ITIE BIBLE ẸNAMDE AN̄WAN̄A

Mark 1:14, 15—“Ubɔŋ Abasi ke Ekpere”

BRE

“Jesus odụk Galilee ọkọkwọrọ eti mbụk Abasi onyụn̄ ọdọhọ ete: ‘Edimek ini emekem, obio ubọn̄ Abasi onyụn̄ asan̄a ekpere. Mbufo ẹkabade esịt ẹnyụn̄ ẹbuọt idem ke eti mbụk.’ ”—Mark 1:14, 15, Edikabade Eke Obufa Ererimbot.

“Jesus aka ke Galilee ɔkɔkwɔrɔ gospel Abasi, ete, Ini emekem, Ubɔŋ Abasi ke ekpere: mbufo ekabare esit enyuŋ enim gospel ke akpanikɔ.”—Mark 1:14, 15, Edisana Ŋwed Abasi Ibom.

Se Mark 1:14, 15 Ọwọrọde

Jesus Christ ọkọdọhọ ke Obio Ubọn̄ Abasi * “ekpere,” mîdịghe ke “asan̄a ekpere,” sia enye, emi edidide Edidem Obio Ubọn̄ oro, eketịn̄ ikọ emi ọnọ mmọ.

Ikọ Jesus ikọwọrọke ke ukara oro ama ọtọtọn̄ọ. Enye ama edinam mbet esie ẹdiọn̄ọ ke Obio Ubọn̄ oro itọn̄ọke kan̄a, ke edidi ke ini iso. (Utom 1:6, 7) Jesus ekedi ke nnennen ini, ke isua emi Bible ọkọdọhọde ke owo emi edidide Edidem eyedi. * Oro akanam Jesus ekeme ndidọhọ ete: “Edimek ini emekem,” sia ini ama ekem enye nditọn̄ọ ndikwọrọ mban̄a nti n̄kpọ emi Obio Ubọn̄ Abasi edinamde.—Luke 4:16-21, 43.

Edieke owo ekededi oyomde ndidia ufọn nti n̄kpọ emi Obio Ubọn̄ Abasi edinamde, ana enye akabade esịt—atua n̄kpọfiọk ke idiọkn̄kpọ enye akanamde onyụn̄ anam se Abasi amade. Mbon oro ẹkabarede esịt ẹwụt ke imenen̄ede inịm ke ukara Abasi eyedi.

Se Iban̄ade Mark 1:14, 15

Jesus eketịn̄ ikọ emi ke Galilee ini enye ọtọn̄ọde utom ukwọrọ ikọ esie. Matthew 4:17 emi onyụn̄ etịn̄de ukem n̄kpọ ọdọhọ ke “ọtọn̄ọde ke ini oro ka iso,” ke Jesus ọkọtọn̄ọ ndisikwọrọ mban̄a Obio Ubọn̄ Abasi. Obio Ubọn̄ Abasi edi ata akpan n̄kpọ emi Jesus ekesikwọrọde aban̄a. Ikọ oro, Obio Ubọn̄ Abasi m̀mê Ubɔŋ Abasi esịne ebe itie 100 ke Gospel *, ediwak esịne ke ikọ Jesus. Obio Ubọn̄ Abasi ke Jesus ekesima nditịn̄ mban̄a n̄kan.

Kot Mark ibuot 1 ye ikọ idakisọn̄ ekededi emi anamde ndusụk n̄kpọ an̄wan̄a ye mme itie Bible eken emi ẹtịn̄de ukem n̄kpọ oro.

^ ikp. 3 Obio Ubọn̄ Abasi edi ukara Abasi. Ifụm ukara oro odu ke heaven. Ukara oro ke Abasi edida inam uduak esie mi ke isọn̄. (Daniel 2:44; Matthew 6:10) Okpoyom ndidiọn̄ọ n̄kpọ efen mban̄a ukara oro, kot ibuotikọ emi “Nso Idi Obio Ubọn̄ Abasi?”

^ ikp. 4 Akana Jesus edi edidem sia ẹma ẹtetịn̄ ke Messiah emi Abasi edinọde ẹdi, edidi edidem. Edieke oyomde ndidiọn̄ọ isua emi Bible ọkọdọhọde ke Messiah edidi, kot ibuotikọ emi “Ndi Mme Prọfesi Oro Aban̄ade Messiah Owụt ke Jesus Ekedi Messiah?”

^ ikp. 6 N̄wed Matthew, Mark, Luke ye John emi odude ke N̄wed Abasi Usem Greek m̀mê Obufa Testament ke ẹsikot Gospel, ndien enye enen̄ede etịn̄ aban̄a uwem Jesus ye utom ukwọrọikọ esie.