ndin̄wam do ke mbufịt emi otode inyan̄ ama akabiat n̄kpọ ẹsụk ẹdodu do. Ẹnanam ekese ndien ibịghike ẹmọn̄ ẹkụre.

Sudan: Ẹnọ udia, ọfọn̄, ikpaukot, ye n̄kpọnna ọkpọ ẹsọk Mme Ntiense Jehovah emi ẹkefen̄ede ẹkpọn̄ ufọk ke ntak ekọn̄.

Tanzania: Kpukpru se ubon 14 ẹkenyenede ama atak ke ini mmọn̄ okodụkde ebiet emi mmọ ẹkedụn̄de. Mme esop ke n̄kan̄ oro ẹma ẹnọ mmọ ọfọn̄ ye n̄kpọufọk. Ẹma ẹfiak ẹbọp ufọk ẹnọ ubon kiet.

Zimbabwe: Akan̄ odu ke ebiet kiet ke idụt oro ke ntak emi ọkpọsọn̄ ufiop okowotde se ẹketọde. Ẹnọ okụk ye udia ẹsọk mbon emi afanikọn̄ emi esịmde.

Burundi: Ẹn̄wam mbon itọkekọn̄ ẹnyụn̄ ẹsọbọ mmọ idem.